Супер-компјутерот на познатата статистичка платформа – „Opta“ ги предвиде шансите на клубовите од англиската Премиерлига да ја освојат шампионската титула во сезоната 2023/2024.

На прво место е Манчестер Сити – 87,1%;, пред Ливерпул – 7,2%;, Арсенал — 5,3%; Тотенхем – 0,2%; и Астон Вила – 0,1%.

„Граѓаните“ се лидери по 12 одиграни натпревари со 28 бодови. Ливерпул и Арсенал имаат по 27 бодови,  Тотенхем со 26 бодови а Астон Вила  25 бодови. Во зоната за испаѓање се Барнли на последното, 20. место со четири бода, Шефилд Јунајтед со пет бода на 19. позиција и Лутон Таун со шест бода на 18. место.

Офанзивниот играч за врска на Баер Леверкузен, Флориан Виртц го привлече вниманието на најголемите клубови на Стариот континент.

Покрај Баерн Минхен и Челзи, сега во трката за потписот на Германецот се приклучи и Реал Мадрид. Леверкузен нема лесно да го пушти својот „бисер“, особено поради фактот што Виртц има договор до 2027 година.

Оваа сезона Виртц на 15 настапи постигна 6 гола и запиша 9 асистенции, а Реал Мадрид сака да ја победи конкуренцијата.

„Кралевите“ веќе стапиле во контакт со агентот и на лето се спремни да поудат 80 милиони евра за неговиот потпис.

Дефанзивецот на Ливерпул,Трент Александер-Арнолд со восхит зборуваше за фудбалерот на Манчестер Сити, Џон Стоунс.

„Мислам дека тој е пример како еден играч да може да се трансформира на повеќе позиции. Тој е исклучителен и долго време се восхитувам на неговата игра. Гледам многу видеа од неговите постапки, па дури и кога ги гледам натпреварите на Манчестер Сити, седам и се фокусирам на него“, изјави Александер-Арнолд.

Дефанзивецот на „граѓаните“ во минатата сезона ја освои тројната круна со Манчестер Сити.

Поранешниот аргентински репрезентативец Ернан Креспо е нов тренер на екипата на Ал Аин од ОАЕ. Тој ќе го наследи Алфред Шредер, кој замина по само шест месеци работа.

Ал Аин ја објави веста на социјалните мрежи со видео на кое се прикажани снимки од кариерата на поранешниот напаѓач.

„Ернан Креспо е меѓународна ѕвезда, голем лик и одличен тренер. Неговата репутација и амбиции ги задоволуваат барањата на лидер во фудбалска Азија“, напишаа од клубот.

Креспо до октомври беше тренер на катарскиот шампион Ал-Духаил, кој го ослободи по серијата лоши резултати.

Валтер Мацари е нов тренер на Наполи. Тој доаѓа на местото на Руди Гарсија кој заработи отказ по серијата на лоши резултати.

Клучен фактор за отказот на Шпанецот беа последните два натпревари на Наполи во кои тимот ремизираше 1-1 во Лигата на шампионите со Унион Берлин а претрпе пораз во Серија А од Емполи (0-1).

Мацари ги водеше наполитанците од 2009 до 2013 година кога го освои Купот на Италија.

Јувентус потпиша нов договор со фудбалерот, Николо Фаџоли, кој беше суспендиран поради обложување.

Истиот е до летото во 2028 година. Играчот од средниот ред дојде во клубот во 2015-та кога имаше 14 години. 22-годишниот Италијанец во моментов е суспендиран  поради обложување на фудбалски мечеви.

Фаџоли во сезонава одигра шест натпревари во Серија А и направи една асистенција.

Во последниот период се шпекулираше за тоа кој би можел да го наследи Карло Анчелоти на клупата на Реал Мадрид.

Италијанецот има договор со „кралевите“ до крајот на годината и медиумите тврдеа дека сигурно ќе се раздели со Реал Мадрид на лето.

Притоа, се тврдеше дека веќе има договор со Бразил и ќе седне на селекторското столче на „кариоките“.

Меѓутоа, последните информации се дека Реал сака да продоли со Италијанецот на клупата и дека наскоро ќе започне преговори за продолжување на договорот.

Луис Суарез се врати во националниот тим на Уругвај за претстојните светски квалификации против Аргентина и Боливија. Ова е прв повик за него по Светското првенство во Катар каде Уругвај не успеа да ја помине групната фаза.

36-годишниот Суарез, кој моментно игра за Гремио и е еден од најдобрите стрелци во бразилската лига со 14 гола на 29 натпревари, се најде меѓу избраниците на селекторот Марсело Биелса.

Уругвај во четврток во Буенос Аирес гостува кај светскиот шампион Аргентина, a пет дена подоцна ќе биде домаќин на Боливија.

Репрезентативците на Англија, Џуд Белингем и Леви Колвил поради повреда ќе ги пропуштат претстојните дуели против Малта и Македонија во квалификациите за Еуро 2024.

Најдобриот играч на Реал Мадрид сезонава, Белингем, според информациите од таборот на англичаните сеуште не се опоравил од повредата на рамото, па така селекторот Саутгејт одлучи да не го вклучи во тимот.

Освен овие двајца играчи, поради повреда претходно од списокот за настап отпаднаа Џејмс Медисон од Тотенхем, Калум Вилсон од Њукасл и Луис Данк од Брајтон.

Англија против Малта игра во петок а три дена подоцна гостува во Скопје.

Манчестер Јунајтед соопшти дека репрезентативците на Данска Расмус Хојлунд и Кристијан Ериксен заработија повреди на првенствениот натпревар против Лутон и нема да настапуваат за тимот наредниот период.

Ериксен има повреда на левото рамо и првичната проценка е дека тој ќе биде надвор од фудбалските терени наредните месец дена.

Хојлунд има истегнување на бутниот мускул и тонајверојатно ќе отсуствува до крајот на ноември.

Двајцата играчи нема да бидат достапни и за репрезентативните дуели на Данска во квалификациите за Еуро против Словенија и Северна Ирска.