Во еден момент беше отпишан. Кога на почетокот на февруари против Лацио врза три последователни порази во Серија А, постоеше прашање дали Сержо Консеисао воопшто ќе го дочека крајот на сезоната на клупата на Милан.

Сепак, како што се ближи крајот на натпреварувачката година, така и шпекулациите за кандидатите кои би можеле да го наследат се потивни, додека можноста Португалецот да остане на Сан Сиро, изгледа дека се зголемува.

„Имаме целосна доверба во него, концентрирани сме да видиме како ќе се одвива оваа сезона, тој добро работи со тимот и веруваме во него“, изјави извршниот директор на „Росонерите“, Џорџо Фурлани по победата над Болоња.

Милан во среда против Болоња во финалето на Купот на Италија ќе има можност да обезбеди пласман во Лигата на Европа. Меѓутоа, извршниот директор на италијанскиот клуб не крие дека и во случај на освојување на втор трофеј сезоната би била неуспешна бидејќи „Росонерите“ нема да играат во Лигата на шампионите следната сезона.

Со заминувањето на Чаби Алонсо се очекува да си заминат и најголемите ѕвезди на Баер Леверкузен.

Вчера се шпекулираше за договорот на Флоријан Вирц со Баерн Минхен, а Баварците истовремено решија со сите сили да тргнат и по Џонатан Тах.

Договорот на дефанзивецот истекува на 30 јуни и ќе биде слободен во изборот на нова средина, а иако зимоска договори сè со Барселона, Каталонците се повлекоа од преговорите.

Откако Роналд Араухо остана, а Ерик Гарсија значително ја подигна формата и го доби довербата на Ханси Флик, и поради бројни финансиски проблеми, Каталонците ги стопираа преговорите со германскиот дефанзивец.

Баерн со сите сили се обидува да го убеди да дојде во Минхен, особено откако Ерик Дајер договори трансфер во Монако.

Во Минхен сметаат дека Вирц и Тах се совршени засилувања и главни цели за сезоната 2025/26 и во голема мера работат на потписот на двајцата.

Голманот на италијанската фудбалска репрезентација и на Пари Сен-Жермен Џанлуиџи Донарума (26) е на радарот на Манчестер Јунајтед, пренесуваат англиските и италијанските медиуми. Донарума оваа сезона е еден од клучните играчи на парискиот состав, кој веќе го обезбеди новиот трофеј во Ле Шампионат, како и пласман во финалето на Лигата на шампионите.

Италијанскиот голман особено блесна против англиските клубови Ливерпул, Астон Вила и Арсенал во осминафиналето, четвртфиналето и полуфиналето на Лигата на шампионите. Неговиот договор со клубот истекува во јуни 2026 година, меѓутоа се шпекулира дека би можел да си замине ова лето.

„Островските“ медиуми сè погласно го споменуваат интересот на Манчестер Јунајтед. Се наведува дека менаџерот на Јунајтед, Рубен Аморим, побарал понуда за Донарума, незадоволен од изведбите на Андре Онана. Донарума во Паркот на принцовите пристигна во јуни 2021 година како слободен играч од Милан, а се шпекулира дека ПСЖ ќе бара најмалку 50 милиони евра за него.

Хајдук беше блиску, а сега е далеку од титулата во Хрватска.

Има три бода помалку од Риека, два од Динамо и само чудо во последните три кола може да ги одведе до титулата. Ѓенаро Гатузо го водеше овој тим цела сезона, а поради слабите резултати на крајот, титулата е далеку.

“Можеби се повторувам, но… Дојдов во овој прекрасен град со насмевка и така ќе биде и кога ќе заминам”, рече Гатузо.

“Овие 11 месеци беа тешки и во моментот кога ќе заминам многу ќе ми биде жал. Сретнав луѓе кои ми обележаа живот”, истакна италијанскиот тренер кој на овој начин го најави своето заминување.

Атлетико Мадрид експресно ја заврши работата против Реал Сосиедад и со убедливи 4-0 забележа три бода на контото во 35. коло од Ла Лига.

Херој на вечерта беше Александер Сорлот, кој блесна со хет-трик уште во првите 11 минути, а потоа додаде и четврти гол пред да се наврши првиот половина час од натпреварот.

Се играше седмата минута кога Сорлот првпат ја затресе мрежата, а потоа следуваше вистинска норвешка бура – два гола во две минути (10’ и 11’) и историја: најбрз хет-трик во историјата на шпанската Примера. Во 30. минута, по убава акција и асистенција на Галан, Сорлот погоди за 4-0 и го заокружи спектакуларното прво полувреме.

Во вториот дел Атлетико ја намали брзината, а Сорлот беше блиску до петти погодок, но ја погоди пречката. Со оваа победа, „јорганџиите“ стигнаа до бројката од 70 бодови и математички си го обезбедија настапот во Лигата на шампионите. Реал Сосиедад останува на 43 бодови и се наоѓа на 12. позиција.

Од редовите на Пари Сен Жермен сега се истакнаа со еден убав гест кој доликува на голем клуб и ќе обезбеди влезници за сите 600 вработени во клубот за претстојното финале во Лигата на шампионите во кое ќе се сретнат со Интер.

На 31 мај, „светците“ во Минхен ќе се соочат со милански Интер, а Ал-Келаифи одлучи да го награди целиот персонал за нивната посветеност и лојалност.

„Горди сме што сме едно семејство, семејството на Пари Сен Жермен кое го претставува Париз и Франција на најголемата европска сцена. Секој од вас придонесе за овој успех и затоа ќе бидете таму, да го бодрите тимот во живо во Минхен. Ви благодарам за вашата работа, труд, професионалност и страст кон клубот“, се наведува во писмото кое претседателот лично го испратил до сите вработени.

ПСЖ ќе игра второ финале во својата историја и ќе се обиде конечно да го освои најпосакуваниот трофеј во европскиот клупски фудбал.