Калвин Филипс и Пау Торес се првите две трансфер цели на новиот тренер Ерик Тен Хаг кој на лето ќе го преземе Манчестер Јунајтед, објавија британските медиуми.
26-годишниот играч од средниот ред Филипс е лидер на екипата на Лидс, додека 25-годишниот централен дефанзивец Торес е член на Виљареал.
Раководството на 20-кратниот шампион на Англија ќе направи се што е во нивна моќ да ги купи двајцата играчи за кои ќе треба да издвои десеттина милиони евра.
Германскиот репрезентативец Антонио Рудигер донесе конечна одлука да го напушти Челзи. Играчот објави дека нема повеќе намера да чека на разврска околу промената на сопственоста на Стемфорд Бриџ, и дека не очекува нова понуда од клубот.
Во моментов „сините“ од Лондон немаат дадено понуда за продолжување на договорот дефанзивецот. Актуелниот договор на Рудигер истекува на крајот од сезоната.
Според информациите, Германецот е решен да прифати нов предизвик, и е многу блиску до договор со Реал Мадрид.
Хари Мегваер јасно им стави до знаење на своите пријатели дека не сака да го напушти тимот на лето, и покрај неодамнешната закана со бомба во неговиот дом.
„Хари нема да биде исфрлен од тимот на Манчестер Јунајтед со такви закани. Неговиот приоритет број еден секогаш ќе биде безбедноста на неговото семејство, но тој исто така има силен карактер да го направи правилното. Овие закани најверојатно се дело на некој кукавички обожавател“, изјави извор близок до Мегваер за „Сан“.
Претходно беше објавено дека фудбалерот добил писмо преку мејл во кое се вели дека може да дојде до експлозија во куќата во која живее со својата свршеница и двете деца. Фудбалерот на Манчестер Јунајтед за помош се обратил до полицијата, која со помош на кучиња ја пребарала куќата, но не нашла ништо. Мегваер оваа сезона одигра 28 натпревари во Премиер лигата и постигна еден гол. Трансфермаркт го цени Мегваер на 40 милиони евра.
Габриел Жесус би можел да се пресели во лондонски Арсенал. Клубовите не воделе директни преговори, но управата на Арсенал веќе стапила во контакт со претставници на 25-годишниот бразилски фудбалер за да разговараат за условите на личниот договор. Се истакнува дека Жесус е отворен за преселба во лондонскиот клуб поради недостаток на минутажа во Манчестер Сити.
Да потсетиме дека Жесус се пресели во Манчестер Сити од Палмеирас во 2016 година. Бразилскиот напаѓач оваа сезона одигра 23 натпревари во Премиер лигата, постигна три гола и имаше седум асистенции. Од 2016 година Жесус е повикан во репрезентацијата на Бразил.
Голгетерот на Баерн Минхен, Роберт Левандовски ја коментираше својата ситуација во клубот. Постојано се шпекулира за неговата иднина во Баерн, бидејќи неговиот договор истекува на крајот од сезонава.
Напаѓачот потврди дека треба да се водат разговори за обновување на неговиот договор, а тоа не му е лесно.
„Знам дека наскоро ќе имаме состанок, но засега нема ништо посебно. Гледам што се случува, не ми е лесно. Прашајте го клубот дали сака да ме задржи“, изјави Левандовски по победата од 3:1 над Борусија Дортмунд, со која Баерн ја освои 10-та последователна титула во Бундеслигата.
Леброн Џејмс оваа сезона не успеа да се пласира со Лос Анџелес Лејкерс во НБА плејофот.
Лејкерси регуларниот дел од сезоната го завршија како единаесетти на табелата, па не ни отидоа во плеј-ин разигрувањето. Ова беше само четврти пат за Леброн да го пропушти плеј-офот. Претходно тоа му се случи во 2004, 2005 и 2019 година.
Тој сподели коментар со своите следбеници на Твитер по возбудливите натпревари во првото коло од плеј-офот.
„Не смеам и нема да пропуштам ниту еден плеј-оф во кариерата. Ова ср*ње боли! Во ред, се враќам да ги гледам натпреварите“, напиша Леброн Џејмс на Твитер.
Одлуката на Вимблдон да им забрани учество на Русите и Белорусите го подели тенискиот свет.
АТП најпрвин излезе со соопштение во кое го осуди ваквиот потег на најпрестижниот тениски турнир во светот, а сега отиде и чекор понатаму.
Според последните информации кои ги пренесоа медиумите, но ги потврдија и некои тениски тренери, АТП и ВТА наскоро ќе имаат состанок во Мадрид, а темата ќе биде вистински преседан.
Размислуваат да одземат бодови на Вимблдон за ВТА и АТП листата. Поточно, Вимблдон би станал најдобро организирана, најбогата и најмасовна егзибиција бидејќи никој не можел да освои ниту еден бод.
Алтернативата е да се најде решение за бодови кои ќе им бидат доделени на Русите и Белорусите врз основа на некои претходни резултати.
Веројатно има уште простор за договор со Вимблдон, но славниот турнир ќе одржи прес-конференција на 26 април.
Фудбалерот од средниот ред на Барселона, Френки де Јонг може да ја продолжи кариерата во англиската Премиер лига.
Според информациите кои беа објавени, Манчестер Јунајтед е заинтересиран за услугите на 24-годишниот холандски фудбалер. Де Јонг е на списокот на трансфер цели на Манчестер Јунајтед за летниот прозорец. Познато е дека на Де Јонг му се допаѓа во Барселона, но играчот може да замине во Манчестер Јунајтед за повторно да се обедини со тренерот на Ајакс, Ерик Тен Хаг, кој ќе ги води „црвените ѓаволи“ од новата сезона.
Да потсетиме дека Де Јонг се пресели во Барселона од Ајакс во 2019 година. Холандскиот играч за врска оваа сезона одигра 27 натпревари во Примера, постигнувајќи три гола и асистенции.
Првиот светски рекет Ига Швјонтек синоќа ја победи 12-та на ВТА ранг-листата, Ема Радукану со 2-0, по сетови 6-4, 6-4 и се пласираше во полуфиналето на турнирот во Штутгарт. За полската тенисерка ова е 21 победа во низа.
Таа победи на пет меча во Доха, потоа шест во Индијан Велс, шест во Мајами, два во Купот „Били Џин Кинг“ и сега два во Штутгарт. Победничката серија е најдолга за тенисерка во топ 10 најдолга од 2000 година. Швјонтек, исто така, стана првата жена што освоила 28 сета по ред по Серена Вилијамс, која го направи тоа помеѓу
Отвореното првенство на САД во 2012 година и Австралија Опен во 2013 година. Попладнево, Швјонтек во полуфиналето на трунирот во Штутгарт ќе се соочи со Људмила Самсонова од Русија.
Менаџерот на Манчестер Јунајтед, Ралф Рангник по поразот од Арсенал со 3-1 изјави дека неговиот тим покажал напредок, но дека крајниот резултат во Лондон е разочарувачки.
Тоа беше важен дуел за позицијата која води во Лигата на шампионите. „Црвените ѓаволи“ се се подалеку од елитата, моментално се шести на табелата со 54 бодови и шест помалку од четвртопласираниот Арсенал.
„Мислам дека имавме одлично враќање во натпреварот по раниот гол, имавме неколку одлични шанси во првото и второто полувреме, можевме да постигнеме уште еден гол“, изјави Рангник и додаде:
„Најслаба точка ни беше одбраната, реакциите во нашиот шеснаесетник. Имавме и три многу несреќни ВАР одлуки. За мене третиот гол на Арсенал беше очигледен офсајд. Не сме многу среќни поради одлуките на ВАР технологијата денес“, потенцира германскиот тренер.
