Додека тишината на меѓународната пауза го преплавува Камп Ноу, ритамот на закрепнување во тренинг центарот на Барселона се забрзува. За тренерот Ханси Флик, вестите не можат да бидат подобри: Ерик Гарсија и Алехандро Балде конечно ги напуштија теретаните и се вратија на зелениот терен, започнувајќи ја клучната фаза од својата рехабилитација.

Враќањето на Балде и Гарсија на тревник е вистинско олеснување за „Блауграна“, која помина низ исклучително напорен мартовски период со десеткувана одбрана. Балде, кој беше надвор од стројот поради повреда на тетивата, се чини дека прецизно ги следи роковите за враќање, додека мускулните проблеми на Гарсија веќе се минато. Нивното индивидуално тренирање со топка е јасен сигнал дека финалниот чекор до целосна фитнес форма е веќе во тек.

Амбициите на медицинскиот тим се јасно дефинирани, Флик мора да ги има сите клучни алки на располагање веднаш по репрезентативната пауза. Покрај Балде и Гарсија, се очекува зелено светло да добијат и Френки де Јонг и Жил Кунде. Иако овој двоец сè уште работи според специфична програма за зајакнување, оптимизмот во клубот е голем. Целта е сите четворица да бидат подготвени за големото дерби против Атлетико Мадрид на 4 април, натпревар кој веројатно ќе го трасира патот кон титулата во Ла Лига.

Германскиот стратег не крие дека овие четворица фудбалери се столбовите на неговиот тактички мозаик. Пред Барселона е „пеколен“ распоред кој вклучува четвртфинале во Лигата на шампионите и завршна битка за домашниот трон. Креативноста на Де Јонг, цврстината на Кунде, експлозивноста на Балде и интелигентното изнесување на топката на Гарсија се неопходни за тимот да го издржи притисокот. За Флик, оваа пауза се претвори во совршен „прозорец“ за ресетирање на неговите најважни играчи пред одлучувачкиот јуриш.

Во она што се опишува како една од најбизарните медицински грешки во модерната историја на спортот, медицинскиот тим на Реал Мадрид се најде под жесток удар на јавноста поради погрешната дијагноза за нивната прва ѕвезда, Килијан Мбапе. Извештаите откриваат дека при првичните прегледи за повредата на коленото добиена во декември 2025 година, клупските лекари направиле магнетна резонанца на десното колено, иако повредата била на левото.

Бидејќи снимката на здравото колено не покажала никакви аномалии, Мбапе доби зелено светло да продолжи со настапите. Французинот одигра три натпревари со висок интензитет до крајот на годината, несвесно влошувајќи го делумно скинатиот лигамент на левата нога. Овој превид не само што го одложи неговото закрепнување, туку наводно предизвика и целосна реконструкција на медицинскиот штаб на клубот во јануари.

Фрустриран од постојаната болка и недостатокот на јасни одговори во Мадрид, Мбапе реши да ги преземе работите во свои раце и замина за Париз. Барајќи второ мислење кај реномираниот специјалист д-р Бертран Сонери-Коте, напаѓачот конечно ја доби потребната дијагноза. Француските експерти прецизно го лоцираа изворот на проблемот во левото колено, по што беше започнат таргетиран план за закрепнување без хируршка интервенција.

„Имав среќа што добив точна дијагноза кога дојдов во Париз“, изјави Мбапе на неодамнешен настан. Тој призна дека чувствувал огромна „фрустрација, гнев и вознемиреност“ во неделите кога играл без вистински увид во својата физичка состојба. Патувањето во Франција се покажа како пресвртна точка, трансформирајќи го неговиот статус од „проблематичен“ во целосно закрепнат играч.

Мбапе потврди дека е „100% подготвен“ и повторно му се приклучи на националниот тим. Иако фудбалерот се обидува да ја смири драмата за да остане фокусиран на теренот, овој „срам“ останува главна тема во Шпанија.

Инцидентот го стави медицинскиот менаџмент на Реал Мадрид под лупа во критичен дел од сезоната. Додека клубот се бори со Барселона во Ла Лига и се подготвува за четвртфиналето во Лигата на шампионите против Баерн Минхен, за Мбапе ова е само потсетник за кревкоста на врвната кариера.

Медиумите во Италија шпекулираат дека тренерот на Рома, Џан Пјеро Гасперини, може пред време да го напушти составот од Рим.

Според нив, елиминацијата од европските конкуренции и слабите игри во Серија „А“ може да ги натера челниците на „волчицата“ да размислуваат за ново име на клупата.

Од друга страна, Гасперини, јавно потенцираше дека проблемот со повредени играчи влијае на резултатите на теренот. Тој и претходно изјави дека не е задоволен од трансферната политика во Рома.

Ливерпул официјално објави дека Мохамед Салах ќе го напушти клубот по завршувањето на сезоната. Египќанецот помина девет неверојатни години на “Енфилд” и имаше договор до летото 2027 година, но двете страни постигнаа договор за разделба. Според официјалното соопштение од мирсисајдерите, самиот Салах побарал ова да биде објавено што е можно порано.

33-годишниот египќанец потпиша нов договор со клубот во април, но од почетокот на оваа сезона не е во својата позната форма, што доведе до тоа неколкупати да биде оставуван на клупата за резерви. Тоа не му се допадна и по ремито со Лидс во декември го обвини клубот дека не ги спазил своите ветувања. Последователно настана конфликт со менаџерот Арне Слот.

Покрај проблемите оваа сезона, Салах ќе си замине со статусот на вистинска легенда на Ливерпул.

Тој беше привлечен од Рома во летото 2017 година и оттогаш одигра 435 натпревари за “црвените”, постигнувајќи 255 гола, што го доведе на третото место во листата на најголемите стрелци во историјата на клубот. Освои две титули во Премиер лигата, Лигата на шампионите, Светското клупско првенство, Суперкупот на УЕФА, ФА Куп, две Купа на лигата и “Комјунити Шилд”. Четири пати беше најдобар стрелец во Премиер лигата.

„Здраво на сите!

За жал, денот дојде. Ова е дел од моето збогум. Ќе го напуштам Ливерпул на крајот од сезоната. Сакав да започнам со тоа што никогаш не си замислував колку длабоко овој клуб, овој град, овие луѓе ќе станат дел од мојот живот. Ливерпул не е само фудбалски клуб. Тоа е страст. Тоа е историја. Тоа е дух што не можам да го објаснам со зборови на никого кој не е дел од овој клуб. Славевме победи, освоивме најважните трофеи и се боревме заедно низ најтешките моменти во нашиот живот. Сакам да им се заблагодарам на сите што беа дел од овој клуб за целото мое време тука, особено на соиграчите, сегашни и поранешни, и на навивачите…

Немам доволно зборови. Поддршката што ми ја дадовте во најубавиот период од мојата кариера и бевте со мене во најтешките моменти е нешто што никогаш нема да го заборавам и нешто што секогаш ќе го носам со себе.

Напуштањето никогаш не е лесно. Вие ми дадовте најубавиот период од мојот живот. Секогаш ќе бидам еден од вас. Овој клуб секогаш ќе биде мојот дом за мене и моето семејство. Благодарам ви за сè.

Заради сите вас никогаш нема да сум сам”, изјави Салах во емотивно видео-обраќање со кое се збогуваше.

Од Јувентус започнале разговори со претставниците на дефанзивецот на Реал Мадрид, Антонио Рудигер, објавува “Тутоспорт”.

Тренерот на “бјанконерите” Лучано Спалети е голем обожавател на играчот и има огромна желба да го има во својот состав за следната сезона. Двајцата работеа заедно во Рома помеѓу 2015 и 2017 година, а германскиот дефанзивец одработи вкупно 54 натпревари во дресот на “волците” под водство на стручњакот.

Поранешниот селектор силно верува дека Рудигер може да го донесе така потребното искуство во центарот на одбраната, кое би помогнало на тимот. Од Јувентус дури и биле подготвени да понудат договор за три години и плата во висина од околу 5 милиони евра на играчот.

Самиот фудбалер има договор само до крајот на тековната сезона со Реал Мадрид и досега не добил понуда за негово продолжување. Најверојатната причина за тоа се сè почестите проблеми со повреди на германскиот дефанзивец. 33-годишниот фудбалер има одиграно само 18 натпревари оваа сезона токму поради различни повреди. Различни информации во печатот тврдат дека од Ливерпул и Манчестер Јунајтед исто така ја следат ситуацијата околу Рудигер, но засега не презеле никакви чекори.

Репрезентацијата на Италија утре го започнува својот пат во дополнителните квалификации за Светското првенство. Ќе одиграат полуфинален натпревар против Северна Ирска на домашен терен во Бергамо, а доколку се пласираат понатаму, финалето ќе го играат против победникот од дуелот меѓу Велс и БиХ.

На кормилото на италијанската репрезентација е легендарниот фудбалер, Џенаро Гатузо, кој досега забележа пет победи и еден пораз како селектор, а сега го очекува најголемиот предизвик. Голема поддршка му пружи Марчело Липи, поранешен селектор на Италија, кој го водеше Гатузо до титулата светски првак во 2006 година.

Прославениот селектор му испрати искрени желби на Гатузо: “Те прегрнувам, Рино. Беше еден од моите најдобри ученици, заедно ја освоивме Светската круна, бевме одличен тим. Како тренер, многу наликуваш на мојот карактер, врската со играчите и визијата која ја имаш. Потсетуваш на… Липи.”

“Заслужуваш го најдоброто. Заслужуваш пласман поради големата страст што секогаш ја вградуваш во сè што го правиш, на теренот, како тренер и во животот. Многу среќа, драг колега. Имаш силен тим и ќе дадеш сè од себе да не го пропуштиме ова натпреварување кое ни недостасува предолго”, изјави Липи.

„Сите сме со тебе, заедно ќе одиме на Светското првенство! Ќе успееме”, додаде тој. Липи, како и секогаш директен, го повика Гатузо на денот на назначувањето и едноставно му рече: “Сега си селектор и знаеш што значи тоа: тоа е твоја работа.”

На прашањето кој од светските прваци од 2006 година, кои станаа тренери, ги има најголемите “липиевски” карактеристики, Липи без двоумење одговори: “Гатузо”, најмногу поради стилот на водење на тимот. Гатузо сега има нешто помал предизвик, прво треба да избори пласман на Светското првенство, а потоа да сонува за повторување на успехот на Липи од 2006 година.

Фудбалерот на Арсенал, Еберечи Езе, нема да игра четири до шест недели поради повреда, објави Би-Би-Си.

Езе заработи повреда на листот минатата недела во натпревар од Лигата на шампионите против Баер Леверкузен.

Оваа сезона, англискиот фудбалер постигна девет гола и шест асистенции во 43 натпревари во сите натпреварувања.

Арсенал е лидер на табелата во Премиер лигата со 70 бода, а во Лигата на шампионите ги очекува четвртфинален натпревар против Спортинг Лисабон.

Интер е заинтересиран за младиот фудбалер на Челзи, Андре Сантос, бидејќи ветераните, Хакан Чалханоглу и Хенрих Мхитарјан, се очекува да го напуштат клубот на крајот од сезоната.

Затоа на „Џузепе Меаца“ активно бараат нивни замени а 21-годишникот се наметнува во преден план.

Интер е исто така заинтересиран за потпишување на Леон Горецка како и за Ману Коне од Рома.

Дефанзивецот на Рома, Зеки Челик, може да си замине од италијанскиот состав, најавија дел од медиумите.

Сегашниот договор на Челик предвидува нето плата од 2 милиони евра плус бонуси, но тој и неговите агенти бараат многу поголема сума 4 милиони евра нето по сезона што клубот ја гледа како превисока.

Доколку не се постигне договор, не може да се исклучи можноста играчот да замине како слободен агент на крајот од сезоната.

Фудбалската асоцијација на Англија (ФА), на својата веб-страницата објави дека натпреварот од Суперкупот во 2026 година ќе се одржи на 16 август во Кардиф.

Велшкиот стадион има капацитет од над 73.000 гледачи.

Стадионот беше домаќин на Суперкупот од 2001 до 2006 година, по што трофејот се пресели во Лондон на реновираниот стадион „Вембли“, со исклучок на 2012 и 2022 година.

Причина за промена на локацијата годинава се концертите закажани на „Вембли“ на 15 и 16 август. ФА, исто така, забележа дека поради промените во календарот, новата сезона во Премиер лигата ќе започне на 22 август.

Актуелен освојувач на Суперкупот е Кристал Палас, кој го освои трофејот за прв пат по победата над Ливерпул во август 2025 година. Рекордер по бројот на трофеи е Манчестер јунајтед (21).