Раководството на Вулверхемптон неодамна му врачи отказ на Витор Переира, а информациите велат дека клубот го пронашол новиот стратег.

Се работи за актуелниот тренер на Мидлсброу, Роб Едвардс кој ја прифатил понудата од Вулвс. Тој ќе го напушти Мидлсброу и ќе стави потпис на договор со Вулвс.

Мидлсброу излезе и потврда дека Едвардс ќе замине за Вулвс. Тие одбиле една понуда за него, но откако разговарале со тренерот решиле разочарани решиле да му дозволат да замине.

Мисијата за опстанок на Вулверхемптон ќе му биде исклучително тешка со оглед на тоа што по 10 одиграни меча имаат освоено само два бода, а немаат тим кој влева надеж дека може да се направи некоја позитивна серија.

Со оглед на тоа што Мидлсброу е на второто место во Чемпионшип, може да се случи по крајот од сезоната тие да влезат во најдобрата англиска лига, а Роб Едвардс и Вулвс да испаднат во Чемпионшип.

Љупче Дориев игра во голема форма за Согдиана во првенството на Узбекистан, македонскиот фудбалер беше стрелец во гостинска победа од 2-0.

Дориев погоди во 85. минута за водство од 1-0 на Согдиана на гостувањето кај Хоразм. Во судиското продолжение неговиот тим даде уште еден гол за триумф од 2-0.

Согдиана е на средина на табелата, но нашиот Дориев со 16 постигнати гола е на второто место на листата на стрелци со само два погодоци помалку од првиот. Македонецот има и шест асистенции оваа сезона.

Пет дена по поразот во дуелот од Лигата на шампионите со Ливерпул, лидерот во шпанската Ла Лига повторно беше запрен. Од „Ваљекас“ Реал се врати дома само со еден бод.

Саможртвуваната, малку хаотична, но храбрата одбрана на Рајо Ваљекано издржа голем притисок од своите соседи и ѝ понуди на Барселона шанса да се доближи до лидерот. Имаше и Рајо свои шанси, но Куртоа и на овој меч потврди дека се наоѓа во врвна форма.

Рајо е првиот тим што остана непоразен оваа сезона дома против Реал и Барселона. Само два клуба успеаја да го сторат тоа минатата сезона: Осасуна и Бетис.

Подоцна во текот на денот, Мајорка го победи Хетафе со минимален резултат, со голот на Муричи во 14-та минута.

Валенсија освои бод во финишот на натпреварот против Бетис. Овој натпревар заврши со резултат 1:1.

Бетис водеше од 74-та минута кога Хернандез постигна гол. Валенсија го дојде во 82-та минута преку Риоха.

Преговорите за нов договор помеѓу 32-годишниот германски дефанзивец Антонио Ридигер и Реал Мадрид се прекинати поради повредата на мускулот на играчот, објави „Марка“.

Првичните преговори меѓу играчот и клубот започнаа пред неколку месеци, при што износите веќе беа договорени и беше изразена заедничка желба за постигнување договор. Тековниот договор на играчот со клубот важи до летото 2026 година.

Ридигер игра за Реал Мадрид од летото 2022 година. Со Реал Мадрид, Германецот ја освои Лигата на шампионите и шпанското првенство. Дефанзивецот одигра само еден натпревар за својот клуб оваа сезона.

Шпанскиот фудбалски клуб Севиља се наоѓа пред продажба, истата добива на интензитет и се очекува да се забрза до крајот на оваа година, а зделката се очекува да биде завршена до почетокот на 2026 година, објави „АС“.

Неколку странски инвестициски фондови изразија интерес за купување на клубот, кој со години е во борба за превласт меѓу своите главни акционери. Потребен е договор меѓу нив за продажбата да се случи до 2027 година.

Идниот купувач ќе мора да се справи со огромниот долг на клубот. Проценките се движат од 100 милиони евра за кои клубот тврди дека му ги должи, па сè до над 200 милиони евра.

Севиља ја водат семејствата Гујаро, Карион, Алес и Кастро, а актуелен претседател е Хозе Марија дел Нидо Караско.

Тимот на Вардар повторно е лидер на прволигашката табела. Попладнево на Арената во Скопје, Вардар го совлада Тиквеш 3-1 и се врати на лидерската позиција на табелата.

Домаќинот на овој меч имаше повеќе од играта, создаде многу шанси од кои три ги претвори во погодок, а најзаслужен зошто “црвено-црните” не забележаа поубедлива победа беше гостинскиот голман, Стевковски кој и покрај примените голови имаше одличен ден и со извонредни интервенции спречи противникот да дополнително да ја затресе неговата мрежа.

Домаќините уште од самиот почеток тргнаа офанзивно кон голот на Тиквеш, а првата можност за погодок ја имаше Азер Омерагиќ кој што биеше со глава покрај дирекот од голот на Стевковски. За да потоа во 17.минута Немања Босанчиќ со удар од слободен удар откосо ја погоди гредата од противничкиот гол.

Во 19. Минута Вардар дојде до водство. Акцијата од лево ја донесе топката до Ворен, кој што од линијата на шеснаесетникот се реши да шутира. Топката удри во некој од дефанзивците на Тиквеш и го измами Стевковски и таа заврши во неговиот гол.

На спротивната страна Иван Ивановски најопасен за голот на Вардар. Ситуација, две, во која беше за сантиметри кус за да ја зафати топката и да создаде опасност.

Сепак, во самиот финиш на првиот дел, грешката на Закариќ на средината на теренот создаде шанса за Тиквеш. Во која, Ивановски биеше откосо, а во блокот направен со лизгачки старт Јанкулов играше со рака. По ВАР проверката, главниот судија Доне Ристовски покажа на белата точка. Сигурен реализатор на најстрогата казна беше токму Иван Ивановски.

Стартот на вториот дел го одбележа ситуацијата во која нововлезените Димитар Тодоровски и Едис Спахиу прекрасно комбинираа, но напаѓачот во својот обид беше осуетен од Христијан Стевковски.

Во 78. минута, Вардар имаше уште една екстра шанса. Роџерс Мато тргна сам од својата половина, мина педесетина метри и прекрасно асистираше за Талевски, кој беше сам пред Стевковски но шутираше преку голот.

Во 82. минута конечно Вардар доаѓа до толку посакуваното водство. Одлично нафрлување за Едис Спахиу, кој што изби сам пред Стевковски и постигнува гол за водство од 2-1.

Во 86. минута, Роџерс Мато става крај на сите дилеми околу победникот на овој меч. Рутински реализира од непосредна близина, пласирајќи во долниот лев агол.

Откако прокнижи две победи во второто и третото коло од ПМФЛ, битолскиот тим дури по пауза од десет кола или вкупно 77 дена, повторно се враќа на победничките патеки, славејќи минимално со 1-0 против Брера.

Ова е прв триумф на Пелистер на стадионот „Петар Милошевски“, затоа што една од споменатите две победи беше на гости (против Брера), а другата (против Шкупи) се случи кога екипата беше домаќин на стадионот во Кавадарци, бидејќи нивниот стадион се реновираше.

Како што во повеќе наврати се виде во последните мечеви, битолскиот тим најчесто создава шанса од прекин на играта или од шутеви и центаршутеви од далечина, па така и овој пат го започнаа натпреварот: првата шанса дојде по центаршут на Мрмачовски, кога Петковски биеше со глава, но преку голот, за подоцна Булатовиќ од работ на теренот и покрај двајца чувари да го пронајде Керим во казнениот простор (меѓу четири противнички играчи) за овој со глава да го постигне водечкиот гол, кој всушност ја одлучи и средбата.

Брера во првиот дел имаше само еден удар кон голот на Јовчевски, а шутот го упати Нзенге. Истиот играч во вториот дел успеа да ја затресе мрежата на Пелистер, но голот беше поништен поради недозволена позиција.

Пелистер својата иницијатива најмногу ја претвори во освоени удари од аголот, а повеќе играчи се најдоа во полу шанси при вакви ситуации. Дефанзивецот Здравковиќ се закани на два пати кон крајот на првиот дел, додека Стефан Спировски имаше иста шанса, но неговиот удар со глава по корнерот отиде над пречката. До крајот можат да се спомнат уште две шанси: центаршут на Ристевски до Петковски кој биеше во голманот, како и удар на глава од Белиќ по корнерот што го изведе Спировски.

Во куси црти, битолскиот клуб повеќе ја посакуваше победата во денешниот меч, играчите дадоа свој максимум (при што заработија и четири жолти картони, наспроти еден за гостите) и успеаја да го контролираат овој важен натпревар. Апатичната игра на Брера беше казнета во овој случај, а новите три бода му даваат живот на Пелистер во борбата за опстанок, особено по поразот на директниот ривал Тиквеш од Вардар, во вториот првенствен натпревар одигран денеска во Скопје.

Во следните три кола, Пелистер игра дуели со најзагрозените екипи од дното на табелата, Работнички и Шкупи, а до крајот на ноември ќе гостува и на Арсими, поради што оваа победа има големо психолошко значење за битолскиот клуб.

Медицинскиот персонал на Манчестер Јунајтед се надева дека повредата на коленото што ја претрпе напаѓачот Бенџамин Шешко против Тотенхем не е сериозна, а првичните скенирања покажуваат знаци на подобрување.

Менаџерот на Јунајтед, Рубен Аморим, потврди дека Шешко го повредил коленото, по што бил принуден да излезе од теренот на стадионот во Лондон.

Шешко влезе како замена во 58-та минута, но падна на земја три минути пред крајот додека бркаше долга топка и веднаш беше јасно дека нема да може да продолжи. Ова е уште еден неуспех за напаѓачот, кој имаше тежок почеток на кариерата на „Олд Трафорд“. Тој постигна само два гола за „црвените ѓаволи“ од неговиот трансфер.

И покрај загриженоста, разни извори тврдат дека Шешко веќе ги поминал првичните тестови на коленото, кои „укажуваат дека повредата не е сериозна“.

Скенирањата не покажале ништо загрижувачко. Сепак, играчот ќе се подложи на магнетна резонанца пред да се постави конечна дијагноза.

Веднаш по натпреварот во Лондон, Рубен Аморим изјави дека повредите на коленото секогаш се загрижувачки.

Шкендија сезонава се претставува повеќе од солидно во Конференциската лига, а покрај бодовите и добрите игри, тетовскиот клуб би можел да заработи и на трансфери.

Според информациите на албанскиот портал „Опен-ТВ“, интерес за дефанзивецот Имран Фетаи покажува полскиот великан Лех Познањ, кој внимателно ги следи неговите настапи.

Фетаи повторно беше меѓу најдобрите и на вчерашниот натпревар против Јагелонија, во кој Шкендија беше на чекор од победа — водеше 1:0 до последните моменти, кога полскиот тим израмни од својата прва посериозна шанса.

Како што пишува порталот, скаути на Лех биле присутни на трибините и оставиле позитивен извештај за младиот дефанзивец. Освен Полјаците, за Фетаи интерес се споменува и од неколку други европски клубови, но токму Лех се смета за најконкретна дестинација.

Пред да пристигне во редовите на Шкендија, Фетаи настапуваше за Беса, Тиквеш, Гостивар, како и за албанската Аполонија, каде ги мина младинските категории.

Карло Анчелоти, тренерот на бразилската фудбалска репрезентација, му советуваше на Нејмар да ја промени својата позиција за да се врати во врвна форма.

Советот доаѓа откако легендарниот Бразилец беше изоставен од составот по четврти пат откако италијанскиот стручњак ја презеде клупата на „Селесао“.

Формата и физичката подготвеност на Нејмар се под големи прашања во Сантос, а 34-годишникот е во опасност да го пропушти својот четврти настап на Светското првенство во Северна Америка следната година, пишува Goal.com.

Нејмар повторно е изоставен од составот на Бразил за претстојните пријателски натпревари, четврти пат Анчелоти да не го повика од неговото доаѓање ова лето. Тој го имаше својот последен настап за Бразил во октомври 2023 година, кога претрпе скинати лигаменти на коленото во натпревар против Уругвај.

Следеше долго закрепнување од 12 месеци, а проблемите со повредите продолжија, поради што тој е без настап за репрезентацијата две години. Иако беше поканет во март оваа година, мораше да го откаже настапот поради нова повреда.

Коментирајќи го изоставувањето на Нејмар, Анчелоти откри за PLACAR што најмногу дискутирал со печатот. „Да, да, прашањето што најмногу го слушнав досега е за Нејмар, но тоа е нормално бидејќи тој е легенда на бразилскиот фудбал. Знам дека сите сакаат Нејмар да се врати во својата најдобра физичка состојба.

И федерацијата и тренерот и техничкиот персонал се надеваат дека тој може да се врати на своето најдобро ниво. Вистина е дека денешниот фудбал бара многу. Не само талент, туку и физичка подготвеност, интензитет… се надеваме дека Нејмар ќе биде на своето најдобро ниво.“

Италијанскиот стратег понуди и конкретно решение. „Мислам дека треба да се игра поцентрално, а не како крило, бидејќи во денешниот фудбал, крилата мора да помагаат и во одбраната. Кога играте малку поцентрално, одбранбената работа е многу помала. Исто така, мислам дека многу талентиран играч, поблиску до голот, има повеќе можности да постигнува голови. Лажната деветка би можела да биде неговата идеална позиција.“