Тренерот на Фенербахче, Жозе Мурињо ја критикуваше арбитражата во првенството по натпреварот од 11. коло од турската Суперлига со Трабзонспор (3-2).

„Ја обвинувам управата на Фенербахче што ме донесе овде, ми кажаа само половина од ситуацијата овде. Да ми ја кажаа целата приказна за судиската ситуација, немаше да дојдам овде! Јас не сум Турчин, вие сте Турци, не оставајте ја оваа судиска ситуација вака“, рече Мурињо по натпреварот со Трабзонспор.

По 11 одиграни натпревари, Фенербахче е на второто место на табелата во турското првенство со 23 бода. Трабзонспор по ист број одиграни натпревари се наоѓа на 11. место со 12 бода.

Виктор Осимен летово привлече големо внимание, изненади и со одлуката кога го напушти Наполи да се пресели во редовите на Галатасарај. Осимен на самиот на истекот на преодниот рок, откако не успеа да постигне договор со Челзи, реши да замине на позајмица во редовите на актуелниот шампион на Турција.

Тој не сакаше да остане во Наполи, а во тимот не го сакаше ниту тренерот Антонио Конте. На местото на Нигериецот, Конте го ангажира Ромелу Лукаку.

Осимен е на позајмица до крајот на сезоната, но челниците на турскиот клуб се надеваат дека ќе можат да го задржат и подолго во Истанбул.

Наводно, Галатасарај биле подготвени да му плати на Наполи близу 50 милиони евра за Осимен.

Ова сценарио е тежко остварливо, бидејќи Наполи бара поголема сума за напаѓачот, а и Осимен сака да игра во Премиер лигата.

Рубен Аморим проговори за преговорите со Манчестер Јунајтед. Португалскиот стручњак, кој го предводи Спортинг, вчера беше назначен на местото главен тренер на англискиот клуб кому ќе му се приклучи на 11 ноември.

„Моето единствено барање беше трансферот да се случи на крајот на сезоната, но Манчестер Јунајтед ми кажа дека тоа не е можно – или сега или никогаш. Разбрав дека ако одбијам, тогаш за шест месеци нема да ја добијам оваа работа. И знаев дека за шест месеци ќе го напуштам Спортинг. На почетокот на сезоната имав разговор со претседателот на Спортинг и му кажав дека што и да се случи, ова е мојата последна сезона во клубот“, вели Аморим.

Фудбалерите на Барселона без поголеми проблеми го победија Еспањол со 3-1 (3-0) во 12. коло од шпанското првенстви. Каталонскиот клуб веќе по 31. минута имаше големи и недостижни 3-0, а гостите успеаја само да намалат на 3-1 во 63. минута кога погоди Хави Пуадо.

Двоен стрелец за Барселона беше Дани Олмо во 13. и 31. минута, додека Рафиња ја погоди мрежата во 23. минута.

Избраниците на Ханси Флик се лидери на табелата во шпанското првенство со 33 бода, а со овој триумф направија одлична увертира пред натпреварот од Лигата на шампионите.

Лидерот во Примера, за три дена гостува во Белград каде против Црвена Звезда ќе го одигра натпреварот од во четвртото коло во Лигата на шампионите.

Фудбалерите на Пелистер со гол во судиското продолжение триумфираа вечерва во Битола во дербито против вечниот ривал Вардар со 1-0 во завршниот натпревар од 13 коло во Првата македонска фудбалска лигa.

Во спектакуларна атмосфера и пред бројна публика на стадионот „Петар Милошевски“, која одамна е раритет на натпреварите во македонското првенство, Пелистер до победата дојде со голот на капитенот Мирко Ивановски во втората минута од судиското продолжение.

Со вечерашниот триумф Пелистер се искачи на седмото место на табелата, а Вардар остана последнопласиран.

Нејмар на крајот на сезоната би можел да го напушти Ал-Хилал и да се врати во својот матичен клуб Сантос, пренесуваат бразилските медиуми

Потпретседателот на Сантос, Освалдо Нико ја откри оваа информација за бразилските медиуми: „Нејмар доаѓа во јуни, во контакт сме со него“. Овој потег би значел враќање на фудбалската ѕвезда во клубот во кој ја започна својата професионална кариера далечната 2009 година. За Сантос одиграл 225 натпревари, постигнал 136 гола и забележал 64 асистенции, со што стана нова ѕвезда на фудбалското небо.

По неговиот блескав успех во Бразил, Нејмар во 2013 година се пресели во Барселона за 88 милиони евра. Неговата трансфер цена ги собори сите рекорди четири години подоцна, кога ПСЖ плати дури 222 милиони евра, очекувајќи тој да биде првата ѕвезда на тимот. Сепак, наместо да стане лидер, Нејмар остана во сенка на Лионел Меси. Во летото 2023 година, тој го напушти Париз без да го освои трофејот во Лигата на шампионите – целта за која дојде.

Претседателот на Реал Мадрид, Флорентино Перез, не е задоволен од настапот на тимот од почетокот на сезоната и од неубедливите резултати. Поради оваа причина, тој почнува да го губи трпението со Карло Анчелоти и сега се посериозно размислува дали е време за промена на тренерското место.

Перез имал разговор со Анчелоти и побарал итно подобрување и на резултатите и на перформансите на тимот. Најмногу е разочаран од настапите против Лил и Борусија Дортмунд во Лигата на шампионите.

Флорентино е незадоволен од начинот на кој во моментов се користи Белингем, како и од фактот дека младите таленти Ендрик и Арда Ѓулер добиваат премалку минутажа.

УЕФА се огласи во јавноста со соопштение, а повод е доделувањето на наградата „Златна топка“.

Овогодинешното доделување на „Златната топка“ во организација на „Франс фудбал“ и за прв пат во соработка со Европската фудбалска унија (УЕФА) продолжува да предизвикува полемики и реакции.

Се разгореа дебатите кој ја заслужил престижната награда, со поделени мислења, некои сметаа дека Родри ја заслужил, други го критикуваа однесувањето на Винисиус пред церемонијата, тврдејќи дека поради арогантното однесување „заслужил да биде дисквалификува“.

Исто така, се коментира и критикува однесувањето на Реал, клуб за кој некои тврдат дека повеќе не е пример за водење бизнис со стил.

Социјалните мрежи беа преплавени со тврдења дека УЕФА имала влијание врз исходот од гласањето, па дури дека влијанието го икористил претседателот на УЕФА, Александар Чеферин.

УЕФА брзо реагираше на овие шпекулации, објавувајќи соопштение во кое јасно ги отфрли сите тврдења за наводна вмешаност.

„Категорично отфрламе какви било приказни за наводната вмешаност на УЕФА во исходот од гласањето за победниците на Златната топка. Ниту УЕФА ниту нејзиниот претседател не објавија никакви изјави или коментари за резултатите од изборот. Ваквите извештаи се целосно неосновани и не ја отсликуваат реалноста. Ќе го задржиме нашето право да покренеме правна постапка против сите оние кои шират такви лаги“, велат од УЕФА.

Фудбалерите на Македонија ЃП ја совладаа Брегалница со 3-0 во дербито на 11. коло меѓу претендентите за влез во елитата. Дарко Размоски донесе водство за ѓорчепетровци во првото полувреме, а во вториот дел домаќинот го завери триумфот со уште два погодока. Стрелци беа Стоилов и Софијаноски.

Башкими ја оправда фаворитската улога против Осогово и славеше со 5-1, па сега со Македонија Ѓорче Петров го дели врвот. Меметриза Хамза и Хусеин Демири постигнаа по два гола, а и Аган Сулимани погоди за тимот на Башкими.

На врвот на табелата е Македонија ЃП со 26 бода, исто колку што има и Башкими. Брегалница остана на 24, Арсими се приближи со бод помалку, а тука некаде е и Охрид со 20 бода.

Фудбалерите на Јувентус скокнаа на второто место на табелата на италијанскиот шампионат со победата од 0-2 на гости кај Удинезе во натпреварот од 11. коло.

Торинскиот тим дојде до голема предност во првото полувреме кога топката се одби од стативата во две за нив поволни ситуации. Во 19. минута Турам по убав продор шутираше, а топката од стативата се одби во грбот на домашниот голман Окоје, а потоа и во мрежата. Вториот гол го постигна Савона во 37. минута, кој најдобро реагираше на одбиена топка од стативата по ударот на Јилдиз.

Јувентус сега има 21 бод, како и Интер, но миланскиот тим одигра еден натпревар помалку, додека за лидерот Наполи, кој исто така има меч помалку, заостанува четири бода со исто така меч помалку. Удинезе е седми со 16 бодови.

Во последниот натпревар од саботната програма од 11. коло на италијанскиот шампионат, фудбалерите на Милан како гости ја победија Монца со 0-1.