Паузата во првенството во сениорска конкуренција во Првата и Втората лига жени само два тима ја дочекаа до беспрекорен учинок – Наковски Волеј кај прволигашите, односно Фламинго Волеј во второлигашката конкуренција.

Освојувањето на куп-титулата, првиот пехар во клупската историја, за Наковски Волеј беше круна на сезоната 2024/2025, но истовремено и најава за поголемите амбиции кои ги има овој струмички состав. Тимот тоа го потврдува со прикажаната игра и константноста низ девет кола, во кои ниту еднаш не „киксна“, а потклекна само за момент во дуелот со Пелистер Волеј, кога си дозволи да загуби бод, но не и да претрпи пораз. Одбојкарките на Наковски имаат доволно време за одмор пред да почнат новите битки за врвот.

Работнички Скопје стои како втор на табелата, со два порази, а двата „удари“ ги доби од главните ривали за трофеите – Наковски Волеј и Јанта Волеј Кисела Вода.

Шампионот Јанта Волеј КВ скапо ја плати набиената агенда која му ја донесе настапот во Европа, односно во ЦЕВ Лигата на шампионите, каде имаше успешна прва рунда, а потоа и во ЦЕВ купот. Бранителот на титулата е петти на табелата, но во вториот дел од сезоната фокусот ќе биде насочен само кон првенството, а тоа е најава за уште поинтересни дуели.

Дебитантите Газели Волеј и Пелистер Волеј покажаа дека се и тоа какво освежување во Првата женска лига. „Газелите“ се во топ-три, го изненадија шампионот и им пркосеа на фаворитите, па заслужено се таму каде што се. Пелистер Волеј одигра најмногу дуели во пет сета во полусезоната, и откако плати со неискуството, стигна и до толку потребната (во тој момент) „тај-брејк“ победа.

Младост УГД, Струмица Жени и Вардар ЕМ исто така потврдија дека се ривали кои во никој случај не смеат ни да се потценат, ниту пак, предвреме да се отпишат. Не признаваат фаворити и противникот мора добро да се испоти за да заработи бодови против нив.

Учесникот на Ф4 во Купот 2025 Фит Фан Волеј, кој не претставуваше и на меѓународна сцена, во БВА купот, пред почетокот на сезоната, претпоследен е на табелата со една победа и тоа службена над Ускана.

Првенството во Првата лига продолжува на 24 јануари 2026 година со вториот дел од лигата. По комплетирањето на лига натпреварувањето, првите осум екипи играат во четвртфиналето од плеј-офот во два добиени натпревари, од кои ќе се добијат полуфиналистите од првенствениот плеј-оф, односно екипите кои ќе играат за шампионскиот пехар. Екипата која ќе заврши на деветтата позиција на табелата игра бараж со второпласираниот тим во Втората лига жени за опстанок во прволигашкото друштво. Последнопласираната екипа во првенството, пак, во следната натпреварувачка сезона ќе се натпреварува во Втората лига.

Во Втората лига жени, Фламинго Волеј е екипата која има беспрекорен учинок. Скопскиот тим успеја да ги мине сите пречки во првиот дел од сезоната, особено дерби-дуелите со Вардар Жени и Форца Волеј ЕМА, главната тројка на кандидати за пласман во најсилното друштво во следната сезона.

Вториот дел од првенството во Втората лига жени исто така стартува на 24 јануари 2026 година, со уште 12. кола, по чие завршување првопласираната екипа обезбедува директен пласман во Првата лига – жени во сезоната 2026/27. Второпласираниот тим игра бараж натпревар со деветтопласираната екипа од Прва лига – жени за влез во поквалитетното друштво.

Словенецот Домен Превц триумфираше вечерва во Оберсдорф на првата станица од новогодишната турнеја Четири скокалници.

Превц со тоа ѝ го донесе на Словенија првиот триумф во Оберсдорф на Новогодишната турнеја, а воедно ја забележа и шестата победа во последните седум настапи во Светскиот куп во скијачки скокови.

Дваесетишестгодишниот Словенец победи во Оберсдорф со скокови од 141,5 и 140 метри, што беа доволни за 316,7 бодови. Второто место со 299,2 бодови го поделија неговиот сонародник Тими Зајц (скокови од 133,5 и 138 метри) и минатогодишниот победник на Новогодишната турнеја, Австриецот Даниел Хофениг (132 м, 134 м).

Во генералниот пласман на Светскиот куп, Превц води со 950 бодови, пред Јапонецот Рјоју Кобајаши (688) и Германецот Филип Рајмунд (540 бодови).

Новогодишната турнеја Четири скокалници продолжува традиционално на 1 јануари во Гармиш-Партенкирхен

Во Оберстдорф, Германија, денес започнува 74-то издание на Новогодишната турнеја на четири скокалници. По Оберсдорф, скокачите ќе се преселат во друг ски центар во Германија, во Гармиш-Партенкирхен на 1 јануари, а потоа следуваат уште две натпреварување во Австрија.

Натпреварот во Инсбрук е закажан за 4 јануари, а турнејата традиционално завршува во Бишофсхофен на 6 јануари.

Најголем фаворит за победа на Новогодишната турнеја е Домен Превц од Словенија. Одличниот словенечки скокач се истакна во Оберстдорф во квалификациите во неделата, прескокнувајќи 139,5 метри. За тој скок, тој доби 150,9 поени, надминувајќи го второпласираниот Германец Филип Рајмунд за седум метри и 10,7 поени (132,5 м/140,2).

Трет беше победникот на минатосезонската турнеја и освојувач на Големиот кристален глобус, Даниел Чофениг од Австрија, кој беше осум метри и 11,3 поени зад Превц.

Во досегашната историја на Новогодишната турнеја – четири скокалници рекордер е Јане Ахонен од Финска со 5 титули, а зад него е Јенс Ваисфлог со 4 трофеи од оваа натпреварување. Камил Штох и Кобајаши се оние кои имаат по 3 титули од Новогодишната турнеја – четири скокалници.

Директорот на програмата Мерцедес-АМГ Рејсинг, Стефан Вендл, го поздрави партнерството со тимот на Макс Верстапен и ги истакна целите на проектот.

„Многу сме задоволни што одлучи Верстапен рејсинг да се натпреварува со Мерцедес-АМГ ГТ3 во „ГT Ворлд челинџ Јуроп“. Затоа сме исклучително задоволни од овој многу амбициозен и ветувачки проект, како и од уште едно врвно учество во програмите „Спринт“ и „Endurance“ на „ГT Ворлд челенџ Јуроп“, истакна Вендл.

Крис Лулам ќе вози за Верстапен рејсинг во „ГT Ворлд челинџ Јуроп спринт куп“ втора сезона по ред. Нему ќе му се придружи Даниел Јункадела во сезоната 2026, кој има богато искуство од ГТ3 и силна евиденција на патеката со автомобили на Мерцедес-АМГ.

Шведскиот атлетичар, скокачот со стап Арманд Дуплантис e избран за најдобар спортист во Европа во 2025 година во традиционалниот избор на европски новински агенции организиран од полската агенција ПАП.

Девет европски агенции му дадоа на Дуплантис максимален број поени, а четири агенции го ставија на второто место.

На Светското првенство во Токио оваа година, Дуплантис постави нов светски рекорд во скок со стап со скок од шест метри и 30 сантиметри.

Полската новинска агенција, ПАП, оваа награда ја доделува од 1958 година.

Тенисерите Новак Ѓоковиќ (2011, 2015, 2018, 2021 и 2023 година) и Роџер Федерер (2004, 2005, 2006, 2007 и 2009 година), по пет пати ја освоиле оваа престижна награда.

Меѓу поранешните добитници на престижната награда се сите великани на европскиот спорт, фудбалерот Кристијано Роналдо, тенисерот Рафаел Надал, атлетичарите Себастијан Коу и Сергеј Бубка, возачите на Формула 1 Мика Хакинен, Најџел Мансел, Себастијан Фетел, Михаел Шумахер и Луис Хамилтон, тенисерките Мартина Хингис, Ига Швионтек и Штефи Граф, велосипедистот Еди Меркс, гимнастичарката Надја Команечи и други.

Атлетската федерација на Македонија ги прогласи најдобрите за 2025 година, а кај сениорите признанијата им припаднаа: Адријана Попарсова и Андреас Трајковски.

Адријана Попарсова (Атлетски Клуб Делта) и Андреас Трајковски (Атлетски Клуб Работнички), се атлетичарите кои со своите настапи, резултати и континуитет ја одбележаа сезоната и поставија високи стандарди за идните генерации.

Во младинските категории, признанијата им беа доделени на:

Марко Алексовски – најдобар младинец (Атлетски клуб Центар)

Мелиса Димитриевска – најдобра младинка (Атлетски клуб Дрени Старт)

Ева Митевска – најдобра помлада младинка (Атлетски клуб Работнички)

Михаил Стошевски – најдобар помлад младинец (Атлетски клуб Куманово)

Кај пионерите, признанијата ги понесоа:

Ведран Николовски – најдобар пионер (Атлетски клуб Куманово)

Марта Димковска – најдобра пионерка (Атлетски клуб Работнички)

Во категоријата млади пионери:

Ељана Салаи – најдобра млада пионерка (Атлетски клуб Куманово)

Арти Џеладини – најдобар млад пионер (Атлетски клуб Куманово)

Трајковски имаше забележителни настапи пред сè на Европското првенство во сала во Апелдрон, Холандија со пласманот во финалето и освоеното осмо место, додека на балканските првенства се закити со бронзи во своите дисциплини пред сè во скок во далечина.

Легендарната американска скијачка ги потврди плановите за ЗОИ 2026: „Не гарантирам медали, но гарантирам дека ќе го оставам срцето на патеката“.

Линдзи Вон не престанува да ја шокира спортската јавност. Иако веќе е во петтата деценија од животот, една од најголемите на сите времиња „гази“ во Светскиот куп и официјално потврди дека ќе ја предводи селекцијата на САД на претстојните Зимски олимписки игри во Кортина и Милано 2026.

И покрај тоа што ќе биде една од највозрасните натпреварувачки во историјата на Игрите, резултатите од оваа сезона покажуваат дека таа е сериозен конкурент во спуст и супервелеслалом.

Министерот за спорт Борко Ристовски и градоначалникот на општина Карпош, Сотир Лукровски, денес официјално ги пуштија во употреба реконструираните спортски игралишта во Студентскиот дом „Гоце Делчев“ во Скопје.

Министерството за спорт одговори на барањето на студентите и заедно со Општина Карпош ја реализира најавената инвестиција со која е извршена комплетна санација и реконструкција на просторот за спорт и рекреација во најголемиот државен студентски дом.
Со оваа инвестиција, студентите добија современо уредени игралишта за фудбал и кошарка со полипропиленски под, изведени според современи стандарди.

Министерот Ристовски ја истакна добрата соработка на Министерството за спорт со локалната самоуправа во реализацијата на овие инфраструктурни проекти кои овозможуваат активен и здрав живот на сите граѓани, особено на младата популација.

„Заедно со градоначалникот Лукровски го реализиравме овој проект со што значително ќе се подобри инфраструктурата на ова спортско игралиште во состав на студентскиот дом „ Гоце Делчев“. Секако , приоритет за ползување на истото, ќе имаат студентите од овој студентски дом, но и сите карпошани. Затоа, јас како министер и ние како министерство и во иднина постојано ќе се заложуваме и ќе инвестираме во подобрување на условите за спортските активности“, нагласи Ристовски.

Министерот Борко Ристовски и градоначалникот на Карпош, Сотир Лукровски заеднички се согласија дека успешната соработка меѓу локалната самоуправа и ресорното министерство ќе продолжи и во иднина, со тоа што ќе се работи на подобрување на севкупната спортска инфраструктурна мрежа на територијата на Општината.

Реконструкцијата на спортските игралишта во СД „Гоце Делчев“ е уште еден реализиран проект од програма на Министерството за спорт за изградба и реконструкција на спортската инфраструктура низ целата држава, со цел подобрување на условите за спорт, рекреација и активен начин на живот.

За подобрување на условите за универзитетскиот спорт и за студентите, Министерството за спорт ја почна и постапката за реконструкција на спортската сала во кампусот на Универзитетот „Св.Кирил и Методиј“ во Скопје што ја спроведува во соработка со ректоратот на УКИМ. Реконструкцијата на салата на УКИМ треба да биде завршена во текот на наредната година и таа одново ќе биде ставена на располагање на над 4.000 студенти за спроведување на наставата и за одржување на други спортски активности.

Светскиот шампион Фрањо вон Алмен од Швајцарија победи во спустот од Светски куп во одржан во италијанскиот зимски центар Вал Гардена.

21-годишниот швајцарски скијач ја помина патеката за 1:58,67 минути, победувајќи го својот сонародник и четирикратен победник на Светскиот куп, Марко Одермат, за 30 стотинки

Италијанецот Флоријан Шидер беше трет со 98 стотинки на домашен терен, запишувајќи го третиот подиум во својата кариера.

Во генералниот пласман, Марко Одермат води со 765 бода, по него следува Норвежанецот Хенрик Кристоферсен со 302 бода, а трет е Винсент Крихмаер од Австрија со 283.

Австриската алпска скијачка Корнелија Хутер победи во спуст трката од Светскиот куп 2025/26 одржана денес во Вал д’Изер, Франција. Таа ја заврши патеката за 1:41,54.

Второто место го освои Германката Кира Вајдле-Винкелман, со заостанување од 0,26 секунди. Легендарната 41-годишна Американка Линдзи Вон (+0,35) ги заокружи првите три на подиумот.

По изминатите 12 натпревари, во генералниот пласман за Големиот кристален глобус сè уште води фаворитот Микаела Шифрин (САД) со 558 поени, пред Алис Робинсон од Нов Зеланд со 404. На третото место досега е Германката Ема Ајхер со 345.

Во пласманот за спуст, Линдзи Вон е на врвот со 240 поени, пред Ајхер со 171, Хутер со 155 е третта.

Корнелија Хутер веќе има пет победи во спуст од вкупно 10 во својата кариера во Светскиот куп. Таа ќе биде главен кандидат за медал во олимпискиот спуст, закажан за 8 февруари во Кортина д’Ампецо. Таа се пласираше на четвртото место во спуст на секое од двете светски првенства одржани по Олимписките игри во Пекинг 2022 година, каде што заврши седма.

Враќањето на Вон по речиси шест сезони надвор од патеките е насочено кон Зимските игри во Италија, што ќе биде нејзина петта Олимпијада. Таа освои злато во Ванкувер во 2010 година и бронза зад Гоџа во Пјонгчанг во 2018 година.

Утре, Вал д’Изер ќе биде домаќин на супер-велеслаломот, една недела откако Вон заврши на четвртото место во оваа дисциплината во Сент Мориц, на која победи Алис Робинсон од Нов Зеланд.