Бруно Фернандеш имал позитивен ковид-19 тест и може да го пропушти реванш натпреварот од Лигата на шампионите против Атлетико Мадрид. Според информациите од Англија кои ги потврди и менаџерот на Манчестер Јунајтед, Ралф Рангник, Португалецот се уште чека негативен тест.

Лук Шо и Скот Мектоминај го пропуштија мечот во саботата, но се во план за настап против Атлетико.

„Се надевам дека Скоти ќе биде подобар. Имаше болки во потколеницата и затоа го оставив да одмори. Скоти е вреден играч за нас, но само кога е 100 отсто подготвен за игра”, изјави Рангник.

„Лук треба да продолжи со тренинзите во понеделник, а ќе го чекаме Бруно до последен момент. Тој има позитивен тест за ковид-19 и мора да бидеме внимателни“.

Тренерот на Челзи Томас Тухел, ги уверува навивачите дека со сигурност останува да ја води екипата до крајот на сезоната, иако клубот се соочува со големи проблеми.

Имено, Челзи трпи големи загуби после санкциите уведени од британската влада а се однесуваат на руската инвазија врз Украина. Во меѓувреме, Абрамович се повлече од раководење со клубот, и се бара нов купувач, додека сите банкарски сметки се замрзнати.

Иако, во прашање се доведува и понатамошното функционирање на клубот, тренерот Тухел засега нема намера да ја напушти клупата.

„Без сомневање останувам во Челзи до крајот на сезоната. Одиме ден по ден поради тоа што ситуацијата може да се промени во секој момент. Клубот е на продажба и се надевам дека се ќе помине добро. Не можам ништо повеќе да кажам, бидејќи немам никакво влијание на повеќето работи“, изјави Тухел после победата над Њукасл во Премиер лигата. 

Дарко Тасевски ќе стави крај на играчката кариера после завршувањето на актуелната сезона.

Тасевски во мај ќе наполни 38 години, а за тимот на Славија Софија нема натпревар од ноември. Во последно време имаше чести проблеми со повреди, само што се врати повторно мораше да оди на пауза.

Според најавите од Бугарија Тасевски ќе стави крај на играчката кариера и ќе продолжи да работи во младинските категории на Славија Софија како тренер. Дресот на Славија Софија Тасевски го носи од 2019 година, а во кариерата играше уште за Кон Каен, Суфанбури, Бангок Глас, Шамона, Левски, Металург Запорожје, Вардар и Цементарница 55.

Поранешниот холандски напаѓач Клас-Јан Хунтелар влезе во раководните структури на Ајакс. 38-годишниот поранешен фудбалер ќе работи во спортскиот оддел на клубот.

Хунтелар ќе потпише договор со Ајакс до јули 2024 година. Тој ќе стане помошник на актуелниот спортски директор на клубот, Џери Хамстра, откако по секс-скандалот функцијата спортски директор ја напушти Марк Овермарс.

Хунтелар за време на неговата кариера како фудбалер играше за Ајакс од 2006 до 2009 година, а исто така и од 2017 до 2021 година.

Џанлуиџи Донарума веќе неколку дена е мета на критики бидејќи се посочува како главен виновник за елиминацијата на ПСЖ од ЛШ.

Донарума направи голема грешка при првиот гол на Бензема, што се покажа како клучен момент на мечот.

Младиот Италијанец ова лето го напушти Милан како слободен агент, а според многумина со тоа направил голема грешка.

„Сите сте премногу сурови кон Донарума, Французите и Италијанците. Го терате да плати за се. Тој не го направи вистинскиот избор, јас исто така разговарав со него и го советував да остане во Милан, ама го избра овој пат. Да не беше Донарума, Италија немаше да го освои Европското првенство, тој беше главниот играч. Во секој случај, се работи за добро момче, но мислам дека погреши што замина од Милан“, изјави Михајловиќ.

Легендарните италијански тренери Ариго Саки и Фабио Капело исто така сметаат дека Донарума направил голема грешка кога заминал од Милан.

Аргентинецот Анхел Ди Марија е на излезна врата од Париз Сен Жермен. Тој веќе подолго време не е во плановите на тренерот Почетино и најверојатно на крајот од сезоната нема да го продолжи тековниот договор кој истекува ова лето.

Според медиумите во Франција, 34.годишниот фудбалер надвор од сите очекувања ќе се врати во Португалија и ќе заигра за својот некогашен клуб, Бенфика.

Неговото евентуално враќање на „Ла Луж“ би бил неочекуван потег поради фактот што тоа би значело огромно намалување на неговата плата која во моментот во ПСЖ изнесува 13 милиони евра по сезона. Можеби носталгијата и желбата на играчот ќе бидат пресудни во неговата одлука.

Екипата на Вулверхемптон прикажува одлични игри во одбраната, посебно кога се работи за настапите на гостински терен.

Популарните „Волци“ немаат примен гол на гостински терен во првото полувреме на 14 последователни натпревари, со што го израмнија рекордот на Арсенал.

Екипата која тогаш беше предводена од Арсен Венгер, од септември 1998 до април 1999 година успеа да не прими гол во првите 45.минути од натпреварите на сите нивни гостувања.

Вулверхемптон во моментот се наоѓаат на седмото место од табелата во Премиер лигата со освоени 46 бодови.

Еден од главните играчи во средниот ред на Баерн Минхен, Леон Горецка е се поблиску до враќање на теренот. Германскиот репрезентативец нема настапувано за својот тим повеќе од три месеци откако го повреди коленото на дербито против Борусија Дортмунд.

Очекувањата се дека играчот ќе се приклучи на тренинзите со своите соиграчи во текот на следната недела.

„Леон е добро. Неговото колено не покажува негативни реакции после вежбање. Одлично се опорави и веќе во вторник ќе се приклучи на тимските тренинзи со полн интензитет“, изјави тренерот Нагелсман.