Густаво Појет е нов селектор на Грција.

Појет со грчката федерација потпиша договор до 2023 година со можност соработката да продолжи во зависност од резултатите.

„Чест ми е што ќе бидам селектор на Грција. Доаѓам во преубава земја со богата историја. Грција го освои Европското првенство во 2004 година и играше на големи натпреварувања, токму на тој пат сакаме да ја вратиме“, изјави Појет.

Раководството на Париз Сен Жермен е спремно да му понуди нов договор на капитенот Маркињос.

Со новиот договор, 27-годишниот Бразилец би останал дополнителни пет години во клубот од Париз, и според најавите фудбалерот е спремен да ја прифати понудата.

Маркињос е член на ПСЖ од 2013 година, каде пристигна од екипата на Рома. Неговиот актуелен договор со клубот истекува во 2024 година.

Лион одлучи да отстрани од првиот тим Жером Боатенг, пренесуваат француските медиуми.

Дефанзивецот не се наоѓа во конкуренција за натпреварот со Ница поради своето однесување. Минатото лето Боатенг пристигна во Лион после десетгодишната авантура во Баерн. Очекувањата од него беа големи, но започнаа проблеми поради неговото однесување.

Пред две ипол недели на еден од тренинзите влезе во расправија со Бруно Гимараеш, а соиграчите мораа да ги раздвојуваат да не дојде до физичка пресметка. Гимараеш во зимскиот преоден рок направи трансфер во Њукасл.

Според медиумите од Англија, ѕвездата на Манчестер Јунајтед, Кристијано Роналдо, не бил задоволен од моменталната ситуација на клубот од Олд Трафорд, и имал план да разговара со својот менаџер околу опциите за неговата иднина. Информациите велат дека не е исклучена можноста Роналдо да го напушти Јунајтед по завршетокот на сезоната.

Изгледа дека 37-годишниот Португалец најпрво ќе ја почека одлуката на клубот за избор на тренер кој ќе го замени привремениот Рангник, па потоа ќе донесе конечна одлука што понатаму.

Шпанските гиганти Реал Мадрид и Барселона се силно заинтересирани за играчот на Ајакс, Нусер Мазрауи.

Овој 25 годишен десен бек оваа сезона има 24 настапи за Ајакс во сите натпреварувања, а има и пет гола, како и три асистенции. Неговиот договор со Ајакс истекува на крајот на сезоната, а тоа го прави интересен за многу европски гиганти.

Сепак, „Спорт“ пренесува дека главната битка за неговиот потпис ќе ја водат Реал Мадрид и Барселона, бидејќи играчот сака кариерата да ја продолжи во Шпанија.

Иднината на играчот од средниот ред на Реал Мадрид, Марко Асенсио останува неизвесна. Реал Мадрид уште не одлучил дали сака да му понуди нов договор на Шпанецот. Неговиот актуелен договор истекува во летото 2023 година.

Раководството на „кралскиот клуб“ на почетокот на сезоната размислуваше да го продаде, но Асенсио се враќа во форма и сега ситуацијата ги стави првите луѓе на клубот во размислување.

Засега се уште нема конечна одлука. 26-годишниот крилен напаѓач оваа сезона забележа 25 настапи за Реал Мадрид во сите натпреварувања и постигна осум гола.

Вкупните приходи од ТВ правата на Премиер лигата во целиот свет веќе надминаа 10 милијарди фунти, што се случува за прв пат во историјата.

Ова стана факт откако Премиер лигата ги продаде ТВ правата за Индија и Азија. Во ноември лигата склучи рекорден договор од 2 милијарди фунти за правата во САД.

Сега вкупната сума за пренесувањето на најелитното англиско првенство во странство достигна 5,4 милијарди фунти. На нив се додава сумата од 5,1 милијарда фунти за пренесување на „Скај Спорт“ и „Би-Би-Си“.

Така целата сума за ТВ правата на Премиер лигата во целиот свет достигна 10.4 милијарди фунти.

Ова значително ќе ги зголеми приходите на англиските клубови, така што дури 106 милиони финти ќе добива клубот кој ќе заврши на последно место на табелата.

Фудбалерите на Барселона веќе почнаа да се подготвуваат за следната сезона и нивното внимание ќе биде насочено кон доведување квалитетни играчи кои остануваат без договор и ќе бидат слободни играчи на пазарот. Една од трансфер целите на тимот е играчот од средниот ред на Милан, Франк Кеси, чиј договор истекува на крајот од сезоната.

25-годишниот Кеси прикажува одлични партии откако пристигна во Милано од Аталанта, но најверојатно ќе го напушти „Сан Сиро“ на крајот од договорот во јуни. 

Од Барселона во Кеси гледаат наследник на капитенот Бускетс кој наскоро ќе наполни 34 години и прашање е дали ќе може да игра со исто темпо како и досега.

Главните луѓе во Милан задолжени за трансфери, Малдини и Масара, постигнале начелен договор со претставниците од Лил околу трансферот на дефанзивецот Свен Ботман.

Според договореното, 22-годишниот Ботман ќе потпише пет годишен договор со Милан и ќе заработува 2,5 милиони евра по сезона. Тој се очекува да пристигне во новиот клуб ова лето.

Во јануари екипата на Лил ја одби понудата вредна 40 милиони евра од Њукасл Јунајтед.

Маурицио Почетино проговори за шпекулациите дека Килијан Мбапе веќе одлучил од лето да игра за Реал Мадрид.

Токму Реал Мадрид ќе биде противникот на ПСЖ во осминафиналето од Лигата на шампионите. Првиот натпревар на програмата е на 15 февруари, а реваншот се игра во главниот град на Шпанија на 9 март.

„Килијан одлуката за својата иднина ќе ја донесе после натпреварот со Реал Мадрид во Лигата на шампионите. Во овој момент целосно е фокусиран да направи што е можно подобри работи со ПСЖ. Станува збор за голем професионалец, го почитуваме сите. Знаеме дека негова е одлуката. Меѓутоа тоа не го оптеретува и секогаш дава максимум во дресот на ПСЖ“, изјави Почетино.