Прес-службата на Оклахома Сити објави дека клубот ќе го повлече бројот 0 кој на својот дрес го носеше плејмејкерот Расел Вестбрук.

Триесет и седумгодишниот Американец го објави своето пензионирање во август пред сезоната 2026/27. Неговиот последен клуб беше Сакраменто, каде што Вестбрук играше минатата сезона.

Вестбрук беше избран од Оклахома Сити како четврти избор на НБА драфтот во 2008 година. Тој играше за Тандер до 2019 година. 

Вестбрук има настапувано и за Вашингтон Капиталс, Лејкерс, Клиперс и Денвер.

Вкупно, Вестбрук одигра 1.301 натпревар во НБА, со просек од 20,9 поени, 6,9 скока и 8 асистенции. 

Репрезентативецот на Македонија, Ти-Џеј Шортс, ја пронајде вистинската форма во редовите на Валенсија, а неговите одлични партии на почетокот од сезоната беа крунисани со големо признание – Евролигата официјално го прогласи за најкорисен играч (МВП) за месец октомври.

Шортс зад себе има фантастичен период во кој се наметна како еден од најдоминантните кошаркари во елитното европско натпреварување. Статистиката најдобро го потврдува неговиот придонес: на девет одиграни натпревари Шортс во просек бележеше 17,1 поен, 5,7 асистенции, 1,8 скокови и 0,9 украдени топки. Според поентерскиот и асистентскиот ефект се наоѓа на третото место во Евролигата, додека со просечен индекс на корисност од 20,7 е меѓу двајцата најуспешни играчи во целото натпреварување.

Неговиот влијателен придонес се одрази и врз резултатите на тимот. Валенсија во овој период запиша шест победи, а додека Шортс беше на паркетот, екипата оствари вкупна разлика од дури +89.

По заминувањето од Панатинаикос, плејмејкерот очигледно пронајде средина во која повторно ги прикажува сите свои квалитети.

Словенечкиот кошаркар Лука Дончиќ одигра уште еден незаборавен натпревар и испиша историја во НБА. Лејкерси го победија Торонто со 131:125. За разлика од Лејкерс, градскиот ривал Клиперс загуби од Голден Стект со 112:124. Вориорс ги предводеше новата ѕвезда, дебитантот, Јаксел Ландеборг.

Во победата на Лос Анџелес Лејкерс над Торонто Репторс од 131:125, Словенецот имаше учинок каков што немал никој пред него.

Дончиќ стана првиот кошаркар во историјата на НБА кој забележал најмалку 15 скока, пет асистенции, пет украдени топки и постигнал пет тројки во еден натпревар.

Покрај тоа, тој погоди дури осум шута надвор од линијата од 7,24 метри.

Неверојатниот Дончиќ го заврши натпреварот со 45 поени, 15 скока, шест асистенции и пет украдени топки, потврдувајќи уште еднаш дека е во исклучителна форма.

Настапот на Дончиќ во последните четири натпревари изгледа особено импресивен. Во тој период, тој постигна дури 175 поени, (52, 41, 37 и 45 поени).

Покрај Дончиќ, во победничкиот тим се истакна Остин Ривс со 19 поени, додека Вокер Кеслер запиша 16 поени и 15 скока.

На другата страна, Скоти Барнс беше најефикасен со 29 поени, шест скока и пет асистенции.

Ар-Џеј Барет додаде 22 поени, десет скока и пет асистенции, додека Џејмисон Батл го заврши натпреварот со 20 поени и пет скока.

Голден Стејт Вориорс ги победија Лос Анџелес Клиперс со 124:112 и стигнаа до својата четврта последователна победа во НБА.

Најзаслужен за новиот триумф беше Јаксел Ландеборг, кој го одигра најдобриот натпревар во својата кариера досега.

Дебитантот го предводеше тимот од Сан Франциско со рекордни 37 поени, заедно со четири скока и шест асистенции.

Неговата игра беше клучна во продолжувањето на победничката серија на Вориорс, кои по три последователни порази на почетокот на сезоната успеаја да го подигнат нивото на игра и да стигнат до позитивен учинок од четири победи и три порази.

Голден Стејт успеа да победи и покрај отсуството на првата ѕвезда на тимот, Стеф Кари.

Неговото отсуство го надомести Диентони Мелтон, кој постигна 21 поен и запиша шест скока.

Во редовите на Лос Анџелес Клиперс, Руи Хачимура беше најефикасен со 24 поени и седум скока.

Турскиот Фенербахче е на чекор до ангажман на искусниот канадски центар Двајт Пауел, кој по 13 години минати во НБА лигата е подготвен за прв европски предизвик во кариерата.

Пауел во најсилната кошаркарска лига во светот настапуваше за Далас Маверикс, каде што имаше значајна улога во ротацијата на тимот.

Со Далас во 2024 година стигна и до големото финале во НБА, но не успеа да ја освои шампионската титула.

Пауел има и репрезентативно искуство на највисоко ниво. Беше дел од селекцијата на Канада која на Светското првенство во 2023 година, одржано на Филипините, го освои бронзениот медал.

Адем Мекиќ повторно е дел од МЗТ Скопје. Македонскиот репрезентативец и еден од милениците на навивачите на аеродромци официјално се враќа во клубот, откако денеска потпиша договор кој ќе го обврзува на верност во следните една и пол сезона.

За Мекиќ ова е враќање во добро позната средина и негов трет мандат во дресот на МЗТ Скопје. Претходно настапуваше за „металците“ во периодите од 2014 до 2017 и од 2020 до 2023 година.

Во тие сезони остави значајна трага во клубот, освојувајќи пет шампионски титули и трофеи во Купот на Македонија. Неговата борбеност и посветеност на теренот го направија еден од омилените кошаркари меѓу навивачите на МЗТ.

Во Аеродром се враќа по успешниот интернационален период, во кој настапуваше за Задар и освои двојна круна во хрватската кошарка. Со себе носи и значајно меѓународно искуство, кое треба да биде дополнителен адут за тимот во продолжението од сезоната.

МЗТ Скопје Аеродром и тренерот Васко Атанасов, спогодбено ја прекинаа меѓусебната соработка. Ова доаѓа откако македонскиот кошаркарски првак вчера го претрпе првиот пораз во домашното првенство на гостувањето кај Струмица.

Атанасов ја презеде тренерската палка во 2023 година и со клубот освои четири титули првак (2023, 2024, 2025, 2026), во три наврати победуваше во Купот (2024, 2025, 2026).

Името на новиот прв тренер ќе биде соопштено во текот на наредните денови. Дотогаш, со екипата ќе работат досегашните помошници на Атанасов – Дејан Србиновски и Тино Даневски. Инаку, следниот натпревар „металците“ го играат на домашен терен во првенството в недела (1.ноември) против Пелистер.

Виктор Петровски е нов селектор на женската сениорска репрезентација на Македонија, објави попладнево федерацијата.

„Кошаркарската федерација на Македонија започнува ново поглавје во развојот на женската сениорска репрезентација, со именувањето на младиот и трофеен тренер Виктор Петровски за нов селектор на националниот тим. Со оваа одлука Федерацијата ја потврдува својата определба за постепено подмладување на репрезентацијата, воспоставување континуитет меѓу младинските и сениорската селекција и создавање нова генерација кошаркарки кои во наредните години треба да бидат носители на македонската женска кошарка“, стои во соопштението.

Федерацијата му се заблагодарува на досегашниот селектор Александар Ашаданов кој пет години ја предводеше репрезентацијата и се повлече од од лични причини.

Новиот селектор Виктор Петровски, роден во 2001 година, и покрај својата младост, зад себе веќе има исклучително успешна тренерска кариера, исполнета со значајни резултати. Во 2019 година, како тренер на селекцијата до 14 години, Петровски освојува бронзен медал на завршниот турнир, додека во 2021 година со селекцијата до 18 години стигнува до златниот медал. Во 2022 година првпат ја презема функцијата главен тренер на сениорски тим, а уште во својата дебитантска сезона е прогласен за најдобар тренер во регуларниот дел од првенството, остварувајќи серија од девет последователни победи. Во наредните сезони продолжува со континуирани успеси. Во 2023 и 2024 година обезбедува пласман во полуфиналето на националното првенство, а во 2025 година го предводи својот тим до финалето. Круна на неговата досегашна работа е 2026 година, кога со Крива Паланка ја освојува титулата национален шампион на Македонија, како и трофејот во Суперкупот. Во сезоната 2025/2026 го добива и признанието „Тренер на неделата“ во регионалната WABA лига.

Поранешниот кошаркар во НБА-лигата, Пол Пирс во текот на кариерата заработи 195 милиони долари од договори, но денес се соочува со сериозни проблеми.

Судските документи покажуваат дека неговите трошоци месечно достигнуваат до 96.000 долари, а неговите адвокати тврдат дека тој нема доволно приходни за редовно да ги покрие обврските.

По завршувањето на кариерата следеле и проблемите, па така Пирс месечно издвојува околу 28.000 долари за издршка на децата и дополнителни 20.000 долари за поранешната сопруга. За останатите животни трошоци наведува дека му се потребни уште околу 48.000 долари.

Дополнителен удар за неговите приходи беше заминувањето и од телевизиската куќа „Фокс Спортс“, каде што работеше како аналитичар.

Пирс помина 19 сезони во НБА, од кои дури 15 со Бостон Селтикс. Во 2008 година ја освои шампионската титула, а беше прогласен и за најкорисен играч на финалната серија.

Најдобриот играч на Минесота Тимбервулвс, Ентони Едвардс, ќе мора да се подложи на операција на десното колено, што би можело да го оддалечи од кошаркарските терени до два месеци.

И покрај проблемите со коленото, Едвардс одигра одличен натпревар против Кливленд, постигнувајќи 47 поени во поразот на неговиот тим во продолжението (127-125).

Американскиот бек ја отвори сезоната во извонредна форма, со просек од 33,3 поени, 4,8 скока и 3,5 асистенции во првите четири натпревари.

Долгата пауза би можела да ги загрози неговите шанси за признание за МВП и избор во идеалната петорка на НБА, за која е потребно да се одиграат најмалку 65 натпревари.

Едвардс имаше проблеми со колената минатата сезона, поради што пропушти 21 натпревар.

Неговото отсуство сега претставува голем удар за амбициите на Минесота во новата сезона.

Торонто Репторс ќе мора да се снаоѓа без својата суперѕвезда Кавај Ленард во следните неколку недели.

Според Шамс Чаранија од ЕСПН, се очекува Ленард да отсуствува неколку недели поради оток на левото колено.

Магнетната резонанца не покажала структурни оштетувања на коленото. Сепак, паузата ќе му овозможи постепено да се врати во посакуваната форма.

Ленард учествувал во загревањето на Торонто пред викенд-дуелот против Минесота Тимбервулвс. Сепак, почувствувал проблем со коленото, по што медицинскиот тим на Торонто одлучил да не му дозволи да настапи.

Од Репторс соопштија дека Ленард ќе помине низ третмани и рехабилитациска програма за да се намали отокот на левото колено.

Ленард во првите два натпревари со Торонто на почетокот на сезоната има просек од 19,5 поени, 7,5 скока, 1,5 асистенции и 3,5 украдени топки по натпревар. Неговата реализација од игра изнесува 32,4 проценти, додека за три поени шутира со 28,6 проценти.