По завршувањето на сезоната, Ернесто Валверде ќе се раздели со Атлетик Билбао, а клубот веќе има решение за негов наследник.

Иако во игра беше и Андони Ираола, кој ќе го напушти Борнмут, изборот паднал на Един Терзиќ.

Поранешниот стратег на Борусија Дортмунд последен пат беше активен во 2024 година кога стигна до финалето во Лигата на шампионите, каде загуби од Реал Мадрид, по што остана без ангажман.

И покрај интересот од клубови како Рома, Манчестер Јунајтед, Волфсбург, Ајнтрахт Франкфурт и Баер Леверкузен, Един Терзиќ не прифати нов предизвик, но сега е подготвен за враќање и преземање на Атлетик Билбао.

Од таборот на „старата дама“ соопштија дека Аркадиуш Милик заработил повреда на задната ложа, медиумите шпекулираат дека напаѓачот ќе паузира помеѓу четири и пет недели со што практично за него е завршена сезоната.

Аркадиуш Милик во последните две години не може да крене глава од повреди, Полјакот не одигра ниту една минута во сезоната 2024/25.

Тој конечно се врати на терените минатиот месец, одигра десетина минути против Сасуоло, а потоа доби и 25 минути на почетокот од апри против Џенова.

Но напаѓачот на вчерашниот тренинг заработи нова повреда, настрада задната ложа на десната нога.

Од таборот на Јувентус порачаа дека за десет дена ќе бидат направени нови тестови, но како што пренесуваат медиумите, Аркадиуш Милик ќе паузира помеѓу четири и пет недели, со што практично за него сезоната е завршена.

Според Калчо и Финанца, голгетерот оваа сезона го чини Јувентус околу 3,62 милиони евра, а неговиот учинок на теренот е минимален.

Манчестер Јунајтед ќе биде без услугите на Хари Мегваер за гостувањето кај Челси в сабота во натпревар од Премиер лигата.

Англискиот стопер веќе отслужи суспензија и за дуелот против Лидс Јунајтед, кој Јунајтед го загуби со 2-1 на домашен терен, по црвениот картон заработен на 20 март против Борнмут.

По тој инцидент следуваа и дополнителни обвинувања за неговото однесување кон четвртиот судија при напуштање на теренот.

Мегваер ја прифатил вината и е казнет со уште еден натпревар суспензија, а покрај тоа ќе мора да плати и парична казна од 30.000 фунти.

Ова значи дека тренерот Мајкл Керик ќе биде без двајцата стандардни стопери, бидејќи и Лисандро Мартинез е суспендиран по исклучувањето на натпреварот против Лидс.

Барселона доцна синоќа оствари пирова победа на гостувањето кај Атлетико Мадрид со 2-1 во четвртфиналето во Лигата на фудбалските шампиони бидејќи избраниците на Ханси Флик се елиминирани со вкупни 3-2.

„Разочарани сме. Имавме многу можности, особено во првото полувреме. Имавме шанса да постигнеме трет гол, но наместо тоа примивме еден. Tребаше да се подобриме, но на крајот тимот даде сè. Тие направија одлична работа. Наредниот чекор е да ја освоиме Ла Лига“, рече тренерот на Каталонците.

Челниците на фудбалскиот состав Јувентус сакаат да го задржат на подолг рок капитенот Мануел Локатели, се наведува денеска во дел од медиумите на „чизмата“.

28-годишниот италијански репрезентативец и клубот од Торино се согласија да го продолжат неговиот договор до 2030 година. Тековниот му беше валиден до јуни во 2028 година.

Играчот од средниот ред настапува за „старата дама“ од 2021 година. Тој во сезонава одигра 30 мечеви со еден гол и две асистенции.

Женската фудбалска репрезентација го продолжи настапот во квалификациите за пласман на Светското првенство. Во меч од третата рунда нашата селекција во Битола ја пречека Унгарија, која на крајот забележа убедлива победа од 5:0.

„Унгарија е сериозен противник, фаворит за освојување на првото место во групата и тоа го докажа на дуелот во Битола. И овој натпревар беше уште една можност за оваа талентирана генерација да го стекне неопходното искуство кое во иднина ќе овозможи вакви мечеви да се играат на далеку повисоко ниво. Би сакал да го потенцирам настапот на Теона Галабовска која од натпревар во натпревар игра се подобро и го потврдува големиот талент. Како награда за тоа што го прикажа на теренот, решив во финишот таа да ја носи и капитенската лента. Сметам дека Теона треба да го почувствува моментот кога треба да е лидер на екипата бидејќи од тоа го очекуваме во иднина”, изјави селекторот Александар Андов.

И покрај високиот пораз, предводникот на националниот тим е задоволен од прикажаното со конкретни забелешки за играта во одредени сегменти од екипата.

„Во принцип задоволен сум од прикажаното. Во одредени ситуации одигравме она што претходно беше договорено. За жал скапо ја плативме цената на деконцентрацијата во дефанзивата, а на моменти потфрлија и фудбалерките во средниот ред. Премногу рано примивме два гола, Унгарките веќе по десет минути игра имаа голема предност”, продолжи Андов.

По подолга пауза имаме една талентирана генерација на млади фудбалерки кои во своите возрасни категории беа дел од елитните квалификации и имаа можност да играат против најсилните селекции од Стариот континент. Станува збор за фудбалери кои во блиска иднина треба да бидат рамноправни противници со репрезентациите кои дел од големите натпреварувања.

„Нашата цел е јасна, градиме нова селекција во која шанса ќе добиваат младите фудбалерки. Вакви натпревари за нив се одлична можност за напредок. Верувам во овие девојки и се надевам дека на следниот дуел во Унгарија ќе играме многу подобро. Тоа се поткрепува со фактот дека бевме рамноправни во второто полувреме што значи дека во овој тим има потенцијал за да игра на повисоко ниво”, потенцираше предводникот на националниот тим.

Фактот дека уште една репрезентација е дел од елитен квалификациски турнир, Андов не можеше да смета на сите фудбалерки. Дел од нив во моментов го носат дресот на селекцијата до 17 години.

„Точно е дека на овие средби со Унгарија играме некомплетни. Со колегата Кирил Изов мораше да се договориме кои фудбалерки ќе бидат дел од А селекцијата, а кои ќе настапат за националниот тим до 19 години кој е дел од елитните квалификации за Европското првенство. Во Шкотска заминаа помладите фудбалерки за кои во моментов е подобро да играат со противници од својата генерација. Нивното отсуство го надополнија неколку фудбалерки кои се дел од репрезентацијата до 17 години кои исто така во иднина треба да ја засилат конкуренцијата во сениорскиот тим. Заедно со моите колеги од стручниот штаб работиме да изградиме еден добар тим, кој во блиска иднина треба да биде конкурентен во дуелите со најдобрите селекции од Европа”, заврши Андов.

По испаѓањето на Барселона од Атлетико во Мадрид, Рафиња остро го критикуваше судењето и предизвика голема бура во фудбалската јавност.

Иако не играше на „Метрополитано“, поради повреда, бразилскиот крилен напаѓач сепак даде изјава по натпреварот. Во интервју за бразилските медиуми, тој отворено изјави дека неговиот тим е оштетен:

„Ова беше грабеж, многу проблематично судење. Одлуките што ги донесоа беа неверојатни. Атлетико Мадрид направи не знам колку фаули и не доби ниту еден жолт картон. Сакам да го разберам тој страв од Барселона да продолжи понатаму“, рече Рафиња.

„Не сум некој што сака да зборува за судиите, но ова е навистина премногу. Момците играа совршено, но играчите на Атлетико направија милион прекршоци за кои главниот судија не им покажа жолт картон. Многу од тие прекршоци тој дури и не ги виде, само мавташе со рацете.

Каков проблем имаат судиите со Барселона? Дали се плашат од Барселона од некоја причина? Мораме да се трудиме три пати повеќе од нашите ривали во секој натпревар ако сакаме да победиме, и јасно е зошто. Зошто е проблем за Барса да продолжи понатаму, дали мора да крадете од нас во секој натпревар?“.

Во ред е да се случи еднаш или двапати, сите сме луѓе и сите правиме грешки, но ова веќе станува видлив шаблон. Бевме ограбени во овие два натпревари на срамен начин. Никој не може да ме убеди дека во два натпревари против Атлетико во Лигата на шампионите, вакви работи се случуваат со судијата сосема случајно.“

Неговите изјави брзо одекнаа низ цела Европа, а сè повеќе луѓе зборуваат за можната реакција на УЕФА.

Имено, според Дисциплинските прописи на УЕФА, ваквите изјави може да претставуваат прекршување на основните правила на однесување. Член 11 наведува дека секое „навредливо однесување или однесување што на кој било начин ги крши основните правила на пристојно однесување“, како и однесување „што му штети на угледот на фудбалот, а особено на УЕФА“, е казниво.

Во пракса, ова значи дека Рафиња би можел да биде суспендиран до три натпревари во Лигата на шампионите. Во тој случај, тој би ја отслужил казната на почетокот на следната сезона.

Сличен случај веќе постои, во кој е вклучен неговиот сонародник Нејмар, поранешен играч на Барселона. Во 2019 година, тој беше казнет за објави на социјалните мрежи по натпреварот ПСЖ-Манчестер Јунајтед, во кој исто така жестоко го критикуваше судењето.

Атмосферата на Енфилд стана уште помрачна по елиминацијата од Лигата на шампионите, откако медицинските прегледи ги потврдија најцрните претпоставки. По деталните тестови извршени утрово, Ливерпул официјално соопшти дека нивниот напаѓач Хуго Екитике добил руптура на Ахиловата тетива. Сликата на 23-годишниот голгетер кој во солзи го напушти теренот на носила сега добива трагичен контекст, за фудбалерот кој се наоѓаше во врвна форма, тајмингот на оваа повреда не можеше да биде полош.

Медицинскиот тим на „Црвените“ презентираше сурова прогноза за закрепнувањето на Екитике, проценувајќи дека тој ќе биде надвор од стројот најмалку девет месеци. Ова практично значи крај на неговата сезона, но и бришење на целата преостаната календарска 2026 година. Според тековните проекции, Екитике се очекува да се врати на терените дури во јануари 2027 година. За Ливерпул, ова е огромен хендикеп во битката за домашните трофеи со оглед на неговите 17 гола сезонава, но за самиот играч, последиците се далеку подлабоки од клупските амбиции.

Најболниот аспект на денешната вест е дефинитивното отсуство на Екитике од претстојното Светско првенство. Како нов стандарден член на француската репрезентација, тој требаше да биде едно од откритијата на светската сцена ова лето. Наместо тоа, младиот напаѓач сега се соочува со психолошкиот товар на долгата рехабилитација од повреда која е позната по тоа што често ја одзема експлозивноста кај спортистите. Додека фудбалскиот свет испраќа пораки за поддршка, останува отворено прашањето: Дали еден од најсветлите таленти на Франција некогаш ќе го достигне неговото вистинско ниво?

По болниот пораз од Атлетико Мадрид во Лигата на шампионите синоќа, Ламин Јамал се обрати до навивачите на „Блауграна“ со емотивно писмо:

Во духот на филозофијата „Повеќе од клуб“, Јамал испрати порака на пркос и издржливост. Признавајќи ја болката од поразот, тој потенцираше дека искачувањето кон врвот никогаш не е лесно. „Дадовме сè, но не беше доволно“, призна тој, дефинирајќи го неуспехот како само една станица од подолг процес. Неговата реторика се потпира на упорноста, подвлекувајќи дека „предавањето не е опција“. Наместо дефетизам, Ламин на грешките гледа како на лекции, обидувајќи се да проектира зрелост која ги надминува неговите години.

Највпечатливиот дел од писмото е храброто, речиси дрско ветување за враќање на европскиот трон. Повикувајќи се на семејните вредности, Јамал порача. „Моите родители ме научија дека машкиот збор секогаш се држи… ќе ја донесеме Лигата на шампионите тука“. За клуб кој зад себе има тешка деценија на континенталната сцена, ваквата изјава е меч со две острици. За оптимистите, ова е шампионски менталитет неопходен за враќање на Барса таму каде што припаѓа; за скептиците, пак, ова е преголем товар за плеќите на еден тинејџер.

Сепак, писмото не помина без критики. Дел од навивачите останаа скептични, посочувајќи на момент од натпреварот кој се коси со неговата порака за тимско единство. Додека Фермин Лопез лежеше на тревата со раскрвавен нос по судир со противничкиот голман, камерите го снимија Јамал како седи на топката, наизглед фокусиран на создавање „иконична“ фотографија. Овој контраст поттикна дебати: дали неговиот завет е вистинска лидерска намера или само добро спакуван ПР-маркетинг во ера каде социјалните мрежи често се поважни од реалноста на теренот.

Во светот на фудбалските трансфери, шпекулациите често добиваат своја сопствена насока, но Гордон Стипиќ реши конечно да ги приземји гласините. Со невообичаена директност, менаџерот на Хакан Чалханоглу ги демантираше константните написи кои го поврзуваат турскиот маестро со враќање во татковината, поконкретно во редовите на Галатасарај. „Како општо правило, не коментирам шпекулации, но во овој случај е важно еднаш засекогаш да ги разјаснам фактите“, дециден е Стипиќ.

Тој нагласи дека, и покрај звучните наслови, зад сцената не се случува ништо во врска со евентуален трансфер во Истанбул. Фактите се јасни: ниту минатото лето, ниту во текот на јануарскиот преоден рок, немало никакви преговори со турскиот гигант. Според Стипиќ, досега не стигнало ниту едно конкретно прашање или понуда, со што ги отфрли сите тврдења дека договорот е во подготвителна фаза.

За навивачите на Интер, најважната вест е дека Чалханоглу е максимално среќен на Сан Сиро. Со важечки договор до јуни 2027 година, 32-годишниот играч е столб во тимот на Чиву. Стипиќ подвлече дека Хакан ужива во Милано и во клубот, со што ги прекина сите нагадувања за негово предвремено заминување од Италија.

Во моментов, фокусот на фудбалерот е исклучиво насочен кон трофеите. Додека Интер води жестока битка за одбрана на титулата, неговиот агент напомена дека Хакан е „целосно фокусиран на она што е навистина важно: борбата за Скудетото и заедничкиот успех со тимот“. Неговите настапи на теренот, каде недела по недела ја демонстрира својата страст и квалитет, се најдобар доказ за неговата посветеност кон црно-синиот дрес.

Покрај клупските обврски, Чалханоглу на своите плеќи ја носи и одговорноста за турската репрезентација. Како капитен кој ќе ја предводи својата земја на претстојното Светско првенство, тој на оваа улога гледа со огромна чест и гордост. Стипиќ истакна дека капитенската лента за него значи сè и претставува посебен мотив во оваа фаза од кариерата.

Изјавата на агентот заокружува слика за играч кој е во својот професионален врв и целосна зрелост. Без разлика дали ја диктира играта во Серија А или се подготвува за историскиот настап на мундијалот, иднината на Хакан Чалханоглу останува цврсто врзана за Милано и елитното ниво на европскиот фудбал.