Хрватскиот репрезентативец Андреј Крамариќ нема да биде дел од репрезентацијата на последните два дуела од Лигата на нациите. Тој се заблагодари на повикот на селекторот Славен Билиќ и нема да дојде на собирот на репрезентацијата во понеделник.

Крамариќ беше најдобар стрелец во периодот додека Златко Далиќ беше селектор на Хрватска. Фудбалерот на бундеслигашот Хофенхајм не се гледа во репрезентацијата особено што на претходните натпревари не беше во прв план на селекторот Билиќ.

Крамариќ за Хрватска има одиграно 119 натпревари и постигна 36 голови, а дебитираше во 2014 година.

Хрватска се наоѓа на третото место во групата зад Шпанија и Англија, а во последните две кола ќе игра во гости со Англија на 12 ноември и со Чешка во Осиек на 15 ноември.

Фудбалската федерација на Северна и Централна Америка и Карибите (КОНКАКАФ) воведува нов формат на Голд Купот почнувајќи од турнирот во 2027 година.

Досегашниот формат на Голд купот вклучуваше 16 репрезентации поделени во четири групи, а од следната година ќе бидат поделени во две групи од по осум екипи.

Секоја репрезентација ќе игра четири натпревари против различни противници во групната фаза, наместо претходните три.

Четирите најдобро пласирани репрезентации од секоја група ќе се пласираат во нокаут фазата, која ќе се состои од четвртфинале, полуфинале и финале.

Целта на новиот формат, како што соопшти КОНКАКАФ, е да се создадат повеќе можности за најдобро рангираните тимови во регионот да се сретнат меѓусебно веќе во пораните фази од натпреварувањето.

Турнирот ќе се одржи од 17 јуни до 11 јули 2027 година, а домаќинот сè уште не е одреден.

Селекторот на англиската фудбалска репрезентација, Томас Тухел, го објави денеска списокот со 25 фудбалери за претстојните натпревари во Лигата на нации, на кој не се најде офанзивниот играч за врска на Челзи, Кол Палмер, а дебитантски повици добија Џоб Белингам од Борусија Дортмунд и Џош Кинг од Фулам.

Изоставањето на Палмер го отвори повторно прашањето за неговиот статус во националниот тим, особено откако мораше да го откаже доаѓањето во тренинг кампот во септември поради повреда на мускулот.

Џоб Белингем го доби својот прв повик во сениорскиот тим со своите настапи за германскиот клуб, но и за репрезентацијата на Англија до 21 година и би можел да ги следи стапките на својот постар брат Џуд, кој веќе е еден од клучните играчи во составот на Тухел.

Офанзивниот играч за врска на Фулам, Џош Кинг, веќе беше дел од тренинг кампот на националниот тим во Флорида пред Светското првенство во текот на летото.

Англија во моментов е втора во Групата Ц од Лигата на нации и се соочува со два тешки натпревари, со Хрватска на Вембли, а потоа против Шпанија во Мадрид.

Унаи Емери и Астон Вила се на добар пат да ја продолжат соработката, откако двете страни постигнаа начелен договор за заедничката иднина. Шпанскиот стратег е задоволен од проектот во Бирмингем, а раководството на клубот сака да го задржи како главна фигура во спортскиот развој и во наредните години.

Емери има договор со Астон Вила до 2029 година, но по последните разговори станува сè поизвесно дека неговиот престој ќе биде продолжен. Интересот на Манчестер Јунајтед за шпанскиот тренер дополнително ги забрза активностите на раководството на клубот.

Само еден ден по поразот од Барселона во Лигата на шампионите, Емери одржа состанок со претседателот Насеф Савирис и водечките луѓе на клубот. Разговорите биле насочени кон долгорочната стратегија и амбициите на Астон Вила.

Францускиот репрезентативец и поранешен освојувач на „Златната топка“ е блиску до продолжување на договорот со европскиот шампион, а останува само официјализацијата на договорот.

Усман Дембеле и Пари Сен Жермен постигнале договор за продолжување на соработката до 2030 година, објавуваат француските медиуми. Преговорите меѓу двете страни се во завршна фаза, а според последните информации, останува само клубот официјално да го потврди новиот договор.

Според информациите на новинарот Абделах Булма, договорот е практично завршен и нема пречки за негово официјализирање. Дембеле, кој моментално има договор со парижаните до јуни 2028 година, ќе остане уште две сезони подолго на „Паркот на принцовите“.

Французинот пристигна во Париз во 2023 година од Барселона и постепено прерасна во една од најважните фигури во тимот на Луис Енрике. Неговите одлични настапи во сезоната 2024/25 му ја донесоа и „Златната топка“, со што беше крунисан неговиот подем меѓу најдобрите фудбалери во светот.

Дембеле во преговорите инсистираше на подобри финансиски услови, но очигледно двете страни успеале да најдат заеднички јазик. Францускиот напаѓач моментално се опоравува од повреда на бутниот мускул.

ПСЖ, сепак, не работи само на продолжување на договорот со Дембеле. Клубот води разговори и со Хвича Кварацхелија, со кого сака да потпише нова соработка до 2031 година. Преговорите со грузискиот репрезентативец исто така напредуваат позитивно.

Во плановите на парижаните е и продолжување на договорот со Дезире Дуе, но во неговиот случај разговорите се во почетна фаза и нема потреба од брзање.

Спорот со Мароко околу домаќинството на финалето на Светското првенство во 2030 година добива политичка димензија. Лидерот на опозицијата Алберто Нуњез Феихо најави дека Шпанија треба да се повлече од организацијата доколку финалето не се игра на нејзина територија.

Светското првенство во 2030 година сè уште не е ниту блиску до почетокот, а веќе се појавуваат сериозни несогласувања меѓу трите земји организатори. Шпанија, Португалија и Мароко заеднички ќе бидат домаќини на Мундијалот, но најголемата битка во моментов се води околу тоа каде ќе се одигра финалниот натпревар.

Шпанија и Мароко имаат сериозни амбиции да го добијат најважниот натпревар на турнирот, а ФИФА сè уште нема донесено конечна одлука. Токму неизвесноста околу изборот на стадионот предизвика остри реакции во Шпанија.

Лидерот на опозициската Народна партија, Алберто Нуњез Феихо, испрати јасна порака дека Шпанија треба да се повлече од организацијата доколку Мароко го добие финалето.

„Финалето на Светското првенство мора да се игра таму каде што е праведно, соодветно и неоспорно – во Шпанија. Ако не го организираме финалето, според мене, Шпанија не треба да учествува во организацијата на Светското првенство“, изјави Феихо во телевизиско интервју.

Тој беше уште подиректен кога беше прашан дали би презел конкретни чекори за повлекување на Шпанија доколку дојде на премиерската функција.

„Да, одговорот е да“, порача шпанскиот политичар.

Како главни аргументи за својата позиција, Феихо ги наведе организациското искуство на Шпанија, фактот дека кандидатурата првично била подготвена од Шпанија и Португалија, како и фудбалските успеси на земјата.

Од друга страна, Мароко сериозно работи на кандидатурата за финалето. Главен адут е планираниот стадион „Гранд Стад Хасан II“ во близина на Казабланка, кој треба да има капацитет од околу 115.000 гледачи и да биде еден од најголемите фудбалски стадиони во светот.

Шпанските кандидати се „Сантијаго Бернабеу“ во Мадрид и реновираниот „Камп Ноу“ во Барселона.