Реал Мадрид повторно го насочува вниманието кон дефанзивецот на Ливерпул, Ибрахима Конате, откако нивната главна цел, Вилијам Салиба, потпиша долгорочен договор со Арсенал. Салиба беше прв избор за зајакнување на одбраната, но со неговото останување во Лондон, Мадрид се пренасочува кон други решенија. 

Конате, чиј договор со Ливерпул истекува следното лето, повторно се појавува како реална опција. Иако Ливерпул се обидува да постигне продолжување на договорот, преговорите се сложени, а иднината на Французинот на Енфилд останува неизвесна. 

Реал Мадрид ја гледа можноста да го донесе Конате како слободен агент во 2026 година, што се вклопува во нивната понова стратегија за доведување на квалитетни играчи без отштета. Иако дел од раководството го поддржува потегот како паметен и финансиски и спортски, има и скептици кои не се сигурни дека Конате е најдоброто долгорочно решение за одбраната. 

Мадрид внимателно ја следи ситуацијата, надевајќи се дека статусот на Конате може да им отвори врата за паметен потег во блиска иднина. 

Тренерот на Јувентус, Игор Тудор, упати пофалби за Андреа Камбијасо, нарекувајќи го еден од најперспективните бекови во Европа. На 25 години, италијанскиот репрезентативец се истакнува не само со стабилноста во одбраната, туку и со способноста да игра на офанзивни позиции кога тоа е потребно. 

Тудор ја нагласи неговата интелигенција и тактичка свесност како клучни карактеристики кои му овозможуваат да настапува и како крилен играч или среден играч. Таа флексибилност го направи важен дел од тимот оваа сезона, особено на позицијата лев бек каде што комбинира цврста одбрана со офанзивен придонес. 

Хрватскиот стратег смета дека Камбијасо има квалитет да настапува за најдобрите клубови во Европа, спомнувајќи ги Реал Мадрид, Манчестер Сити и Ливерпул како потенцијални дестинации. Иако интересот од Сити се намали по последните засилувања, Ливерпул сè уште го гледа како можен избор за засилување на левата страна. 

Тудор истакна дека за понатамошниот развој на Камбијасо, клучна ќе биде редовната минутажа. Додека Јувентус сака да го развие неговиот потенцијал, самиот играч ќе треба да одлучи дали ќе остане во клубот или ќе бара поголема шанса во некоја од европските велесили. 

Манчестер Јунајтед ја разгледува можноста за промена на тренерот откако Рубен Аморим се соочува со зголемен притисок по лошиот старт на сезоната. Тимот забележа серија разочарувачки резултати, вклучувајќи и пораз од 3-1 од Брентфорд, што го донесе на 14-то место во Премиер Лигата. Следниот натпревар со Сандерленд на домашен терен се смета за клучен тест за иднината на Аморим. 

Меѓу кандидатите за тренерската позиција се најде и поранешниот селектор на Англија, Гарет Саутгејт, кој е на листата од тројца потенцијални наследници. Сер Џим Ратклиф, делумен сопственик на клубот одговорен за спортските одлуки, во последните недели имал директна комуникација со Саутгејт. Претходно, Саутгејт беше контактиран за оваа улога минатата година, но тогаш не беше заинтересиран. 

За време на својата функција од 2016 до 2024 година, Саутгејт постигна стабилни, но не и импресивни резултати, со 57 победи во 91 натпревар, но без освоени големи трофеи. Иако неговиот дефанзивен стил и избори на играчи предизвикаа критики, тој доби пофалби за создавање позитивна атмосфера и подобрување на клубната култура. Некои поранешни играчи сметаат дека Саутгејт може да донесе стабилност и да помогне во реконструкцијата на проблематичната атмосфера во клубот. 

Сепак, управата на клубот е претпазлива и не сака да донесе брза одлука. Аморим сè уште има поддршка од раководството, вклучувајќи го и Ратклиф, кој е подготвен да му даде уште време на португалскиот тренер да ги подобри резултатите. Манчестер Јунајтед исто така разгледува уште најмалку два други кандидати за менаџерската позиција, покрај Саутгејт, пред да одлучи за иднината. 

Вејн Руни остро ја критикуваше моменталната екипа на Манчестер Јунајтед, нарекувајќи ја непрепознатлива во споредба со златните денови на клубот. Поранешниот капитен и легенда на клубот не го криеше разочарувањето од, како што вели, недостигот на страст, карактер и желба кај сегашните фудбалери. 

Неговите зборови ја одразуваат растечката загриженост кај навивачите и фудбалските експерти, кои чувствуваат дека тимот ја губи својата насока и на теренот и надвор од него. Руни особено потенцираше дека на Јунајтед му недостигаат играчи што можат да направат разлика, фудбалери кои преземаат одговорност и ја менуваат играта. Тоа, според него, не е само прашање на форма, туку и на менталитет и лидерство. 

Слабите резултати последниве недели само ја засилија критиката. Непостојаната форма и неспособноста да се наметне доминација во клучните натпревари ги остави навивачите разочарани и со многу прашања. Се зголемува притисокот врз менаџментот, и сè погласни се сомнежите дали сегашното раководство може да ја врати славата на клубот. 

Начинот на кој клубот ќе одговори во наредните недели може да ја одреди не само сезоната, туку и иднината на Манчестер Јунајтед. 

Чabi Алонсо не ги криеше разочарувањето и лутината по тешкиот пораз од 5–2 против Атлетико Мадрид во саботата. Тренерот беше искрен и директен: неговиот тим не успеа, ниту како поединци, ниту како колектив: во меч каде недостигаше интензитет, контрола и смиреност. 

Реал Мадрид беше под притисок од самиот старт и не успеа да влезе во ритам. Алонсо призна дека тимот не знаел како да се наметне во клучните моменти, оставајќи го Атлетико да доминира со енергија и агресија. 

Овој болен пораз на Метрополитано ги откри слабостите на екипата која сè уште се приспособува на визијата на Алонсо во неговата прва сезона како тренер на „Кралскиот Клуб“. 

Сепак, Алонсо го гледа поразот како дел од процесот на учење. Спомена дека мора да се подобрат основните елементи: дуелите, контролата на топка и тимската хемија. Напредокот, според него, ќе дојде преку самокритика и силна реакција. 

Критичарите, меѓу нив и поранешната ѕвезда на клубот Хорхе Валдано, укажаа на физичката надмоќ и повисокиот ритам на Атлетико како клучни фактори. „Секоја топка во шеснаесетникот беше опасна, секоја контра создаваше хаос во одбраната на Реал“, рече Валдано, опишувајќи меч во кој Реал изгледаше инфериорно во секој сегмент. 

Со Ел Класико што се ближи во октомври, Алонсо е свесен дека времето за корекција е ограничено. Ги повика своите играчи на повисоко ниво на натпреварувачки дух и ментална цврстина. Овој пораз, нагласи, мора да биде пресвртница. 

Совршениот старт на Ливерпул оваа сезона заврши драматично со пораз од 2-1 на гостувањето кај Кристал Палас. Победничкиот гол на Еди Нкетиа во судиското надополнување ја обезбеди победата за домашните и му донесе прв пораз во лигата на менаџерот Арне Слот. 

Црвените, кои ги добија првите седум натпревари од сезоната, многу од нив со доцни голови, овојпат беа казнети од недоволно организирана одбрана во клучните моменти. Слот призна дека фокусот бил исклучиво на одбрана на нерешен резултат, но една лошо проценета офанзивна акција ги остави ранливи по долго нафрлување, момент што Палас максимално го искористи. 

Иако Ливерпул доминираше во поседот, Палас беше подобар во најважните статистички сегменти: очекувани голови, удари во рамките на голот и создадени големи шанси. Дополнително, неколку клучни играчи на Ливерпул изгубија повеќе дуели отколку што добија, што ја истакна физичката слабост на тимот. 

Слот започна со тактички експеримент во формација 4-2-2-2 и средина во форма на „бокс“, но тоа не донесе резултат. По промената во второто полувреме, играта на Ливерпул доби поголем ред, но поразот веќе беше неминовен. 

Слот по натпреварот нагласи дека тимот мора да покаже повеќе дефанзивна дисциплина и физичка цврстина ако сака да остане во трката за титулата. 

Хери Кејн испиша уште една страница во фудбалската историја, станувајќи најбрзиот играч што постигнал 100 голови за клуб од топ 5-те европски лиги. Капитенот на Англија до таа бројка стигна во своето 104. настапување за Баерн Минхен, еден натпревар побрзо од Кристиано Роналдо во Реал Мадрид и Ерлинг Холанд во Манчестер Сити. 

Кејн го достигна рекордот со два гола во убедливата победа од 4-0 против Вердер Бремен, со што Баерн продолжи со перфектен старт во Бундеслигата. Прво реализираше пенал со сигурност, а потоа погоди и од игра, демонстрирајќи ја својата карактеристична смиреност и ефективност пред голот. 

Со 18 голови веќе оваа сезона во сите натпреварувања, од кои 10 само во првите пет лигашки натпревари, 32-годишниот напаѓач не покажува знаци на забавување.  

Усман Дембеле ја освои Златната топка за 2025 година со убедливи 1.380 поени, крунисувајќи ја историската сезона со Пари Сен Жермен во која го предводеше клубот до тројна круна. Французинот стана шестиот играч од својата земја што ја добил оваа престижна награда. 

Младиот талент на Барселона, Ламин Јамал, заврши втор со 1.059 поени, неверојатен успех за 18-годишниот кој истовремено го освој својот втор Копа Трофеј, признание за најдобар млад фудбалер под 21 година. 

Гласањето го спроведоа новинари од 100 земји рангирани од ФИФА. Дембеле доминираше во Африка и Азија, каде неговото влијание во успехот на ПСЖ беше неприкосновено. Во Европа гласовите беа повеќе поделени, со значителна поддршка за зрелиот настап на Јамал во дресот на Барселона. Јужноамериканските новинари пак, ги фаворизираа имињата како Витња и Рафиња. 

Витња заврши трет со 703 поени, пред Мохамед Салах (657) и Рафиња (620). Но најголемата сензација дојде со податокот дека ниту еден новинар не го ставил Рафиња на првото место во својот список. И покрај историската сезона. 

Во топ десет се најдоа уште Ашраф Хакими, Килијан Мбапе, Кол Палмер и Џанлуиџи Донарума, сите со силно влијание и на клупско и на репрезентативно ниво. 

Реал Мадрид се соочува со нов удар во одбраната откако капитенот Дани Карвахал ќе паузира околу еден месец поради повреда на листот на десната нога. Искуствениот бек се повреди за време на поразот од Атлетико Мадрид и мораше да биде заменет по нешто помалку од еден час игра. 

Неговото отсуство доаѓа во најлош момент, со оглед на густата агенда на натпревари во Лигата на Шампионите и Ла Лига. Дополнителен проблем е што и Трент Александер-Арнолд веќе е надвор од составот. 

Александер-Арнолд, кој летово пристигна во Мадрид, се здоби со повреда на задната ложа уште на првиот натпревар во Лигата на Шампионите и ќе биде отсутен уште неколку недели. Тоа дополнително ги намалува опциите на Алонсо за десната бековска позиција. 

Сепак, има и добри вести за „Кралевите“. Стравувањата за нова тешка повреда на Едер Милитао не се остварија, тестовите покажаа дека станува збор за полесен удар, и тој би можел да се врати на теренот веќе во следните денови. 

Но, со двата главни десни бека надвор од игра, Алонсо ќе мора да импровизира или да направи тактички промени за да го одржи тимот стабилен во одбраната во пресрет на серија важни натпревари. 

Крилниот напаѓач на Барселона, Рафиња, ќе паузира околу три недели поради мускулна повреда добиена на натпреварот против Реал Овиедо. Медицинските прегледи потврдија оштетување на средниот дел од бицепс феморис, мускулот на неговата десна нога. 

Повредата доаѓа во незгоден момент, Бразилецот ќе пропушти неколку важни средби. Најзначајна е таа против Пари Сен Жермен во Лигата на Шампионите. Од клубот се надеваат дека ќе се врати по репрезентативната пауза. 

Недостигот на Рафиња е голем удар за Ханси Флик, кој ќе мора да ги реорганизира своите офанзивни планови. Бразилецот играше клучна улога во нападот, со неговата брзина, креативност и енергија. 

Со Ел Класико на повидок, неговото заздравување ќе биде внимателно следено за да се обезбеди целосно закрепнување пред еден од најважните натпревари во сезоната.