Вилијам Салиба призна дека интересот од клуб како Реал Мадрид е „навистина примамлив“ за секој фудбалер. Францускиот дефанзивец, кој брзо се етаблира како еден од најдобрите стопери во Европа, откри дека бил поласкан од вниманието на шпанскиот гигант, но дека неговиот фокус останува целосно насочен кон Арсенал.

Во неодамнешна изјава, Салиба истакна дека: „Реал Мадрид е сон за многумина, но мојата цел е прво да освојам трофеи со Арсенал“. Со тоа, 24-годишниот Французин ја потврди својата зрелост и посветеност кон лондонскиот клуб и неговите амбиции.

Салиба не остана само на зборови, тој неодамна потпиша нов договор со Арсенал, со важност до јуни 2030 година. Со тоа стана еден од најплатените дефанзивци во светот, што е јасен сигнал за решеноста на клубот да го задржи како клучен играч во одбраната.

Менаџерот Микел Артета не го крие задоволството: „Вилијам е среќен, амбициозен и сака да биде дел од успехот што го градиме. Тој е темелот на нашата одбрана.“

Оваа сезона, Салиба е еден од најважните играчи во тимот, придонесувајќи Арсенал да има една од најцврстите одбрани во Европа. Неговата смиреност, физичка моќ и прецизност во играта му донесоа респект ширум Европа, но и потврда дека Арсенал има лидер за сегашноста и иднината.

Со новиот договор и јасната порака дека останува во Лондон, Салиба ја засили позицијата на клубот во трката за домашни и европски трофеи, како непоколеблив столб во срцето на одбраната.

Капитенот на Ливерпул, Вирџил ван Дајк, со мирен тон одговори на критиките од поранешниот англиски ас Вејн Руни, кој ја доведе во прашање лидерската улога на него и Мохамед Салах за време на неодамнешниот пад во формата на тимот.

Руни, на својот подкаст на „BBC“, изјави дека искусните играчи не ја презеле доволно одговорноста во тешките моменти. Ван Дајк, пак, ги оцени тие коментари како „мрзлива критика“, нагласувајќи дека слични зборови не се слушале кога Ливерпул блескаше минатата сезона: „Имам голема почит за Руни, тој е легенда и инспирација за многумина. Но вакви коментари е лесно да се дадат кога работите не одат добро,“ рече холандскиот дефанзивец.

Одговорот на Ван Дајк дојде по победата од 2-0 против Астон Вила, која ја прекина серијата од 4 порази и го крена Ливерпул на третото место во Премиер Лигата. Натпреварот го одбележа јубилејниот, 250-ти погодок на Салах за клубот и сигурната игра во одбраната предводена од капитенот.

Ван Дајк истакна дека успехот доаѓа од тимската кохезија и меѓусебната поддршка: „Кога резултатите се лоши, секогаш е лесно да се посочи кон старите играчи. Но ние сме еден тим и сите работиме заедно за да се извлечеме од тешките моменти.“

И покрај надворешниот притисок, капитенот увери дека во соблекувалната нема паника. Тој верува дека Ливерпул ќе се врати на вистинскиот пат доколку остане обединет и посветен.
Руни остана на својот став, наведувајќи дека како аналитичар има обврска да го каже своето мислење. Сепак, смирениот и достоинствен одговор на Ван Дајк, заедно со неодамнешната победа, испраќаат јасна порака. Ливерпул останува горд и силно поврзан тим, кој сè уште не го кажал своето последно слово во битката за трофеи оваа сезона.

Навивачите на Реал Мадрид се собраа пред тренинг центарот на Реал, Валдебебас, за да му изразат безрезервна поддршка на својата ѕвезда, Винисиус Жуниор. Фановите поставија транспаренти со емотивни пораки, меѓу кои: „Вини, ти си голем, те сакаме. Не ги забораваме добрите моменти.“ и „Ние го направивме нашето, ти го направи твоето. Има страдање, има солзи, но никогаш не се предаваме, ќе се бориме заедно до крај.“

Оваа демонстрација на љубов доаѓа во период кога ситуацијата околу договорот на бразилецот со клубот е неизвесна. Преговорите за продолжување на соработката стагнираат, а двете страни сè уште не можат да се усогласат околу финансиските услови. Според извештаи, таборот на Винисиус бара годишна плата од околу 25 милиони евра, додека Реал Мадрид нуди околу 22 милиони со вклучени бонуси. Клубот засега останува цврст на својата позиција и, доколку не се постигне договор, можно е да размислува за продажба на играчот пред истекот на неговиот договор во 2027 година.

Минатата сезона Винисиус имаше пад во формата и се соочи со критики, а дополнителна тензија се создаде кога беше заменет на Ел Класико. Потег што го налути, но подоцна се извини на навивачите и управата. Сепак, оваа сезона бразилецот повторно го пронајде својот сјај, прикажувајќи ја познатата енергија и желба кои го направија миленик на фановите.

И покрај неизвесноста околу иднината, пораките на поддршка пред Валдебебас јасно покажуваат дека навивачите веруваат во Винисиус и во неговата важност за иднината на клубот.

Легендата на бразилскиот фудбал и светски шампион од 1994 година, Ромарио, јавно изрази цврсто убедување дека единствениот начин Бразил да стигне до титулата на следното Светското Првенство е ако Нејмар биде дел од селекцијата.

Според него, и покрај талентот на играчи како Винисиус Жуниор, тимот сè уште нема фудбалер со способност да го решава натпреварот во клучни моменти како што тоа може Нејмар. „Дури и ако шансите се мали, тие постојат само ако Нејмар игра“, изјави Ромарио, нагласувајќи колку неговото присуство е од суштинско значење за амбициите на Селекао.

Ромарио додаде дека се надева Бразил повторно да го пронајде својот препознатлив стил на игра, оној што го обележуваше низ историјата. „Се надевам дека грешам, но тоа е мојот впечаток. Сакам Нејмар да се врати и Бразил повторно да игра фудбал достоен за своето име,“ рече тој.

Ромарио ја истакна улогата на Нејмар не само како стрелец, туку и како лидер што презема одговорност и решава натпревари. Во време кога земјата некогаш создаваше легенди како Пеле и Роналдо, Ромарио верува дека Нејмар е оној што треба да ја продолжи таа традиција. Иако сегашната генерација има потенцијал, таа, според него, не успеа да покаже исто влијание без својот најголем ас.

По долга пауза поради повреда, Нејмар викендов се врати во форма играјќи за Сантос, што го подгреа оптимизмот меѓу навивачите.

Ромарио е јасен, тимот мора да се гради околу Нејмар ако сака реално да се бори за титула. Најдобриот стрелец во историјата на репрезентацијата останува решен да ја предводи земјата на Светското Првенство. Без неговото водство и креативност, вели Ромарио, патот кон шестиот трофеј ќе биде исклучително тежок.

Трент Александер-Арнолд вети дека нема да слави доколку постигне гол против Ливерпул, кога неговиот нов клуб Реал Мадрид ќе оди на гости на Енфилд во Лигата на Шампионите.

Англискиот бек призна дека судбината имала прсти во жрепката.
„Кога беше извлечен парот, сите некако знаеја дека тоа ќе се случи… Ливерпул против Реал, беше како да е запишано,“ изјави тој со насмевка.

За Александер-Арнолд, ова ќе биде посебен дуел, исполнет со мешавина од емоции. „Знаев дека еден ден ќе се соочам со Ливерпул, но не очекував дека ќе биде толку брзо. Чудно е, бидејќи тие ми значат многу,“ рече тој.

Скаусерот истакна дека целосно го разбира предизвикот што го носи натпреварот. „Атмосферата на Енфилд секогаш прави разлика. Иако Ливерпул немаше најдобри резултати во последно време, тие и понатаму се врвен тим. Знам колку се опасни, играв под тој тренер и со тие играчи,“ додаде тој.

Александер-Арнолд откри дека и понатаму е во контакт со своите поранешни соиграчи. „Имаше многу пораки: со Робертсон, Мо Салах, Ибу Конате… сите се шегувавме, како да сите однапред знаевме дека ќе се паднеме едни против други,“ рече со насмевка.

Иако се соочува со конкуренција и повреди во Реал, Англичанецот останува фокусиран и скромен.
„Ако дадам гол, нема да славам. Тоа е чисто од почит кон клубот што ми даде сè,“ изјави Трент.

Навивачите на Ливерпул уште еднаш ја покажаа својата лојалност, интензивно скандирајќи го името на менаџерот Арне Слот за време на натпреварот против Астон Вила на Енфилд. Поддршката стигна во клучен момент, додека резултатот сè уште беше 0:0, внесувајќи нова енергија и самодоверба кај играчите.

Слот по натпреварот изјави дека оваа поддршка многу му значи, не само нему, туку и на целиот тим. „Тоа што навивачите стојат зад нас, особено по тежок период, е токму она што го прави Ливерпул посебен клуб“, истакна холандскиот стратег.

Натпреварот заврши со заслужена победа од 2:0, која го прекина низот од четири порази во Премиер Лигата. Головите ги постигнаа Мохамед Салах и Рајан Гравенберх, а одбраната овојпат успеа целосно да ги неутрализира најопасните напаѓачи на Вила и да ги одбрани сите прекини, страна што досега претставуваше слабост.

Слот го оцени настапот како „најдобар досега во сезоната“, нагласувајќи ја важноста на контрола на играта при водство. Тој предупреди дека тимот мора да остане внимателен, особено против ривали што се потпираат на долги топки и прекини за да создадат шанси.

Под водство на Слот, Ливерпул игра со стил што се базира на брзи вертикални транзиции и агресивен пресинг. Тимот настојува да го искористи просторот пред противникот да се реорганизира, што беше очигледно и против Вила.

Со оваа победа, Ливерпул не само што ја врати победничката форма, туку и повторно ја зацврсти врската меѓу менаџерот и навивачите. Врска што секогаш била двигател на клубот од Мерсисајд.

Германскиот фудбалски шампион Баерн Минхен објави рекорден промет од речиси една милијарда евра за изминатата сезона.

Информацијата беше објавено за време на Генералното собрание на баварскиот гигант на кое на Херберт Хајнер му беше доделен нов мандат како претседател на клубот.

Извршниот директор Јан-Кристијан Дрисен изјави дека Баерн остварил промет од 978,3 милијарди евра за сезоната 2024/2025, што е зголемување од 2,8 проценти во однос на 951,5 милиони евра една година претходно. Според извештајот, Баерн имал нето добивка од 27,1 милиони евра за тој период.

„Баерн останува финансиски стабилен, на добар пат во однос на спортот и обединет како тим. И покрај некои турбулентни времиња и трансфер пазарот што достигнува нови височини, повторно постигнавме рекорден промет и профит. Ова покажува колку е невообичаено моќен овој клуб. Баерн е стабилен и не троши повеќе отколку што заработува. Тоа е нашата филозофија“, истакна Дрисен.

Килијан Мбапе го израмни рекордот поставен од Кристијано Роналдо додека играше за Реал Мадрид.

Францускиот фудбалер беше двоен стрелец на натпреварот против Валенсија, што беше негов осми натпревар по ред во кој успеа да постигне гол.

Го израмни рекордот на Португалецот, разликата е само што Роналдо постигна 19 гола во осум последователни натпревари, додека Мбапе стигна до бројката од десет гола.

Следниот рекорд би можел да биде ако Мбапе постигне гол против Елче и Џирона.

Откако пристигна во шпанската престолнина, светскиот шампион од 2018 година одигра 73 натпревари, со учинок од 62 гола и седум асистенции.

Мохамед Салах уште еднаш го запиша своето име во историјата на Ливерпул, постигнувајќи го својот 250-ти гол за клубот во клучната победа од 2-0 над Астон Вила во саботата. Големото достигнување дојде по несекојдневна грешка на голманот Еми Мартинез, кој му ја подари топката директно на Салах, оставајќи му лесна задача да погоди во празна мрежа.

Со овој погодок, Салах му помогна на Ливерпул да ја прекине серијата од четири порази во Премиер Лигата, а воедно стана само третиот фудбалер во историјата на клубот што стигнал до оваа бројка. По легендите Иан Раш и Роџер Хант. Откако пристигна на Енфилд во 2017 година, Египќанецот има постигнато 188 голови само во Премиер Лигата, потврдувајќи ја својата непроценлива улога во тимот.

Оваа сезона започна потешко за Салах и за тимот, но јубилејниот гол и крајот на негативната серија внесоа нов оптимизам меѓу навивачите. Мнозинството експерти гледаат во овој момент можен пресврт во сезоната. Шанса за Салах повторно да ја пронајде својата најдобра верзија и да го поведе Ливерпул назад кон врвот на табелата.

Крилниот напаѓач на Ливерпул, Мохамед Салах, постигна гол во натпреварот од 10. коло од Премиер лигата против Астон Вила.

Со овој гол Салах стигна до 279 гола и асистенции во Премиер лигата (190 гола и 89 асистенции), исто колку и легендата на Челзи, Френк Лампард , кој има 177 гола и 102 асистенции.

Само Вејн Руни (311 гола и асистенции) и Алан Ширер (324) остануваат повисоко на оваа ранг-листа.

Покрај тоа, постигнатиот гол беше 250-ти на 33-годишниот Египќанец за Ливерпул во сите натпреварувања.

Да потсетиме дека Ливерпул ја победи Астон Вила со резултат од 2-0.