Почна продажбата на билетите за мечот Македонија – Луксембург
Билетите за натпреварот меѓу Македонија и Луксембург, со кој македонската машка ракометна репрезентација ги започнува квалификациите за ЕХФ ЕУРО 2028, се веќе достапни во продажба.
Натпреварот ќе се одигра на 4 ноември (среда), со почеток во 19 часот, во спортскиот центар „Борис Трајковски“ во Скопје.
Македонските ракометари ќе имаат можност пред домашната публика да го отворат новиот квалификациски циклус, а поддршката од трибините ќе биде дополнителен мотив за успешен старт.
Надал се враќа од пензија за егзибиционен меч
Рафаел Надал првпат фати рекет по заминувањето во пензија на турнирот кој самиот го организираше по повод јубилејот во неговата Академија, но очигледно кам-бекот на терените му годеше на прославениот шпански тенисер, кој сега најави дека ќе биде дел од нова егзибиција.
Надал ќе се појави и на терените во САД, или поточно во Лас Вегас каде ќе има тениски обврски на крајот на месец февруари 2027-ма година.
Егзибицијата во Ел-Еј е организирана од „MGM Resorts“ и се одржува секоја година, како што потврди самиот Рафа, настанот ќе се одржи на 28 февруари наредната година.
Хари Кејн ја освои „Златната топка“
Хари Кејн е новиот освојувач на „Златната топка“ на јубилејното 70. издание кое се одржа во Лондон. Англискиот голгетер така на најдобар начин ја круниса својата најдобра индивидуална сезона во кариерата.
Напаѓачот на Баерн Минхен изминатата сезона ја заврши со фантастични 61 гол и седум асистенции на 51 натпревар за германскиот гигант. Посебно се истакна во Бундеслигата, каде што постигна 36 погодоци.
Кејн имаше солиден настап и на Светското првенство во 2026 година, на кое постигна шест гола на седум натпревари, помагајќи ѝ на Англија да го освои третото место.
Со вакви бројки освен што ја освои „Златната топка“, Кејн во Лондон го доби и признанието за најдобар голгетер во сезоната.
За Кејн ова е прва „Златна топка“ , а тој е првиот англиски фудбалер по Мајкл Овен кој го освојува ова признание. На Овен тоа му успеа во 2001 година како фудбалер на Ливерпул.
Чави Еспарт е сериозно повреден, ќе биде во аут скоро два месеци
По единаесет победи во исто толку натпревари оваа сезона, Барселона претрпе неколку тешки порази минатата недела. Прво, загубија со 4:2 од ПСЖ во Лигата на шампионите, а вчера и од Реал (2:1) во дербито на Ла Лига.
Против ПСЖ останаа без Дани Олмо, кој излезе на полувреме и ќе отсуствува еден месец,а нови лоши вести за тренерот Флик дојдоа по поразот од Реал.
Барселона ќе биде без Чави Еспарт речиси два месеци. Младиот, 19-годишен лев бек мораше да го напупти теренот по само половина час, поради повреда на десниот глужд.
Еспарт игра многу добро сезонава, го постигна својот втор гол против ПСЖ оваа сезона, а има и две асистенции во девет настапи.
Одбраната на Барселона веќе е значително ослабена од повредите на Жил Кунде и Ерик Гарсија, па губењето на Еспарт најмалку седум недели значи дека нејзината бековска линија е десеткувана.
Ова го потврди тренерот Ханси Флик, кој рече дека останал без одбрана и потсети дека уште еден дефанзивец, Андреас Кристенсен е повреден подолго време.
Де ла Фуенте е најдобар светски тренер според „Франс фудбал“
На свечената церемонија на доделувањето на Златната топка, наградата за најдобар тренер ја доби селекторот на фудбалската репрезентација на Шпанија, Луис де ла Фуенте.
Де ла Фуенте, во јули оваа година, ја предводеше Шпанија до титулата на Светското првенство, одржано во САД, Мексико и Канада. Во финалето, по продолженијата, Шпанците ја победија Аргентина со 1:0.
„Чест е да се добие оваа награда. Посебно е да се биде номиниран, сите номинирани направија многу и тие исто така ја заслужуваат наградата. Оваа награда е колективна. Имам еден од најдобрите стручни штабови во светот, опкружен сум со експерти. Благодарност до сите од шпанската федерација што ни дозволија да го развиеме овој проект. Благодарност до моето семејство, до оние што се тука и до оние што повеќе не се. Фудбалот е како животот, нè учи дека ништо не трае вечно. Сакам да продолжам да учам. Тимската работа нè прави непобедливи“, рече селекторот на Шпанија.
Притворен првиот човек на грчката кошарка
Мерка притвор им беше одредена доцна синоќа на, сега веќе поранешниот претседател на кошаркарската федерација на Грција Вангелис Лиолиос и неговиот близок соработник, бизнисменот Јоргос Мавраганис за скандалот со корупција и местење натпревари, јави дописничката на МИА од Атина.
Лиолиос, кој беше уапсен минатата седмица, вчера беше изведен пред јавен обвинител и истражен судија и во неколкучасовното сослушување, според медиумите, ги отфрлил обвиненијата за поткуп во период од една деценија, со цел манипулирање со резултатите од кошаркарски натпревари, коментирајќи дека станува збор се заговор со цел да биде отстранет од функцијата.
Паралелно, вчера си поднесе оставка од функцијата претседател на федерацијата.
Првите тројца осомничени од вкупно шест уапсени лица, односно Лиолиос, Мавраганис, како и судијата Петрос Папапетру, се веќе во притвор, додека пак во текот на денешниот ден се очекува пред јавен обвинител и истражен судија да бидат изведени тројца кошаркарски судии, еден активен и двајца поранешни.
По оставката на Лиолиос, управниот одбор на кошаркарската федерација на Грција одржа вонреден состанок за избор на нов претседател, а функцијата ја презеде Ангелос Папаниколау, кој беше главниот противкандидат на Лиолиос пред пет години.
Членовите на управниот одбор на Федерацијата, денеска ќе одржат средба со министерот за спорт на Грција Јанис Вруцис со цел да разговараат за иднината на грчката кошарка по откривањето на скандалот со местење на натпревари.
Ленард има проблеми со коленото, мора на дополнителни прегледи
Кошаркарот на Торонто, Кавај Ленард, ќе биде подложен на лекарски преглед откако го пропушти поразот на тимот од Минесота со 94:117 на гостински терен.
Триесет и петгодишниот кошаркар учествуваше во загревањето, но на крајот не се појави на теренот.
Главниот тренер Дарко Рајаковиќ објави на прес-конференција по поразот дека прегледот е закажан за понеделник. Врз основа на резултатите, медицинскиот персонал ќе утврди дали играчот може да игра на домашниот натпревар против Орландо в среда.
„Утре ќе биде подложен на дополнителен преглед, а потоа ќе знаеме повеќе, рече српскиот специјалист“.
Ламин Јамал пак е најдобар млад фудбалер во светот
Фудбалерот на Барселона Јамин Јамал по третпат по ред е добитник на признанието за најдобар млад фудбалер на годината, откако претходно триумфираше во 2024 и 2025 година.
Јамин Јамал испишува историја, станувајќи првиот фудбалер кој три години едноподруго ја освојува престижната награда „Копа“, која ја доделува „Франс Фудбал“ за најдобриот играч во светот до 21 година.
Јамал зад себе има уште една извонредна сезона во дресот на каталонскиот гигант, во која беше еден од клучните играчи во освојувањето на титулата во Ла Лига.
Даглас Луиз конечно задоволен од позицијата и минутажата во Јуве
Фудбалерот на Јувентус, Даглас Луиз, имаше гол и асистенција во победата на теренот на Лече во вчерашниот меч во Серија „А“. Тој не крие дека е среќен по победата.
„Задоволни сме од играта и од победата. Имавме добро прво полувреме но, мораме да се подобриме и да играме подобро во текот на целиот натпревар.
„=Три бода на гостински терен секогаш се значајни. Верувам дека можеме да одиграме многу подобро. Милам дека ја имам вистинската позиција на теренот“, нагласи фудбалерот на „старата дама“ од Торино.
Допри го голот – Фудбал за секое дете: Фудбалот ги поврзува децата и ги руши бариерите
Фудбалот како универзален јазик на пријателството, соработката и инклузијата беше во центарот на настанот „Допри го голот – Фудбал за секое дете“, реализиран од Основното училиште со ресурсен центар „Иднина“, Скопје, со поддршка на Фудбалската федерација на Македонија и Фондацијата на УЕФА за деца (UEFA Foundation for Children).
На настанот учествуваа ученици со типичен и атипичен развој од седум училишта од Скопје, Куманово и Кратово: ООУ „Живко Брајковски“ – Бутел, ООУ „Кочо Рацин“ – Петровец, ООУ „Кочо Рацин“ – Кратово, ООУ „Имри Елези“ – Чаир, ООУ „Васил Главинов“ – Чаир, ООУ „Киро Глигоров“ – Центар и ОУРЦ „Иднина“ – Скопје.
Преку заеднички фудбалски активности, учениците, наставниците и образовните асистенти испратија силна порака за важноста на инклузијата, врсничката поддршка, тимскиот дух и еднаквите можности за секое дете. Ревијалните фудбалски активности беа можност децата да се дружат, да соработуваат и да создаваат нови пријателства, потврдувајќи дека на фудбалскиот терен има место за сите.
Директорката на ОУРЦ „Иднина“, Лорета Андреевска, истакна дека главната цел на проектот е да им овозможи на децата заедно да играат, да се запознаваат, да соработуваат и да градат нови пријателства.
„Верувавме дека фудбалот може да биде многу повеќе од спорт. Преку играта децата најприродно учат да се почитуваат, да си помагаат, да се охрабруваат и да бидат дел од тимот. За нас, ова не е само фудбалски натпревар, туку можност да покажеме дека инклузијата не е само нешто за кое зборуваме, туку нешто што заедно го создаваме, преку учество, меѓусебна поддршка и прифаќање“, порача Андреевска, упатувајќи благодарност до ФФМ и Фондацијата на УЕФА за деца за поддршката, како и до сите училишта, наставници, стручни лица и соработници вклучени во реализацијата на проектот.
Поддршката за ваквите иницијативи е дел од заложбите на Фудбалската федерација на Македонија за промовирање на социјалната инклузија и создавање можности што ќе му овозможат на секое дете да биде дел од фудбалската игра.
Ирена Бакревска Милошевска, менаџер за социјална одржливост при ФФМ, ја истакна важноста на поддршката и еднаквите можности за сите деца.
„Многу сме среќни што денес сме тука заедно со вас, а во исто време горди што Фудбалската федерација на Македонија и Фондацијата на УЕФА за деца го поддржаа овој проект, кој на децата им отвора повеќе можности за фудбалска игра, дружење и заеднички моменти. Веруваме дека фудбалот е најубав кога сите имаат шанса да се вклучат, да бидат прифатени и да се чувствуваат како дел од тимот. Само тогаш кога му даваме можност на секое дете да учествува, сите сме победници“, истакна Бакревска Милошевска.
