Српскиот напаѓач во дресот на Фиорентина, Душан Влаховиќ, го изедначи рекордот на Кристијано Роналдо во Серија А, постигнувајќи 33 гола во една календарска година. 

Толкав број на голови нема постигнато ниту еден играч во италијанската лига дури од 1961 година. 

Влаховиќ оваа сезона во Серија А има 16 погодоци, и подобар скор од него во петте најаки лиги во Европа има само Роберт Левандовски кој во Бундеслигата за Баерн Минхен постигна 19 гола.

Сопственикот на фудбалскиот клуб Челзи, Роман Абрамович, доби португалско државјанство.

Тој сега освен рускиот и израелскиот, има и пасош на Португалија. Оваа вест ја потврдува неговиот портпарол кој ја извести јавноста дека Абрамович има португалско државјанство од 30.април оваа година.

Рускиот милијардер го искористи законот кој португалската држава го донесе во 2015 година а според кој му се нуди натурализација на секој евреин кој има наследници кои во средновековната инквизација биле протерани од Португалија.

Богатството на Абрамович се проценува на 14,3 милијарди долари а сопственик на Челзи е од 2003 година.

Иднината на Килијан Мбапе се уште е крајно неизвесна и никој не е сигурен каде младиот фудбалер ќе продолжи по крајот на оваа сезона.

Офанзивецот кој според многумина оваа сезона стагнира во формата ја игра последната година од договорот со ПСЖ и веќе во јануари ќе може да се договори со неговиот следен клуб кој би го ангажирал на лето како слободен агент.

Најсериозен кандидат за обезбедување на неговиот потпис е тимот на Реал Мадрид, но од ПСЖ не се откажуваат од намерата да го задржат фудбалерот во своите редови.

Тоа го потврди и спортскиот директор на клубот, Леонардо, кој пак не даде конкретен одговор дали самиот Мбапе изразил желба да остане на „Паркот на принцовите“.

„Килијан Мбапе е застрашувачко момче. Тој е поинаков од останатите, тој е фантастичен. Да, знае што сакаме ние, тоа е јасно како ден. Ќе видиме што ќе се случи на крај“, изјави Леонардо.

Арсенал е заинтересиран во своите редови да го доведе напаѓачот на Лил, Џонатан Дејвид пренесуваат медиумите на Островот.

После последните случувања јасно е дека Обамејанг повеќе нема иднина на „Емирати“ и на крајот на сезоната сигурно ќе го напушти клубот.

Прва желба за негова замена е токму Џонатан Дејвид, кој игра фантастична сезона во Лил и до сега има постигнато 14 гола.

Екипата на Јувентус веќе подолг период е заинтересирана за доведување на Антони Марсијал од Манчестер Јунајтед.

После неодамнешната изјава на 26-годишниот Французин дека е незадоволен од неговиот статус во тимот од „Олд Трафорд“ и дека планира заминување од Манчестер, од Јувентус имаат план да испратат официјална понуда за негов ангажман.

Понудата би била Марсијал во јануари да пристигне како позајмен играч со опција за негово купување на лето.

Голема е веројатноста од Манчестер Јунјатед да ја прифатат ваквата понуда и да му дозволат на играчот да го напушти клубот.

Јувентус може да се соочи со конкуренција за потписот на Марсијал, бидејќи интерес за него покажуваат и од Париз Сен Жермен.

Челзи одлично ја започна сезоната но во последно време има пад на формата, а причина за тоа се и многуте отсуства.

„Сините“ имаат проблем со неколку позитивни фудбалери на Ковид, па тренерот Тухел има големи проблеми при составување на тимот.

„Треба да останеме позитивни и да се надеваме дека ќе можеме да собереме 11 фудбалери за следниот меч со Вулверхемптон. Во моментов Хаверц е спремен откако тестот покажа дека е негативен, Ковачиќ ги обнови тренинзите, но Жоржињо е под знак прашалник. Сметам дека Премиер лигата треба да внесе повеќе јаснотија околу протоколите, за да им биде јасно на сите, бидејќи сега многу работи се измешани. Ги знам правилата и мора да ги почитуваме“, изјави Тухел.

Екипата на Вест Хем припрема понуда за ангажирање на српскиот репрезентативец Александар Митровиќ.

Митровиќ кој моментално настапува во англискиот Чемпионшип за тимот на Фулам, игра во одлична форма и е убедливо најдобриот играч и стрелец на екипата. Од стартот на сезоната има постигнато 22 гола на 21 натпревар.

Тој би бил огромно засилување за нападот на Вест Хем кој оваа сезона има големи амбиции во Премиер лигата. Тие се наоѓаат на 5-то место од табелата а исто така продолжуваат и со настапите во Лига Европа.

Eнис Барди од јануари ќе може да преговара со други клубови, секако ако во меѓувреме не го продолжи договорот со Леванте. Сепак, со оглед на ситуацијата во која е Леванте и интересот за македонскиот репрезентативец продолжување на соработката е малку веројатна.

Договорот на Барди истекува наредното лето, а Леванте како што тргнал многу лесно може да испадне од шпанската елита. Во таква ситуација за очекување е Барди да ја промени средината затоа што интерес за него има од други екипи.

Сега шпанските и италијанските медиуми пренесуваат дека италијански Лацио ја разгледува можноста за ангажман на Барди. Покрај Лацио се поврзува Селта.

Во редовите на Леванте Барди пристигна во 2017 година и од тогаш стана странец со најмногу настапи во тимот од Валенсија.

Шампионот на Бундеслигата, Баерн Минхен е заинтересиран за звездата на Лидс Јунајтед, Рафиња.

25-годишниот Бразилец би бил одлична замена доколку клубот го напушти Кингсли Коман кој најави дека нема да потпише нов договор со Баварците. За Коман постои голем интерес од неколку врвни европски клубови, па Баерн би ги искористил средствата од неговата продажба за купување на Рафиња за кого од Лидс побаруваат околу 40 милиони евра.

Бразилскиот крилен напаѓач пристигна во Лидс Јунајтед во 2020 година од екипата на Рен за 18 милиони евра и за многу кратко стана еден од најдобрите поединци во тимот по што доби и повик за настап во репрезентацијата на Бразил. 

Рафиња во дресот на Лидс досега има постигнато 13 гола на 41 натпревар, додека за селекцијата на Бразил има 5 натпревари и 2 гола.

Артур Мело е новата трансферна цел на Арсенал, пренесуваат медиумите на Островот. Бразилециот не е во плановите на Макс Алегри и Арсенал е еден од клубовите кои се заинтересирани за неговиот потпис.

Јувентус сака што побрзо да се ослободи од него и од неговата висока плата, па е спремен да го испрати на 18-месечна позајмица со право на откуп.

Со оглед на фактот дека другите заинтересирани клубови не можат да си ја дозволат платата на Бразилецот, во овој момент Арсенал е во пол-позиција за неговиот потпис.