Менаџерот на Баерн Минхен, Винсент Компани, ги пофали своите играчи по победата од 1-2 над актуелниот европски шампион Пари Сен Жермен.

И покрај тоа што играа со играч помалку во текот на целото второ полувреме, германските гиганти успеаја да ја извојуваат победата и да освојат вредни три бода, запишувајќи ја својата 16-та победа по ред. Сепак, тренерот на Баварците останува цврсто на земја.

„Освоивме три бода, што е добро, но никој не освојува трофеи во ноември. Знаевме дека сме способни да го направиме тоа. Мора да останеме смирени, но тоа ни дава самодоверба. Го ротиравме составот во саботата и тимот одговори добро. Моравме да се браниме со десет играчи и тимот повторно одговори на тој предизвик, што покажува дека сме способни да се адаптираме за да постигнеме резултат“, коментираше Винсент Компани по натпреварот.

Фудбалерите на Ливерпул го победија Реал Мадрид со 1-0 во четвртото коло од Лигата на шампионите.

„Црвените“ aпсолутно ја заслужија победата, создадоа поголем број шанси, но поголемиот дел од натпреварот немаа решение за Тибо Куртоа, кој беше неверојатен меѓу стативите.

Во првото полувреме, тој со одлични одбрани во два наврати ги запре обидите на Собослај и спречи водство на Ливерпул.

Домашниот тим бараше пенал кога топката го погоди Чуамени во раката во средината на првото полувреме, на крајот одлуката на Иштван Ковач ќе се прераскажува. Првично досуди слободен удар, а кога од ВАР собаа го повикаа да ја прегледа ситуацијата, бидејќи играчот на Реал беше во шеснаесетникот, ја повлече одлуката и му ја додели топката на Реал.

Ливерпул продолжи да напаѓа во второто полувреме, а голот на гостите постојано висеше во воздух. Куртоа имаше две одлични реакции кога момците на Арне Слот изведуваа корнери, прво се обиде Ван Дајк, потоа Екитике, но без успех.

МекАлистер го пронајде клучот за бравата на Реал. Собослај уфрли одлична топка, а нискиот Аргентинец се најде на вистинското место и успеа да ја испрати топката зад грбот на Куртоа.

Одиграни се првите натпревари од четвртото коло во Лигата на шампионите. Ги обележаа дерби пресметките во Ливерпул и Париз. Ливерпул го победи Реал со 1:0, а ПСЖ загуби од Баерн со 1-2.

Јувентус и по четири рунди нема победа во Лигата на шампионите. „Старата дама“ одигра 1-1 со Спортинг во Торино и г забележа третиот нерешен резултат.

Јувентус губеше против Спортинг во Торино, Душан Влаховиќ израмни во 34-тата минута, но Старата Дама немаше сила за целосен пресврт.

Олимпијакос водеше против ПСВ се до 93. минута, но холандскиот шампион успеа да избегне пораз со голот на американскиот интернационалец Рикардо Пепи.

Најубедливата победа на вечерта ја забележа Тотенхем против дански Копенхаген, иако во 55. минута при резултат 2-0, стрелецот на водечкиот гол, Велшанецот Бренан Џонсон, доби директен црвен картон. Тотенхем и со играч помалку постигнаа уште два гола и Ришарлисон промаши пенал.

Во Мадрид, Атлетико беше подобар од белгискиот шампион Унион Сен Жилоа. „Јорганџиите“ со малку повеќе трд славеа над шампионот на Белгија, Хулијан Алварез погоди во првиот дел, потоа Галагаер ја зголеми предноста во 72-та минута. Но драма внесе Сајкс со голот во 80-та минута. Во 93-та минута Расмусен имаше голема шанса за 2-2, не ја искористи, а во следниот напад Љоренте ги постави конечните 3-1.

Значајна победа во Норвешка оствари Монако. Францускиот тим славеше минимално со голот на балагун во 43. минута.

Кога Џанпјеро Гасперини се чинеше дека го пронајде клучот за конечно да го среди нападот на Рома, дојде студен туш. Пауло Дибала, кој во последните недели стана клучна фигура во нападот како лажна деветка, е принуден да оди надвор од терените на одреден период. Аргентинецот заработи повреда на флексорниот мускул на левата бутина по промашениот пенал во последните минути од натпреварот со Милан.

Денес тој ќе биде подложен на рутински тестови за да се процени степенот на повредата. Првичните впечатоци не се охрабрувачки, а и самиот Гасперини, по натпреварот на Сан Сиро, наговести дека Дибала веројатно нема да се врати пред репрезентативната пауза.

Фудбалската федерација на Македонија ја отвори продажбата на билетите за натпреварот меѓу Македонија и Летонија, кој ќе биде последен на фудбалерите оваа година во Скопје.

Средбата ќе биде од пријателски карактер, а за нас доаѓа во клучен момент и пред решавачкиот натпревар од квалификациите за Светското првенство. Македонија ќе му гостува на Велс, па против Летонците ќе треба да се воиграат и последните детали во борбата за мундијалски бараж.

ФФМ објави дека билетите ќе чинат по 200 и 300 денари, а отворени ќе бидат само јужната и северната трибина.

Екипата на Струга Трим Лум заслужено освои три бода на гостувањето кај Македонија Ѓ.П., во натпревар од 12. коло на Првата фудбалска лига. Беа доволни головите на дебитантот Рочи и најефикасниот напаѓач во Првата лига, Компаоре, за нови три бода за Струга Трим Лум.

Првата акција им припадна на гостите, кога Буњамин Шабани проби и центрираше од лево, но Рочи не успеа да постигне гол од само два метра пред противничката мрежа. Подоцна, Јевтовски и Компаоре се заканија од далечина, но нивните обиди не го променија резултатот и топката заврши надвор од голот на Македонија Ѓ.П.

Промената на резултатот дојде во 32. минута, кога Папе Фал центрираше во шеснаесетникот, а Флоријан Рочи ја испрати топката во мрежата на Македонија Ѓ.П., постигнувајќи го својот дебитантски гол во Првата лига.

Во вториот дел, домаќините беа поорганизирани, а првиот нивни обид беше забележан кога Гереро шутираше од 18 метри, но топката заврши во рацете на голманот Ангелети.

Во 53. минута, Малески изведе соло-акција и шутираше од 18 метри, но обидот заврши неколку сантиметри покрај стативата на Јанков.

Напаѓачот на Струга Трим Лум, Малески, ѝ избега на домашната одбрана по асистенција на Компаоре, но во опасната зона беше соборен од Џелили, а судијата покажа на белата точка. Сигурен од 11 метри беше Компаоре, кој го испрати голманот во еден, а топката во другиот агол, поставувајќи го конечниот резултат 0-2.

Во 79 минута, Талаков шутираше од 13 метри, но топката заврши во рацете на голманот Ангелети.

Во 87. минута, Бојку упати силен шут од страна, но Јанков беше сигурен.

И кога сите очекуваа крај на натпреварот, судијата покажа прво на белата точка, но по интервенција на ВАР-системот, покажа само слободен удар за домашната екипа

Сопствениците на Фиорентина го отпуштија Стефано Пиоли. „Виолетовите“ со Пиоли на клупата не забележаа ниту една победа во првите 10 рунди во Серија А.

Фиорентина под Пиоли освои само четири поени и се наоѓа на последната позиција на табелата.

Кога пристигна во средината на јули оваа година, потпиша договор до јуни 2028 година, па Фиорентина веројатно скапо ќе ја плати оваа непланирана разделба.

Помеѓу Фиорентина и Милан, кого го водеше 240 пати и го освои италијанското првенство во 2021/22 година, Пиоли имаше и краток престој во Ал-Наср.

Денеска во УЕФА беа извлечени противниците за лигашката фаза од квалификациите за Светското првенство во женска конкуренција, кое ќе се одржи во Бразил во 2027 година.

Македонија квалификациите ќе ги започне од Лига Ц, во која има вкупно шест групи. Натпреварите од оваа фаза ќе се играат во март, април и јуни 2026 година.

Победниците од шесте групи во Лига Ц, како и двете најдобро рангирани второпласирани репрезентација, ќе имаат можност да обезбедат пласман на Светското првенство преку бараж натпревари со второ и трето пласираните селекции од Лига А. Овие баражи ќе се играат во октомври и ноември 2026 година, по што ќе следат интерконтиненталните баражи во февруари 2027 година.

Македонската женска фудбалска репрезентација ќе го бара своето место во баражите преку групата Ц3, каде противници ќе ни бидат Унгарија, Азербејџан и Андора.