Фудбалските клубови ќе можат на своите играчи да им забранат да одат на репрезентативните собири идниот месец, одлучи ФИФА. Клубовите досега беа задолжени да ги пуштат своите играчи за репрезентативни обврски, но коронавирусот влијаеше на промена и на ова правило. Клубовите сега имаат можност да им забранат на играчите да одат во одредена држава, доколку при враќањето од таа држава мораат во карантин од барем пет дена. На пример, на црвената листа на земји во Велика Британија се наоѓаат Португалија и одредени афрички земји, па играчите кои би патувале таму ќе мораат во карантин по враќањето. Така, Манчестер Јунајтед ќе може да му забрани на Бруно Фернандеш да игра за Португалија, доколку оваа држава остане на црвената листа во Велика Британија.

Ансу Фати најверојатно ја заврши оваа сезона, бидејќи поради компликации со повредата на коленото мораше на нова операција. Оваа вест беше потврдена од лекарот Мигел Љобет, кој истакна дека Фати мораше на нова операција по болките во коленото. Тој доживеа повреда на менискусот на 7. ноември против Бетис, кога му беше предвидена пауза до март, но како што стојат работите, прашање е дали воопшто ќе се врати сезонава. Пред повредата, Фати беше најдобар фудбалер на Барса заедно со Меси, а на 10 натпревари постигна 5 погодоци и имаше четири асистенции. За потсетување, Барселона сезонава има доста проблеми со повреди, Кутињо се враќа дури во април, Серхи Роберто доживеа нова повреда и ќе паузира уште најмалку еден месец, додека Пике по тримесечна пауза треба да се врати овој месец.

Меѓународната федерација за историја и статистика на фудбалот (ИФФХС) објави рангирање на најдобрите фудбалери во оваа деценија во Африка. На врвот од оваа листа се најде напаѓачот на Ливерпул и египетската репрезентација Мохамед Салах. На второ место е неговиот клупски партнер, напаѓачот на репрезентацијата на Сенегал и Ливерпул, Садио Мане. Ријад Марез, играчот за врска на Манчестер Сити и репрезентацијата на Алжир е на третото место. Да потсетиме дека Салах игра за Ливерпул од 2017 година. Египетскиот напаѓач оваа сезона одигра 21 натпревар за Ливерпул во англиската Премиер лига, постигнувајќи 15 гола и 3 асистенции. Актуелниот договор на играчот со Ливерпул е до летото 2023 година. Од 2011 година, Салах е дел од репрезентацијата на Египет.

Манчестер Јунајтед започнал преговори со Бруно Фернандеш за продолжување на неговиот договор, тврдат неколку медиуми во Англија повикувајќи се на извори од клубот. Португалецот кој пред само една година пристигна на „Олд Трафорд“ веднаш стана голема ѕвезда во составот на Оле Гунар Солскјаер. Шефовите на „црвените ѓаволи“ се свесни дека тој заслужува многу подобри финансиски услови со оглед на неговиот ефект на теренот. Сегашниот договор на Фернандеш е валиден до 2025 година.

Нашата фудбалска репрезентација У21 го дозна распоредот за квалификациите за Европското првенство во 2022 година. Ние сме во групата со Франција, Србија, Украина, Фарски острови и Ерменија. Новиот циклус ќе го започнеме на 2 септември на теренот на „триколорите“ а ќе го завршиме кај Украинците на 7 јуни догодина. Еве го комплетниот распоред за македонските фудбалери кој го одреди УЕФА.

02.09.2021 Франција – Македонија

07.09.2021 Македонија – Србија

07.10.2021 Фарски острови – Македонија

12.10.2021 Ерменија – Македонија

11.11.2021 Македонија – Украина

16.11.2021 Македонија – Франција

24.03.2022 Србија – Македонија

29.03.2022 Македонија – Фарски острови

01.06.2022 Македонија – Ерменија

07.06.2022 Украина – Македонија

Роберт Левандовски за прв пат по нешто повеќе од две години промаши пенал. Во натпреварот од 20 коло од Бунделслигата, Баерн на гостувањето против Херта славеше со 1:0, а натпреварот ќе се памети по тоа што голманот Руне Јарштајн му одбрани пенал на Левандовски. Јарштајн најпрво направи пенал над Сане, а потоа се „извади“ со одбраната. Ова беше прв пат под 27. јануари 2019. година некој да му одбрани пенал на полскиот фудбалер. Тој ден промаши пенал во победата на Баерн над Штутгарт, а потоа постигна 17 гола од 17 пенали. Последен голман кој одбранил пенал на Левандовски беше неговиот сегашен соиграч Мануел Нојер, на натпревар во 2013. година, кога Левандовски се уште настапуваше за Борусија Дортмунд. Според податоците на Трансфермаркт, Левандовски за Баерн и Полска од мај 2013. година, постигнал 52 гола од пенал, при што промашил само четири, вклучувајќи го и синоќешниот. Преостанатите три пенали не беа одбранети од голманите.

Двајца дефанзивци на италијанскиот прволигаш Наполи, Калиду Кулибали и Фаузи Гулам се позитивни на коронавирус, објави италијанскиот клуб. Двајцата фудбалери, кои се без симптоми и се наоѓаат во изолација, па ќе го пропуштат гостувањето на Наполи вечерва кај Џенова во рамки на 21. коло од Серија А. Исто така, под знак прашање е и нивниот настап на двата важни натпревари идната недела, најпрво во среда во Бергамо во реваншот од полуфиналето на италијанскиот Куп против Аталанта, а потоа на 13. февруари дома против Јувентус во италијанското првенство. Наполи е и без напаѓачот Дрис Мертенс, кој се наоѓа во Белгија каде се опоравува од повредата на скочниот зглоб.

Интер му „подари“ победа на Јувентус во првиот меч од полуфиналето во Купот на Италија, а навивачите брзо го пронајдоа виновникот. Капитенот и голманот Самир Хандановиќ е мета на критики, па и навреди од навивачите на Интер на друштвените мрежи. Она што тлееше неколку месеци наназад сега пукна. Хандановиќ ја изгуби довербата. Искусниот Словенец во претходните години ги навикна навивачите на Интер да брани на високо ниво. Често беше единствена светла точка во тимот на „нероаѕурите“. Сега кога е создаден конкуретен тим во борбата за Скудетото Хандановиќ повеќе не прави разлика. Дури стана една од послабите алки. Сезонава имаше неколку сериозни грешки при примањето голови (Беневенто и Верона), за негова среќа Интер победуваше во тие натпревари. Сепак, после дербито против Јувентус Хандановиќ немаше зад кого да се скрие.

Нејмар потврди дека нема намера да го напушти тимот на ПСЖ со што стави крај на шпекулациите дека ќе си замине од градот на светлината. „Ме мотивираат само победите кои ги имам остварено во животот и кариерата. Знам какво е чувството да ја освоиш Лига на Шампиони и уверен сум дека повторно ќе го остварам тоа, но, како фудбалер на ПСЖ. Сите знаеме како да поминуваме со фамилијата, пријателите или едноставно да се забавуваме. Пандемијата не натера да размислуваме различно“, додаде фудбалерот на ПСЖ.