Возачот на Мекларен, Ландо Норис, ја освои пол-позицијата пред Големата награда на Бразил, 20-та трка од овогодинешното првенство во Формула 1.

Минатогодишниот шампион стигна до четвртата пол-позиција во сезоната на „Интерлагос“, во квалификациите кои траеја речиси два и пол часа поради силниот дожд, со круг од 1:27.470 минути.

Во борбата за најдобрата стартна позиција, Норис го победи Џорџ Расел во Мерцедес за две десетинки, кој нема да стартува од втората позиција, бидејќи поради промената на деловите од моторот, ќе биде поместен за пет позиции надолу.

Двајцата Британци беа следени од новиот шампион Кими Антонели, кој беше четири десетинки зад својот тимски колега, и ќе го наследи второто место, пред Лиам Лосон од Рејсинг Булс.

Новозеланѓанецот профитираше од казните на Расел и Шарлс Леклерк, кој беше четврти, но ќе биде поместен за 10 позиции на стартната линија поради промени на одредени делови од погонската единица.

Казни ги очекуваат двајцата најуспешни возачи во шампионатот, Луис Хамилтон и Макс Верстапен, кои ќе ја започнат трката во недела од последниот ред.

Последниот дел од квалификациите донесе битка помеѓу Норис и Расел, во која возачот на Мекларен заслужено ја освои пол-позицијата, додека неговиот ривал ја плати грешката на тимот, бидејќи му беше наредено да се откаже од кругот.

Марко Бецеки ќе тргне од првата стартна позиција на трката за Големата награда на Катар откако денеска имаше најдобро време во квалификациите на патеката „Лусаил“.

Италијанецот до пол позицијата дојде поставувајќи нов рекорд на патеката со време од 1:50.028 минути. Ова е петта пол-позиција за возачот на Априлија во актуелната сезона.

Бецеки беше за 0,266 секунди побрз од лидерот во шампионатот Марк Маркез, за кого ова значи старт од втората позиција.

Трет е Фабио Ди Џанантоно, а Хорхе Мартин потфрли во овие квалификации и ќе стартува дури од 11. позиција.

Шпанецот Хорхе Мартин доби медицинска дозвола за настап на првиот слободен тренинг пред ГН на Катар, со што направи значаен чекор кон враќањето на патеката по повредата заработена во Австралија.

Возачот на Априлија во петок ќе се појави на патеката „Лусаил“, но неговото учество во продолжението на тркачкиот викенд ќе зависи од дополнителна медицинска проценка.

Шпанецот во четврток го помина прегледот на медицинскиот тим на Мото ГП, предводен од доктор Анхел Чарте, по што доби статус дека е „фит“.

Тоа значи дека има дозвола да го започне викендот, но по првата тренинг-сесија лекарите повторно ќе ја проценат неговата состојба и ќе одлучат дали може да продолжи со натпреварувањето.

Возачот на Ред Бул во Формула 1, Макс Верстапен, вели дека треба да се намали бројот на трките во една сезона.

„Според мене, 24-ри Гран При трки се многу. Се сеќавам кога започнував бројот на трките по сезона беше 17 или 18. Секако, би сакал да има помалку трки но, во исто време ги разбирам причините зошто нивниот број е зголемен“ – вели Холанѓанецот.

„За жал, мојот договор не вклучуваше зголемување на платата во зависност од тоа колку трки ќе возите по сезона – 17-18 или 24. Можеби вреди да се обрне внимание на тој момент“, рече Верстапен.

Ждрепката за Светскиот куп во одбојка во 2027 година во Полска ќе се одржи на 3 декември во рудникот за сол Вјеличка во близина на Краков, 125 метри под нивото на земјата

Светскиот куп, што во минатото се играше под името Светското првенство, во 2027 година ќе се игра од 10 до 26 септември во Краков (Арена Таурон), Гдањск (Арена Ерго), Катовице (Арена Сподек), Лоѓ (Арена Атлас) и Олштин (Арена Уранија).

Краков ќе биде домаќин на полуфиналните натпревари и натпреварите за медали.

Пласман на Светскиот куп, врз основа на светската ранг-листа од 29 септември, изборија Полска, Италија, Франција, Финска, Словенија, Јапонија, Иран, Кореја, САД, Канада, Куба, Тунис, Камерун, Алжир, Бразил, Аргентина, Чиле, Бугарија, Германија, Украина, Белгија, Турција, Србија, Чешка, Грција, Романија, Холандија, Мексико, Порторико, Данска, Египет и Естонија.

Младите атлетичарки на АК Олимп освоија три медали на традиционалната ноќна атлетска трка по повод 4 Ноември, Денот на ослободувањето на Битола. Пред домашната публика, Сара Ночевска, Елис Синановска и Ирина Здравевска се искачија на подиумот, придонесувајќи кон празничната вечер со две сребрени и една бронзена медала. Во категоријата до 15 години, Сара Ночевска го освои второто место по неизвесна завршница решена со фотофиниш. Елис Синановска беше второпласирана во категоријата до 11 години, а Ирина Здравевска го освои третото место во категоријата до 10 години.

За младите атлетичарки, настапот во својот град носи посебна возбуда. Тука се тренира, се прават првите спортски чекори, а на празничната трка имаат можност да покажат колку напредувале пред семејствата, пријателите и сограѓаните. Освоените медали се дополнителен поттик да продолжат со тренинзите и со следните натпреварувачки предизвици. Трката, во организација на Општина Битола и Сојузот на спортови на Битола, ја продолжи традицијата градскиот празник да се одбележува и со атлетика.

За Олимп, учеството на младите членови има особено значење. Клубот со долга битолска историја добива нова генерација која веќе ги освојува своите први медали и создава свои спомени од трчањето дома.

Францускиот возач Естебан Окон дефинитивно нема да ја заврши тековната сезона во Формула 1 со тимот на Хас, а моменталниот лидер во шампионатот на Формула 2, Рафаел Камара, ќе вози наместо него на претстојната трка во неговиот роден Бразил.

Ова е епилогот на одлуката, што ја донесе Хас, во саботата, кога реши да го замени Окон среде тркачкиот викенд за Големата награда на Мексико Сити.

Се покажа дека причината за таа брзоплета одлука била ескалацијата на тензиите што траеле со месеци, иако беше познато дека Французинот ќе замине од тимот на крајот од сезоната.

Окон имал жестока расправија со шефот на тимот, Ајао Комацу, а се шпекулира дека и физички се пресметале.

„Одлуки како оваа не се донесуваат лесно, како што беше случајот во Мексико Сити, но како и тогаш, веруваме дека ова е најдобро за тимот. Разговорите што се водеа меѓу тимот и Окон ќе останат интерно прашање и ние ќе продолжиме да ја почитуваме доверливоста и приватноста на сè што се случува зад затворени врати“, изјави Комацу.

За трката во Мексико, Комацу одлучи да го замени Окон со резервниот возач, Рјо Хиракава, кој претходно настапи на првата слободна тренинг сесија. Иако тоа беше негово деби во најбрзиот караван, Хиракава возеше добро, имаше неколку престигнувања, а на крајот, поради казни за другите возачи, стигна до десеттото место и освои еден бод.

Сепак, за претстојниот викенд во Бразил, јапонскиот возач е зафатен, бидејќи го чека финалето на сезоната од Светското првенство во издржливост во кое се бори за титулата со Тојота.

Затоа тимот на Хас го покани актуелниот лидер во генералниот пласман во Формула 2, Рафаел Камара, кој неодамна беше потврден како возач на овој тим за 2027 година.

Патем, интересно е што Окон останува без можност да ја заврши сезоната во Формула 1 по втор пат, бидејќи претходно се раздели со Алпина пред последниот викенд во Абу Даби во 2024 година.

Македонската футсал репрезентација ја започнува трката за пласман на Светското првенство во футсал 2028 година. Националниот тим на 6 ноември ќе го одржи собирот пред претстојниот квалификациски натпревар против Финска, кој ќе се одигра на 10. ноември во финскиот град Вантаа.

Селекторот Газмед Хисејини го објави списокот на повикани играчи за овој натпревар, кој е дел од главната рунда на европските квалификации за Светското првенство во 2028 година.

Македонија (футсал): Антонио Петровски (голман), Иван Стојановски (голман), Марио Благојевски, Јасир Зекири, Берат Рамадани, Јакуп Рамадан, Наум Блажевски, Бојан Јанев, Таулант Исмаили, Абдил Кадир Јахја, Иван Крстевски, Садат Зибери, Илјаз Чилјафи, Игор Леовски;

Средбата Финска – Македонија е закажана за 10 ноември, со почеток во 18:30 часот по локално време (17:30 часот по средноевропско време), во арената „Енергија Арена“ во Вантаа.

Македонија се наоѓа во групата 4 од главната рунда на квалификациите, заедно со репрезентациите на Шпанија и Финска. Во главната рунда учествуваат 36 репрезентации, поделени во 12 групи со по три селекции. Се игра двокружен систем, односно секоја репрезентација игра по два натпревари со своите противници, дома и на гости.

Меѓународниот олимписки комитет (МОК) го потврди списокот на седум држави кои изразиле интерес за организација на Летните олимписки игри во 2036 година.

Меѓу потенцијалните домаќини се наоѓаат Германија, Унгарија, Индија, Катар, Јужна Африка, Турција и Јужна Кореја.

Дел од земјите во трката влегоа со по два предлога за градови домаќини. Германија ги кандидираше Минхен и Берлин, додека Јужна Кореја ги предложи Сеул и провинцијата Северна Џола.

Останатите држави засега имаат по еден фаворит: Будимпешта од Унгарија, Ахмедабад од Индија, Доха од Катар, Дурбан од Јужна Африка и Истанбул од Турција.

Процесот за избор на организатор допрва ќе влезе во следната фаза. Во текот на ноември потенцијалните кандидати ќе имаат виртуелни презентации пред Комисијата на МОК за идни домаќини.

Швајцарката Мишел Гизин објави дека се повлекува од професионалното алпско скијање на 32-годишна возраст. Тешката повреда здобиена при тренинг во декември минатата година ја оддалечи од патеките, а по долг период на рехабилитација, олимписката шампионка одлучи дека нема да се врати во Светскиот куп.

Една од најуспешните швајцарски алпски скијачки во последната деценија, стави крај на својата кариера, а одлуката ја соопшти на прес-конференција во Енгелберг, речиси 11 месеци по тешкиот пад за време на тренингот во спуст во Сент Мориц.

„Тоа беше долг процес на размислување, кој се одвиваше паралелно со мојата рехабилитација, но започна и неколку години претходно“, изјави Гизин.

Швајцарката зад себе остава импресивна спортска биографија. На Зимските олимписки игри во Пјонгчанг во 2018 година го освои златниот медал во алпската комбинација, а четири години подоцна во Пекинг го повтори успехот и ја одбрани олимписката титула. На Игрите во 2022 година освои и бронза во супервелеслалом.