По четирите последователни победи на Пелистер, се најде јунак кој ќе го сопре битолскиот клуб, мечот против Беласица во Струмица заврши без голови 0-0.
Мечот се играше под рефлектори и требаше да биде уживање за навивачите на овој празничен ден. Но актерите на теренот не понудија многу.
Пелистер бараше начин да дојде до победа, особено беа офанзивни во второто полувреме, но Беласица се одбрани, ја сочува својата мрежа и по петти пат оваа сезона одигра нерешено.
По седмото коло Пелистер падна од врвот, таму сега е Охрид со бод повеќе.
Над 360 натпреварувачи на џудо турнирот „Прилеп Град Херој – 2026“ – Цевитана куп
На турнирот настапија над 360 натпреварувачи од 40 клубови, од кои 25 странски и 15 од Македонија, претставувајќи девет држави: Србија, Бугарија, Грција, Косово, Албанија, Турција, Црна Гора, Словенија и Македонија.
Натпреварите се одржаа во машка и женска конкуренција во категориите деца У12, помлади пионери У14 и пионери У16, на четири борилишта. За регуларното одвивање на борбите се погрижија судии од Македонија и од странство.
Турнирот го организираше Џудо клубот „Сеишин“ – Прилеп, традиционално во чест на националниот празник 11 Октомври. Настанот е дел од програмата на Општина Прилеп за одбележување на празникот.
Свеченото отворање започна со обраќање на потпретседателот на Џудо федерацијата, Миодраг Стојановиќ, по кого се обрати џудо-експертот на Интернационалната џудо федерација, Георге Дани. Градоначалникот на Општина Прилеп, Дејан Проданоски, го прогласи турнирот за отворен, по што беше интонирана химната и започнаа борбите.
Посебен дел од настанот им беше посветен на џудо ветераните, кои одбележуваат десет години од формирањето на Иницијативниот одбор на џудо ветерани. Претседателот на Одборот и селектор на ветеранската репрезентација на Македонија, Киро Здравески, им додели признанија.
Со големиот број учесници, меѓународниот карактер и силната конкуренција, Цевитана куп уште еднаш го потврди своето место меѓу препознатливите традиционални џудо настани во регионот и придонесе за достојно одб
Голем успех за Митевска – освои турнир во Грција!
Сара Митевска, која има само 16 години, го освои турнирот во Грција за тенисерки до 18 години – Ј100 Аридеа.
Митевска на убедлив начин стигна до финалето, без загубен сет, а таму со пресврт дојде до пехарот.
Во финалето македонската тенисерка ја совлада Софија Дрозденко со 2-1 (1-6, 6-1, 6-3) во сетови.
Претходно, во првата рунда како седма носителка беше слободна, а во второто коло ја победи Фотеини Фасула од Грција 2-0 (6-1, 6-1). Во следната рунда ја совлада Елена Пападопулу од Бугарија со 2-0 (6-3, 6-2), додека во четвртфиналето беше поуспешна од Ана Варса од Романија со 2-0 (7-6(5) и 6-4). Победничката серија ја продолжи во полуфиналето со Лидија Панајотиду од Грција 2-0 (6-4, 6-4).
Митевска настапи и во конкуренција на двојки каде со Нина Тепиќ од Србија беа елиминирани во четвртфиналето.
Повредата на Инкапие не е наивна, Арсенал стравува за Еквадорецот
Арсенал е загрижен за состојбата на Пјеро Хинкапие, откако се појавија снимки на кои еквадорскиот дефанзивец има сериозни проблеми со одењето по победата од 2-1 над Лидс.
Хинкапие влезе во игра во 82. минута, но за време на загревањето по натпреварот почувствувал болка во десниот зглоб, поради што соиграчите морале да му помогнат да го напушти теренот.
Засега нема официјална потврда за тежината на повредата, но неговиот настап против Лил во Лигата на шампионите во вторник е неизвесен.
Евентуалното подолго отсуство би му создало дополнителни проблеми на менаџерот Микел Артета, особено поради густата програма и потребата од ротации во одбраната.
Игор Стојчевски најави повлекување од фудбалското судење
Македонскиот интернационален фудбалски судија Игор Стојчевски донесе одлука да се повлече од судењето, наведувајќи ги притисоците и невистините што, според него, се шират во јавноста.
Стојчевски беше изложен на критики по пријателскиот натпревар меѓу младинските репрезентации на Македонија и Русија, кој заврши со победа на Русите од 3-2, особено поради досудените пенали.
Тој потврди дека веќе ги известил челниците на ФФМ и судиската организација за својата одлука.
„Ги информирав претседателот на ФФМ и претседателот на судиската организација, како и комесарот за делегирање дека немам намера повеќе да судам.
Сакам да бидам со моето семејство во овие тешки семејни времиња и не сакам да дозволам да страдаат моите најблиски поради невистини и манипулации што се шират во јавноста од осудувани криминалци“, објави Стојчевски на социјалните мрежи.
Неговото повлекување доаѓа во период кога беше дел од програмата на УЕФА за талентирани судии и менторство за сезоната 2026/2027, во која требаше дополнително да се усовршува.
Закариќ ја освои Автокоманда, Вардар се доближува до врвот
Вардар со пресврт во второто полувреме со 1-2 го победи Скопје на негов терен, актуелниот шампион го искористи киксот на Шкендија и дојде на само минус три до лидерската позиција. Херој беше Горан Закариќ кој ги постигна двата гола.
За вардарци ова беше првата гостинска победа оваа сезона во најдобрата македонска лига.
Мечот не започна најдобро за нив, Виктор Ангелов во 26. минута погоди за водство на Скопје од 1-0. Тоа беше и резултатот од првото полувреме.
По 15 минути игра во вториот дел, по еден одличен центаршут на Пиреш, Закариќ погоди со глава за израмнување на 1-1.
Како одминуваше времето се очекуваше дека натпреварот така и ќе заврши, но во 93. минута Закариќ постигна уште еден гол со глава, овојпат за комплетен пресврт и победа на Вардар од 1-2.
Реми во Чаир, Симоновски донесе бод за Шкендија Арачиново
Во Чаир се одигра интересен натпревар меѓу Шкендија од Арачиново и Шкендија од Тетово, кој заврши без победник, 1-1.
Тетовскиот тим беше подобар противник во поголемиот дел од натпреварот и создаде неколку одлични можности уште во првото полувреме.
Во 13. минута, по слободниот удар на Ендрит Красниќи, Тамба се најде во добра позиција, но неговиот удар заврши во стативата. Само неколку моменти подоцна повторно се закани истиот фудбалер, но голманот Столевски одлично интервенираше. Набргу потоа се обиде и Красниќи со силен удар, но чуварот на мрежата на домашните повторно беше на висина на задачата.
Постојаниот притисок на гостите вроди со плод во 27. минута. Красниќи одлично го пронајде Криезиу, кој беше соборен од домашниот голман во шеснаесетникот. Главниот судија без двоумење покажа на белата точка, а токму Красниќи беше прецизен од пенал за водство на Шкендија од Тетово од 0-1.
И во второто полувреме гостите имаа повеќе од играта и создадоа неколку добри шанси, но не успеаа да го зголемат водството.
Казната стигна во 77. минута кога резервистот Марко Симоновски се најде на вистинското место и ја затресе мрежата за израмнување на 1-1.
Генерално, натпреварот беше коректен и со иницијатива на поранешниот шампион од Тетово, но Шкендија од Арачиново уште еднаш покажа дека поседува квалитет и карактер. Скопскиот тим потврди дека ќе биде незгоден противник за секоја екипа во Првата македонска фудбалска лига.
Двете Шкендии мораа да се задоволат со поделба на пленот. Тетовчани остануваат лидери на табелата со 20 бода и во следното коло ќе играат со Скопје во Автокоманда, додека арачиновци стигнаа до 14 бодови и ќе се подготвуваат за средба со Струга Трим Лум на домашен терен.
Мундијалот во Саудиска Арабија ќе се игра во зима
Светското фудбалско првенство во Саудиска Арабија, предвидено за 2034 година, би можело да се одржи на почетокот на 2035 година поради горештините и преклопувањето на можниот зимски термин со Рамазан.
Германски „Кикер“, повикувајќи се на „Атлетик“, ја пренесе оваа можност, но нема потврдена одлука за поместување на турнирот.
Високите летни температури го отежнуваат одржувањето на Мундијалот во традиционалниот термин во јуни и јули. Првенството во Катар во 2022 година се играше во ноември и декември, но во 2034 година тој период се преклопува со рамазан, што дополнително го усложнува изборот на датумите.
Како можен термин се споменува почетокот на 2035 година, додека АП претходно го наведе и јануари 2034 година како една од опциите. Точните датуми треба да ги одреди ФИФА.
Два гола на Меси во победата над ДЦ Јунајтед
Интер Мајами со 4-0 го победи ДЦ Јунајтед, а Лео Меси и Луис Суарез дадоа по два гола.
Првото полувреме го одбележа Луис Суарез, во него Уругваецот ги постигна своите два погодоци.
Во вториот дел на сцена стапи Меси кој исто така постигна два голови.
Мехди Бенатиа нов спортски директор на Милан
Милан е во потрага по нов спортски директор, а меѓу главните кандидати за оваа функција се најде поранешниот фудбалер на Јувентус, Мехди Бенатија. Според информациите на новинарот Матео Морето, Мароканецот би можел наскоро да пристигне на „Сан Сиро“ и да добие важна улога во раководството на „росонерите“.
Бенатија веќе има искуство во спортскиот менаџмент, откако по завршувањето на професионалната кариера се приклучи на Олимпик Марсеј. Во францускиот клуб, од 2023 до 2025 година, работеше како советник на претседателот, а потоа ја презеде функцијата спортски директор, на која остана до крајот на сезоната 2025/2026.
Во Милан би требало да го наследи Игли Таре, кој се повлече од функцијата на крајот од минатата сезона. Раководството на италијанскиот гигант сега разгледува можни решенија, а Бенатија се наметнува како една од опциите за пополнување на испразнетото место.
Мароканецот добро го познава италијанскиот фудбал, бидејќи покрај Јувентус, во Серија А настапуваше и за Рома и Удинезе. На меѓународната сцена го носеше и дресот на Баерн Минхен, а во текот на кариерата играше и за Марсеј, Клермон, Ал Духаил и Карагумрук.
Останува да се види дали Милан ќе се одлучи токму за Бенатија и дали поранешниот дефанзивец ќе ја добие можноста да преземе една од најважните функции во клупската структура на „росонерите“.
