Најдобриот играч на Минесота Тимбервулвс, Ентони Едвардс, ќе мора да се подложи на операција на десното колено, што би можело да го оддалечи од кошаркарските терени до два месеци.

И покрај проблемите со коленото, Едвардс одигра одличен натпревар против Кливленд, постигнувајќи 47 поени во поразот на неговиот тим во продолжението (127-125).

Американскиот бек ја отвори сезоната во извонредна форма, со просек од 33,3 поени, 4,8 скока и 3,5 асистенции во првите четири натпревари.

Долгата пауза би можела да ги загрози неговите шанси за признание за МВП и избор во идеалната петорка на НБА, за која е потребно да се одиграат најмалку 65 натпревари.

Едвардс имаше проблеми со колената минатата сезона, поради што пропушти 21 натпревар.

Неговото отсуство сега претставува голем удар за амбициите на Минесота во новата сезона.

Торонто Репторс ќе мора да се снаоѓа без својата суперѕвезда Кавај Ленард во следните неколку недели.

Според Шамс Чаранија од ЕСПН, се очекува Ленард да отсуствува неколку недели поради оток на левото колено.

Магнетната резонанца не покажала структурни оштетувања на коленото. Сепак, паузата ќе му овозможи постепено да се врати во посакуваната форма.

Ленард учествувал во загревањето на Торонто пред викенд-дуелот против Минесота Тимбервулвс. Сепак, почувствувал проблем со коленото, по што медицинскиот тим на Торонто одлучил да не му дозволи да настапи.

Од Репторс соопштија дека Ленард ќе помине низ третмани и рехабилитациска програма за да се намали отокот на левото колено.

Ленард во првите два натпревари со Торонто на почетокот на сезоната има просек од 19,5 поени, 7,5 скока, 1,5 асистенции и 3,5 украдени топки по натпревар. Неговата реализација од игра изнесува 32,4 проценти, додека за три поени шутира со 28,6 проценти.

МЗТ Скопје не успеа да приреди изненадувања против АЕК, откако загуби со 69-85 во натпревар од четвртото коло во ФИБА Еврокупот.

Аеродромци го отворија мечот со водство од 7-0, но потоа АЕК потоа направи целосен пресврт и поведе со 9-7. По жестока борба, кипарската екипа ја доби првата четвртина со 23-20.

АЕК беше подобар и во вторите 10 минути, па на полувремето замина со предност од 49-42, по што следеше целосен распад на МЗТ.

Клучниот пад во играта на скопјани се случи во вториот дел, а АЕК ја искористи слабата реакција на македонскиот шампион, ја зголемуваше предноста и на крајот триумфира со 85-69.

Најдобар поединец во победничкиот состав беше Мајлс Тејт со 22 поени, три скока и пет асистенции. Кај МЗТ Скопје, Емир Крајиниќ се истакна со 17 поени и 12 скока.

Рускиот кошаркар Данил Касаткин ќе биде екстрадиран во Соединетите Американски Држави, одлучи судот во Париз. Одлуката за екстрадиција се чекаше околу четири месеци и, на крајот, беше одлучено Франција да го екстрадира Касаткин, кој е обвинет дека е член на позната хакерска група.

Иако адвокатот на рускиот кошаркар нагласи дека „сето тоа било недоразбирање“ и дека ситуацијата ќе се реши во корист на неговиот клиент, Касаткин сепак ќе биде екстрадиран на американските власти, каде што ќе му се суди и ќе се соочи со потенцијална казна од 25 години затвор.

Во втората половина на јуни, Данил Касаткин беше осомничен за учество во хакерска група која наводно извршувала напади користејќи таканаречени „програми за рансомвер“. Кошаркарот ги негираше сите обвиненија, велејќи дека купил сметка од втора рака и дека можел да биде хакиран, и дека сè му било наместено, но очигледно тоа не било доволно за да се ослободи Русинот.

Претходно побарал да биде ослободен со кауција, што исто така му било одбиено, а не помогнало ниту тоа што на сослушувањето изјавил дека ослабел многу и дека тоа ќе влијае на неговата професионална кошаркарска кариера.

Данил Касаткин е роден во 1999 година и своевремено беше член на младинските категории на ЦСКА. Како перспективен кошаркар, тој заминал во САД каде што играл на колеџот Пен Стејт, но не можел да стигне до НБА. Последниот клуб за кој играше беше МБА-МАИ, кој се натпреварува во руската ВТБ-лига.

Мерка притвор им беше одредена доцна синоќа на, сега веќе поранешниот претседател на кошаркарската федерација на Грција Вангелис Лиолиос и неговиот близок соработник, бизнисменот Јоргос Мавраганис за скандалот со корупција и местење натпревари, јави дописничката на МИА од Атина.

Лиолиос, кој беше уапсен минатата седмица, вчера беше изведен пред јавен обвинител и истражен судија и во неколкучасовното сослушување, според медиумите, ги отфрлил обвиненијата за поткуп во период од една деценија, со цел манипулирање со резултатите од кошаркарски натпревари, коментирајќи дека станува збор се заговор со цел да биде отстранет од функцијата.

Паралелно, вчера си поднесе оставка од функцијата претседател на федерацијата.

Првите тројца осомничени од вкупно шест уапсени лица, односно Лиолиос, Мавраганис, како и судијата Петрос Папапетру, се веќе во притвор, додека пак во текот на денешниот ден се очекува пред јавен обвинител и истражен судија да бидат изведени тројца кошаркарски судии, еден активен и двајца поранешни.

По оставката на Лиолиос, управниот одбор на кошаркарската федерација на Грција одржа вонреден состанок за избор на нов претседател, а функцијата ја презеде Ангелос Папаниколау, кој беше главниот противкандидат на Лиолиос пред пет години.

Членовите на управниот одбор на Федерацијата, денеска ќе одржат средба со министерот за спорт на Грција Јанис Вруцис со цел да разговараат за иднината на грчката кошарка по откривањето на скандалот со местење на натпревари. 

Кошаркарот на Торонто, Кавај Ленард, ќе биде подложен на лекарски преглед откако го пропушти поразот на тимот од Минесота со 94:117 на гостински терен.

Триесет и петгодишниот кошаркар учествуваше во загревањето, но на крајот не се појави на теренот.

Главниот тренер Дарко Рајаковиќ објави на прес-конференција по поразот дека прегледот е закажан за понеделник. Врз основа на резултатите, медицинскиот персонал ќе утврди дали играчот може да игра на домашниот натпревар против Орландо в среда.

„Утре ќе биде подложен на дополнителен преглед, а потоа ќе знаеме повеќе, рече српскиот специјалист“.

Работнички ја продолжи победничката серија во домашното кошаркарско првенство, откако на домашен терен го совлада Куманово со 70:63 и го запиша четвртиот триумф од исто толку одиграни натпревари.

Кумановчани, кои на ова гостување пристигнаа по две последователни победи, се покажаа како сериозен противник, но во поголемиот дел од средбата домаќините беа подобриот ривал и на крајот заслужено стигнаа до новите бодови.

Натпреварот донесе неизвесна борба и чести промени на водството. Работнички подобро го отвори дуелот, но Куманово во финишот на првата четвртина направи пресврт и поведе со 19:18. Во продолжението двете екипи се менуваа во водството, а на полувремето Работнички замина со предност од 36:33.

Слична слика имаше и во третата четвртина, по која домашниот состав имаше минимални плус два (53:51). Сепак, кога се решаваше победникот, Работнички одигра најдобро. Во последните десет минути ја презеде контролата врз играта, ја зачува предноста и без поголеми проблеми го приведе натпреварот до крај за нова победа.

Претседателот на кошаркарската федерација на Грција Вангелис Лиолиос е уапсен како дел од полициска акција поради сомневање за подмитување и местење резултати на кошаркарски натпревари во изминатите години, а тој на функцијата е од септември 2021 година. Во акцијата издадени се шест налози за приведување, а меѓу осомничените се и Елијас Коромилас (поранешен судија во Евролига), потоа активните кошаркарски судии: Василики Каруха, Петрос Папапетру, Анастасиос Полидис и Јоргос Маврајанис.

Некои од нив биле во Истанбул и приведени се по доаѓањето во Грција, а според грчките медиуми треба да бидат сослушани пред истражен судија. За дел од обвиненијата предвидени се и законски казни и до пет години затвор.

Интересно е дека при претрес на куќа кај еден од судиите во Катерини се пронајдени повеќе од 800.000 евра во готово. 

Кошаркарите на Филаделфија и Оклахома остварија победи на домашен терен во натпреварите од НБА-лигата.

Филаделфија направи неверојатен пресврт против Кливленд Кавалирс и славеше со 114:106, додека актуелниот шампион Оклахома беше подобар од Денвер со 96:84.

Филаделфија ја забележа втората победа во сезоната, откако пред својата публика го совлада Кливленд во натпревар во кој во еден момент имаше негатива од дури 29 поени.

Гостите одлично го отворија дуелот и ја добија првата четвртина со убедливи 35:18.

Тајрис Макси беше најзаслужен за големиот пресврт со 32 поени, додека Џоел Ембид додаде 24. Џејлен Браун, кој летово пристигна во Филаделфија од Бостон, постигна 21 поен.

Клучниот момент се случи во последната четвртина, кога домашните направија серија од 15:0 и го презедоа водството. Во тој период Макси влезе во вербална расправија со Џејмс Харден, поранешниот соиграч од Филаделфија, па двајцата мораше да бидат разделени

Најефикасен во победата беше Тајрис Макси со 32 поени, додека Ембид запиша 24, а Леброн го заврши дуелот со 17 поени и 10 скокови. Интересно е што ова е и најголемиот пресврт во кариерата на „Кралот“.

Оклахома Тандер славеше против Денвер со 96:84. Двете екипи имаа слаби шутерски вечери, а особено потфрлија нивните најголеми ѕвезди, Шеј Гилџес-Александер и Никола Јокиќ.

Гилџес-Александер го заврши натпреварот со 17 поени, со реализација од само шест погодени шута од 19 обиди. Со тоа заврши неговата серија од 141 натпревар со најмалку 20 постигнати поени, рекорд во НБА-лигата. Во првото полувреме ги промаши сите седум обиди од игра, а до поени стигна единствено од линијата за слободни фрлања.

Кај Денвер, Арон Гордон беше најефикасен со 20 поени, додека Никола Јокиќ постигна само 13 поени, со седум скока и пет асистенции. Српскиот центар имаше многу слаба шутерска вечер, погодувајќи само пет од 19 обиди од игра, од кои еден од седум за три поени. Демар Дерозан, исто така, постигна 13 поени.

Кошаркарите на Партизан ја добија првата овосезонска пресметка со Црвена звезда на европската сцена, откако по голема драма и продолжение славеа со 85-82 во рамките на Евролигата.

„Црно-белите“ одиграа одлично прво полувреме и стекнаа значителна предност, но Црвена звезда не се предаде и во продолжението од натпреварот успеа да се врати во игра. Сепак, Партизан имаше повеќе концентрација во решавачките моменти и на крајот се радуваше на важна победа.

Домаќините фуриозно го отворија натпреварот, поведувајќи со 7:0, а потоа предноста ја зголемија и на 13-3. Партизан продолжи да го контролира темпото и по првата четвртина имаше двоцифрена предност од 31-21.

Во втората четвртина избраниците на Жоан Пењароја дополнително ја зголемија разликата, која во еден момент достигна и 15 поени (36:21). Црвена звезда се обидуваше да се врати, но на паузата замина со негатива од 14 поени (52-38).

Сепак, „црвено-белите“ не се откажаа. Во третата четвртина успеаја да ја намалат разликата, пред Партизан повторно да се одлепи и во последните десет минути да влезе со водство од 65-50.

Во завршната четвртина следуваше нов голем налет на Црвена звезда. Тимот на Ибон Наваро ја искористи кризата во нападот на противникот и постепено ја топеше предноста, приближувајќи се на само четири поени (68-64).

Партизан се обиде да го запре налетот, но Звезда продолжи да се бори и внесе неизвесност во финишот. На крајот, регуларниот дел не беше доволен за да се реши победникот, па вечните ривали мораа да играат продолжение.

Во дополнителните пет минути Партизан беше посигурен и успеа да го приведе натпреварот до крај во своја корист, славејќи со 85-82.