Резервниот голман на францускиот фудбалски првак ПСЖ, Александр Летеје објави денеска дека заминува од клубот.

Летеје, чиј договор истекува на 30 јуни, пристигна во ПСЖ во 2020 година и запиша само два настапи за клубот од Париз.

„По четири години гордост што ги носев боите на мојот омилен клуб, време е да се збогуваме“, порача Летеј на Инстаграм доцна синоќа, само неколку денови откако беше објавено заминувањето на вториот резервен голман Кејлор Навас.

Русинот Матвеј Сафонов според пишувањата на повеќе медиуми ќе биде новата замена за Италијанецот Џанлуиџи Донарума, кој останува прв голман на ПСЖ, во чиј редови е и младиот Шпанец Амау Тенас.

Хрватскиот фудбалски клуб Хајдук веќе работи на промените за новата сезона и го ангажираше Никола Калиниќ на позицијата спортски директор.

Првата задача на Калиниќ ќе биде да пронајде нов тренер, а еден од кандидатите е италијанската фудбалска легенда Џенаро Гатузо.

Гатузо имаше успешна кариера како играч, но како тренер баш и не се прослави и не оствари посебен успех во Сион, Милан, Наполи, Палермо, Валенсија и Марсеј каде што го имаше последниот ангажман.

Шпанската фудбалска федерација (РФЕФ) соопшти дека го продолжила договорот со актуелниот селектор Луис де ла Фуенте до лето 2026 година за кога е закажано Светското првенство во САД, Мексико и Канада.

РФЕФ го објасни продолжувањето на соработката со Фуенте со потребата од стабилност во репрезентацијата пред претстојното Европско првенство во Германија.

Шпанија ќе игра во групата Б со Хрватска, Италија и Албанија.

Фуенте ја презеде селекторската должност од Луис Енрике по елиминацијата во осминафиналето на последното Светско првенство во Катар,

Фуенте веќе освои трофеј со Шпанија со победата против Хрватска во финалето во Ротердам во ланскотго издание на Лигата на нации.

Англискиот фудбалски состав Манчестер Сити  покрена тужба против Премиер лигата поради правилата поврзани со спонзорски договори.

„Граѓаните“  кои се предмет на истрага поради 115 прекршувања на финансискиот фер-плеј, сега ќе бидат дел од нов судски процес по нивна иницијатива. Сити проценил дека Премиер лигата не треба да ги ограничува договорите туку спонзорите сами треба да одлучат колку ќе инвестираат во некој клуб.

Ограничувањата започнаа во 2021 година откако во екипата на Њукасл влезе голем капитал од Саудиска Арабија.

Првите луѓе на Астон Вила размислуваат да го ангажираат фудбалерот на Интер, Дензел Дамфрис, велат последните информации од Англија.

Тимот од Бирмингем во новата сезона ќе биде дел од Лигата на шампионите и затоа планира да направи промени во ростерот.

Прв на листата е 28-годишниот Холанѓанец кој има договор до 2025 година.

Директорот на фудбалскиот состав Аталанта, Лука Пекарси, вели дека ќе се разгледа секоја понуда што ќе пристигне за Копмајнерс кој имаше одлична сезона во екипата од Бергамо.

Медиумите во Италија денеска наведуваат дека Јувентус сака да го ангажира Холанѓанецот како замена за Џорџо Скалвини кој има скинати вкрстени лигаменти на левото колено и ќе биде на опоравување минимум шест месеци.
Копемајнерс кој со тимот ја освои Лига Европа, на трансфер пазарот вреди околу 60 милиони евра.

Џејден Санчо призна дека е подготвен да се врати во Манчестер Јунајтед под еден услов, а тоа е Ерик тен Хаг повеќе да не раководи со „црвените ѓаволи“. Англискиот репрезентативец не успеа да се наметне во тимот по неговиот трансфер од Борусија Дортмунд за 73 милиони фунти во 2021 година и се врати на „Вестфален“ на позајмица овој јануари.

Ова стана факт откако во септември офанзивниот фудбалер влезе во сериозна пресметка со менаџерот на клубот. По враќањето во Борусија, Санчо повторно ја откри својата кариера и играше во финалето на Лигата на шампионите, каде загуби со 2-0 од Реал Мадрид.

24-годишниот фудбалер сега треба да се врати на „Олд Трафорд“ и според „Мирор“, тој се согласува, се додека тимот повеќе не го води Тен Хаг. Потсетуваме, Санчо одби да му се извини на Холанѓанецот поради една лута објава на социјалните мрежи по која го отстрани од тимот на Јунајтед.

Важно е да се напомене дека случајот тренерот во Манчестер Јунајтед се уште „виси“ во воздух, бидејќи не е одлучено кој ќе биде менаџер на тимот во новата сезона. Кандидати за позицијата се Томас Тухел, Томас Франк и Маурисио Покетино, како и англискиот тренер Герет Саутгејт.

Сепак, постои можност Тен Хаг да продолжи да го води тимот од северозападниот дел на Англија.

Антонио Конте наскоро ќе седне на кормилото на Наполи, а позната е и неговата најголема трансфер желба.

Приоритет на Конте ќе биде засилување на одбраната, а прва желба е италијанскиот репрезентативец Алесандро Бонџорно.

Дефанзивецот на Торино важи за еден од најголемите италијански таленти и веќе е стандарден во италијанската репрезентација.

Наполи сака да му ја исполни желбата на Конте и  почнал да работи на трансферот, а Торино за неговата слобода бара 40 милиони евра.

Еден од клучните играчи на Реал Мадрид низ годинашниве настапи во Лигата на шампиони, Хоселу и дефинитивно во иднина останува фудбалер на „кралевите“.

Хоселу досега играше на „Сантијаго Бернабеу“ како позајмен фудбалер од Еспањол, но Реал Мадрид се одлучи сега да го откупи неговиот договор за 1,5 милиони евра откупна клаузула која „кралскиот тим“ ја активираше за да го задржи во тимот.

Тоа е еден вид награда за 34-годишниот напаѓач, кој оваа сезона беше херој од сенка за „кралевите“ и со своите два гола го елиминира Баерн во полуфиналето од ЛШ.

Фирмата „777 Партнерс“, со седиште во Мајами, не успеа да го затвори договорот за купување на англискиот Евертон. Иако во септември минатата година, компанијата постигна договор со мнозинскиот акционер Фарад Мошири, од клубот соопштија дека понудата е раскината бидејќи не била комплетирана пред истекот на рокот.

„Договорот меѓу 777 Partners и Blue Heaven Holdings Limited за продажба на мнозинскиот удел во клубот истече. Клубот ќе продолжи да работи нормално додека работи со Blue Heaven за да ги разгледа сите опции за идната сопственост на клубот“, објавија „карамелите“.