Одличните настапи на Педри во дресот на Барселона, му донесоа на неговиот претходен состав Лас Палмас околу 18 милиони евра во вид на различни бонуси.

Каталонците кои во 2019 година го купија 21- годишниот играч од средниот ред за 5 милиони, во последните 5 години мораа да ги исполнат условите и да му исплатат одредена сума на Лас Палмас.

Така, вкупната за трансферот достигна  23 милиони. Медиумите наведуваат дека евентуален трансфер на Педри во друг состав, ќе му донесе на Лас Палмас нови 15 проценти од сумата што ќе биде платена.

Фудбалерот на Олимпијакос, Ајуб Ел Кааби, кој го постигна решавачкиот гол за победа против Фиорентина во вчерашното финале во Конференциската Лига постави рекорд по бројот на голови во плеј-офот на европските купови.

Тој на девет средби успеа да дојде до бројката од 11 голови. Веднаш до него е Португалецот, Кристијано Роналдо, кој има 10 голови во плејофот на Лигата на шампионите во 2017 година и Французинот, Карим Бензема кој таквиот ефект го направи во 2022 година.

Колумбиецот, Радамел Фалкао, во 2011 година успеа во Лига Европа да дојде до 10 погодоци.

Астон Вила нема намера да го откупи Николо Заниоло и тој на крајот од сезоната ќе се врати во Галатасарај.

Италијанецот не сака да остане во Турција и сака да се врати во Серија А, а два гиганти веќе ја започнаа трката за неговиот потпис.

Милан и Јувентус внимателно ја следат ситуацијата и сакаат на лето да го доведат во своите редови.

Цената на Заниоло во моментов изнесува 20 милиони евра, сума која двата клуба се спремни да ја платат.

Примарна цел на Манчестер Сити во летниот преоден рок ќе биде засилување на средниот ред, а најголема желба е ѕвездата на Њукасл, Бруно Гимараеш.

Голем интерес за неговите услуги покажуваат неколку европски гиганти, а најсериозен е интересот на Манчестер Сити.

Гимараеш неодамна го продолжи договорот со „чавките“, но во него има откупна клаузула, а Сити веќе стапил во контакт со неговиот агент.

Њукасл остана без играње во Лигата на шампиони, па 27-годишниот Бразилец сака да ја промени средината, а трката за неговиот потпис веќе започна.

Англиските медиуми тврдат дека Сити ќе ја победи конкуренцијата и е во пол-позиција за неговиот потпис.

Белгискиот селектор Џакомо Тедеско, изненади сите со составот на Белгија за Европското првенство во Германија 2024, откако не го повика првиот голман Тибо Куртоа кој го чува голот на Реал Мадрид, и кој се врати после тешката повреда.

Тедеско објасни дека Куртоа и натаму не е подготвен да игра за Белгија, но чуден е фактот што тој брани во финишот на сезоната за Реал Мадрид, па дури може да се најде меѓу диреците во финалето во ЛШ на први јуни во Лондон.

„Тибо најдобро си го познава своето тело. Тој не е подготвен за настап на Европско првенство“, рече Тедеско.

Голманот на Краснодар и руската фудбалска репрезентација Матвеј Сафонов пристигна во Париз на лекарски преглед, пред да потпише за Пари Сен Жермен.

Клубовите го договорија трансферот на 25-годишниот голман. Договорот ќе биде на пет години, а Краснодар ќе заработи 20.000.000 евра обештетување.

Во сезоната која заврши викендов, Сафонов одигра 30 натпревари за Краснодар во руската Премиер лига и во 11 од нив ја зачува својата мрежа.

Во последното коло неговиот клуб го победи Динамо од Москва со резултат 1:0 и го освои второто место, зад Зенит и пред Динамо. Сафонов во неделата беше прогласен за најдобар голман во сезоната 2023/24. во Русија.

Голот на Краснодар го чува од 2019 година.

Саудискиот шампион Ал Хилал го награди својот тренер Хорхе Жесус по освојувањето на титулата.

Португалскиот стратег потпиша продолжување на договорот со клубот. Тоа беше потврдено денеска со објава и на социјалните мрежи.

Во соопштението се наведува дека двете страни потпишале продолжување на соработката за уште една година.

69-годишниот Жесус дојде во Ал Хилал во летото 2023 година и досега на саудискиот гигант му ги обезбеди пехарите во првенството и Суперкупот на Саудиска Арабија.

Капитенот на Наполи, Џовани Ди Лоренцо изгледа се подалеку од Неапол, откако самиот им најавил на директорите на клубот дека летово сака да си замине. Ди Лоренцо е незадоволен од односот на клубот, но и од разочарувачката сезона.

Агентот на играчот Џуфреди беше јасен и се чини дека ниту доаѓањето на Антонио Конте не е позитивен сигнал за да го предомисли Ди Лоренцо. Во Италија се зборува дека репрезентативниот бек преговара со Јувентус и најверојатно ќе замине во Торино бидејќи е во одлични релации со директорот на „старата Дама“, Кристијано Џунтоли. Двајцата имаат голема меѓусебна почит од периодот на заедничка работа во Наполи. Всушност, пред неколку години токму Џунтоли го донесе Ди Лоренцо во Наполи по одличната сезона со Емполи. Ди Лоренцо има договор со Наполи до 2028 година и доколку Јуве сака да го купи ќе мора да плати околу 20 милиони евра.

Бразилскиот централен дефанзивец Фабрисио Бруно ќе биде првото ново засилување на Вест Хем во летниот преоден рок, објави новинарот Фабрицио Романо. 28-годишниот Бруно доаѓа од тимот на Фламенго и ќе биде првиот трансфер на новиот менаџер на „чеканите“, Хулен Лопетеги.

За неговите права Вест Хем ќе плати 12 милиони евра, а уште 1,5 милиони ќе бидат како бонуси. Оваа сезона Бруно го доби својот прв повик во репрезентацијата на Бразил и забележа учество на два натпревари по 90 минути во контролите со Англија и Шпанија. Во својата кариера, дефанзивецот играше само во тимови во Бразил.

Чави Хернандез денеска и официјално потпиша меѓусебен раскин на соработката со Барселона, која уште пред неколку дена го потврди неговото заминување.

Каталонските медиуми открија дека Чави одлучил да се откаже од платата во последната година од договорот, со што клубот заштедил меѓу 11 и 12 милиони евра.

Но, единствениот услов му бил остатокот од стручниот штаб да биде платен до крајот на договорот, односно до летото 2025 година, колку што е вкупната сума за сите – околу три милиони евра.

Покрај тоа, Чави одби да има проштална конференција и каква било церемонија, сакаше да си замине тивко и без преголема бура и одговарање на бројни прашања. На последната конференција пред мечот со Севиља веќе се знаеше дека си заминува, а потоа џентлменски се прости од сите припадници на „седмата сила“, додека истото го направи и со играчите на последниот тренинг.

Чави си замина како господин, по две и пол години, а од тој ноември 2021 година ја освои Ла Лига и Суперкупот на Шпанија.