Поранешниот напаѓач на Манчестер Јунајтед, Мејсон Гринвуд игра одлично во Франција каде што сезонава пристигна во дресот на Марсеј.

Гринвуд после одличната сезона во Гетафе беше мета на многу европски клубови, но на крајот Марсеј ја доби битката за неговиот потпис. Гринвуд со Марсеј има договор до 2029 година, но неколку европски гиганти внимателно го следат.

Тој покажа дека е еден од најголемите европски таленти, а проблемите се веќе зад него, па многу европски гиганти покажуваат интерес за него.

Медиумите пренесуваат дека главната битка за неговиот потпис ќе ја водат Барселона и ПСЖ.

Германскиот фудбалски тренер Јирген Клоп, беше одликуван со Федерален орден за заслуги од претседателот на Германија, Франк-Валтер Штајнмаер, на церемонија во палатата Белви во Берлин.

Клоп беше меѓу 28-те наградени кои добија признание за „исклучителен придонес за вредностите на демократијата“.

Модераторката на настанот го претстави Клоп како добитник на наградата, истакнувајќи дека поранешниот тренер „станал одличен модел за многумина и извонреден фудбалски амбасадор, многу подалеку од светот на спортот“.

Премиер Лигата и  одговорните луѓе ја усвоија жалбата на Манчестер Јунајтед и го поништија црвениот картон што го заработи Бруно Фернандес на мечот против Тотенхем.

Португалецот беше исклучен во 42. минута кога судијата Каванаг му покажа директен црвен картон.

Тој негодуваше, стручниот штаб на Јунајтед исто така, но главниот арбитар остана на својата одлука и го испрати во совлекувална.

Поништениот црвен картон значи дека Бруно Фернандес нема да добие суспензија од три натпревари и ќе му биде на располагање на Тен Хаг.

Откако Манчестер Сити го совлада Слован Братислава со 4-0 во второто коло од групната фаза на Лигата на шампионите, „граѓаните“ го израмнија рекордот на градскиот ривал Манчестер Јунајтед за најдолга серија без пораз во историјата на Лигата на шампоните, кој изнесува 25 натпревари.

Во последните 25 натпревари во Лигата на шампионите, Манчестер Сити победил 17 пати и забележале 8 нерешени. Последен пат Манчестер Сити загуби од Реал Мадрид во полуфиналниот реванш во сезоната 2021/2022.

Минатата сезона Сити повторно беше исфрлен од „кралевите“, но ова беше по две нерешени средби и изведување пенали, што значи дека во рамките на регуларното време на игра на најпрестижното европско клупско натпреварување, избраниците на Пеп Гвардиола не го почувствувале поразот во последните две години и пет месеци.

Марио Балотели наскоро би можел да игра фудбал во шпанската трета лига.

Балотели во кариерата го носеше дресот на: Милан, Ливерпул, Олимпик Марсеј, а негов последен клуб беше Адана Демирспор од Турција. Според последните информации на „АС“ Италијанецот кој е без клуб преговара со клубот Интереси кој се натпревара во третата шпанска лига.

Преговорите за „АС“ ги поврдиле извори од клубот и наводно тие одат во добра насока. Балотели во претходните денови се поврзуваше и со трансфер во Бугарија во екипата на ЦСКА Софија, но очигледно од тоа нема да има ништо.

Фудбалерот, Лука Јовиќ, нема желба да го напушти тимот на Милан иако неодамна се појавија шпекулации дека напаѓачот може да си замине во јануарскиот трансфер период.  

Реално гледано, 26-годишниот интернационалец од Србија има мала минутажа кај тренерот, Фонсека, кој главно го држи на клупата за резерви.

Во меѓу време се појавија информации дека за потписот на Јовиќ се заинтересирани неколку екипи од Турција.

Раководството на Манчестер Јунајтед ќе треба да исплати отштета од околу 17,5 милиони фунти на менаџерот Ерик тен Хаг доколку одлучи да го отпушти Холанѓанецот.

Интересно, оваа сума е околу половина од она што „црвените ѓаволи“ го заштедиле по отпуштањето на 250 свои вработени во обид да ги намалат непотребните трошоци.

„Отпуштањето на Тен Хаг во јуни ќе ги чинеше Јунајтед околу 10 милиони фунти. Да го направат тоа сега, по едногодишното продолжување на договорот, ќе чини околу 17,5 милиони фунти. Ова е речиси половина од сумата што клубот ја заштеди со отпуштањето на 250 вработени“, објавија медиумите на Островот.

Манчестер Јунајтед доживеа нов понижувачки пораз во неделата, кога загуби од Тотенхем со 0-3 на домашен терен, што предизвика нов бран на шпекулации за иднината на менаџерот.

Некогашниот камерунски фудбалер Самуел Ето се најде во фокусот на јавноста поради заканите кои им ги испраќаше на селекторите на различни камерунски репрезентации, но сега е казнет од ФИФА поради недолично однесување на Светското првенство за жени до 20 години.

Според објаснувањето на светската Федерација, Ето го прекршил ФИФА кодексот според две точки со своите погрдни зборови за противниците и официјалните лица на натпревар на мундијалот, а во дадениот случај станува збор за осминафиналето меѓу Бразил и Камерун.

Ето ја прелил чашата на толерантност кај ФИФА и со своето некултурно однесување предизвика реакција од дисциплинците, кои денеска соопштија дека Самуел е суспендиран во период од шест месеци.

Според последните информации кои пристигнуваат од Франција, Усман Дембеле бил отстранет од тимот на Пари Сен Жермен поради расправија со тренерот Луис Енрике.

Дембеле како што се најавува нема да биде дел од составот на францускиот гигант за утрешниот натпревар во Лигата на шампионите.

Од почетокот на сезоната Дембеле настапи на сите шест натпревари во Лига 1 и во нив оствари учинок од четири гола и четири асистенции. Беше асистент Дембеле и во натпреварот против Рен во петокот навечер (3-1).

Во оваа ситуација за ПСЖ е добра вест што во составот по повредата се враќа Витиња и тој ќе може да настапи во Лондон.

Матија Мирков, по денешниот пораз од Работнички, поднесе оставка од позицијата главен тренер на Шкупи, имајќи ги предвид резултатите и сметајќи дека за клубот во овој момент е најдобро да се повлече, објави прволигашот од Чаир.

Управниот одбор на клубот известува дека ја прифатил оставката на тренерот Матија Мирков, благодарејќи му за досегашниот придонес како помошен тренер, но и како главен тренер, и му посакува многу успех во неговата кариера.

Матија Мирков секогаш ќе остане дел од нашето семејство. Ти Благодариме, стои во соопштението на Шкупи.

Тренерот Мирков, во образложението на оставката вели дека дал максимално се залагал за време на тренерската работа во Шкупи и му посака на тимот повеќе успех во понатамошниот дел од сезоната.