Селекцијата на Данска ја заврши својата полуфинална задача на домашното Европско првенство во ракомет, совладувајќи го Исланд со резултат 31-27 во второто полуфинале.

Со оваа победа, Данска се пласира во финалето на ЕП, каде ќе се соочи со Германија. За момците на тренерот Јакобсен, ова е петти пласман во борбата за злато на европските првенства. Досега двапати ја освојувале титулата – на ЕП 2008 и ЕП 2012 година.

Во нападот на Данците најефикасен очекувано беше Гидсел со седум, пред Хансен со шест и Питлик со пет погодоци, додека прв стрелец на исландскиот состав беше Смарасон со осум погодоци.

Финалниот натпревар Данска – Германија е закажан за недела во 18:00 часот, додека претходно, од 15:00 часот, за бронзата ќе играат Хрватска и Исланд, кои веќе се сретнаа и во главната рунда на ЕП.

Европската ракометна федерација ги потврди шеширите пред утрешната ждрепка за баражите за пласман на Светското првенство 2027 година во Германија. Македонија е сместена во првиот шешир, и ќе ги избегне селекциите кои се заедно со неа, односно Франција, Словенија, Норвешка, Шпанија, Унгарија, Швајцарија, Фарски Острови, Холандија и Австрија. Можни ривали на Македонија се Италија, Чешка, и победниците од останатите натпревари.

Прв шешир:
Франција, Словенија, Норвешка, Унгарија, Шпанија, Швајцарија, Фарски Острови, Македонија, Холандија, Австрија

Втор шешир:
Чешка, Италија, БиХ/Косово, Грузија/Израел, Украина/Словачка, Србија/Литванија, Полска/Летонија, Турција/Романија, Грција/Белгија, Финска/Црна Гора

Извлекувањето на паровите за баражот е закажана за в сабота во терминот од 15:00 часот.

Селекторот на хрватската репрезентација Дагур Сигурдсон остро ја критикуваше Европската ракометна федерација (ЕХФ) споредувајќи ја со компанија за брза храна, која воопшти не се грижи за квалитетот, туку само како подобро да профитира од Европското првенство.

Хрватска утре ја очекува дуелот од полуфиналето против Германија, со почеток во 17:45 часот, додека Данска и Исланд ќе се сретнат потоа.

Откако Хрватска обезбеди пласман во полуфиналето во средата, мораше да патува околу четири часа со автобус од Малме до Хернинг, Данска, каде ќе се одржи завршницата на континенталниот турнир.

„Европската ракометна организација се грижи само за тоа како да приреди некакво добро шоу во сето ова. Тие се како фаст фуд компанија, која не се грижи за квалитетот, туку само за продажбата. Никој не зборува за фактот дека имавме четири часа возење од Малме, каде што нè сместија во групата, до Хернинг. Имавме два дена помалку од другите за да одиграме седум натпревари. Тоа е смешно. Сега не сме сместени во близина на салата. Возевме повеќе од половина час до оваа пред конференција и половина час назад. Поради сето тоа, не можевме да одржиме тренинг“, рече резигнирано Сигурдсон.

„Моравме да ги играме последните два натпревари за помалку до 22 часа, а следниот ден нè ставаат во автобус како животни. Шокантно е и скандалозно. Луѓе мои, ние сме во полуфиналето и мора да го преживееме сето ова. Ќе бидам среќен денот кога ќе си заминеме оттука. Тешко е, но кога станува неправедно, мора да проговориме. Другите тимови имаат подобри услови за сместување и подобра подготовка за полуфиналето. За нас е невозможно да имаме квалитетен тренинг и подготовка, не во овие околности. Нашата ситуација сега стана навистина алармантна. Тешко ни е да планираме нешто, а дури немаме ниту ресурси да решиме сè што ни треба“, додаде Сигурдсон на официјалната прес конференција пред утрешното полуфинале.

Алкалоид на стартот на подготовките за вториот дел од сезоната се пофали со зимското засилување во бековската линија, а тоа ќе биде Филип Николов.

26-годишникот доаѓа од редовите на градскиот ривал Бутел Скопје. Николов е бек, ама одлично одговара и во игра во два правци. Поради тоа тој ќе биде опција и за офанзивата и за дефанзивата на Алкалоид и Кирил Лазаров.

Велешанецот Николов во својата ракометна кариера освен за Бутел настапуваше уште за екипите на Радовиш и Охрид. Сега во Алкалоид ја задолжи опремата со број 24.

Филип Николов беше и на поширокиот список на репрезентацијата на Македонија пред ова Европско првенство.

Голманот на германската репрезентација, Андреас Волф, вели дека Германија не завршија со најдобрите партии на ова ЕП. По пласманот во полуфиналето, апетитите на Германците пораснаа во трката за најсјајниот медал.

„Очекувањето за последниот викенд е огромно, бидејќи сè уште сте вклучени во турнирот до самиот крај. Многу тимови во нашиот хотел веќе заминаа; ние сè уште сме тука, остануваме до самиот крај и сè уште имаме задачи пред нас. Тоа е многу посебно чувство“, изјавил Волф, кој сигурно претендира за трофејот за најдобар голман на турнирот.

Женскиот ракометен клуб Атлетик од Скопје го најави одржувањето на првото издание на меѓународниот женски ракометен турнир „АТЛЕТИК И ПРИЈАТЕЛИТЕ” кој ќе се одржи во Спортскиот центар Јане Сандански (мала сала) во период од 30 јануари до 01 февруари.

ЖРК Атлетик кој е лидер на табелата во првата женска ракометна лига со 11 победи од 11 одиграни средби по првиот дел од сезоната е најсериозен кандидат за пласман во Супер лигата, а зимската пауза ја искористи за добри подготивки, но и организација на овој женски ракометен турнир.

На турнирот ќе учествуваат три екипи од Македонија (Вардар, Куманово и Атлетик) и една од Црна Гора, екипата на Будуќност 2

Распоред на натпревари:
30.01.2026 (петок)
16:00 ЖРК Атлетик – ЖРК Вардар
18:30 ЖРК Будуќност 2 – ЖРК Куманово

31.01.2026 (сабота)
16:00 ЖРК Будуќност 2 – ЖРК Вардар
18:30 ЖРК Атлетик – ЖРК Куманово

01.02.2026 (недела)
12:00 ЖРК Будуќност 2 – ЖРК Атлетик
14:30 ЖРК Куманово – ЖРК Вардар

Сите натпревари ќе се играат во Спортскиот центар Јане Сандански (мала сала) и влезот е слободен за љубителите на ракометот.

Данска ја победи Германија 31-36 и се пласира во полуфиналето на Европското првенство. Германанија и Франција во директен дуел ќе решат за вториот патник во полуфиналето од Групата 1, откако Французите неочекувано загубија од Шпанија.

Данска во дуелот со Германија уште еднаш покажа зошто е најголемиот фаворит за титулата на Европското првенство.

Германците некако се држеа во првото полувреме, во кое не и дозволија на Данска да се одлепи на повеќе од три гола разлика, а по 30 минути имаа само гол негатива.

Данската машина, на погон на голманот Нилсен проработе во вториот дел. Стекнаа Данците предност од седум гола, а кога во ритам влезе и Питлик (постигна шест гола во низа), беше јасно кој ќе го добие мечот.

Гидсел и Питлик ја предводеа Данска со по шест гола, Нилсен имаше 14 одбрани. На проситвната страна Ушчинс беше најефикасен со шест гола.

Шпанија, претодно, приперди изненадување со победата над Франција 36:32. Французите во ниту еден момент не беа конкурентни, предност на Шпанците во еден момент од вториот дел изнесуваше седум гола. Благодарение на голманот Дебоне, Французите два пати дојдоа до гол негатива, но не успеаја да направат целосен пресврт.

Филип Талески во продолжението на сезоната ќе го носи дресот на унгарскиот клуб Татабања. Унгарскиот тим Талески го претстави како засилување. Играчот доаѓа како слободен агент.

Левиот бек по заминувањето од Вардар тренираше индивидуално, а сега ќе има неколку недели заеднички подготовки со играчите од новиот клуб до продолжението на унгарското првенство односно по завршувањето на Европскиот шампионат. Во редовите на Татабања истакнуваат дека се работи за играч со искуство и пред играч кој може да игра во „два правца“.

Пред Татабања, Талески има настапувано во странство во Германија (Рајн Некар-Левен и Балинген) и Португалија (Бенфика), додека во македонските клубови има настап во Металург и Вардар.

Талески беше постојан репрезентативец до последните три големи натпреварувања.

Даниел Душебаев би можел да го засили хрватскиот шампион Загреб.

Брилијантниот лев бек, роден во Ваљадолид, веќе играше во оваа област како позајмен играч во Целје во сезоната 2017/18, а од 2018 година е член на полскиот гигант.

На крајот од сезоната станува слободен агент и ќе ја промени средината.

Левиот бек Јаков Гојун ќе го напушти Загреб на крајот од сезоната, кој оди во долго заслужена пензија, а покрај Даниел Душебаев, од Извиѓач на позицијата лев бек ќе пристигне и младиот хрватски репрезентативец Дино Нерис Чешко.

Исланд ја совлада вечерва Шведска во Малме со 35-27 во рамки на второто коло од групата 2 во главната фаза, нанесувајќи му го првиот пораз на кодомаќинот на Европското ракометно првенство.

Исланд со триумфот се израмни на врвот на табелата со Шведска и Словенија со по четири бодови и остана во игра за место во полуфиналето.

Избраниците на Снори Гудјонсон одиграа брилијантен натпревар, особено во првото полувреме, кое го добија со шест голови разлика (18-12).

Во второто полувреме, Шведска се приближи на гол негатива (21-20, 23-22), но Исланѓаните потоа се вратија на +4 (26-22), а кога поведоа со осум голови разлика на три минути пред крајот (33-25), прашањето за победникот беше решено.

Исланд до победата го предводеа Виго Кристјансон со 11 голови од исто толку обиди, додека Виктор Гисли Халгримсон имаше 12 одбрани. Во шведскиот состав, најефикасни беа Албин Лагергрен со пет и Даниел Петерсон со четири голови.

Во првиот натпревар од второто коло во групата 2, Словенија ја победи Унгарија со 35-32, а вечерва ќе играат Швајцарија и Хрватска.