Барселона направи уште еден важен чекор во задржувањето на клучните фудбалери од актуелниот состав. Бразилскиот репрезентативец Рафиња го потпиша новиот договор со каталонскиот клуб, кој треба да важи до 30 јуни 2030 година.

Сите детали меѓу Барселона, фудбалерот, неговите претставници и адвокати се договорени, а документите се потпишани од двете страни. Официјалното соопштение и церемонијата за продолжување на соработката се очекуваат во текот на оваа недела, а како можен термин се посочува петок, доколку административната процедура се одвива според планот.

Продолжувањето не доаѓа неочекувано. Уште во септември спортскиот директор на Барселона, Деко, јавно потврди дека разговорите со Рафиња се во напредна фаза и дека клубот планира Бразилецот да остане дел од тимот во следните четири години.

Од неизвесна иднина до еден од најдобрите во светот

Патот на Рафиња во Барселона не беше секогаш едноставен. Тој пристигна од Лидс во летото 2022 година, но во еден период неговата иднина во клубот беше предмет на бројни шпекулации. Ситуацијата значително се промени по доаѓањето на Ханси Флик, под чие водство Бразилецот доби поголема доверба, слобода во играта и сè поважна улога во тимот.

Рафиња постепено се наметна како еден од лидерите на каталонскиот состав, не само со головите и асистенциите, туку и со интензитетот, пресингот и влијанието врз играта. Во сезоната 2024/25 тој постигна 34 голови и запиша 25 асистенции на 56 натпревари, што беше една од причините Барселона уште во мај 2025 година да го продолжи неговиот тогашен договор до 2028 година.

Во меѓувреме, неговото значење во тимот дополнително порасна. Самиот Рафиња неодамна јавно истакна дека сака да остане во клубот подолго и дека би бил задоволен доколку кариерата ја заврши во Барселона.

Со новиот договор, Барселона практично ја обезбедува иднината на еден од најважните фудбалери во актуелниот проект. Претходната соработка требаше да трае до летото 2028 година, а новата спогодба ќе ја продолжи за дополнителни две сезони.

Останува уште Барселона официјално да ја потврди зделката. Сепак, според последните информации, договорот е комплетиран и потпишан, па формалното соопштение од клубот треба да биде последниот чекор во продолжувањето на соработката со Бразилецот.

Еден од најдобрите напаѓачи во историјата на Манчестер Сити, Сехио Агуеро, проговори за големата ѕвезда на Челзи, Кол Палмер.

„Кога бев таму, тој немаше многу можности да игра за Сити бидејќи имаше многу играчи од врвно ниво кои беа во добра форма.

Преминувањето во Челзи функционираше добро бидејќи му требаше да игра. Според мене, тој е сега најдобриот играч на Челзи“ – рече Аргентинецот.

Денес ќе биде комплетирано четвртото коло од Лигата на нации, веќе може да се анализираат некои сегменти од натпреварувањето.

Статистиката вели дека досега гол не примила само селекцијата на Северна Ирска која се натпреварува во Лига Б. Таа е прво место во својата група во која се уште и Унгарија, Украина и Грузија.

Ирците имаат дадено четири голови, а немаат примено ниту еден. Имаат две победи и две нерешени со резултат 0-0.

Сите останати селекции без разлика дали имаат одиграно три или четири натпревари, примиле барем по еден гол.

Четири селекции не постигнале гол, тоа се Македонија, Грузија, Сан Марино и Лихтенштајн.

Додека во ек се шпекулациите околу тоа кој ќе ја добие најпрестижната индивидуална награда во фудбалот, „Златната топка“, „Тутоспорт“ ја објави листата на номинирани за наградата „Златно момче“.

„Тутоспорт“, оваа награда за најдобар млад играч ја доделува од 2003 година, а првиот освојувач беше Рафаел ван дер Варт, тогашен фудбалер на Ајакс. Лани наградата му припадна на Дезире Дуе од ПСЖ.

Интересно е што и Хрватска и Босна и Херцеговина имаат свој претставник, во Лука Вушковиќ и Карим Алајбеговиќ.

Според сите прогнози, прв фаворит е Пау Кубарси, кој имаше фантастична сезона во Барселона, крунисана со освојување на титулата светски шампион. Кубарси на Мундијалот во САД, Канада и Мексико беше прогласен за најдобар млад фудбалер.

Номинираните за наградата оваа година се:

Пау Кубарси – Барселона
Ајуб Буади – Манчестер Сити
Ворен Заир-Емери – ПСЖ
Јан Диоманде – Реал Мадрид
Лука Вушковиќ – Брајтон
Виктор Фрохолд – Порто
Мајлс Луис-Скели – Арсенал
Рајан – Борнмут
Јорел Хато – Челзи
Ленарт Карл – Баерн Минхен
Естевао – Челзи
Ендрик – Реал Мадрид
Ели Жуниор Крупи – Борнмут
Џанлука Престијани – Бенфика
Константинос Карецас – Борусија Дортмунд
Саид Ел Мала – Келн
Џон Мартин – Реал Сосиедад
Марк Бернал – Барселона
Керим Алајбеговиќ – Јувентус
Кин Фелх – Штутгарт

Заедно со нив, уште пет фудбалери се најдоа на листата како „вајлд карта“:

Хараламбос Костулас – Брајтон
Жоан Гадо – Борусија
Франко Мастантуоно – Фиорентина
Родриго Мора – Рома
Чави Еспарт – Барселона.

Репрезентацијата на Франција ја победи Белгија во натпреварот од четвртото коло од Групата 1 од елитната А дивизија на Лигата на нации на УЕФА. „Црвените ѓаволи“ поведоа и водеа до 77-та минута, но во пеколен финиш „Гелските петли“ буквално ги прегазија и го забележаа својот втор триумф за само неколку дена.

Натпреварот на стадионот „Франција“ во Сен Дени, предградие на Париз, заврши со резултат 4-1 (0-1).

Натпреварот кој се играше на стадионот „Франција“ не започна според очекувањата на 70-тина илјади навивачи бидејќи Лукебакио во 35-та минута и донесе предност на Белгија.

Во вториот дел, Французите тргнаа на се или ништо и во финишот, ја покажаа својата моќ и за 15-тина минути дадоа четири гола за убедлив триумф. Прво во 77-та минута, Дезире Дуе погоди за 1:1, а во 81-та минута резултатот го сврте Рајан Черки. Во финишот од мечот, Михаел Олисе со два гола, во 88-та и 90-та минута и донесе убедлив триумф на Франција.

Жозе Мурињо продолжува да го креира Реал Мадрид според своите замисли, а последните информации од Мадрид најавуваат промена на плановите за двајца фудбалери.

Португалскиот тренер летово направи сериозни промени во составот, а неговата идеја е да располага со пократок и покомпактен ростер. Мурињо претходно јасно порача дека сака да има околу 20 играчи на располагање, плус фудбалерите кои во моментов се повредени.

Сепак, ситуацијата во меѓувреме се промени, па двајца играчи кои беа блиску до заминување сега се очекува да останат на „Сантијаго Бернабеу“ и да добијат нови договори. Станува збор за Орелиен Чуамени и за Арда Ѓулер. Чуамени се позврзуваше со заминување поради слабата минутажа, додека за Ѓулер беше заинтересиран Арсенал, но тој истакна дека нема намера да си замине од Мадрид.

Мурињо во својот втор мандат во Реал има големо влијание врз кадровската политика и веќе направи сериозни резови во тимот. Меѓу фудбалерите кои претходно беа отпишани беа Раул Асенсио, Ферлан Менди и Едуардо Камавинга.