Репрезентативецот на Албанија, Томаш Стракоша кариерата по заминувањето од Брентфорд ја продолжува во Грција.

Стракоша потпиша договор на пет години со екипата на АЕК. Стрaкоша е роден во главниот град па за 29-годишниот чувар на мрежата ова е враќање дома.

Во Италија, Старкоша остави трага бранејќи за Салернитана и Лацио на 164 натпревари во кои на 48 ја сочува својата мрежа. Во редовите на Брентфорд, беше резервен голман, а во Грција пристигнува како слободен агент.

Поранешниот француски фудбалски репрезентативец Емануел Петит го критикуваше капитенот на „галските петли“, Килијан Мбапе за неговиот настап на ЕП.

„Мбапе мора да игра на следниот меч, но само затоа што противник е Шпанија. Против Португалија беше заменет на паузата во продолженијата кога требаше многу порано да го заменат. Физички не е добро, а му пречи и скршениот нос. Неговото ниво е недостојно за капитен на тимот. Не презема доволно одговорност на теренот. На ЕП 2024 не го покажува најдоброто од себе“, изјави легендарниот некогашен фудбалер.

Капитенот на аргентинската фудбалска репрезентација Лионел Меси ќе биде подготвен за вечерашното полуфинале на Копа Америка против Канада во Њу Џерси, изјави селекторот на репрезентацијата Лионел Скалони.

Меси се врати на теренот во четвртфиналето против Еквадор, откако го пропушти последниот натпревар од групната фаза поради повреда. Тој го одигра целиот натпревар, но изгледаше дека не е подготвен физички.

37-годишната ѕвезда на Интер Мајами промаши пенал за време на настапите на стадионот Хјустон.

„Лео е добро, ние сме мирни околу тоа. Неговото ниво на физичка состојба е добро, тој е клучен играч за нас“, призна Скалони.

Селекторот на Холанија, Роналд Куман изјави дека се гледа себеси како селектор на „лалињата“ уште неколку години. Претходно по разочарувачкиот пораз од Австрија тој самиот отвори простор за заминување од кормилото по ова ЕП.

„Сега за сега, како што изгледа ќе продолжам да бидам селектор. Мислам дека не можат повеќе да се ослободат од мене“, изјавил Куман, напоменувајќи дека планира да ја води Холандија и на Светското првенство во 2026 година.

Медиумите нагласуваат и дека на Куман му одговара селекторската работа во која нема толку многу обврски како во клупскиот фудбал, пред се поради здравствената состојба на неговата сопруга Бартина, на која и е дијагностициран рак на дојка.

Фудбалскиот шампион на Македонија, екипата на Струга ТЛ донесе уште едно големо засилување во пресрет на новата сезона. Од вчера ново засилување за стружани е Ланре Кехинде, кој е еден од деветте нови фудбалери кои ќе играат за Струга во новата сезона.

Нигериецот се сели крај езерото од екипата на Гостивар, каде настапуваше минатата сезона. Според информациите, тој со Струга ТЛ потпиша договор на една сезона.

Минатата сезона во ПМФЛ, Кехинде постигна 12 гола и забележа пет асистенции во 23 натпревари. Стружани денеска заминуваат за Братислава каде утре ќе го одиграат првиот меч против Слован во првото квалификациско коло од Лигата на шампионите.

Шпанскиот фудбалер Алваро Мората во пресрет на полуфиналето на Европското првенство даде изјава со која не криеше дека размислува за крај на репрезентативната кариера.

„Во фудбалот ништо не е невозможно, но понекогаш ми е тешко поради силните критики во Шпанија. Овој турнир сакам да го завршам на најдобар можен начин бидејќи ми е последен во дресот на репрезентацијата. Би можел да се простам по Европското првенство. Тоа можност, но не би сакал сега премногу да зборувам за тоа“, изјави Мората.

Англискиот судија Ентони Тејлор заврши со Европското првенство во Германија пренесува италијанскиот медиум „Газета дело Спорт“.

Тејлор е во центарот на вниманието по оштетувањето на домаќинот Германија кога во второто продолжение од четвртфиналниот дуел против Шпанија не досуди пенал по очигледна игра на рака на Марк Кукуреља во шестнаесетникот.

Десетина илјади Германци се уште потпишуваат петиција за преигрување на средбата со Шпанија, нешто што нема да се случи, но јасно е дека појавуање на Тејлор во центарот од продолжението од турнирот нема да биде добар маркетинг за турнирот и организаторот.

Реал Мадрид е блиску до купување на дефанзивецот на Лил, Лени Јоро, пренесува „Мундо Депортиво“.

Според изворот, Лил сака да добие 40 милиони евра за трансферот на Јоро. Се очекува дека клубовите сепак ќе можат да се договорат во наредните недели.

Претходно имаше информации дека ПСЖ се обидува да го ангажира дефанзивецот, но тој повеќе сака да игра во Реал Мадрид.

Да потсетиме дека минатата сезона Јоро учествуваше на 44 натпревари на сите турнири, на кои постигна три гола. Актуелниот договор на играчот со клубот е до летото 2025 година. Според информациите објавени на порталот Трансфермаркт, пазарната вредност на фудбалерот е 50 милиони евра.

Напаѓачот на репрезентацијата на Гана, Ернест Нуама од белгиски Моленбек потпиша четиригодишен договор со Олимпик Лион, а клубот за неговите права ќе плати 28,5 милиони евра.

Тој минатата сезона веќе настапуваше за францускиот тим како позајмен играч. Нуама остави впечаток во данскиот Нордсјеланд, каде одигра 49 натпревари помеѓу јануари 2022 и август 2023 година, постигнувајќи 20 гола.

Од почетокот на летниот преоден рок, клубот од Лион веќе потроши 158,5 милиони евра, а ги донесе Муса Ниакате од Нотингем Форест, Абнер Винисиус од Бетис Севиља и комплетирајќи ги трансферите на Орел Мангала и Саид Бенрама.

Белгискиот напаѓач Миши Батшуаји , кој претходно играше за Фенербахче, стана фудбалер на Галатасарај, објави прес-службата на клубот на социјалната мрежа Х. Да напоменеме дека напаѓачот пред да се пресели во Фенербахче успеа да игра и за Бешикташ.

30-годишниот Батшуаји играше за Фенербахче од 2022 година. За тоа време, напаѓачот одигра 75 натпревари за тимот од Истанбул на сите турнири, на кои постигна 44 гола и даде девет асистенции. Белгиецот во текот на кариерата настапуваше и за Стандард, Челзи, Марсеј, Борусија Дортмунд, Кристал Палас и Валенсија. Проценетата цена на фудбалерот, според интернет порталот Трансфермаркт, е 8,5 милиони евра.

Во сезоната 2023/2024, Галатасарај стана шампион на турската Суперлига, освојувајќи 102 бода. Тимот имаше три бода предност пред второпласираниот Фенербахче. Галатасарај има 24 шампионски титули на Турција во историјата.