Гвардиола руши клупски рекорд за капитенот на Астон Вила
Манчестер Сити е фаворит за потписот на Џек Грилиш, пренесуваат медиумите на Островот. Грилиш игра уште една фантастична сезона, а медиумите тврдат дека трансферот може да достигне до 100 милиони фунти. Астон Вила минатото лето за својот капитен бараше 80 милиони фунти, но откако фудбалерот потпиша нов договор неговата цена се зголеми. Грилиш е голема желба исто така на Ливерпул и Манчестер Јунајтед, но Гвардиола сака да ја победи конкуренцијата.
Неш нема дилеми: Јокиќ треба да биде МВП на сезоната
Стив Неш, кој со неговиот Бруклин се наметнува како фаворит за освојување на шампионскиот прстен, се изрази ласкаво за играчот на Денвер, Никола Јокиќ. „Јокиќ е МВП годинава. Игра на високо ниво, има континуитет, од почетокот до крајот, ги прави соиграчите подобри – нагласи Неш откако неговиот тим во текот на ноќта славеше токму на дуелот со Денвер. Српскиот интренационалец, Никола Јокиќ, кој игра на центарските позиции беше избран како 41-ви пик на драфтот од страна на Денвер Нагетс во 2014 година.
Се менува локацијата за финалето на Лигата на шампионите
Финалето на Лигата на шампионите помеѓу Челзи и Манчестер Сити треба да се одигра на 29. мај во Истанбул. Поради пандемијата на коронавирусот, финалето би можело да се одигра на Вембли во Лондон. Имено, британската Влада воведе ограничувања во однос на патувањето на нејзините државјани во Турција, каде состојбата со коронавирусот не е стабилна. Со оглед на тоа што во финалето се англиски клубови, се погласно се зборува за промена на локацијаата. УЕФА беше цврста во намерата финалето да остане во Турција, меѓутоа идната недела би можело да дојде до промена. Вембли се наметнува како идеален кандидат и би можел да дочека 22.500 гледачи. ВО тој случај, УЕФА од финалистите на ЛШ ќе бара откажување од заработката од учеството во финалето. Се работи за 22,5 милиони евра. Тие пари би се проследиле на турските власти, кои веќе вложија финансии во организацијата на финалето.
Кубанецот Реиние Табоада од Данкерк е ново засилување за Еурофарм Пелистер
Еурофарм Пелистер го претстави третото засилување за сезоната 2021/22. Нов член на битолскиот суперлигаш е кубанскиот репрезентативец Реиние Табоада Дранкет, кој доаѓа од францускиот Данкерк. Табоада се обрвза на договор на една сезона со опција за уште една и по завршувањето на сезоната во Франција се очекува негово доаѓање во Битола и официјална презентација. 23-годишниот Табоада роден е на втори јуни 1997 година, висок е 192 сантиметри и тежок 89 килограми и може подеднакво добро да игра како среден и како лев бек. Неговите настапи не останаа незабележани од пошироката јавност, бидејќи беше прогласен за најдобар млад ракометар во Португалија, а во последните две сезони е номиниран за најдобар млад ракометар во францускиот шампионат. Сезонава во француското првенство Табоада одигра 24 натпревари и постигна 68 гола (2,83 гола по натпревар), а во целата своја кариера во Франција бележи 66 натпревари и 164 гола (2,48 гола по натпревар). Пред да дојде во Франција, Табоада настапуваше во португалската екипа Аванка, каде постигна 239 гола на 69 натпревари. Табоада важи за еден од најдобрите кубански ракометари, има голем простор за напредок и во Битола доаѓа како важен елемент во тимот на Жељко Бабиќ за наредната сезона. Пред овој потпис, на Еурофарм Пелистер за следната сезона му пристапија Марко Кизиќ и Немања Обрадовиќ.
Виеира најсериозен кандидат за тренер на Лион
Патрик Виеира е главниот кандидат за нов тренер на фудбалскиот состав Лион, пренесуваат дел од медиумите во Франција. Други кандидати за таа позиција се: Кристоф Галтиер од Лил, Роберто Де Зерби од Сасуоло и Марсело Гаљардо од Ривер Плата. Договорот на сегашниот тренер на „лавовите“, Руди Гарсија, ќе истече во текот на летото и нема да му биде обновен. Лион е трет на табелата во Лига 1 и на две кола пред крајот заостанува 6 бодови во однос на лидерот Лил. Виеира кој е светскиот шампион со Франција од 1998 година, последен пат седеше на кормилото на Ница во Лига 1, но, беше ослободен од обврските во декември во изминатата година.
Фабиан Руиз меѓу Атлетико и Јувентус
Атлетико Мадрид и Јувентус се силно заинтересиран за играчот за врска на Наполи, Фабиан Руиз. 25-годишниот Шпанец пристигна во Наполи од Бетис и веднаш се промовираше во клучен играч во тимот, па заработи и место во шпанската репрезентација. Поради финансиски проблеми Наполи на лето е спремен да ги разгледа понудите за Фабиан Руиз, а најсилен интерес покажуваат Јувентус и Атлетико Мадрид. Симеоне смета дека Шпанецот ќе биде идеално засилување за средниот ред и е спремен за неговиот потпис да понуди 50 милиони евра.
Таеквондистот Георгиевски се избори за олимписка виза
Дејан Георгиевски ќе биде дел од претстојните Олимписки Игри во Токио во текот на летото откако успеа да се избори за норма на квалификацискиот турнирво таеквондо кој се реализираше во Софија во соседна Бугарија. Тој во финалето во категоријата над 87 килограми успеа да слави над олимпискиот шампион Радик Исаев од Азербејџан и да си обезбеди место на финалниот собир. Место на Летните Олимписки Игри претходно обезбеди и борачот Могамедгаџи Нуров а реални шанси тоа да го направи има и каратистот Емил Павлов. Георгиевски во двете денешни борби победи со апсолутна доминација против Динко Сегедин а потоа и против олимпискиот првак Исаев.
Санчо се враќа во Англија, два клуба како опции
Џејдон Санчо е се поблиску до враќање во Премиерлигата, а репрезентативецот на Англија не ја крие желбата дека е можно враќање „дома“. Според информациите, два клуба се во игра за неговиот потпис, цената на која инсистира Борусија Дортмунд полека се намалува, од 105 милиони фунти, веќе на двоцифрена бројка од околу 80 милиони, а на ова реагираа два клуба, Ливерпул и Манчестер Јунајтед. Досега евентуалниот трансфер на Санчо во Англија стана вистинска „сапуница“, но сега работите стануваат сериозни.
Кејн одлучи, летово ќе бара трансфер!
Хари Кејн побарал од сопственикот на Тотенхем Даниел Леви да ги разгледа понудите кои доаѓаат за негов трансфер ова лето. Напаѓачот на Тотенхем не е задоволен од резултатите на екипата. По поразот од Лидс, Лигата на шампионите е речиси невозможна мисија, а тој сака следната сезона да игра во елитата на УЕФА. Кејн бара трансфер под нормални околности, Јунајтед има понуда на 90 милиони фунти, тој веќе нема трпение. Англиските медиуми пишуваат дека 27-годишниот напаѓач бара да бидат разгледани сите опции, а сугерираат дека Кејн е најблиску до трансфер во Јунајтед.
Мурињо го сака Белоти во нападот на Рома
Жозе Мурињо веќе го избра играчот што го посакува за нападот на тимот од новата сезона, кога и официјално ќе ја превземе работата на клупата на римската „волчица“. Според „Кориере дело Спорт“, Мурињо сака во својот состав да го има напаѓачот на Торино, Андреа Белоти. Во Белоти тој гледа совршен човек за нападот на Рома, а како менаџер на Тотенхем веќе се обиде да го привлече во Лондон. Договорот на Белоти со Торино истекува во јуни 2022 година и иако има клаузула за ослободување од 100 милиони евра, таа важи само за потенцијалните купувачи надвор од Италија, а неговата цена е далеку под таа вредност и трансфермаркт во моментов ја проценува на 40 милиони евра. Оваа сезона, 27-годишниот напаѓач има 12 голови и 7 асистенции на 31 натпревар во Серија А.
