Поранешниот тренер на Милан, Стефано Пиоли, наскоро би можел да се врати на големата сцена во италијанскиот фудбал, откако медиумите од Апенинскиот полуостров известуваат дека е многу блиску до договор со Рома.
Како што објавува угледниот весник Ла Република, преговорите меѓу Пиоли и управата на „волчицата“ се во напредна фаза, и се очекува брзо официјализирање на соработката.
Иако Пиоли моментално работи како тренер на саудискиот Ал Наср, италијанскиот стратег наводно е определен повторно да се врати на работа во Европа.
ЕХФ ќе бара депозит од екипите учесниците во ЛШ
Европската ракометна федерација (ЕХФ) на последниот состанок донесе одлука да направи промена околу начинот на кој што клубовите ќе учествуваат во новата сезона во Лигата на шампионите.
Заради многуте проблеми со финансиите низ сезоните на повеќе клубови што во некои случаи донесе откажување и среде сезона, ЕХФ ќе бара финансиска гаранција од клубовите кои ќе играат во елитата и кај мажите и кај дамите.
Клубовите кои ќе сакаат да играат во елитата ќе мора да приложат документација дека имаат средства да ја доиграат сезоната во Лигата на шампионите без проблеми.
Исто така, за да се задржи регуларноста, донесена е одлука мечевите од последното коло во Лигата на шампионите ќе се играат во ист термин.
Аморим ќе го седне Онана на клупа
„Дејли Мејл“ пишува дека Рубен Аморим планира да го седне Андре Онана на клупата за резерви за неделниот натпревар против Њукасл.
Португалскиот стратег досега ги толерираше киксовите на Онана и му даваше поддршка, но мечот против Лион ја прели чашата.
Манчестер јунајтед и двата гола во Франција ги прими по грешки на Онана.
Според англискиот медиум, Аморим решил да го седне Онана на клупата и како прв голман да го стави Турчинот, Алтај Бајиндир.
Дали оваа информација на „Дејли Мејл“ е од вистински извор ќе се дознае во недела кога ќе почне натпреварот.
Меси се согласи на нов договор со Интер Мајами
Лионел Меси, првата ѕвезда на МЛС лигата и според многумина еден од најдобрите играчи во историјата, кариерата ќе ја продолжи во дресот на Интер Мајами.
Како што пренесува порталот „Атлетик“, Меси наводно се договорил за продолжување на соработката со тимот од Флорида.
Легендарниот Аргентинец, кој има 37 години, ќе остане во клубот и по истекот на актуелниот договор, според кој е врзан за Интер до летото 2025 година.
Не е познато до кога Меси ќе продолжи да настапува за овој тим, но јасна е позадината на одлуката.
Имено, тимот во сопственост на Дејвид Бекам во 2026 година ќе се пресели на нов стадион чија вредност е над милијарда долари, а поранешниот капитен на репрезентацијата на Англија сака Меси да биде предводник на тимот кој таму ќе започне нова ера.
Во овој тим покрај Меси се и Џорди Алба, Серхио Бускетс и Луис Суарез од поранешните фудбалери на Барселона, а на Флорида би можел да се ресели и ѕвездата на Манчестер Сити и еден од најдобрите светски играчи од средниот ред во последните десет години, Кевин де Брујне.
„Лилјаците“ влегоа во ритам, Севиља падна на „Местаља“
Валенсија продолжи со спектакуларното бегство од опасната зона на табелата во Ла Лига. По поразот од Атлетико Мадрид, Валенсија во следните шест кола, од 2 март досега, освоија 14 бода (четири победи, две нерешени).
Вечерва, во првиот натпревар од 31.коло, Валенсија ја победи Севилја со 1-0 и ја „скокна“ на табелата.
ВАР беше против Севилја, судијата Хозе Санчез досуди пенал, но по сугестијата од ВАР собата ја прегледа снимката и ја поништи својата одлука.
Во третата минута од судиското надополнување, Валенсија успеа да постигне гол преку 20-годишниот Хави Гера.
Во вториот дел имаше прилики на двете страни, но не и вистински реализатор.
Навивачите на Валенсија можат да здивнат, „лилјаците“ се на девет бода од зоната за испаѓање.
Валенсија сега се наоѓа на 11.место со 37 бодови, Севилја по третиот пораз во низа е на 12.позиција со бод помалку.
Одложено рочиштето за случајот „Манчестер Сити“
Конечната одлука во случајот со обвинувањата за англискиот фудбалски шампион Манчестер Сити нема да биде објавена пред летото, тврди „Дејли Телеграф“. Повторно се одложува долгоочекуваната одлука за големиот случај против Манчестер Сити. Рочиштата завршија во декември, а пресудата се очекуваше да биде објавена околу март-април. Комплексноста на случајот, вклучително и количината на докази што се слушнаа, оспорени и проверени, го направија случајот уште потежок.
Обвиненијата првично беа 115, но потоа се зголемија на околу 130 поради конфузија околу некои од правилата за одредени сезони.
Премиер лигата покрена обвиненија во февруари 2023 година, но истрагата датира скоро шест и пол години.
Доколку „граѓаните“ бидат прогласени за виновни, се соочуваат со строги санкции, од одземање бодови до исфрлање од елитата. Од „Етихад“ тврдат дека се невини и дека не се загрижени за конечниот исход на случајот.
Откако Ерлинг Халанд и Пеп Гвардиола потпишаа нови договори пред неколку месеци, се појавија шпекулации дека клубот веќе знаел дека нема да има строги санкции.
И останатите клубови од Премиер лигата со нетрпение го очекуваат конечниот исход и се подготвени да поднесат тужби за изгубени добивки.
Тринкиери најави заминување од Каунас
Тимот на Жалгирис Каунас ќе се раздели со Андреа Тринкиери, што значи дека во новата натпреварувачка година ќе влезе со нов тренер.
На тоа место челниците на клубот од Каунас би сакале да го видат или Ибон Наваро, актуелниот тренер на Уникаха или Јака Лаковиќ кој моментално е во Гран Канарија.
Проблемот е што и двајцата тренери имаат важечки договори и за следната сезона, како што е случајот со актуелниот тренер на Жалгирис, Андреа Триникиери, па ќе биде многу интересно да се види како тоа ќе се одвива.
Димитров не освои ниту гем и неславно испадна во Монте Карло
Бугарскиот тенисер Григор Димитров на неславен начин е елиминиран во четвртфиналето на Мастерсот во Монте Карло.
Алекс де Минор беше подобар од 18. тенисер во светот, што само по себе не е изненадување, изненадување претстаува резултатот. Австралиецот по само 45 минути игра се пласира меѓу четирите најдобри во Кнежевството.
Де Минор на противникот не му дозволи да освои ниту еден гем, победи со 6:0, 6:0.
Тоа е негова трета последователна победа над Бугаринот и прво полуфинале на земјана подлога и второ полуфинале во кариерата на Мастерс турнирите.
Што да се каже за самиот меч во кој еден тенисер ги доби сите 12 гема? Димитров за кратко време направи 23 неизнудени грешки, односно три пати повеќе од противникот.
Познато е дека Димитров не сака да игра на оваа подлога, но не толку за да не освои ниту еден гем. Особено против Де Минор, кој и самиот не е специјалист за земјена подлога.
Мора да се признае дека десеттиот тенисер го игра најдобриот тенис во кариерата на земјена подлога бидејќи на претходните три меча во Монте Карло против Махач, Медведев и Димитров испушти само седум гема.
Де Минор за финале ќе се бори против подобриот од дуелот меѓу Лоренцо Музети и Стефанос Циципас. Втората полуфинална двојка ја сочинуваат Шпанците Карлос Алкараз и Алехандро Давидович Фокина.
Иванишевиќ е нов тренер на Циципас
Горан Иванишевиќ ќе стане тренер на Стефанос Циципас, пренесува грчката „Газета“.
Според овој извор соработката треба да започне пред Вимблдон, односно веднаш по завршувањето на Ролан Гарос.
Таткото Апостолос, му беше тренер на Стефанос во поголемиот дел од кариерата. По честите расправии, а потоа и отказот, Циципас од летово работи со Димитрис Хаџиниколау, селекторот на Грција во Дејвис купот.
Затоа, може да се каже дека овој потег на Циципас беше очекуван.
Иванишевиќ соработуваше со неколку врвни играчи: Марин Чилиќ со кого го освои Ју-ес Опен во 2014 година, Милош Раониќ, Томаш Бердих и секако Новак Ѓоковиќ со кој го имаше најголемиот успех, дури девет гренд слем титули.
Циципас моментално игра на Мастерсот во Монте Карло, а со него е и таткото Апостолос.
Салах се предомисли и потпиша нов двегодишен договор со Ливерпул
Ливерпул и официјално објави продолжување на договорот со Мохамед Салах.
32-годишниот крилен напаѓач потпиша нов договор со клубот во период од две години.
Мохамед Салах игра за Ливерпул од 2017 година, освојувајќи седум титули во ова време, вклучувајќи ги Премиер лигата и Лигата на шампионите. Во англискиот клуб се пресели од Рома. Мохамед Салах во новиот договор со Ливерпул ќе заработи 20 милиони фунти.
Салах оваа сезона на 31 натпревар во Премиер лигата постигна 27 гола и направи 17 асистенции.
