Манчестер Јунајтед соопшти дека репрезентативците на Данска Расмус Хојлунд и Кристијан Ериксен заработија повреди на првенствениот натпревар против Лутон и нема да настапуваат за тимот наредниот период.

Ериксен има повреда на левото рамо и првичната проценка е дека тој ќе биде надвор од фудбалските терени наредните месец дена.

Хојлунд има истегнување на бутниот мускул и тонајверојатно ќе отсуствува до крајот на ноември.

Двајцата играчи нема да бидат достапни и за репрезентативните дуели на Данска во квалификациите за Еуро против Словенија и Северна Ирска.

Бразилскиот голман и член на Манчестер Сити, Едерсон, поради повреда ќе ги пропушти претстојните натпревари на репрезентацијата против Колумбија и Аргентина во квалификациите за пласман на Светското првенство.

Едерсон настапите ги откажал поради повредата на стапалото која ја добил на неделниот натпревар од Премиер лигата против Челзи.

Популарните „кариоки“ во четврток гостуваат во Колумбија а потоа на домашен терен го играат јужноамериканското дерби против Аргентина.

Најдобриот фудбалер на Атлетико Мадрид, Антоан Гризман е подготвен да го продолжи договорот со мадридскиот клуб. Откако стана јасно дека Диего Симеоне ќе остане на клупата на Атлетико со нов договор кој го потпиша минатата недела, сега и Французинот се подготвува да стави потпис на продолжена соработка со „јорганџиите“.

Минатата недела, тренерот на Атлетико Мадрид потпиша нов договор со клубот до 2027 година.

„Тој е многу добар тренер, идеален за клубот. Мигел Анхел Гилдобро го знае ова. Сега е мој ред“, изјави напаѓачот на Атлетико, потврдувајќи ги гласините дека преговара за нова соработка со клубот.

Баерн Минхен оствари рекордни 854,2 милиони евра приход во фискалната 2022/23 година. Баварскиот гигант објави дека го надминал највисокиот приход од 750 милиони евра остварен во претпандемиската 2018/19 година. година.

„Баерн може уште еднаш да погледне наназад на исклучително успешната финансиска година. Во тешко економско опкружување обележано со инфлација и рецесија во Германија, постигнавме рекорден промет и значително зголемување на профитабилноста во однос на претходната сезона. Овие резултати ја покажуваат нашата сила“, рече потпретседателот на клубот Михаел Дидрих.

Добивката на клубот пред оданочување е 54,5 милиони евра, додека добивката по оданочување е 35,7 милиони евра што е зголемување за 23 милиони евра во однос на претходната сезона.

Барселона е силно заинтересирана за дефанзивниот играч за врска на Лестер, Вилфред Ндиди, пренесуваат медиумите на Островот.

Чави сака еден играч од средниот ред со дефанзивни карактеристики, но клубот нема голем буџет на располагање. Ндиди игра одлична сезона со Лестер во Чемпионшип и на 13 меча постигна 1 гол и запиша три асистенции.

Договорот на Ндиди со Лестер истекува на крајот на сезоната, па Барселона сака да го доведе во јануари за симболична сума.

Нигериецот своевремено беше доведен како наследник на Канте, а и минатата сезоната беше една од ретките светли точки во тимот.

Фудбалерите на Ливерпул денеска славеа очекувана победа против Брентфорд на „Енфилд “ со 3-0 во меч од 12. коло на Премиер лигата.

Египетскиот репрезентативец, Мохамед Салах, погоди во 39 и во 62 минута и прослави јубилеј.

Тој дојде до 200 погодоци во англиската елита. Од нив 198 ги постигна како играч на Ливепул а два во дресот на Челзи.

Милан влезе во серија од разочарувачки резултати, иако очекувањата на „росонерите“ оваа сезона беа многу големи.

Милан вчера повторно испушти два гола предност на гостувањето кај Лече и на крајот се спасуваше од пораз.

Во изминатите четири меча во Серија А Милан освои само еден бода и се оддалечи од врвот, па практично испадна од трката за скудетото. Клубот се уште не размислува за отказ на Пиоли, но тренерот повеќе не ужива голема доверба кај раководството.

„Скај Италија“ пренесува дека Милан сака да има спремна замена за Пиоли во случај да продолжат лошите резултати, а прва желба е екс тренерот на Челзи, Грем Потер, кој моментално е без ангажман.

Арсенал и Барселона се силно заинтересирани за бисерот на Атлетик Билбао, Нико Вилијамс.

Нико е брат на Инаки Вилијамс, важи за еден од најголемите шпански таленти во моментов и веќе има 10 настапи за шпанската репрезентација. Тој е дете на Атлетик Билбао и има договор со клубот до 2024 година, а баскискиот клуб прави се за да го задржи во своите редови.

Многу клубови се заинтересирани за неговиот потпис, но според информациите главната битка ќе ја водат Барселона и Арсенал.

Вилијамс уште во јануари може да потпише преддоговор со новиот клуб бидејќи на лето ќе биде слободен агент.

Фабрицио Романо кој важи за експерт за фудбалски трансфери, денес излезе со сензационална најава на социјалните мрежи. Македонскиот репрезентативен голман, Столе Димитриевски, на маса има понуди од две екипи од Ла Лига и веќе во јануари ќе ги започне преговорите за трансфер.

Се работи за најтрофејната екипа во Лигата на Европа, Севиља, како и поранешниот освојувач на истото ова натпреварување, Виљареал.

Договорот кој Столе Димитриевски го има со сегашниот клуб Рајо Ваљекано истекува следното лето и трансферот би го направил како слободен агент, а веќе во јануари ќе започнат преговорите за личните услови. Нашиот репрезентативен голман веќе петта сезона е незаменлив на голот на клубот од предградието на Мадрид, а импресивни се и неговите настапи оваа сезона, што секако го привлече вниманието на големите шпански клубови.

Столе Димитриевски кој потекнува од Куманово, своите први сениорски настапи ги имаше за екипата на Работнички, каде мина две сезони. Следуваше трансфер во Удинезе, каде не доби шанса и беше позајмуван во Гранада и Кадиз, па преку Гимнастик во 2019-тата пристигна во Рајо Ваљекано.

Димитриевски има 64 настапи за репрезентацијата на Македонија и е рекордер помеѓу голманите, а според бројот на настапи е меѓу 10-те на вкупната листа на фудбалери со најмногу репрезентативни настапи.