Легендата на Арсенал, Тјери Анри, верува дека неговиот поранешен клуб конечно ќе ја освои титулата во Премиер лигата. Французинот зборуваше во подкастот „Men in Blazers“ и испрати јасна порака: време е Арсенал да направи чекор напред и да стане првак.

Иако пред неколку месеци отворено ја критикуваше трансфер политиката и истакна дека тимот премногу често останува втор, Анри сега има поинакво расположение. Потврди дека има целосна доверба во Микел Артета и отфрли какви било шпекулации за негова смена.

„Дали мислам дека Артета треба да си замине? Апсолутно не. Она што го прави е извонредно. И да, мислам дека оваа сезона ќе ја освоиме титулата. Досега бевме добри, но сега мора да бидеме одлични“, изјави Анри.

Арсенал од 2019 година инвестираше над 900 милиони фунти под водство на Артета, а минатата сезона го оствари најголемиот успех во Европа со пласман во полуфиналето од Лигата на шампионите. Сега, според Анри, времето за трофеи конечно дошло.

Фудбалскиот клуб Хајдук од Сплит соопшти денес дека поранешниот репрезентативец на Хрватска, Иван Ракитиќ, ја преземал функцијата технички директор на клубот.

Во новата улога, 37-годишниот Ракитиќ ќе биде еден од соработниците на спортскиот директор Горан Вучевиќ, а како што истакна, целосно е посветен на новите предизвици.

„Благодарен сум на претседателот Иван Билиќ и на спортскиот директор Горан Вучевиќ за дадената доверба. Сакам да помогнам на Хајдук и тоа е моментално мојата единствена цел и мотивација. Подготвен сум да работам и да дадам се од себе, за клубот да напредува, а Хајдук во мене ќе има на располагање целото мое знаење, искуство и контакти во светот на фудбалот. Навивачите можат да очекуваат истиот труд и пот што го давав како играч, и сега во оваа нова улога“; изјави Ракитиќ.

Нова ера во Реал Мадрид наскоро почнува – подготовките за новата сезона стартуваат на 4 август, но без Лука Модриќ и Лукас Васкес, двајцата ветерани кои ова лето го напуштија клубот. Со нивното заминување останува голема празнина во соблекувалната затоа што со години беа важни авторитети во тимот, пишува Defensa Central.

Модриќ и Васкес беа двајца од последните тројца останати играчи од генерацијата која освои три последователни Лиги на шампиони. Сега, Дани Карвахал е единствениот „преживеан“ од таа златна ера. Десниот бек ќе ја презеде и улогата на прв капитен, функција која до неодамна ја имаше хрватскиот играч од средина на теренот. Модриќ за последен пат беше капитен во натпреварот против ПСЖ на стадионот MetLife, во полуфиналето на Светското клупско првенство.

Карвахал ќе ја носи капитенската лента секогаш кога ќе биде на теренот, но заедно со него, оваа задача ќе ја делат и Феде Валверде, Тибо Куртоа и Винисиус Жр.

Конор Галагер би можел да го напушти Атлетико Мадрид само една сезона по пристигнувањето, откако шпанскиот клуб го пречекори лимитот за странски фудбалери надвор од Европската Унија.

Причина за компликациите е последното засилување на Атлетико, аргентинскиот плејмејкер Тиаго Алмада, кој пристигна од Ботафого. Со неговиот потпис, тимот на Диего Симеоне сега има четворица фудбалери без ЕУ пасош, а правилата во Ла Лига дозволуваат максимум тројца.

Поради Брегзит, англиските фудбалери веќе не се третираат како граѓани на Европската Унија, па Галагер може да биде „жртвуван“. Шпанските медиуми пренесуваат дека во клубот постои поголема заинтересираност за задржување на Самуел Лино и Науел Молина, додека иднината на Галагер е под сериозен знак прашалник.

Англискиот репрезентативец има 21 настап за „Гордиот Албион“ и веќе се поврзува со враќање во Премиерлигата. Тотенхем и Њукасл се клубовите кои покажале интерес за 24-годишниот играч за врска, кој лани пристигна од Челси за 34 милиони фунти.

Англискиот напаѓач на Манчестер Јунајтед, Маркус Рашфорд, би можел да се приклучи на Барселона. Според Дејвид Орнштајн од „Атлетик“, Каталонците напреднале во преговорите за напаѓачот.

Според изворот, Манчестер Јунајтед се согласил со условите понудени од Барселона, но договорот сè уште не е во финална фаза. Се вели дека Барселона планира да го позајми Рашфорд со опција за откуп.

Маркус Рашфорд е производ на Манчестер Јунајтед. Тој ја помина втората половина од минатата сезона како позајмен играч во Астон Вила. Според медиумските извештаи, Англичанецот не е вклучен во плановите на главниот тренер на „Црвените ѓаволи“, Рубен Аморим.

Жозе Мурињо сака со Фенербахче да го симне Галатасарај од врвот на турскиот фудбал, раководството му гради конкурентен тим.

Информациите од Турција велат дека во текот на наредната недела во Истанбул на медицинските тестови ќе пристигнат Марко Асенсио и Милан Шкрињар.

Шкрињар дел од минатата сезона играше за Фенербахче, но како позајмен играч од ПСЖ, сега би требало да се врати на перманентен трансфер.

За турскиот тим ќе потпише и Марко Асенсио кој својата најголема промоција ја имаше во Реал Мадрид.

И Шпанецот е член на ПСЖ, минатата полусезона настапуваше во Премиер лигата, во тимот на Астон Вила каде се покажа во одлично издание.

Арсенал, под водство на главниот тренер Микел Артета , кој го презеде тимот во зимата 2019 година, потроши 134 милиони фунти (154 милиони евра) за купување играчи од Челзи, објави „ЕСПН“.

Синоќа, „Топџиите“ го објавија трансферот на напаѓачот Нони Мадуеке од Челзи, по претходниот трансфер на голманот Кепа Аризабалага.

Во сезоната 2023/2024, Арсенал го купи офанзивниот играч за врска Каи Хаверц од „Сините“ . Во сезоната 2022/2023, „Топџиите“ го купија играчот за врска Жоржињо .

Покрај тоа, минатата сезона тимот на Артета го позајми крилниот напаѓач Рахим Стерлинг од „Сините“ .

Раководството на Реал Мадрид и голманот Тибо Куртоа постигнаа разбирање во преговорите за нов договор. Според информациите од весникот „Марка“, белгискиот голман ќе потпише нов договор со „кралевите“ до 2027 година.

Претходниот договор на Белгиецот беше до летото 2026 година, но ќе биде продолжен за уште една сезона. Новиот договор ги отстрани сите клаузули во врска со бројот на одиграни натпревари и условите за ново продолжување.

Сите детали од новиот договор се веќе разјаснети и се очекува само официјалното соопштение од Реал Мадрид.

Куртоа ќе започне со тренинзи со шпанскиот гигант на 4 август. Тој пристигна на „Сантијаго Бернабеу“ во 2018 година од тимот на Челзи.

Пјер-Емерик Обамејанг се враќа во францускиот фудбалски клуб Олимпик Марсеј по едногодишен престој во Ал Кадисија, објави „Л’Екип“.

Напаѓачот, кој има 36 години, потпиша договор со Олимпик Марсеј до летото 2027 година.

Обамејанг постигна 30 гола во 51 натпревар за Марсеј во сезоната 2023/2024.

Напаѓачот од Габон беше играч на Милан, но како позајман играч настапуваше за Дижон,Лил и Монако, потоа за Сент Етјен, Борусија Дортмунд, Арсенал, Барселона и Челзи.

Фудбалерот на Аталанта, Адемола Лукман, иако ги прифати условите на Интер за петгодишен договор со плата од 4 милиони евра по сезона, веројатно трансферот нема да се реализира во догледно време.

Имено, првите луѓе на тимот од Бергамо најавија дека немаат намера да прифатат сума помала од 50 милиони евра за 27-годишниот Нигериец додека „нероаѕурите“ испратија понуда од 40 милиони.

Црномурестиот фудбалер одигра 118 мечеви за Аталанта со ефект од 52 гола и 25 асистенции. Неговиот договор е валиден до летото во 2027 година.