Депортиво Ла Коруња на почетокот на овој век беше еден од најсилните шпански клубови, но сега му се заканува испаѓање во петтиот ранг на шпанскиот фудбал. Депортиво во 2018. година испадна од Примера, а минатата сезона заврши на 19. место во Сегунда и испадна во Сегунда Б, односно третата лига. Но, поради реорганизацијата на шпанскиот фудбал, првакот на Шпанија од 2000. година би можел да заврши во петта лига. Сегашната Сегунда Б, во која се наоѓа Депортиво, од следната сезона нема да постои. Шпанскиот сојуз воведува две нови лиги, Примера РФЕФ и Сегунда РФЕФ кои ќе бидат трета, односно четврта лига. Терсера, сегашната четврта лига, ќе биде петта и баш во неа би можел да се најде Депортиво. Депортиво во моментот се наоѓа на петтото од десет места во групата А во Сегунда Б. Првите три екипи ќе изборат пласман во Примера РФЕФ, а екипите од четврто до шесто место во Сегунда РФЕФ. Преостанатите четири екипи ќе испаднат во петта лига. Клубот од Ла Коруња е во очајна форма, не добил никого во првенството уште од крајот на ноември минатата година, постигна само седум гола на 13 натпревари, но имаат надеж дека до крајот на сезоната ќе се извлечат.

Интер беше елиминиран во полуфиналето од Купот откако во реваншот кај Јувентус не успеа да го надокнади поразот од 1:2 на домашен терен. Антонио Конте, темпераментниот тренер на Интер, на полувреме беше иритиран од приговарањето на тренерите и управата на Јувентус, па му покажа среден прст на Андреа Ањели. Инаку, токму Ањели како млад и тогаш именуван претседател на Јувентус, во 2011. година му ја даде на Конте првата тренерска прилика во голем клуб и тоа кога Јувентус беше во тешка ситуација. Конте е играчка легенда на Јувентус и омилен капитен, но дотогаш водеше тимови како Бари, Аталанта и Сиена. Затоа, неговото именување за тренер на великанот во резултатска и финансиска криза беше голем ризик. Ањели одлучи да го преземе тој ризик и тоа му се исплати, па Конте во три години освои исто толку Скудета, па се избори за местото селектор на Италија, па потоа го водеше и Челзи. Меѓутоа, првата прилика на голема сцена му ја даде Ањели, на кого му се заблагодари со среден прст.

Милан во рамките од првата нокаут рунда во Лигата на Европа ќе игра против Црвена Звезда. Првиот натпревар помеѓу овие две екипи е закажан за во Белград и тој ќе се одигра на 18. февруари. „Газета дело Спорт“ сега тврди дека тренерот Стефано Пиоли за овој натпревар има намера да го одмори Златан Ибрахимовиќ. Причината е поради тоа што Милан само три дена после натпреварот со Звезда го игра градското дерби со Интер. Ваквата информација секако е лоша вест за навивачите на Звезда кои ќе успеат да дојдат до влезница. Според последните информации на стадионот „Рајко Митиќ“ би можеле да бидат исполнети 30% капацитетот на стадионот.

Англиските клубови го променија распоредот на бројни натпревари во ЛШ и ЛЕ, поради државните рестрикции за влез на државјани од Велика Британија и потенцијално проширување на новиот вид на коронавирус.
Фудбалерите на Бенфика и Арсенал ќе ги одиграат двата свои натпревари од 1/16 финалето на Лига Европа на неутрален терен, потврди Европската фудбалска унија УЕФА.
Бенфика ќе биде домаќин на Арсенал во Рим на Олимпискиот стадион, додека Арсенал ќе биде домаќин во Атина на стадионот на Олимпијакос.
Ливерпул и Манчестер Сити им гостуваат на Лајпциг и Менхенгладбах во Будимпешта и Хернинг, додека Реал Сосиедад ќе биде домаќин на Манчестер Јунајтед во Торино.
Додека, натпреварот каде требаше да биде домаќин Атлетико Мадрид против Челзи ќе биде одигран во Букурешт.

Играчот на Лидс, Рафиња ќе биде примарна цел на Ливерпул во летниот преоден рок, пренесува „Франс Фудбал“.
24-годишното десно крило Рафиња ја игра првата сезона во Лидс и веднаш го привлече вниманието на многу европски гиганти.
Тој пристигна во Премиер лигата од Рен, а Лидс за неговиот потпис плати 20 милиони евра. Бразилецот од почетокот на сезоната има постигнато 4 гола и 4 асистенции на 16 меча за Лидс.
Клоп сака да ги засили крилните позиции и смета дека Рафиња би бил идеално засилување за неговиот тим.

На денешната седница Управниот одбор на Фудбалската федерација на Македонија го закажа Редовното годишно изборно собрание на Фудбалската федерација на Македонија на 14 март 2021 година во Скопје.

Актуелниот претседател Муамед Сејдини ќе се кандидира за нов мандат откако доби поддршка од Општинскиот фудбалски сојуз Кичево. Претходниот собир на највисокиот орган на ФФМ се одржа пред седум месеци, со строги протоколи поради пандемијата на коронавирусот.

Исто така Управниот одбор на Фудбалската федерација на Македонија донесе одлука со која ја измени регулативата што се однесува на антидопинг материјата. Сите чинители во фудбалската организација имаат обврска да ги почитуваат и спроведуваат антидопинг правилата на НАДО МКД.

Александар Трајковски веќе втора сезона игра во дресот на Мајорка.
Македонскиот напаѓач не добива преголема минутажа меѓутоа како што изјави спортскиот директор Пабло Ортљес тој не побарал да си замине.
„Секогаш има играчи кои играат помалку и сакаат да заминат. Во овој случај тоа беше со Алекс Алегрија. Трајковски е со нас и е наш играч. Тренерот олучува кој ќе игра и тој, а и Трајковски лично не ми кажале дека сака да замине“, изјави Ортељс.
Во редовите на Мајорка Трајковски стигна пред две години од Палермо.

Фудбалскиот магазин „Франс Фудбал“, на насловната страница објави фотоградија на кое Лео Меси Лионел го носи дресот на ПСЖ, што веднаш предизвика реакција кај фановите на Барселона. Аргентинецот кој ја одработува последната сезона на – „Камп Ноу“, често се поврзува со можен трансфер на „Паркот на принцовите“ а магазинот кој ја доделува наградата – „Златна топка“, очигледно алудира дека тоа ќе се случи многу брзо. Доколку Меси не го продолжи договорот со Каталонците, тогаш на лето ќе биде слободен играч и без обештетување ќе може да замине во друг состав.

Судијата Мајк Дин е на удар на јавноста во Англија. Навивачите се исклучително незадоволно од одлуките на еден од најдобрите арбитри кои Англија ги има. По црвениот картон на Беднарек, а потоа и Соучек, Мајк Дин е непопуларна личност помеѓу навивачите. Неколку од нив дури отидоа толку далеку што судијата доби и закани по својот живот, а англските медиуми пишуваат дека Дин донесе одлука. Судијата поднесе барање за „пауза“. На распоредот за судење, тој требаше да биде на натпреварот на Лестер во ФА Купот, а познатиот арбитар најверојатно ќе паузира наредното коло. Во двата случаи на поделени црвени картони, Дин се одлучи на тој потег по прегледување на ВАР мониторот покрај теренот. И двата картони беа поништени по жалбите на клубовите, па Соучек ќе може да настапи против Шефилд Јунајтед во Премиерлигата веќе овој викенд.