Фудбалерот, Килијан Мбапе, вчера го реализираше првиот хет-трик во дресот на Реал Мадрид. Неговите три гола му донесоа победа на „кралскиот“ клуб на теренот на Валјадолид со 3-0 во рамките на Примера Дивизион.
„Тоа е убаво чувство, многу сум среќен. Но, пред се, среќен сум поради победата. Почнавме многу добро и вршевме притисок врз противникот. Првиот гол беше постигнат благодарение на добрата колективна акција“ – вели Французинот.
„Веќе кажав дека можам да играм на сите три позиции во нападот. Морав да се адаптирам, но, сега можам да играм секаде. Мојата адаптација е завршена“ – нагласи играчот на „белите“.
Бенитез кандидат за клупата на Ботафого
Шпанскиот фудбалски тренер, Рафа Бенитез, може да го предводи составот на Ботафого, пренесуваат денеска дел од медиумите.
Според наводите, бразилскиот тим има тројца кандидати меѓу кои влегува и трофејниот стратег. Засега Бенитес не се изјаснил дали ќе се пресели во Јужна Америка. Тој нема ангажман од претходниот март кога ја напушти Селта Виго.
Шпанецот беше тренер на Реал Мадрид, Наполи, Интер, Валенсија и Ливерпул. Со „црвените“ ја освои Лигата на шампионите во 2005 година.
Лазаров: Мора да сме задоволни, иако мислам дека можевме повеќе!
Франција ја продолжи серијата победи на Светското првенство и главната фаза ја заврши со сигурен триумф над Македонија од 32:25. Средбата во Вараждин донесе повеќе возбудувања од очекуваното, затоа што храбрата Македонија одлично му парираше на големиот фаворит и достојно се прости од овој шампионат.
Селекторот Кирил Лазаров во микс-зоната ги искажа своите први впечатоци од поразот од Франција и од одиграниот турнир.
„Мислам дека треба да бидеме задоволни. Јас очекував тежок натпревар, затоа што се работи за противник како Франција. Воопшто не нè потценија, можеби не играа во 100%, туку во 90%.
Први импресии… еден квалитетен натпревар со висок ритам, повисок од оној со Франција. За нашите играчи ова е големо искуство, да се игра против ваква Франција. Со нив игравме и на Европското првенство во Германија, но сменивме многу работи од тој дуел. Воопшто не беше лесно да се прати тој ритам кога даваш гол, а одма враќаат. Ни треба и многу измени, а уште немаме таков концепт на играчи за да играме така. Ние имаме одлични работи и предности, меѓутоа и маани и дефекти, кои екипа како Франција ќе ги казни. Жал ми е за промашените три пенали во првиот дел, а мислам дека доаѓавме и до чисти позиции каде не дававме голови. Меѓутоа, ова е шести натпревар, шести дуели и да го играш против Франција не е лесно и треба да сме задоволни. Во еден момент гледавме табела, ги броевме бодовите, одземавме на Австрија, на Унгарија…
Ова е едно големо искуство за нас, еден добар турнир, треба да сме задоволни и да научиме доста лекции. Ова е едно големо искуство за младите играчи, носејќи се со вакви ѕвезди и ведети кои секоја година освојуваат по повеќе титули, а ние доаѓаме од една мала Македонија, од македонската Суперлига. Честитки до сите играчи, до стручниот штаб, од прв до последен. Мора да сме задоволни, со една мала горчина дека можевме повеќе. Но, знаете, треба да верувате во тие работи, а ние не верувавме. Благодарност до целата јавност за поддршката во текот на целиот шампионат“, рече селекторот.
Од групата 2 во следната фаза патуваат Франција како лидер и Унгарија која се пласираше на второто место со седум бода. Трета заврши Холандија со пет бода, па следува Македонија со еден бод помалку.
Македонија покажа витештво, не недоволно да се победи Франција
Ракометната репрезентација на Македонија загуби од силната Франција со 32:25 и како четврта во групата од главната фаза го заврши настапот на Светското првенство.
Македонија го забележа вториот пораз на Светското првенство. Мундијалскиот настап го завршивме со две победи, две нерешени и два порази. Вечерва избраниците на Кире Лазаров пружија солидна партија против една од најдобрите селекции, но разликата во квалитет беше очигледна па „црвено-жолтите“ парираа само до средината на првото полувреме, кога со серија од три гола стигнавме до егал 9:9.
Франција потоа го крена нивото на игра, брзо се одлепи и на пауза замина со +4 (18:14).
„Триколорите“ продолжија во исто темпо и во вториот дел, па брзо стигнаа и до највиски плус седум (23:16). Македонија не се предаде, во неколку наврати се враќавме на минус четири од паузата, но на крајот Франција славеше со 32:25. Сепак ние ја остваривме целта, успеавме да загубиме со едноцифрена негатива и да го задржиме четвртото место на табелата.
Филип Кузмановски со осум голови повторно беше најпрецизен во македонскиот состав, Марко Митев реализира четири голови, додека Жарко Пешевски застана на три погодоци.
Медисон Кис изненадувачки го освои Австралија опен
Американската тенисерка Медисон Кис е победничка на овогодинешниот Австралија опен.
По Ига Швјонтек, втората во светот, Кис во финалето во три сета (2-1) ја совлада најдобрата на ВТА листата Арина Сабеленка. Мечот траеше нешто повеќе од два часа, а Киз победи со 6-3, 2-6, 7-5. Првата носителка одигра неверојатен турнир н патото до својата прва Гренд слем титула (играше и во финалето на Ју-ес опен во 2017 година). Таа не само што ги победи двете првопласирани, туку и Елина Свитолина, Елена Рибакина и Даниел Колинс.
Затоа, таа влезе полна со самодоверба во овој меч, за што најдобро сведочи нејзиниот сервис, за кој двократната и актуелна шампионка немаше одговор.
Киз доминираше во првиот сет, еден брејк и беше доволен да го освои сетот. Во вториот, очекувано Сабаленка одговори на вистински начин. Апсолутно доминираше, два пати го освои сервисот на Киз и со 6:2 се избори за трет сет.
Двете тенисерки го чуваа сервисот во решавачкиот сет, се до 12.гем кога од никаде Кис дојде до две брејк и меч топки. Ја искористи втората и ја освои првата Гренд слем титула во кариерата.
Утре во машкото финале бранителот на титулата Јаник Синер ќе игра против Александар Зверев.
Норвешки судии ќе ни судат против фаворитот Франција
Светската ракометна федерација ги делегираше официјалните лица за натпреварите од последното коло во главната рунда во Вараждин.
Натпреварот кој Македонија го игра вечерва и може да биде многу важен во борбата за четвртфиналето, а може и да одлучува само за конечен пласман, ќе го судат норвешки судии.
Станува збор за Ларс Јорум и Харалд Клевен, додека делегати на ИХФ за оваа пресметка ќе бидат Феликс Рац од Швајцарија и Бадер Алтејаб од Кувајт.
Натпреварот меѓу Македонија и Франција ќе се игра вечерва во „Арена Вараждин“ а почетокот е закажан во 20:30 часот.
Реал потпиша со Бруно Фернандо
Кошаркарите на Реал Мадрид добија нов играч за продолжението од сезоната во Евролигата и Ендеса лигата.
Станува збор за центарот од Ангола Бруно Фернандо, кој во Мадрид пристигнува по долга НБА кариера.
Бруно Фернандо беше избран како вториот пик во 2019 година од Филаделфија, која веднаш го размени во Атланта.
Фернандо помина две години во овој тим, но играше многу и за развојниот тим на Хокс, пред да се пресели во Бостон Селтикс во 2021 година.
И таму најмногу време мина во развојниот тим, а подоцна играше за Торонто Репторс.
Сега тој пристигнува во Реал Мадрид, кој на центарските позиции ги има Серж Ибака и Валтер Таварес.
Реал по 23 кола е на шестото место во Евролигата со скор од 13 победи и десет порази.
Митев: Најважно е да се бориме и да играме според планот
Дуелот на Македонија со најсилниот противник за нас на ова СП 2025 Франција го најави македонскиот ракометен репрезентативец Марко Митев.
„За нас сега следи натпревар со ракометен гигант, име како што е Франција, секако дека се работи за фаворит селекција, но ние ќе се обидеме да го изненадиме ривалот. Имаме уште малку време да се спремиме и да се покажеме во добро издание. Како што кажав, на Светското првенство сме дојдени да победуваме, не да губиме. Од сите очекувам да бидат фокусирани од почетокот до крајот, па ние ќе одиме да изненадиме, зошто да не го направиме тоа? Најважно од се е да се бориме, да играме по планот на тренерот и да не се предаваме во ниту еден момент.“, изјави Митев.
Натпреварот меѓу Македонија и Франција се игра вечерва од од 20:30 часот.
Сити потроши богатсво оваа зима и не планира да застане
И покрај тоа што во актуелниот преоден рок потроши 152 милиони евра на засилувања, тренерот на Манчестер Сити, Пеп Гвардиола, сака да доведе уште тројца фудбалери од италијанската Серија А, објавија во петокот британските медиуми.
Манчестер Сити за 75 милиони евра потпиша со египетскиот напаѓач Омар Мармуш. Од Ленс за 40 милиони евра приситгна 20-годишниот узбекистански централен бек Абду Кусанов, а за 19-годишниот бразилски централен бек Витор Реис, кој пристигна од Палмеирас, клубот издвои 37 милиони евра.
Според англиските медиуми преодниот рок за Манчестер Сити се уште не е завршен. Гвардиола сака да донесе тројца играчи од СеријаА.
Прв на листата на желби на Гвардиола е играчот од средниот ред на Јувентус, Андреа Камбијасо (24), кого „старата дама“ не сака да го пушти среде сезоната доколку не дојде „понуда што не можеш да ја одбие“. Ова, според британските медиуми, би можело да значи дека Јуве би попуштил доколку им бидат понудени сто милиони евра.
Камбијасо може да игра како коректор на средниот ред или како лев офанзивен дефанзивец. Во март минатата година тој дебитираше за италијанската репрезентација на пријателскиот натпревар против Венецуела и досега има 13 настапи и постигнато два гола. Тој во Јувентус пристигна во јули 2022 година од Џенова за 13 милиони евра, а во мај минатата година го продолжи договорот со Јуве до јуни 2029 година.
Гвардиола сака да го подмлади и средниот ред на Сити во кој моментално се Илкај Гундоган (34), Кевин Де Брујне( 33) и Бернардо Силва (30).
Стратегот на англискиот шампион сака да доведе двајца Бразилци, Даглас Луиз (26) од Јувентус и Едерсон (25) од Аталанта.
Даглас Луиз помина две години во Сити, кој го продаде на Астон Вила за 17 милиони евра во летото 2019 година.
Во јули минатата година Луиз се пресели во Јувентус во трансфер вреден 51 милион евра.
Едерсон го носи дресот на Аталанта од јули 2022 година, кога пристигна од Салернитана за 23 милиони евра. Неговиот договор со клубот од Бергамо е со важност до јуни 2027 година
Барди потпиша за Бодрумспор
Капитенот на македонската фудбалска репрезентација, Енис Барди, го напушти Трабзон, но ќе остане во Турција. Барди потпиша договор со Бодрум.
Барди за Трабзон последниот меч го одигра кон крајот на октомври минатата година. Во ноември, тренерот Шенол Ѓунеш нему и на уште тројца играчи им забрани да тренираат со првиот тим.
Изборот на клубот претставува изненадување, бидејќи Барди се поврзуваше со враќање во Шпанија (Ваљадолид“ и Хајдук Сплит.
Бодрум до крајот на сезоната ќе се бори за опстанок. Клубот забележа само четири победи во првите 19 натпревари. Бодрум се наоѓа на 16.место на табелата со 16 бода, четири помалку од првиот тим кој се наоѓа во безбедната зона.
