Лондонското дерби на Емиратите уште еднаш докажа зошто корнерите се едно од најмоќните оружја во современиот фудбал. Арсенал извојува клучна победа од 2:1 над Челси, со што ја зголеми предноста на врвот на табелата во Премиер лигата на пет бода пред Манчестер Сити.

Од самиот старт, избраниците на Микел Артета ја покажаа тактичката дисциплина која стана нивен заштитен знак во трката за титулата. Мртвата точка беше скршена во 21-вата минута по веќе воиграна акција: Букајо Сака центрираше од корнер, Габриел Магаљаеш ја врати топката во петерецот, каде што Вилијам Салиба со прецизен удар со глава го постигна својот прв сезонски погодок. Сепак, Челси под водство на Лиам Росениор покажа карактер. Пред самиот крај на првиот дел, гостите одговорија со истото оружје. Остриот центаршут на Рис Џејмс предизвика хаос во шеснаесетникот, по што топката несреќно се одби од Пиеро Хинкапи за израмнување на резултатот.

Второто полувреме почна со иницијатива на „Сините“, а Давид Раја мораше да интервенира во неколку наврати за да ги сопре ударите на Енцо Фернандез и Жоао Педро. Сепак, во 66-тата минута, „кралевите на прекините“ повторно стапија на сцена. Деклан Рајс испрати перфектна топка од корнер, која ја дочека Јуриен Тимбер и со силен удар со глава го совлада Роберт Санчез. Работата за Челси стана уште потешка само четири минути подоцна, кога Педро Нето доби втор жолт картон поради фаул над Габриел Мартинели, оставајќи ги своите соиграчи со фудбалер помалку до крајот на мечот.

Овој триумф за „Топчиите“ не е само обична победа, туку и запишување во историјата. Арсенал сезонава постигна дури 16 голови по корнер, со што го израмни рекордот во Премиер лигата. Иако финишот донесе драма и поништен гол на Лиам Делап поради офсајд, Арсенал издржа и стигна до 64-тиот бод. Додека Челси продолжува да се бори за европски пласман, овој резултат јасно покажува дека Арсенал, за разлика од минатите години, е посериозен за оваа титула.

Тренерот на Реал Мадрид, Алваро Арбеола, повторно не изнесе конкретен датум за враќањето на Килијан Ембапе, но потврди дека Родриго е подготвен да се врати во тимот.

Французинот останува во фокусот поради новата повреда, бидејќи Реал Мадрид не објави детали за сериозноста. Се шпекулираше дали ќе биде подготвен за двата натпревара против Манчестер Сити или само за реваншот.

Алваро Арбеола зборуваше за повредата на Мбапе пред утрешниот натпревар против Хетафе.

“Кога се враќа Мбапе? Не можеме точно да кажеме. Сѐ зависи од неговото закрепнување. Ќе игра кога ќе биде 100% подготвен. Од клучно значење е да разбереме за што станува збор и да имаме јасен план за опоравувањето. Планираме целосно враќање во фома пред враќањето на теренот,” изјави Арбеола.

Арбеола исто така потврди дека Родриго е подготвен за натпреварите со Сити.

“Родриго ќе биде наш важен играч. Тој знае како да влијае на натпреварите и ја потврди својата вредност за Реал Мадрид претходните години. Може да игра на сите позиции во нападот и е тежок за чување. Возбуден сум за неговото враќање,” рече Арбеола.

Се очекува Родриго да добие минути против Хетафе во понеделник и против Селта во петок, за да биде во вистинска форма за дуелот против Манчестер Сити во Лигата на шампионите.

Реал Мадрид ќе го пречека Гетафе во понеделник во 21:00 часот, а потоа во истото време во петок ќе гостуваат кај Селта, за да имаат доволно време за подготовка за Сити, кој доаѓа на 10 март.

Манчестер Јунајтед продолжува со својот забележителен напредок под водството на Мајкл Керик, забележувајќи уште една важна победа. Црвените ѓаволи го совладаа Кристал Палас со резултат 2:1, што им овозможи да се искачат на третата позиција во табелата на Премиер лигата.

Сепак, тренерот предупреди дека екипата не треба да се занесе поради овој успех и ги пофали играчите за карактерот и пресвртот кој го покажаа за време на натпреварот.

На полувремето разговаравме со момците за позицијата во која се наоѓаме, како да реагираме и да покажеме индивидуалност и верба. Фудбалот понекогаш знае да биде тежок, а оваа лига е исклучително барана, па не секогаш сè оди лесно. Но, да се вратиме на таков начин и да го свртиме натпреварот во наша корист е најголемото нешто кое го носам од денешниот ден – изјави Керик.

Потоа се осврна на искачувањето на екипата на третата позиција на табелата.

„Во моментов тоа нема многу значење. Убаво е и сакаме да продолжиме да напредуваме. Се справивме со рано примен гол и правилно одговоривме, но не смееме да се заборавиме“, заклучи стратегот на Црвените ѓаволи.

Борусија Дортмунд објави дека капитенот на тимот Емре Чан има скинати предни вкрстени лигаменти на левото колено за време на натпреварот од Бундеслигата против Баерн (2:3). Се очекува фудбалерот да отсуствува подолго време.

Спортскиот директор на Дортмунд, Себастијан Кел, ја коментираше ситуацијата: „Повредата на Емре е многу несреќен настан, не само за него, туку и за целиот клуб. Тој е наш капитен, секогаш посветен на тимот и важен дел од клубот. Емре ќе ја добие нашата целосна поддршка во наредните месеци за да се осигури неговото целосно закрепнување“, изјави Кел за прес-службата на клубот.

Оваа сезона, Емре Чан одигра 16 натпревари и постигна три гола.

Планираниот натпревар помеѓу актуелните европски и јужноамерикански шампиони, познат како „Финалисима“, кој требаше да се одигра на 27 март во Катар, е одложен поради ескалацијата на конфликтите на Блискиот Исток, кои зафатија повеќе азиски земји.

Катарските власти објавија дека натпреварот е одложен откако и оваа земја стана мета на напади поврзани со регионалните воени дејствија.

Катар беше погоден од иранските напади, бидејќи на неговата територија се наоѓаат воени бази на САД.

„Поради актуелната безбедносна состојба, сите фудбалски настани во земјата се одложени до натамошно известување“, соопштија од Фудбалската федерација на Катар.

САД и Израел започнаа координирана воена операција против Иран, при што, според извештаите, е елиминиран врховниот духовен водач на таа земја, ајатолахот Хамнеи. Како одговор, Иран изврши воздушни напади на териториите на ОАЕ, Катар, Бахреин, Јордан и Кувајт, што дополнително ја дестабилизира безбедносната состојба во регионот.

Валенсија запиша важна победа во 26 коло од шпанската Ла Лига, совладувајќи ја Осасуна со 1-0 на домашен терен.

Столе Димитриевски повторно беше стартер за „лилјаците“, каде што добива минутажа во отсуство на првиот голман.

Валенсија до трите бода стигна благодарение на погодокот на Ларжи Рамадани. Белгиецот беше сигурен од белата точка во 67 минута и го постави конечниот резултат.

Со ова Валенсија стигна до седмата сезонска победа и вкупно 29 бодови, со што се искачи на 14 позиција на табелата. Осасуна останува десетта со 33 бода.

Рома и Јувентус одиграа драматични 3-3, „волчицата“ има за што да жали откако испушти два гола предност и во 93. минута остана без цел плен. Возбудливо и драматично дерби на „Олимпико“, Рома водеше 3-1 против Јувентус и беше на прагот на значајна победа во битка за местата во Лигата на шампиони, но „старата дама“ се врати од мртвите и со гол во 93. минута успеа да се избори за поделба на бодовите.

Резултатот беше отворен во 39. минута, Весли прекрасно пласираше во аголот за 1-0 и голема радост на домаќините. Консеисао изедначи на 1-1 на стартот од вториот дел, но „волчицата“ веднаш одговори, Ндика најдобро се снајде по еден прекин и погоди за 2-1.

На средината од второто полувреме, Мален постигна атрактивен гол за 3-1, но Јувентус не се предаде.

Бога во 78. минута намали на 3-2, за во 93. минута Гати да ја затресе мрежата за 3-3. Па Рома пропушти шанса да направи поголема предност во однос на Комо и Јувентус, а избраниците на Спалети си ги задржаа шансите за топ 4 пласман.

Тренерот на Ливерпул, Арне Слот, пред натпреварот со Вест Хем изјави дека десниот бек Џереми Фримпонг е подготвен да се врати на теренот по едномесечна пауза, но дека натпреварот ќе го пропушти Флоријан Вирц.

Шампионот на Англија ги пречекува „Чеканите“ во натпреварот од 28-то коло од Премиер лигата, кој ќе се игра на „Енфилд“ попладнево од 16 часот.

Фримпонг, последниот натпревар го одигра на против Карабаг на 28 јануари.

„Џереми ќе биде во конкуренција за Вест Хем. Тој тренираше со нас неколку пати оваа недела и ќе биде во ростерот. Не очекувам Флоријан да биде во тимот, што секако е разочарување“, рече Слот, додавајќи:

„Секој пат кога некој играч не е достапен, тоа е разочарување, а ова е нешто што не го очекував по минатата недела. Сепак, понекогаш работите се развиваат на таков начин и, за жал, овој пат не на позитивен начин.“

Тренерот на Ливерпул нагласи дека не е јасно кога точно репрезентативецот на Германија би можел повторно да игра.

Еден Азар вели дека практично секое лето бил во контакт со ПСЖ, му биле нудени многу пари за преселба во Париз, но тој на ум има само една работа – трансфер во Реал Мадрид.

Еден Азар откри дека одбил трансфер во ПСЖ и покрај тоа што многу пари биле во игра.

Тој ова го направил од две причини, не сакал да настапува во друг клуб во Франција освен во Лил, и на ум имал само трансфер во Реал Мадрид.

„Секоја година бев во контакт со ПСЖ. Но за мене секогаш беше јасно, кога го напуштив Лил си реков, „Ако еден ден се вратам во Франција, тоа ќе биде само во Лил“. Па не сакав да играм за друг клуб во Франција. Имам почит за луѓето од Лил, за луѓето од северот па затоа ПСЖ никогаш не беше опција за мене, па дури и кога ми понудија многу пари. Мојот сон беше настап во Реал Мадрид, и Челси ќе го заменев само за Реал Мадрид, не за ПСЖ“.

Фудбалерите на Милан потешко од очекуваното стигнаа до победа на гостувањето кај Кремонезе, славејќи со 0-2 во 27. коло од Серија А.

„Росонерите“ отпорот на домаќинот го скршија дури во самата завршница со два гола во судиското продолжение. По мирното прво полувреме без голови, Милан во вториот дел ја засили иницијативата и создаде неколку добри шанси, најконкретен беше Рафаел Леао, но изостана реализацијата. Кремонезе дисциплинирано се бранеше и чекаше своја можност, но не успеа да го изненади Мењан.

Кога се чинеше дека бодовите ќе бидат поделени, по корнер во 90. минута Страхиња Павловиќ најдобро се снајде во мешаницата и донесе водство за гостите. Само неколку минути подоцна Леао стави точка со гол за конечни 0-2.

Милан останува на минус 10 во однос на градскиот ривал и сега целото внимание го насочува кон „Дерби дела Мадонина“ кое е закажано за 8 март.