Македонскиот одбојкарски шампион УГД Штип одигра далеку подобро во реваншот против Орион Старс, но тоа не беше доволно за позитивен резултат. Штипјани загубија со 2-3 во сетови (25-23, 20-25, 25-21, 10-25, 10-15) и го завршија настапот во Лигата на шампионите.

Домашниот тим одлично го отвори натпреварот и со сигурна игра во завршницата го освои првиот сет со 25-23. Гостите возвратија во вториот сет, во кој славеа со 25-20, но УГД Штип повторно ја презеде иницијативата и со 25-21 поведе со 2-1 во сетови.

Сепак, четвртиот сет донесе голем пад во играта на македонскиот првак. Орион Старс доминираше на теренот и убедливо го доби со 25-10, па победникот мораше да биде решен во тај-брејкот. Во решавачкиот сет гостите беа посигурни и со 15-10 го потврдија триумфот.

Александар Љафтов со 17 поени беше најефикасен во редовите на УГД Штип, додека Стојан Илиев заврши со 15 поени. Кај победничкиот тим, Воутер Тер Мат беше најдобар со 22 поени.

Македонскиот шампион покажа подобро издание во однос на првиот дуел, но на крајот мораше да му ја честита победата на противникот и да се збогува со европската елита.

Футсал репрезентацијата на Македонија до 19 години вечерва во Тиват го одигра првиот контролен натпревар со соодветната репрезентација на Црна Гора.

Дуелот заврши без победник, а двете селекции постигнаа по еден погодок. Репрезентацијата на Македонија поведе во 16. минута, а стрелец на голот беше Јован Бојчев.

Дванаесет минути подоцна домаќините преку Лазар Воротовиќ успеаа да израмнат на 1-1 што на крајот беше и конечен резултат на овој натпревар.

Во 32. минута, Црна Гора не успеа да реализира пенал и тоа по одличната реакција на нашиот голман, Илија Петрески.

Репрезентацијата предводена од селекторот Зоран Лекиќ утре од 11 часот ќе го одигра вториот дуел против домаќинот Црна Гора.

Македонската велосипедистка Далија Стојановска е балканска шампионка во циклокрос во конкуренција до 19 години, откако триумфираше на Балканското првенство со време од 43 минути и 21 секунда.

Стојановска ја заврши трката со пет извозени круга, оставајќи ја зад себе второпласираната Бриџит Белу, која на целта пристигна со време од 44 минути и 26 секунди.

Третото место ѝ припадна на Дениса Марија Маркуш со време од 50 минути и 48 секунди.

Со овој резултат, Далија Стојановска оствари значаен успех за македонскиот велосипедизам, освојувајќи го златниот медал и титулата балканска шампионка во својата возрасна категорија.

Со поддршка од министерот за спорт Борко Ристовски, и Владата, по 12 години, решен е проблемот со блокираната сметка и вратена е во целосната функционалност Националната пливачка федерација.

Претседателот на федерацијата, Сашо Лазаровски, е уверен дека пливањето во нашата земја ќе се врати на вистинскиот пат и дека македонските пливачи во иднина ќе имаат многу подобри услови за работа.

– Со голема помош од Министерството за спорт и Владата, ние од денес сме функционални и започнуваме ново поглавје со одблокирана сметка. Започнуваме да работиме на нови проекти, обединети сите клубови. Веќе добивме на управување еден базен, го чекаме и вториот. Работиме на решавање на проблемот за зимските настапи на нашите пливачи во Олимпискиот базен, додека не се завршат градежните работи во базенот Карпош. Планираме многу новитети во иднина, помош за нашите репрезентативни пливачи, обуки за нашите тренери, многу проекти, и се надеваме на многу успеси во наредниот период, рече Лазаровски на денешната прес-конференција.

Задоволство од работата на новото раководство на пливачката федерација искажа министерот Ристовски.

– Секој од нас си ги исполни задачите зададени пред повеќе од една година и сега сме овде со одблокирана сметка на федерацијата. Како што се договоривме ние заедно со Владата на Република Македонија најдовме средства да се одблокира сметката, а обврските на претседателот беа сите клубови да бидат обединети, под една федерација и да нема поделби. Така по 12 години федерацијата може да функционира нормално. Ние вложуваме напори и за сите други федерации кои имаат блокирани сметки да се решат проблемите, рече Ристовски.

Министерот најави и враќање под свое владение на сите спортски објекти кои се од национален интерес со цел да им бидат достапни на спортистите.

Јапонецот Масатора Кавано го постави првиот светски рекорд во маратонско одење на Ол-Јапонскиот турнир во Такахата.

Дваесет и осумгодишниот Кавано ја заврши класичната дистанца од 42,195 км за 2 часа, 55 минути и 14 секунди. Ова е за 1 минута и 16 секунди побрзо од стандардот на Светската атлетика од 2:56,30. 

Кавано е освојувач на сребрен (2022) и бронзен (2023) медал на Светското првенство во одење од 35 км.

Австралијката Ребека Хендерсон, исто така, го собори светскиот рекорд во женска конкуренција на оваа трка, со време од 3:14,52. 

Организаторите на релито Дакар го одложија настанот во 2027 година од Саудиска Арабија поради ситуацијата на Блискиот Исток.

Новата локација за релито сè уште не е одредена. Сепак, организаторите планираат да се вратат во Саудиска Арабија во 2028 година.

„Од 2020 година, Саудиска Арабија е домаќин на релито Дакар седум пати по ред, поканувајќи натпреварувачи од целиот свет на патеки што ја прикажуваат извонредната географска разновидност на Кралството. Овие настани ја направија Саудиска Арабија составен дел од заедницата Дакар и воспоставија силно, долгорочно стратешко партнерство. Сите засегнати страни ја потврдуваат својата посветеност на континуирана соработка, развој на мотоспортот во Кралството и обезбедување извонредни искуства за натпреварувачите, тимовите и навивачите“, се вели во соопштението на организаторите.

Релито Дакар 2027 беше закажано за 1-15 јануари. Одлуката за одложување беше донесена поради ескалацијата на вооружениот конфликт во Јемен.

Кими Антонели триумфираше на Големата награда на САД во Остин, но сè уште не ја осигури титулата светски шампион. Дваесетгодишниот Италијанец може да ја потврди шампионската круна веќе следната недела во Мексико, каде што ќе му биде доволно да заврши меѓу првите деветмина.

Возачот на Мерцедес тргна од пол-позицијата и имаше одличен старт. Поведе уште во првиот круг, а целта ја мина со околу 16 секунди предност пред Шарл Леклер. Третото место му припадна на Макс Верстапен, додека Луис Хамилтон заврши четврти. За Антонели ова беше деветта победа во сезоната.

Антонели пристигна во Тексас со предност од 102 бода и имаше можност да стане најмладиот светски шампион во историјата на Формула 1. За да го оствари тоа, требаше да бидат исполнети три услови: да победи на трката, неговиот тимски колега Џорџ Расел да не заврши меѓу првите осум и Луис Хамилтон да не се пласира меѓу првите четири.

Првиот услов беше исполнет, но другите два не. Расел доби казна од пет секунди поради излетување од патеката на стартот. Падна на десеттото место, но успеа да се врати на осмата позиција, на која и ја заврши трката. Во меѓувреме, Хамилтон пет круга пред крајот го престигна Ландо Норис и се проби на четвртото место. Со тој резултат, Хамилтон му се доближи на Расел во генералниот пласман на само еден бод.

На Големата награда на Мексико, која се вози следната недела, на Антонели ќе му бидат доволни само два бода, односно пласман меѓу првите девет возачи. Во тој случај, ќе ја освои титулата без оглед на резултатот на Расел.

Елена Рибакина успешно ја одбрани титулата на ВТА 500 турнирот во Нингбо, Кина, откако во големото финале доминантно ја совлада канадската тенисерка Лејла Фернандес со максимални 2-0 во сетови (6-2, 6-2).

Ова е првпат во кариерата на Рибакина таа успешно да одбрани титула на еден турнир од ВТА серијата во две последователни години (2025 и 2026).
Клучни детали за триумфот во Нингбо:

Натпреварот траеше само 1 час и 16 минути. Најдобрата светска тенисерка не се соочи со ниту еден загубен сервис-геј, спасувајќи ги сите четири брејк-шанси на Фернандес.

Македонската каратистка Камелија Недев го освои сребрениот медал и стана светски вицешампион во дисциплината кати поединечно, во кадетска конкуренција, на Светскиот шампионат во традиционално карате, кој се одржува во Копер, Словенија.

Во исклучително силна меѓународна конкуренција, Камелија оствари одличен настап и се пласираше во финалето, каде што се соочи со натпреварувачка од Романија. Двете финалистки добија ист број поени, но поради една повисока поединечна оценка на романската натпреварувачка, Камелија го освои второто место и сребрениот медал.

„И покрај тоа што остана чекор до светската титула, Камелија покажа висок технички квалитет, посветеност и борбеност, достоинствено претставувајќи ја Македонија на светската карате сцена. Овој резултат претставува значаен успех за македонското традиционално карате и уште една потврда за квалитетот на нашите млади спортисти“, информираат од МТКФ.

На шампионатот учествуваат претставници од 58 држави, со околу 1.200 натпреварувачи.

Италијанскиот возач Кими Антонели беше најбрз во квалификациите за Големата награда на САД во Формула 1 и ја освои пол-позицијата на патеката во Остин.

Младиот возач на Мерцедес успеа да биде побрз Макс Ферстапен од Ред Бул во борбата за најдобрата стартна позиција.

Трет во квалификациите беше вториот возач на Ред Бул, Исак Хаџар, по што следеа Шарл Леклер и Луис Хамилтон од Ферари.

Трката за Големата награда на САД се вози вечерва од 21 часот.