Навивачите на израелскиот фудбалски клуб Макаби Тел Авив нема да можат да присуствуваат на натпреварот од Лига на Европа против Астон Вила во Бирмингем од безбедносни причини, објави денеска локалната полиција.

Како што пренесува Би-Би-Си, полицијата изрази загриженост дека нема да може соодветно да одговори на можните протести за време на натпреварот што ќе се игра на 6 ноември на „Вила парк“.

„Клубот е во постојан контакт со Макаби и локалните власти како дел од овој процес. Безбедноста на навивачите и жителите околу стадионот е приоритет при донесувањето каква било одлука“, објави Астон Вила.

Одлуката предизвика бројни реакции од политичарите во Велика Британија. Премиерот Кир Стармер го нарече потегот „погрешна одлука“, додека лидерката на Конзервативната партија, Ками Баденох, ја нарече одлуката „национален срам“.

Европската фудбалска унија (УЕФА) почна нова истрага против Јувентус поради можни прекршувања на правилата за финансиски фер-плеј, поради кои италијанскиот клуб веќе доби суспензија од европските натпреварувања во сезоната 2023/24.

„Во врска со параметрите на правилата за приходи, на ден 18 септември, како што е вообичаено во слични случаи, Јувентус доби известување од УЕФА за отворање постапка поради можното надминување на финансискиот лимит за тригодишниот период 2022/23 – 2024/25“, соопшти клубот од Торино.

Исходот од постапката се очекува напролет 2026 година и, како што е наведено, може да доведе до парична казна, „веројатно со пониска сума“, како и спортски санкции, како што се ограничувања за регистрација на нови играчи за европските натпреварувања.

Клубот, кој е контролиран од семејството Ањели преку нивната холдинг компанија „Ексор“, беше исклучен од европските натпреварувања минатата сезона токму поради претходни прекршувања на финансискиот фер-плеј.

Играчот од средниот ред на Челзи, Кол Палмер, ќе отсуствува од теренот уште шест недели поради повредата на препоните, објави денеска тренерот Енцо Мареска пред саботниот премиерлигашки дуел против Нотингем Форест.

Палмер се повреди во август, но се врати во составот на Челзи и постигна по еден гол на натпреварите против Брентфорд и Баерн Минхен.

Сепак, повредата на 23-годишниот англиски репрезентативец се влоши во поразот на Челзи од Манчестер Јунајтед на 20 септември.

„Погрешив во врска со Палмер. За жал, тој мора да отсуствува уште шест недели“, им изјави на новинарите Мареска.

„Се обидуваме да го заштитиме Кол колку што можеме. Најважно е кога ќе се врати, да биде целосно подготвен. Медицинскиот персонал не се магионичари. Се надеваме дека шест недели се доволни. Мора да го видиме тоа чекор по чекор. Сигурен сум дека ќе биде добро“, додаде Мареска.

Меѓународната фудбалска федерација (ФИФА) објави дека се продадени повеќе од еден милион билети за Светското првенство, кое ќе се одржи идното лето во САД, Канада и Мексико.

Најголема побарувачка е регистрирана од навивачи во трите земји домаќини, а билети купиле навивачи од 212 различни држави и територии, иако досега се познати само 28 од 48 учесници на мундијалскиот турнир од 11 јуни до 19 јули идната година.

ФИФА објави дека Англија, Германија, Бразил, Шпанија, Колумбија, Аргентина и Франција се меѓу првите 10 земји според бројот на купени билети.

„Додека националните тимови ширум светот се натпреваруваат за место на историското Светско првенство, воодушевен сум што толку многу фудбалски фанови сакаат да бидат дел од натпреварувањето во Северна Америка. Тоа е неверојатен одзив и прекрасен знак дека најголемото, најинклузивно Светско првенство во историјата ја освојува имагинацијата на навивачите“, рече претседателот на ФИФА, Џани Инфантино.

Фудбалската федерација на Косово објави дека официјално го формализираше новиот договор со селекторот Франко Фодa за уште 2 години.

Со новиот договор, Фода ќе ја предводи репрезентацијата на Косово до крајот на 2027 година, со можност за автоматско продолжување во случај на квалификација за Европското првенство во 2028 година.

Франко Фода ја презеде функцијата во февруари минатата година и оттогаш го предводеше Косово на 17 натпревари постигнувајќи 11 победи, 2 нерешени средби и само 4 порази.

Финалето во Лигата на Шампионите во 2005 година во Истанбул останува запишано во фудбалската историја како еден од најзапаметените пресврти. Ливерпул се соочи со моќниот тим на Милан, кој доминираше во првото полувреме и изгледаше дека ќе слави по водството од 3-0. Паоло Малдини го отвори резултатот, а потоа Хернан Креспо постигна два гола, оставајќи го Ливерпул во негатива и многумина навивачи подготвени за пораз на полувреме. 

Но, второто полувреме се претвори во вистинска фудбалска бајка. Ливерпул направи неверојатен пресврт, постигнувајќи три гола за само 6 минути преку Стивен Џерард, Владимир Смицер и Чаби Алонсо. Нивната упорност го израмни резултатот и натпреварот отиде во продолжение, каде што двата тима не успеаја да постигнат гол. Во пеналите, голманот на Ливерпул, Џерзи Дудек, се покажа како херој со одбрани на 2 пенали, овозможувајќи му на Ливерпул да го освои својот петти европски куп. 

Дури и по толку години, поразот сè уште е болен за поранешните играчи на Милан, особено за Креспо, кој имаше извонреден настап во првото полувреме. Колапсот на толку силна одбрана, составена од легенди како Кафу, Јап Стам, Алесандро Неста и Малдини, сè уште е тешко да се објасни. Пресвртот на Ливерпул, поттикнат од решителност и вера, се слави како еден од најголемите моменти во фудбалот. 

Повеќе од резултат, финалето од 2005 година ја отсликува непредвидливоста и драмата на фудбалот. Тоа е моќен потсетник дека нема сигурно водство и дека упорноста може да ги победи најголемите шанси. Дваесет години подоцна, „Чудото во Истанбул“ продолжува да инспирира играчи и навивачи ширум светот како најдобар пример за надеж и истрајност на фудбалскиот терен. 

Маркус Рашфорд верува дека неговиот трансфер во Барселона претставува пресвртница во неговата кариера – исполнета со нова енергија, мотивација и потенцијал. По нестабилниот период во Манчестер Јунајтед, англискиот напаѓач вели дека преминот во Ла Лига ја разгорел неговата љубов кон фудбалот и му овозможил личен и професионален развој. 

Во интервју, Рашфорд сподели дека адаптацијата на новата средина и прифаќањето на уникатниот стил на игра на Барселона веќе имаат трансформирачки ефект. Смета дека филозофијата на тимот му одговара и му овозможува поголема слобода на теренот. 

„Овој потег ме освежи,“ изјави тој. „Се работи за поинаков ритам, нов предизвик – токму тоа ми беше потребно.“ 

Првичните настапи покажуваат дека промената дава резултати. Решфорд брзо се наметна како клучна фигура во тимот, со значаен придонес и во голови и во асистенции. Тој го припишува овој напредок на промената на амбиентот, што му помогна повторно да ја пронајде мотивацијата што некогаш го направи еден од најперспективните англиски таленти. 

Сега неговиот фокус е насочен кон следното ниво. Решфорд е решен да продолжи да се развива и да ѝ помогне на Барселона да успее и во домашните и во европските натпреварувања. Убеден е дека со време ќе го достигне својот максимум – и верува дека навивачите во Англија наскоро ќе ја видат најдобрата верзија од него и на репрезентативната сцена. 

„Сè уште не сум го достигнал својот лимит,“ додаде тој. „Гладен сум за напредок и знам дека ова е само почеток на нешто посебно.“ 

Пари Сен Жермен е на чекор од финализирање на нов долгогодишен договор со централниот дефанзивец Вилијам Пачо, само неколку месеци по неговото доаѓање од Ајнтрахт Франкфурт во 2024 година. Еквадорецот се очекува да потпише продолжување на договорот до 2030 година, со зголемени примања што го одразуваат неговото влијание во тимот. 

Од пристигнувањето во Париз, Пачо брзо се наметна како незаменлив во системот на Луис Енрике. Со својата стабилност, физичка подготвеност и тактичка зрелост, се истакна како клучен играч и во Лига 1 и во Лигата на Шампионите. Тренерот Енрике го смета за витален дел од тимот, додека спортскиот директор Луис Кампос одигра клучна улога во забрзувањето на преговорите за новиот договор. 

Иако интерес од други клубови не недостасуваше, Пачо изгледа задоволен во Париз, каде што веќе испиша историја како првиот Еквадорац со трофеј во Лигата на Шампионите. 

Италијанскиот фудбалски гигант Интер оствари рекордни 567 милиони евра приходи во изминатата финансиска година, беше објавено на веб-страницата на клубот.

Финансиските извештаи за сезоната 2024/25 покажуваат приходи од 567 милиони евра, што е зголемување од 94 милиони евра во споредба со претходната сезона. Ова е рекорд, не само за Интер, туку и за италијанскиот фудбал како целина. Претходниот рекорд го држеше Јувентус кога имаше приходи од 464 милиони во првата сезона на Роналдо.

Рекордните приходи на Интер се резултат на зголемените приходи од домашните и европските натпреварувања, како и учеството во првото издание на проширеното Светско клупско првенство. Во исто време, имаше зголемување на комерцијалните приходи од спонзорства и натпревари.

Интер ја затвори финансиската година со нето добивка од 35,4 милиони евра, во споредба со загуба од 35,7 милиони евра во претходната финансиска година. Интер ја заврши рекордната финансиска година без трофеј.

Во финалето на Лигата на шампионите загуби од ПСЖ, во Серија А беше втор од Наполи, во Купот на Италија испадна во полуфиналето против градскиот ривал Милан, „росонерите“ беа подобри и во финалето на Суперкупот на Италија, додека на клупскиот Мундијал клубот загуби од Флуминензе.

Фудбалерот на Баерн Минхен и Англија, Хари Кејн, ја откри својата амбиција да постигне 100 гола за својата репрезентација.

„Мислам дека веќе е блиску. Онака како што се чувствувам во моментов, не планирам да забавам наскоро. Сакам да останам на ова ниво што е можно подолго. Сега сум на 76 гола, така што остануваат 24, а имаме уште неколку натпревари да одиграме пред Светското првенство, а потоа ќе се обидам да дојдам до 100. Головите се постигнати, а бројките зборуваат сами за себе. Начинот на кој се чувствувам на теренот, начинот на кој ја гледам играта, се чувствувам навистина добро“, изјави за ESPN 32-годишниот фудбалер.

Кејн постигна 76 гола и имаше 19 асистенции во 110 настапи за својата репрезентација.