Тренерот на ПСЖ, Луис Енрике зборуваше за победата на парискиот клуб над Монако со резултат 1-0 во натпреварот од Суперкупот на Франција.

„Тоа е многу, многу позитивно чувство. Освојувањето трофеј е секогаш извор на радост. Да ја започнеме 2025 година вака, со речиси полн стадион, со многу луѓе кои ги поддржуваат играчите на ПСЖ, ни дава сила и самодоверба да ја започнеме годината, затоа мора да го искористиме ова и да размислуваме за иднината. Денеска беше многу тежок натпревар со противник со многу квалитетни играчи, со многу напаѓачки играчи. Имавме многу добри моменти на натпреварот, моменти на доминација и моменти на страдање во одбраната, но мислам дека на крајот голот му ја додели победата на тимот кој никогаш не престанува да се бори, кој никогаш не престанува да напаѓа, кој никогаш не престана да трча. Мислам дека ова е многу позитивен момент и треба да продолжиме да го развиваме“, изјави Енрике за прес-службата на клубот.

Победничкиот гол на ПСЖ беше постигнат во 90+2. минута од напаѓачот Осман Дембеле, на асистенција од Фабијан Руиз.

Атлетико го доби својот 13. натпревар по ред, повторувајќи го клупскиот рекорд од пред 13 години.

Разликата во постигнати и примени голови за тимот предводен од Диего Симеоне во овој период е 34-8.

Претходно, од август до октомври 2012 година, Атлетико освои 13 победи во низа со вкупен резултат 34:10, рекорд поставен исто така под водство на тренерот Симеоне, кој ги води „душекџиите“ од 2011 година.

Вчеравечер Атлетико ја победи Марбеља (1:0) во 1/16-финалето на Копа дел Реј.

Поранешниот тренер на Милан, Стефано Пиоли го истакна високото ниво на квалитет на првенството во Саудиска Арабија.

„Квалитетот е подобар отколку што мислев. Шест или седум екипи би можеле да бидат конкурентни во Серија А, три или четири би можеле да конкурираат за места во Лигата на шампионите.
На почетокот во Ал-Наср не вршев голем притисок, потоа малку по малку почнавме да ги привлекуваме играчите кои ги сакавме“,, изјави главниот тренер на Ал-Наср.

Во првенството на Саудиска Арабија последните неколку години трансфери направија десетици фудбалски ѕвезди од целиот свет.

Во Барселона во последните денови е турбулентно, а се чини дека допрва следува вистинска бура. Опозицијата бара оставки од актуелното раководство.

Групата што се спротивставува на сегашното раководство на фудбалскиот клуб Барселона, предводена од Џоан Лапорта, бара итна оставка од актуелниот претседател, пишуваат шпанските медиуми, на кои им бил даден документ во кој се наведени причините зошто Лапорта повеќе не треба да биде претседател на клубот. .

Меѓу потписниците на објавата се и групите “Yes to the tuture” која ја преставува бизнисменот Виктор Фонт (некогаш кандидат за претседател на Барса) и „ Som un clam“ чиј лидер е Џоан Кампруби, лидерот на опозицијата, кој изминативе месеци најгласниот критичар на клупската политика.

Сега повеќе од порано имаат „муниција“ да го нападнат сегашното раководство.

Овие две групи се огласија поради случаите на Дани Олмо и Пау Виктор, играчи на Барселона кои и покрај жалбите на клубот не беа пријавени за натпревари во вториот дел од сезоната.

Опозиционерите за ваквиот епилог го обвинуваат актуелното раководство.

Не се задоволни ниту од одлуката на Лапорта да стави вето на доаѓањето на Томас Ертел во кошаркарскиот клуб, иако на клубот очајно му треба плејмејкер.

Англискиот напаѓач на Манчестер Јунајтед, Маркус Рашфорд може да стане играч на Милан, пишува на својата веб-страница инсајдерот Џанлука Ди Марцио.

Според изворот, италијанскиот клуб сака „Црвените Ѓаволи“ да го преземат поголемиот дел од платата на играчот. Исто така, двете страни се заинтересирани само за шестмесечен договор за позајмица без право на купување.

Веб-порталот Трансфермаркт ја проценува вредноста на трансферот на 27-годишниот Рашфорд на 55 милиони евра.

Оваа сезона Рашфорд одигра 24 натпревари за Манчестер Јунајтед во сите натпреварувања, на кои постигна седум голови и три асистенции.

Напаѓачот на Ливерпул, Мохамед Салах оваа сезона на 19 натпревари во англиската Премиер лига постигна 18 голови и имаше 13 асистенции. Вчера Египјанецот постигна гол против Манчестер Јунајтед (2:2) и го запиша своето име во историјата на Премиер лигата.

Голот против Манчестер Јунајтед беше 175-ти за Салах во кариерата во Премиер лигата, а според овој показател се израмни со легендарниот напаѓач на Арсенал, Французинот Тиери Анри. Севкупно, сега и двајцата го заземаат седмото место во листата на стрелци во Премиер лигата.

Следна цел на Салах е Френк Лампард , кој има 177 гола. На врвот на листата е Алан Ширер со 260 голови пред Хари Кејн кој има 213 и Вејн Руни 208 гола.

Хамес Родригес би можел да замине од Шпанија по само седум одиграни натпревари за Рајо Ваљекано.

Колумбиецот летово се врати во Ла Лига од Сао Пауло и заигра за Рајо. Сепак, кам-бекот не оди според планираното, тој не е на нивото и главно е резерва. Поради тоа неминовна е разделба, а според најавите тој би можел да замине на нов предизвик.

Родригез кој во минатото беше дел од Енвигадо, Банфилд, Порто, Монако, Реал Мадрид, Баерн Минхен, Евертон, Ал Рајан, Олимпијакос и Сао Пауло веројатно ќе се проба во МЛС лигата.

Според шпанските медиуми можна дестинација на Хамес Родригез е Интер Мајами каде што би играл заедно со Лионел Меси, Луис Суарез, Жодри Алба, Серхио Бускец. Доколку ова се исполни, Родригез и Меси по долгогодишно репрезентативно и клупско ривалство би заиграле за првпат заедно.

Манчестер Сити веќе размислува на следните акции во летниот преоден рок, иако е во тек зимскиот период за трансфери.

Според најавите од Англија шампионот на оваа земја налето ќе тргне по изненадувачко име од Бундеслигата. Станува збор за Омар Мармуш, крилниот напаѓач на Ајнтрахт Франкфурт.

Египетскиот фудбалер игра одлично за „орлите“ и оваа сезона има неверојатни 18 гола и 12 асистенции на 24 натпревари. Блесокот му ја крена цената на Мармуш која моментално изнесува 60 милиони евра, но останува да видиме за колку Ајнтрахт би го продал.

Мармуш пристигна во Германија во 2017 година од Вади Дегла, играше за Волфсбург и не се наметна, па летото 2023 година се пресели во Ајнтрахт. И минатата сезона му беше солидна со 17 погодоци и шест асистенции, но во новата е далеку подобар.

Некогашниот репрезентативецот на Белгија и поранешната ѕвезда во Серија А, Раџа Наинголан се одлучи да игра футсал и стави потпис на договор со третолигаш.

Наинголан потпиша со третолигашот од неговата земја, Хасани Мечелен. Во прашање е клуб од близината на Антверп кој е негов роден град.

За овој тим Наинголан веќе одигра неколку натпревари минатата година, меѓутоа сега и официјално е регистриран.

Белгиецот без клуб во фудбалот е од летото кога се раздели со Бајангкар од Индонезија. Во кариерата Наинголан играше уште за: СПАЛ, Антверп, Интер, Рома, Каљари и Пијаченца, а во најдобрите денови вредеше 45 милиони евра.

Бобан Бабунски нема да ја води Беса во вториот дел од сезоната, иако клубот неодамна ја потврди овва информација.

Имено, Беса попладнево преку социјалните мрежи информираше дека ја раскинува соработката со Бабунски.

„По несогласувањата и промената на ставот на тренерот клубот ја прекина соработката“, стои во објавата на Беса.

Така Бабунски ќе замине од Беса без ниту еден натпревар на кормилото на овој тим. Подготовките за вториот дел од сезоната Беса ќе ги започне на 10 јануари, но засега не е познато со кој предводник.