Баерн на Компани израмни историски рекорд на Милан
Баерн ја победи Борусија во Менхенгладбах со 0-3, во осмото коло од Бундеслигата. Баварците ја забележаа 13. победа од почетокот на сезоната, со што го израмнија рекордот на Милан за најдобар старт во сезоната во петте најдобри национални првенства.
Баварците се лидери во германското првенство со максимални 24 бода и гол-разлика од 30-4. Баерн го израмни рекордот на Милан од сезоната 1992/1993, ја отвори сезоната со 13 последователни победи.
Избраниците на тренерот Винсент Компани можат да станат рекордери доколку во среда го победат Келн во Купот на Германија.
Дуплантис и Бол атлетичари на годината според ИААФ
Фемке Бол од Холандија и Арманд Дуплантис од Шведска се прогласени за најдобри атлетичари за 2025 година. Свеченоста се одржа во грузискиот град Батуми, a изборот беше организиран од страна Европската атлетска федерација.
Ова е третпат Бол и Дуплантис да го добија ова признание. Претходно во три наврати беше прогласен за најдобар атлетичар на Стариот континет Британецот Мохамед Фарах.
Дуплантис оваа година по третпат стана светски првак во скок со стап и по 14.ти пат постави светски рекорд – 6.30 метри, додека Фемке Бол ја одбрани светската титула на 400 метри со пречки.
Наградата за „ѕвезди во подем“ им припадна на Одри Веро од Швајцарија и на Хуберт Трошчианк од Полска.
Лазаров го повика Петар Атанасијевиќ по отказот на Манасков
Крилото на Еурофарм Пелистер Петар Атанасијевиќ ќе треба да се јави утре на стартот на подготовките на ракометната репрезентација на Македонија.
Тој ќе треба да го пополни местото на својот клупски колега Дејан Манасков, кој го „одби“ повикот на селекторот Кирил Лазаров.
Манасков како што објави вчера на социјалната мрежа Фејсбук на таков чекор се решил поради нарушени односи со селекторот.
Лазаров веднаш по одигрувањето на редовното коло го повика Атанасијевиќ, кој лани беше дел од составот на нашата репрезентацијата на Светското првенство.
Македонскиот ракометен национален тим во неделата на ЕХФ ќе има мини подготовки, а потоа ќе одигра два натпревара со Јапонија, едниот од затворен тип (31 октомври) и вториот закажан за 1 ноември во Куманово.
ШК Алкалоид по третпат до европската вицешампионска титула!
Во последното седмо коло од Европскиот клупски куп, кој се играше на грчкиот остров Родос, шахистите на Алкалоид забележаа убедлива победа од 4,5 : 1,5 над најсилниот претставник на Израел, Ришон ле Цион, кој е седми носител на турнирот според почетниот рејтинг, со што ја освоија втората позиција на табелата, односно вицешампионската тутула!
Овој турнир е најсилен во клупската конкуренција на Стариот континент, поради што често се споредува со Лигата на шампионите, а ШК Алкалоид триумфираше на него во 2016 година, додека, пак, во 2017, 2024 и во 2025 година го освои второто место.
Импресивен резултат за клубот кој бележи 49 години постоење и шаховски раст, континуирано поддржуван од компанијата „Алкалоид“.
– Нималку лесна победа во последното коло против тим кој може да се нарече елитен, па по три часа игра резултатската неизвесност беше присутна. На првите четири табли не гледавме шанса за победа, но нештата се свртеа откако на петтата табла Александар Инѓиќ (2.618) со бели фигури успеа да го надигра Евгени Занан (2.504). Постепено и на шестата табла Абиманју Пураник го скрши отпорот на ИМ Ор Бронштајн (2.460), па на тој начин започна да се наѕира победата која беше вредна медал. Тимот покажа карактер по вчерашниот минимален пораз од ривалите за тронот, со што беше демонстриран борбен и победнички дух против тврдокорниот противник – коментираше ВМ Влатко Богдановски, кој е капитен на интернационалниот состав на ШК Алкалоид.
Израелскиот тим беше предводен од легендарниот Борис Гељфанд (2.636), поранешен учесник во меч за светски првак, кој успеа со голем жар да ја одржи послабата позиција во сицилијанска одбрана на првата табла против Арјун Еригаиси (2.773).
Ји Веи (2.754) имаше црни фигури против уште еден елитен израелски велемајстор, Максим Родштајн (2.647), кој годинава на поединечното Европско првенство го делеше првото место. Членот на ШК Алкалоид солидно се бранеше, а кога противникот ја мина црвената линија обидувајќи се да игра на победа, со целосен пресврт успеа да донесе цел поен за висок резултат.
И на третата табла Јангји Ју (2.720) не успеа да создаде конкретна предност бидејќи Ницан Штајнберг (2.554) одигра на врвно ниво. Најдолго траеше дуелот на Читамбарам Аравинд (2.711) на четвртата табла, кој играше 70 потези, и неговиот противник Јахли Соколовски (2.539), кој ги преживеа сите напади.
Ји Веи и Абиманју Пураник дополнително освоија и сребрени медали како најуспешни играчи на втората и на шестата табла, додека, пак, Читамбарам Аравинд ја присвои бронзата на четвртата табла.
Романскиот претставник СуперЧес, предводен од светскиот првак Гукеш, иако четврти носител, на крајот како единствен непоразен тим и со само една загубена партија (и тоа во последното 7. коло) за првпат го освојува пехарот во Европскиот клупски куп со максимални 14 бодови. ШК Алкалоид на второто место има 12 бодови, колку и чешкиот Нови Бор, кој играше само со македонскиот шампион меѓу ривалите од првата петорка и го загуби тој дуел, но, сепак, на крајот стигна до шест победи и до бронзен медал.
Идната година предвидено е домаќин на Европскиот клупски куп во шах да биде Црна Гора.
Сензација на стартот на Светскиот Куп во алпско скијање
Австриската скијачка Јулија Шеиб победи на првата трка сезонава во Светскиот куп во скијање. Таа денеска беше најбрза на велеслаломската патека.
По двете трки Шеиб триумфираше со време 2:16.51 минути и донесе голема радост за домашните навивачи. Место на подиумот имаше за Паула Молцан од САД која имаше заостанување од 58 стотинки и го освои второто место, додека како третопласирана заврши Лара Гут-Бехрами од Швајцарија, која имаше заостанување од 1.11 секунда.
Почетокот на сезоната традиционално се одржува на глечерот Ретенбах. Први велеслаломска трка имаат дамите, а утре на истата локација првиот натпревар сезонава ќе го имаат и мажите.
Победничката на денешната трка имаше најдобро и во првото возење.
Европскиот првак Фенербахче должи неверојатни 588 милиони евра!
Алармантен долг на еден од најголемите спортски колективи во Турција, гигантот Фенербахче од 588 милиони евра!
Според извештајот на Јагиз Сабунчонглу, вкупниот долг на Фенербахче достигна 588 милиони евра заклучно со септември 2025 година.
Оваа бројка го вклучува целиот клуб, вклучувајќи ги сите спортски оддели, објекти и операции, а не само кошаркарскиот тим.
Во моментов, кошаркарскиот тим на Фенербахче има скор од 3-3 по шест кола од Евролигата.
Минатата сезона, Фенербахче ја освои Евролигата, победувајќи го Монако со 81-70 во финалето.
Манасков одби да се врати во репрезентацијата на Македонија
Ракометарот на Еурофарм Пелистер, Дејан Манасков објави дека во моментов нема простор за негово враќање во дресот на македонската репрезентација.
Во објавата на социјалната мрежа Фејсбук даде изјава:
„Почитувани, Би сакал да ја информирам цела македонска јавност и сите медиуми дека во моментов, за доброто на националниот тим, нема да настапувам за македонската ракометна репрезентација. Ќе бидам искрен и краток во моето обраќање и објаснување на одлуката. Во изминатите единаесет години, колку што настапував за македонската селекција, секогаш со чест и гордост го носев светиот дрес.
Се борев и настапував секогаш со цело срце. Моите односи со селекторот Кирил Лазаров се нарушени и не гледам простор во моментов истите да се подобрат. Последните две години неправедно бев неповикуван.
После сè што дадов, чувствувам дека Македонија премногу лесно се откажа од мене. Тоа премногу ме погоди и после долго размислување ја донесов оваа одлука. Им посакувам многу среќа и успех на репрезентативците во следниов период. Дотогаш ќе бидам ваш најголем навивач и поддржувач. До некое следно видување Македонијо!“, напиша Дејан Манасков.
Инаку, спортската јавност очекуваше враќање на Манасков во репрезентацијата пред сè поради одличните игри и формата во која се наоѓа.
Македонската репрезентација во рамките на неделата на ЕХФ ќе се подготвува во Скопје, а ќе одигра и два натпревара со Јапонија.
Мајкл Мелоун најави враќање на тренерската работа
Apr 1, 2025; Denver, Colorado, USA; Denver Nuggets head coach Michael Malone in the second quarter against the Minnesota Timberwolves at Ball Arena. Mandatory Credit: Isaiah J. Downing-Imagn Images
Мајкл Мелоун, поранешниот долгогодишен тренер на Денвер, изјави дека е желен да се врати на тренерската работа во НБА откако помина една деценија на клупата во Колорадо. Малоун, кој беше отпуштен од Денвер во април, сега работи за ESPN.
„Дефинитивно не сум завршил со тренерската работа. Тренерството ми е во крвта. Возбуден сум што ќе се вратам и повторно ќе тренирам други“, рече Мелоун.
За време на неговиот престој во Денвер, тој постигна рекорд од 510 победи и 394 порази.
Модриќ: Испуштивме два значајни бода против Пиза
Капитенот на Милан, Лука Модриќ, го коментираше вчерашното ремито со Пиза во натпревар од италијанската Серија А. Росонерите стигнаа до бод со гол во продолжението.
„Вината што не победивме е целосно наша. Загубивме два важни бода. Разочарани сме и лути затоа што пропуштивме одлична можност. Ние ги сменивме нашите позиции за да ги збуниме. Во поголемиот дел од натпреварот тоа функционираше но, мора да играме подобро“, нагласи хрватскиот ветеран.
Борнмут бара луди 75 милиони евра за Антоан Семењо
Раководството на фудбалскиот состав Борнмаут постави цена од 75 милиони фунти за ѕвездата на тимот, Антоан Семењо.
Според последните информации за неговиот потпис се заинтересирани Ливерпул, Челзи и Баерн Минхен.
25-годишниот фудбалер во тековнава сезона има 6 гола и 3 асистенции на 9 натпревари во сите конкуренции.
