Болоња и Тулуз си подадоа рака за холандскиот напаѓач Тијс Далинга кој треба да биде наследникот на Џошуа Зиркзе кој замина во Манчестер јунајтед.

Италијанскиот клуб за Далинга на Тулуз ќе му плати 12 милиони евра плус бонуси.

Трансферот е целосно договорен, а во наредните денови ќе биде и официјално објавен откако ќе бидат завршени сите формалности.

Ангажманот на Далинга може да значи крај на интересот на Болоња за нашиот Бојан Миовски.

Интерес за Македонецот има и од Џенова. Засега Миовски не настапува за Абердин, шкотскиот клуб го чува за продажба.

Комо успеа да донесе уште една фудбалска ѕвезда, овојпат во дефанзивата, тоа е Рафаел Варан кој во италијанскиот тим пристигнува како слободен играч.

Сеск Фабрегас успеа да убеди уште едно силно засилување за неговиот тим, Рафаел Варан во текот на оваа недела ќе потпише двегодишен договор со Комо со можност за продолжување на уште една.

Разговорите меѓу Варан и Фабрегас трае неколку недели, на крајот францускиот дефанзивец одлучи да се приклучи на проектот на новиот клуб од Серија А.

Следна желба на Фабрегас е да го донесе Артур Мело. Тој е фудбалер на Јувентус, но беше пратен на позајмица во Фиорентина каде имаше одлична сезона.

Меѓународната фудбалска федерација (ФИФА) ја одложи одлуката за суспензија на Израел. Палестина испрати барање за суспензија на оваа земја, но ФИФА таа одлука ќе ја донесе дури по Олимписките игри во Париз.

ФИФА објави дека двете страни побарале повеќе време за да подготват одбрана на своите позиции.

Палестинскиот фудбалски сојуз уште во мај испрати барање и побара Израел да биде суспендиран од сите натпреварувања поради конфликтот што моментално се случува меѓу овие две земји.

По барањето за продолжување од двете страни, кое беше одобрено од ФИФА, потребно е повеќе време за да се заврши овој процес со должно внимание и комплетност, соопшти ФИФА, додавајќи дека одлуката ќе биде позната до 31 август.

Олимписките игри во Париз почнуваат на 26 јули, а завршуваат на 11 август. Фудбалската репрезентација на Израел обезбеди учество во машка конкуренција на најголемиот светски спортски настан.

Легендарниот италијански тренер, Карло Анчелоти проговори зошто не сака да тренира репрезентација, а се пошегува и за неговото пензионирање, Мбапе и Белингем.

Анчелоти неодамна наполни 65 години, а договорот со Реал Мадрид го продолжи до 2026 година. Анчелоти го следел Европското првенство и двајцата негови играчи – Џуд Белингем и Килијан Мбапе.

„Шпанија го заслужи трофејот, тие се најталентирани. Беше првенство со слаб интензитет, бидејќи најдобрите играчи беа уморни уште на стартот. Белингем е генетски шампион – може да се подобри со секој изминат тренинг, но потребна е генетика за да се биде шампион.

На крајот, како Мбапе ќе се вклопи во Реал Мадрид? „Ќе видиме, ќе го ставам некаде“, се пошегува Анчелоти.

АЕК од Атина претстави нов играч. Кај „црно-жолтите“ пристигна големо засилување, а се работи за аргентинскиот фудбалер Ерик Ламела.

Тој потпиша договор на три години, чија вредност е 6.000.000 евра, плус 1.500.000 евра кои ги добил само затоа што ги ставил своите иницијали на лист.

Ламела во Атина пристигна како слободен играч од Севиља каде играше четири години. Пред тоа се стекна со слава во Тотенхем и Рома, а во Европа пристигна од Ривер Плата. 

Атињаните минатата сезона ја испуштија титулата за два разлика. Во претстојната сезона со Ламела, клубот сигурно ќе биде уште поконкурентен. АЕК за три дена официјално ја започнува сезоната во квалификациите за Конференциската лига против Интер од Андора.

Европскиот вицешампион декласиран од тајландски прволигаш

Борусија Дортмунд одигра сезона во која стигна и до финалето во Лигата на шампионите, додека во Бундеслигата играше променливо. Сега во предсезоната „милионерите“ немаат добри резултати.

По ремито со Езгебирге, европскиот вицешампион беше прегазен од тајландскиот прволигаш Патум со убедлви 4-0.

Иако Борусија не играше со најсилниот тим сепак на теренот истрчаа фудбалери како: Суле, Адејеми, Але, Брандт…но, ниту тие не помогнаа да се избегне дебаклот.

Поранешниот германски фудбалер Џером Боатенг (35) е казнет условно со глоба од 200.000 евра поради намерно нанесување физички повреди на поранешната партнерка и мајка на нивните близнаци, одлучи денеска судот во Минхен.

Казната Боатенг ќе мора да ја плати само доколку го повтори прекршокот, но судот му нареди да плати 100.000 евра за хуманитарни цели.

Боатенг, кој беше репрезентативец на Германија кој го освои светскиот шампионат во 2014 година, имаше физичка пресметка со својата поранешна партнерка за време на годишниот одмор во 2018 година.

Боатенг негираше дека ја повредил поранешната партнерка.

Обвинителството има рок од една недела за евентуална жалба на оваа пресуда, додека Боатенг преку својот адвокат изјави: „Ми олесни што овој повеќегодишен кошмар заврши. Сега сакам да се концентрирам на моето семејство и фудбалот“.

Напаѓачот на Челзи, Ромелу Лукаку би можел да ја продолжи кариерата во Наполи, пренесува новинарот Фабрицио Романо. Триесет и едно годишниот Белгиец е подготвен да ја намали својата плата од 11 милиони евра на 6 милиони.

Репрезентативецот на Белгија сака повторно да работи под водство на Антонио Конте. Во моментов трансферот на Лукаку зависи од евентуална зделка која би го испратила Виктор Осимен во Пари Сен Жермен.

Лукаку се врати во Челзи во 2021 година. Минатата сезона напаѓачот настапуваше за Рома како позајмен играч. За Римјаните забележа 47 настапи во сите натпреварувања, постигнувајќи 21 гол и 4 асистенции. 

Фудбалската асоцијација е во потрага по нов селектор на Англија, откако Герет Саутгејт минатата недела објави дека се повлекува како прв човек на националниот тим.

Саутгејт поднесе оставка по поразот од Шпанија (1-2) во финалето на Европското првенство и челниците на англискиот фудбал сега се во потрага по негов наследник.

Во медиумите се споменуваат неколку имиња, но засега никој не може со сигурност да каже кој ќе биде новиот тренер. Кој е тој што би отишол чекор понапред од Саутгејт и конечно би освоил титула со репрезентацијата на Англија?

Би-Би-Си се вклучи во потрагата по нов селектор. Медиумот направи анкета меѓу своите читатели и навивачите на англиската репрезентација.

Најмногу гласови доби екс менаџерот на Ливерпул, Јирген Клоп. За Германецот гласале 29% од учесниците во истражувањето. На второ место е менаџерот на Њукасл Еди Хау со 19%, додека трет е менаџерот на шампионот Манчестер Сити, Шпанецот Пеп Гвардиола со 15%.

Српскиот фудбалер Миодраг Пиваш официјално е нов играч на Њукасл. 

19-годишниот Пиваш минатата сезона го носеше дресот на второлигашот Јединство од Уб, а откако им помогна да влезат во првата лига направи трансфер од соништата.

Премиерлигашот за неговите услуги платил 800.000 евра, додека Јединство ќе има и 20% од следниот трансфер на младиот Србин.