Францускиот стратег Лоран Блан веќе не е тренер на Ал-Итихад, клубот кој минатата сезона го одведе до титулата во Саудиска Арабија. Веста беше официјално потврдена еден ден по поразот со 0-2 од Ал-Наср.
Клубот ја сподели информацијата на социјалните мрежи, каде што се наведува дека со тимот ќе раководи капитенот Хасан Халика, а негов прв асистент ќе биде досегашниот тренер на екипата до 21 година, Иван Караско.
Тие ќе го водат Ал-Итихад сè до назначувањето на нов постојан шеф на стручниот штаб.
Синер лесно во четвртфиналето во Пекинг
Италијанецот Јаник Синер обезбеди пласман во четвртфиналето на АТП турнирот од серијата 500 на тврда подлога во кинеската престолнина Пекинг, откако денеска во второто коло го совлада Французинот Теренс Атма со 6:4, 5:7, 6:0 за два часа и 22 минути игра.
Синер, кој е прв носител, ја освои титулата во Пекинг во 2023 година.
Негов противник во четвртфиналето ќе биде унгарскиот тенисер Фабијан Марожан, кој го елиминираше Александар Милер од Франција со 6:3, 7:6(5).
Турнирот во Пекинг се игра за награден фонд од над четири милиони евра.
Италија и Бугарија ќе се борат за светската титула во одбојка
Светскиот шампион Италија ќе ја брани титулата во утрешното финале, откако попладнево ја совлада Полска со 3-0 (25-21, 25-22, 25-23) во полуфиналето на Светското првенство за одбојкари на Филипините.
Второто полуфинале во Пасај Сити беше реприза на последното финале на Светското првенство пред три години, во кое Италија ја совлада Полска во Катовице со 3-1, како и на овогодишното финале во Лигата на нации, во кое полската репрезентација беше победник со 3-0 во кинескиот град Нингбо.
Јури Романо беше најефикасен во редовите на Италија со 15 поени, додека најистакнат во редовите на Полска беше Вилфредо Леон со 14 поени.
Противник на Италија во утрешното финале ќе биде Бугарија, која претходно денеска ја совлада Чешка со 3-1. За Бугарија ова ќе биде прво финале по пауза од 55 години, кога во Софија загуби од поранешна Источна Германија.
Нуно Еспирито Санто е нов менаџер на Вест Хем
Лондонски Вест Хем го назнаки попладнево Португалецот Нуно Еспирито Санто за нов тренер, само неколку часови откако му врачи отказ на функцијата на Греам Потер.
Санто веќе денеска ќе го одржи првиот тренинг со лондонскиот клуб пред дуелот против Евертон, в понеделник, во рамки на шестото коло во Премиер лигата.
Санто беше без тренерски ангажман помалку од три недели по отказот што му беше врачен на клупата на премиерлигашот Нотингем Форест.
Смената на тренерската клупа во Вест Хем дојде по очајниот старт на новата сезона во која лондонскиот премиерлигаш е последнопласиран на табелата со три бодови, и четири порази во воведните пет кола.
Интер на рутина ја освои Сардинија
Интер со успех се враќа од гостувањето на Сардинија, откако го победи Калјари со 0-2. Тимот на Кристијан Киву го контролираше натпреварот и заслужено стигна до триумф.
Гостите од Милано поведоа уште во осмата минута преку Лаутаро Мартинез.
Победата ја потврди младиот Пио Еспозито со гол во 82. минута, по одличната асистенција на Федерико Димарко.
Дефанзивците „стрелаа“, ПСЖ лесно се справи со Оксер
Пари Сен Жермен се врати на победнички пат во Лига 1 и брзо го заборави поразот во дербито со Олимпик Марсеј. На домашен терен, тимот на Луис Енрике со сигурни 2-0 го совлада Оксер.
Дебито на Забарњи во листата на стрелците донесе водство на ПСЖ уште во 32. минута, откако го искористи додавањето на Витиња. Со 1-0 се замина на полувреме, а во вториот дел дефанзивата на гостите не издржа повторно – уште еден гол од стопер донесе конечен резултат.
Лукас Бералдо се запиша како стрелец за конечни 2-0, постигнувајќи го својот прв гол сезонава, а третиот во кариерата за „светците“.
Хорхе Мартин пак се повреди, в понеделник го чека операција
Светскиот шампион во Мото ГП, Хорхе Мартин, ќе биде опериран в понеделник во Барселона, објави тимот на Априлија по спринтот во Мотеги во Јапонија.
Возачот падна на денешниот спринт и го повреди десното рамо. Во медицинскиот центар на патеката беше утврдено дека има фрактура на десната клучна коска и утре ќе замине за Шпанија.
Тоа значи дека светскиот шампион ќе ја пропушти Големата награда на Индонезија закажана во почетокот на октомври.
Тиквеш за нијанса подобар од Македонија ЃП, бодовите остануваат во Кавадарци
Фудбалерите на Тиквеш ја совладаа Македонија ЃП со 2-1 и ја забележаа втората победа во првенството. Тиквеш рано стигна до предност, Садик уште во деветтата минута го совлада гостинскиот голман Јанков, а на 2-0 зголеми Ивановски во 68. додека стрелец на единствениот гол за гостите беше Ѓорѓи Стоилов од пенал.
Во првото полувреме двата тима имаа можност да постигнат уште по некој погодок. Рамадани за малку не ја погоди сопствената мрежа при интервенција во петте метри и при тоа ја погоди гредата од голот на Стевковски. Веднаш на спротивната страна на асистенција на Миловановиќ, ударот на домашниот фудбалер Стојанов заврши во дирекот.
Во второто полувреме Абдула „од непосредна близина со глава шутира директно во Стевковски. Илиески на спротивната страна со глава шутира преку голот на Јанков.
Тиквеш до победата стигна во 68. минута, ударот Стојковски, голманот на гостите Јанков успеа да го одбрани, а топката стигна до Ивановски кој осамен само пласираше во празната мрежа.
Во обидот да израмни Македонија ЃП вреден за споменување е ударот на Глишиќ кој можеше и да асистира но реши да шутира, но беше изблокиран.
Атаман наговести дека Јанис еден ден ќе заигра за ПАО
Главниот тренер на Панатинаикос, Ергин Атаман, сака еден ден да работи со големата грчка кошаркарска ѕвезда, Јанис Адетекумпо, кој игра за Милвоки.
„Јанис е најразновидниот играч во НБА . Може да игра како бек, да трча брзо, да шутира од рекетот, да постигнува кошеви и да се брани. Тој е играч кого навистина го почитувам.“ –рече тренерот на Панатинаикос.
Ќе потсетиме дека Адетекумпо беше вклучен во најдобрата петорка на последното Европско првенство додека Атаман беше прогласен за најдобар селектор.
Пелистер поразен во неизвесен меч со ПАОК во Солун
Кошаркарите на Пелистер продолжуваат со контролните натпревари во пресрет на новата натпреварувачка сезона, а „зелено-белите“ по настапот во квалификациите за ЛШ против Реџо Емилија денеска повторно имаа за ривал исклучително квалитетна екипа.
Грчки ПАОК беше домаќин на „пелистерци“ во Солун, во интересен меч што беше израмнет до неколку минути пред крајот, а грчкиот тим сепак се радуваше со конечни 94-82. Двајцата тренери им дадоа шанса на сите кошаркари воигрувајќи ги тактичките замисли пред стартот на новата сезона, а Пелистер одлично му парираше на квалитетниот ривал.
Првата четвртина заврши 24-23 за ПАОК, на одмор се замина со 56-51 за домаќините, а резултатот на седум минути до крајот беше израмнет (74-74). Сепак, грчкиот состав благодарение на поголемото искуство успеа да се одлепи пред самиот финиш и да триумфира и со двоцифрена разлика.
Брејси Дејвис беше прв стрелец на Пелистер со 20 поени, 16 постигна Малешевиќ, 13 Вилсон, додека со 10 поени мечот го заврши Митревски.
Пелистер следниот викенд ќе ја стартува новата сезона во македонската Суперлига, во која битолчани за противник во првото коло ќе го имаат Работнички.
