Се е подготвено за битолската европска кошаркарска премиера, вечерашниот меч од второто коло во ФИБА Европа купот во кое Пелистер ќе биде домаќин на Превидза од Словачка (19 часот, сала „Боро Чурлевски“.

„Пелистерци“ претрпеа пораз во првиот меч во Загреб од Цедевита јуниор, но таа лекција е научена, па се очекува избраниците на тренерот Даскаловски максимално мотивирани да го дочекаат гостинот. Промената на пристапот е она што сите во таборот на Пелистер го потенцираа во пресрет на овој меч, најавувајќи една иста работа – максимална борба во текот на сите 40 минути со единствена цел, да се стигне до победа што ќе биде прославена со битолската публика.

„Пред ас е првиот европски меч во Битола, податок што дефинитивно е мотив плус за сите нас. Знаеме дека нема да биде нималку лесно, а клучот ќе биде во нашиот пристап. Ако одиграме онака како што знаеме, ако се бориме и го спроведеме она што го договараме, верувам дека ќе успееме да се радуваме на крајот“, вели Никола Малешевиќ.

Превидза во првото коло покажа дека е исклучително квалитетен тим, рутински славејќи над Керавнос со убедливи 82-68, меч што беше анализиран од страна на стручниот штаб и кошаркарите на Пелистер.

„Ги скаутиравме и знаеме дека сакаат да играат физичка кошарка, ги увидовме нивните предности, како и слабите страни. Играат брза кошарка, незгодни се во транзиција. Ако успееме да го запреме тоа и ние бидеме во котрола над темпото, ќе си ја олесниме задачата на патот кон првата европска победа која сите ја посакуваме“, порачува Малешевиќ.

Билетите по цена од 200 денари од денеска ќе можат да се купат и на билетарницата во салата „Боро Чурлевски“.

НБА планира да ги финализира надоместоците за франшиза во наредните месеци за да лансира нова кошаркарска лига во Европа во рок од две години, објави заменик-комесарот и главен оперативен директор на лигата, Марк Тејтум.

„Нашата цел е да го започнеме проектот во следните две години. Секако, тоа зависи од одобрението од НБА и ФИБА. Преминуваме во следната фаза. И мислам дека во следните осум недели ќе добиеме многу добра претстава за тоа на кое ниво на интерес сме. Сметаме дека оваа лига ќе вклучува комбинација од постоечки клубови, потенцијални нови клубови кои денес не постојат и евентуално некои фудбалски клубови кои немаат кошаркарски тим, но сакаат да инвестираат во еден. Во првата фаза, планираме да се прошириме во 10-12 градови од Велика Британија, Шпанија, Италија, Франција, Германија, евентуално Турција и Грција“, изјави Тејтум за „talkSPORT“.

Претходно, НБА и Меѓународната кошаркарска федерација (ФИБА) официјално објавија дека размислуваат за создавање нова професионална кошаркарска лига во Европа, која би послужила како алтернатива на Евролигата и би ги следела европските или меѓународните правила, вклучувајќи натпревари од 40 минути. Би била поблиску до европскиот формат отколку Американска. Планирано е лигата да вклучува 16 тима.

Екипите од Израел Макаби и Хапоел Тел Авив натпреварите од Евролигата можно е наскоро да ги играат на домашен терен во Израел.

Како што пренесуваат израелските медиуми двата клуба од 1.декември 2025 можно е повторно да играат пред своја публика.

Членовите на бордот на Евролигата изгласале враќање на израелските екипи во Тел Авив. Оваа одлука следува откако Израел и Хамас прогласија примирје и потпишаа прекин на огнот во Газа.

Макаби своите натпревари како „домаќин“ во Евролигата ги игра во Белград, додека Хапоел како „домашен терен“ ја има салата во Софија „Арена 8888“.

Сепак најавите се дека будно ќе се следи ситуацијата во Газа пред да се даде „зелено светло“ за одигрување спортски натпревари.

Кошаркарите на Пелистер во изминатите денови интензивно се подготвуваат за новиот европски предизвик – и тоа првиот меч во историјата што овој клуб ќе го игра во Битола, а за противник ќе го има словачкиот претставник Превидза (среда, 19 часот, сала „Боро Чурлевски“).

Лекцијата од поразот во првото коло во Загреб е научена, а „пелистерци“ во последните денови ставаат акцент токму на овој дуел со гостинот од Словачка, свесни дека пред се мора да се промени пристапот и залагањето во однос на оној прв меч против Цедевита јуниор.

„Прва работа што треба да ја смениме е индивидуалниот пристап, бидејќи од тоа почнува се. Мораме да покажеме желба, да се бориме и да играме за секоја топка, да бидеме колективно силни, да личиме на тим. Мораме да останеме сконцентрирани и на обврските во одбраната, да не играме секој за себе. Ако секој од нас биде на висина на задачата со индивидуалниот пристап, тоа ќе придонесе сите заедно да изгледаме многу подобро на теренот. Секако, желба на сите нас е со победа да го крунисаме овој прв европски меч во Битола“, вели Лука Стојановски во пресрет на утрешниот натпревар.

Мечот со Превидза значи и почеток на напорниот период за битолчани кои за пет дена ќе играат три меча, ако се знае дека по утрешниот дуел ги очекуваат пресметки со Маџари и со Феникс во домашнинот шампионнат.

„Физички се чувствуваме подготвени за тој предизвик, но нема да биде лесно психолошки да се издржи тој ритам, тренинг-процесот и подготовките за овие три меча за така краток период. Токму затоа и овој прв дуел со Превидза е толку важен, ако одиграме како што треба и стигнеме до посакуваната победа, тоа ќе ја крене самодовербата и ќе ни помогне уште посилни и посамоуверени да влеземе во наредните мечеви“, истакнува македонскиот репрезентативец од таборот на Пелистер.

Според него, утрешниот противник на „пелистерци“ е многу сличен на Цедевита јуниор, од кого македонскиот претставник претрпе пораз во првото коло.

Ливерпул ја започна новата сезона со високи амбиции, но последните седмици некако почнува да личи на тим без интензитет и креативност наместо да нуди добри партии и победи.

Во последните три натпревари од Премиер Лигата, Ливерпул запиша порази. Ситуацијата се затегна со поразот на домашен терен од Манчестер Јунајтед во неделата.

Сериозните прашања кои произлегоа поради неуспесите се фокусирани и на Мохамед Салах. Капитенот на „црвените“, кој долги години беше главната фигура на тимот, сега минува низ можеби најтешкиот период од доаѓањето на Анфилд.

Салах веќе не изгледа толку експлозивно, губи во двобои што порано ги добиваше со леснотија, а неговата улога во играта е многу помалку доминантна. Последниве неколку натпревари е бледа сенка од минатите сезони, што би можело да го натера Арне Слот да преземе радикална одлука.

Салах е дел од Ливерпул од 2017 година, кога беше донесен од Рома, и одтогаш е најдобар играч на Црвените. Со тимот има освоено две титули во Премиер Лигата и една во Лигата на шампионите.

Четири пати беше најдобар стрелец во најсилните европски лиги, три пати играч на годината на Анфилд и два пати африкански фудбалер на годината.

Партизан синоќа во АБА лигата го победи ФМП, по едно продолжение, со 109-103. Во фнишот на натпреварот се повреди плејмејкерот Карлик Џонс.

Плејмејкерот на Партизан, ќе паузира три месеци, пишува „Моцартспорт“.

Џонс веднаш по натпреварот бил однесен на медицински тестови. Снимката покажала дека има скршеница на петтата метатарзална коска и дека американскиот кошаркар го чека подолга пауза.

Ова значи дека Џонс заврши со играње кошарка за оваа година. Проблемот е уште поголем бидејќи од претходно е повреден и Шејк Милтон, за кого не е познато кога ќе се врати во тимот.

Со вечерашните три натпревари стартуваше Sparkase Life Прва лига жени. Во неизвесна завршница во Кавадарци, Бадел успеа да стигне до првата победа совладувајќи ја екипата домаќин Пробаскет со 87-83.

Убедлива победа оствари кандидатот за врвот на табелата Крива Паланка. Домашната екипа го совлда тимот на Патриот со 103-44. Во тек е натпреварот меѓу Вардар и Спорт Тим.

Последниот дуел од стартното коло се игра во среда (СРЦ Кале) меѓу МЗТ Бела Вода и првакот Баскет Кам. Натпреварите поради локалните избори беа одложени и не се играа во деновите од викендот.

Мајами Хит има конкретен и долгорочен план како да му го „украде“ Никола Јокиќ на Денвер.

Легендарниот претседател на Мајами, Пет Рајли, веќе го празни буџетот. Тимот од Флорида е дури 15-ти по трошоци во НБА лигата и има потрошено само 73 милиони долари за сезоната 2027/28 – токму кога на српскиот центар му истекува договорот.

Иако Јокиќ пред почетокот на подготовките изјави дека планира целата кариера да ја помине во Денвер, тој ова лето одби да разговара за продолжување на договорот, а за две години ќе биде слободен играч.

Според „CourtSide Buzz“, Мајами сериозно се фрлил на работа и планира да донесе ѕвезди како Никола Јокиќ и Јанис Адетокумбо. Србинот би имал добра основа доколку дојде на Флорида, бидејќи Мајами сега има многу млади и талентирани играчи.

Францускиот претставник Асвел би можел да ја напушти Евролигата и да се пресели во Лигата на шампионите по крајот на оваа сезона.

Тоа само значи дека францускиот клуб која е во сопственост на легендарниот плеј на Сан Антонио Тони Паркер, има желба да се натпреварува во иднина во Лига што би можела да ја формира НБА- Европа.

Со оваа постапка Асвел би следел го следел патот на Алба, германскиот тим веќе се пресели во натпреварувањата на ФИБА од оваа сезона, откако ја напушти Евролигата.

Што се однесува до другите клубови од Франција, Монако нема планови да ја напушти Евролигата, каде што стигна до финалето минатата сезона.

Од друга страна, првиот човек на Асвел, Тони Паркер, верува дека иднината е во друго натпреварување.

Кошаркарите на Пелистер веќе почнаа со тренинзи во Битола по враќањето од Загреб, решени да го остават зад себе разочарувачкиот пораз од Цедевита Олимпија и да се вратат експресно на победнички патеки.

Битолчани влегуваат во пеколен ритам на натпревари ако се знае дека веќе в среда ќе ја пречекаат Словачка Превидза во второто коло од ФИБА Европа купот, по што в петок ќе се сретнат со Маџари во третото коло од Суперлигата, за веќе в недела да го играат и мечот од четвртата рунда против Феникс.

„Бевме разочарани по тој пораз во Загреб, но сега сме фокусирани само на иднината и претстојните предизвици. Главен проблем ни беше што не влеговме енергетски како што треба во мечот, ја немавме онаа агресивност на двете страни од теренот што го красеше Пелистер во изминатите два месеца. Борба за секоја топка, желба за победа, тоа е она што треба да го покажуваме секогаш, тоа не беше случај во Загреб и така не може да се добие натпревар од едно европско натпреварување. Причините може да се бараат на повеќе места, но јас никогаш не сум барал алиби, така ќе биде и овојпат – насочен сум само кон она што следи и верувам дека ќе се вратиме на победнички патеки“, вели тренерот Боро Даскаловски.

Пелистер веќе в среда го игра премиерниот меч од европските купови, историски прв кошаркарски меч од ФИБА-натпреварување во Битола на кој „зелено-белите“ ќе сторат се за да слават над екипата на Превидза од Словачка.

„Верувам дека ќе биде многу поинаку отколку во Загреб, пред се дека ние ќе имаме сосема поинаков пристап и ќе покажеме поголема агресивност на секој дел од теренот. За разлика од Цедевита јуниор, тимот на Превидза е исполнет со Американци, од неодамна имаат и еден босански интернационалец, така што станува збор за екипа со осум-девет странци, надополнета со двајца словачки репрезентативци. Тие имаат респектабилен ростер, но тоа не не интересира, кога играме дома пред нашата битолска публика ќе сториме се за да се покажеме во најдобро можно светло и да дојдеме до победата“, истакнува Даскаловски.