Ралф Рангник дефинитивно ќе го напушти фудбалскиот состав на Манчестер Јунајтед и ќе се насочи само кон обврските како селектор на Австрија.

„Имав разговори со раководните лица и дојдовме до заклучок дека ќе биде најдобро за нив и за мене да го раскинеме договорот  за советник во клубот“, изјави Германецот кој досега беше тренер на „црвените ѓаволи“.

Неговото место од неодамна го зазеде Холанѓанецот, Ерик тен Хаг, кој успеа да ја освои тутулата со Ајакс во шампионатот на Холандија.

Американската компанија „Red Bird“ за 1,3 милијарди евра го откупи мнозинскиот дел од акциите на италијанскиот гигант Милан.

Весникот Тутоспорт пренесува дека американците ги потпишале сите потребни документи потребни за преземање на клубот од досегашните сопственици, групацијата Елиот кои го водеа клубот од 2018 година.

Договорот во името на компанијата од Америка го потпиша нејзиниот основач и прв човек, Гери Кардинале. 

Екипата на Милан после пауза од 11 година, сезонава го освои трофејот во Серија А.

Офанзивецот на Ред Бул Лајпциг и репрезентативец на Франција, Кристофер Нкунку меѓу редови го најави неговиот следен клуб.

За одличниот фубалер кој остави одличен впечаток во Бундеслигата оваа сезона има интерес од Манчестер Јунајтед и ПСЖ, а според неговата последна изјава тој попрво би се одлучил да направи трансфер во тимот на ПСЖ од каде и потекнува.

„Париз е мојот дом, таму е мојот омилен клуб. Не ги затворам вратите за трансфер, се е можно во фудбалот.

Убаво е кога најголемите светски клубови се интересираат за мене. Но исто така одлично е да се види дека Лајпциг прави се што  е во нивна моќ за да ме задржи“, изјави Нкунку.

Клупската фудбалска сезона е завршена, но за најдобрите фудбалери нема одмор. Наскоро започнува Лигата на нации, а многу брзо ќе започне и новата сезона бидејќи Светското првенство ќе направи големи поместувања во термините.

Шампионот на Англија со Манчестер Сити, и репрезентативецот на Белгија,Кевин Де Брујне отворено изјавува дека распоредот на натпревари е многу густ и дека за него Лигата на нации е небитно натпреваурање.

„За мене Лигата на нации не е битна. Мора да ги одиграме тие дуели, но тоа се само преценети натпревари, некој вид на тренинг. Сите ние имавме многу напорни сезони. Како играч можам да кажам дека ни е потребен одмор, но го работиме тоа што ќе ни се каже и тоа е тоа. Имаме само околу три недели одмор на секои 12 месеци“, потенцира Де Брујне.

Европската фудбалска унија го избра идеалниот тим на Лигата на шампиони за сезоната 2021/22. Во „дрим-тимот“ свое место најдоа четворица фудбалери од освојувачот на трофејот, Реал Мадрид. Тоа се Тибо Куртоа, Лука Модриќ, Карим Бензема и Винициус Жуниор.

Остатокот од тимот го сочинуваат играчите на Ливерпул:Трент Александер-Арнолд, Енди Робертсон, Вирџил ван Дијк и Фабињо, потоа Антонио Рудигер од Челзи, Кевинд Де Брујне од Манчестер Сити и Килијан Мбапе од ПСЖ.

Карим Бензема е прогласен за најдобар играч во ЛШ , а нему му припадна и титулата најдобар стрелец со 15 погодоци.

Лионел Меси зборуваше за успехот на Реал Мадрид оваа сезона во Лигата на шампионите и за емоциите по поразот од кралскиот клуб во осминафиналето на најелитното европско натпреварување.

Во нереалниот поход кон 14. трофеј во Лигата на шампионите, Реал Мадрид зад себе ги остави Пари Сен Жермен (шеснаесетфинале), Челзи (четвртфинале), Манчестер Сити (полуфинале) и Ливерпул (финале), иако по општо мислење се веруваше дека во сите овие дуели беше во подредена позиција.

Лео Меси памети голема тага по елиминацијата.

„Реал тогаш нѐ уби. Сите нас: јас, сите во соблекувалната, целиот наш тим. Го познавам Реал Мадрид затоа што играв против нив со години. И знаев дека такво нешто може да се случи. Нивниот гол од никаде целосно ја промени играта. Истото се случи и со другите тимови: Челзи, Манчестер Сити, Ливерпул. Не го намалувам успехот на Реал Мадрид, тие ја освоија Лигата на шампионите, но не беа најдобриот тим оваа година, а сепак освоија сѐ“, изјави Линоел Меси.

Роберт Левандовски изјави дека неговиот трансфер од Баерн Минхен ова лето ќе биде најдобар исход за двете страни.

„Од денеска едно е сигурно, а тоа е дека мојата приказна со Баерн е завршена. Не можам да замислам да продолжам со добра соработка. Верувам дека трансферот е најдоброто решение за двете страни. Се надевам дека Баерн нема да го спречи мојот трансфер само затоа што има можност да го направи тоа“, изјави Левандовски на прес-конференција.

Полскиот напаѓач има договор со Баерн на уште една година, но експлицитно изрази желба да го напушти клубот на лето.

Коментарот на Левандовски веројатно нема да биде добро прифатен во Баерн, бидејќи спортскиот директор Хасан Салихамиџиќ и извршниот директор Оливер Кан најавија дека Левандовски ќе остане во клубот до крајот на договорот.

Медиумите наведуваат дека агентот на Левандовски, Пини Захави и Барселона усно се договориле за тригодишен договор, но дека Баерн е цврст на ставот дека Левандовски не е на продажба.

Фудбалерот од средниот ред на Реал Мадрид, Тони Крос, после финалниот натпревар од Лигата на шампионите и победата над Ливерпул со 1:0, најави дека ќе остане во екипата до 2024 година.

„Ја прифатив понудата од раководството и решив да останам овде уште две години“, порача Тони Крос.

32-годишниот Германец, е фудбалер на Реал од 2014 година каде пристигна од тимот на Баерн Минхен. Неговиот актуелен договор истекува во јуни 2023 година, но сега ќе го продолжи истиот до 2024.

Аргентинецот Лионел Меси, седум пати во својата кариера е добитник на наградата Златна топка, и сега нема дилема кој би требало да ја освои наградата на следната церемонија.

„Не постои никаква дилема. Јасно е дека Карим Бензема има одлична година позади себе. Тој беше клучен играч на Реал Мадрид од осминафиналето до крајот на Лигата на шампиони која ја освои Реал“, истакнува Меси.

На патот кон титулата, Реал во осминафиналето беше подобар од ПСЖ, тим за кој од минатата сезона настапува Лионел Меси.

„Тој реванш натпревар против Реал не уби како екипа. Имавме големи очекувања во Лигата на шампионите“, изјави Меси.

Златната топка ќе биде доделена на 17.Октомври, а имињата на кандидатите ќе бидат познати на 12.август.

Поранешниот македонски репрезентативец Иван Тричковски е добитник на Златната копачка за најдобар стрелец во првенството на Кипар изминатава сезона.

Тричковски беше стрелец на 15 првенствени гола за својот клуб АЕК Ларнака. Тој е најдобриот странски фудбалер во историјата на својот клуб.