Анчелоти добива нов долг договор со Бразилската конфедерација
Карло Анчелоти ќе остане на кормилото на Фудбалска репрезентација на Бразил и по Светско првенство 2026, откако раководството на Бразилска фудбалска конфедерација донело одлука да му понуди нов четиригодишен договор.
Првите луѓе на „кариоките“ се презадоволни од тоа како искусниот Италијанец ја води селекцијата, неговата стручност, авторитет и смиреност во клучните моменти се оценети како гаранција за стабилност на долг рок. Токму затоа, во федерацијата не сакаат настапот на претстојниот Мундијал да биде и последен за Анчелоти на бразилската клупа.
И самиот стратег покажал јасна желба да ја продолжи мисијата, воодушевен од талентот и потенцијалот со кој располага репрезентацијата. Неговата амбиција е јасна, враќање на Бразил на врвот на светскиот фудбал, без разлика дали тоа ќе се случи во 2026 година или четири години подоцна.
Според информациите од Бразил, клучните точки од новиот договор веќе се усогласени, а остануваат само формалности пред официјалната потврда. Се очекува соработката и формално да биде продолжена во текот на март.
Македонија отвора во Лигата на нации против Швајцарија на домашен терен
Европската фудбалска асоцијација го објави распоредот на натпреварите во годинешното издание од Лигата на нации.
Репрезентацијата на Македонија дебитантскиот настап во Б конкуренцијата ќе отвори на домашен терен и тоа против селекцијата на Швајцарија.
Првиот меч во историјата против оваа репрезентација ќе го одиграме на 26 септември на арената Тодор Проески, a почетокот е закажан за 20 часот и 45 минути.
Во првиот циклус на натпревари кога на програмата се вкупно четири кола имаме две гостувања во Словенија и Швајцарија и уште еден дуел пред нашите навивачи кога ја пречекуваме Шкотска.
Во последните две рунди во ноември прво патуваме за Глазгов, а во последното коло во Скопје се среќаваме со Словенија.
ЛИГА НА НАЦИИ – РАСПОРЕД НА НАТПРЕВАРИ
26.09.2026 (сабота)
20:45 МАКЕДОНИЈА – Швајцарија
29.09.2026 (вторник)
20:45 Словенија – МАКЕДОНИЈА
03.10.2026 (сабота)
20:45 МАКЕДОНИЈА – ШКОТСКА
06.10.2026 (вторник)
20:45 Швајцарија – МАКЕДОНИЈА
13.11.2026 (петок)
Шкотска – МАКЕДОНИЈА
16.11.2026 (понеделник)
20:45 МАКЕДОНИЈА – Словенија
Позитивен скор против Словенија, прво соочување со Швајцарија
епрезентацијата на Македонија во годинешното издание од Б конкуренцијата во Лигата на нации за противници ги има селекциите на Шкотска, Швајцарија и Словенија.
Против Шкотите во минатото сме одиграле четири средби. По победата од 1-0 во мечот одигран во Скопје во 2008 година, следуваат средби во кои бележиме два порази и еден нерешен резултат. Сите четири средби се играни во рамките на квалификациите за учество на Светскиот куп.
Со Словенците сме одиграле седум натпревари и во овие натпревари имаме позитивен биланс. Пет меча се пријателски, а оној од 1993 е најзначаен во нашата фудбалска историја бидејќи тоа првиот настап на нашиот национален тим во независна Македонија.
Сите го паметиме историскиот гол на Зоран Бошковски кој сега е дел од стручниот штаб на селекторот Гоце Седлоски.
Македонија во мечевите со Словенија има вкупно четири победи, два нерешени резултати и само еден пораз.
Елиф Елмас со три гола е најефикасниот играч во дуелите против Словенија и тие погодоци се постигнати на последните два меча додека капитенот Енис Барди беше стрелец на израмнувачкиот погодок на мечот во 2019 во Љубљана.
Против Швајцарија до сега не сме играле ниту еден натпревар и токму во ова издание од Лигата на нации ќе додадеме уште една земја на листата на национални тимови со кои сме сретнале на меѓународната сцена.
Македонскиот репрезентативец, Тихомир Костадинов го промени клубот со цел да добие поголема минутажа.
Во финишот од преодниот рок Костадинов ја напушти Сигма и се пресели во Словачко кој се бори за опстанок во најдобрата Чешка лига.
По зимската пауза Костадинов не одигра ниту една минута за Сигма и констатно беше на клупата за резерви, па затоа се одлучи за нов предизвик.
Во кариерата претходно македонскиот фудбалер беше дел од полски Пјаст Главице, словачките Руженборк, Вион и Банска Бистрица, додека во Македонија настапуваше за Тетекс.
Чеферин потврди дека Суперлигата повеќе не постои
Во Брисел, пред ждрепката за Лигата на нации, овој четврток се одржа Конгресот на УЕФА, каде што претседателот Александар Чеферин ја одржа својата презентација.
Најважната порака што ја испрати од говорницата е дека Суперлигата на Европа е официјално поразена.
Во среда, УЕФА постигна договор со Реал Мадрид, а претходно и Барселона се повлече од проектот, ставајќи крај на обидот за формирање паралелно елитно натпреварување.
„Воодушевен сум затоа што Барселона и Реал Мадрид се вратија во нашето семејство. Вистина е дека сите бевме уморни од сè, но УЕФА никогаш не ја изгуби меѓусебната почит со Флорентино Перез, иако имавме различни мислења. Единствениот победник мора да биде фудбалот. Му се заблагодарувам и на Насер Ал Келаифи, кој беше клучен за нашето повторно обединување“, рече Чеферин.
Претседателот на УЕФА ја искористи можноста да испрати силни пораки надвор од самата Суперлига.
„Федерациите стануваат заложници на политиката. Во Европа, нема да прифатиме фудбалот да служи како оружје. Денес, единството се соочува со големи предизвици“, рече Чеферин.
Тој ја отфрли тезата дека фудбалот мора радикално да се промени за да ја привлече помладата генерација.
„Некои велат дека фудбалот мора да се промени за да преживее меѓу младите, но грешат. Младите не му го свртеле грбот на фудбалот, тие сè уште ги полнат стадионите. Во светот на екраните и вештачката интелигенција, ниту еден алгоритам или бот не може да го замени чувството за тоа што се случува на теренот. Фудбалот е реален и затоа неговата иднина е светла“, нагласи првиот човек на УЕФА.
Феенорд се засили со Рахим Стерлинг
Англискиот офанзивец Рахим Стерлинг има нов клуб. Постигнат е договор со Феенорд, каде што ќе пристигне како слободен играч по разделбата со Челси.
Стерлинг важеше за еден од најплатените фудбалери во лондонскиот клуб, но одамна не беше во плановите за иднината. Раководството во изминатиот период бараше решение за неговиот статус и на крајот успеа да пронајде излез.
Со трансферот во Ротердам, искусниот крилен напаѓач ќе се обиде да ја оживее кариерата и повторно да се наметне во европскиот фудбал.
Атлетико Минеиро го отпушти Хорхе Сампаоли
Aргентинскиот стратег Хорге Сампаоли доби отказ.
По само две победи во последните десет натпревари, Атлетико Минеиро одлучи да ја прекине соработката со Сампаоли. Отказот за Аргентинецот дојде по ремито против Рем (3-3).
Сампаоли го преземе Атлетико во септември минатата година и со овој клуб играше во финалето на Копа Судамерикана каде што беше поразен од Ланус.
Покрај клупската кариера во која беше во клубови како. Сантос, Севиља, Фламенго, Марсеј, Рен…Сампаоли беше и селектор на Аргентина и Чиле со кој успеа да триумфира во Копа Америка.
УЕФА пријави огромен приход
Европската фудбалска асоцијација (УЕФА) го одржа денеска својот 50. редовен конгрес во Брисел, потврдувајќи ја здравата финансиска состојба на асоцијацијата, која во моментов има буџет од околу пет милијарди евра, додека резервите изнесуваат 522 милиони евра.
УЕФА е една од најуспешните спортски организации во светот, како што наведе во своето обраќање пред делегатите нејзиниот претседател Александар Чеферин, додавајќи оти иднината на европскиот фудбал, исто така, е светла и покрај бројните предизвици.
За прв пат досега, во сезоната 2024/25, која не го вклучува машкото Европско првенство, вкупните приходи пораснаа на повеќе од пет милијарди евра (5.014), што е зголемување од 737 милиони евра во споредба со сезоната 2023/24. Од оваа бројка, 3,9 милијарди евра беа прераспределени директно на клубовите и националните асоцијации.
„Само оваа сезона, речиси 400 милиони евра ќе бидат распределени на клубови кои не влегле во лигашката фаза на европските натпреварувања, од кои 308 милиони евра ќе одат кај клубови кои воопшто не се натпреваруваат во европските натпреварувања. Дали тоа би постоело во систем управуван исклучиво од профит?“, рече Чеферин во своето обраќање.
За сезоната 2025/26, оваа бројка достигнува 5,136 милијарди евра, додека буџетот за сезоната 2026/27 треба да биде 5,052 милијарди евра. Најголемиот дел од приходите, 81%, доаѓа од медиумски права, 16% од комерцијални партнерства и 3% од билети и угостителство.
Седлоски: Со максимален фокус, посветеност и тимски дух, можеме да одговориме на предизвикот
Македонската репрезентација ги доби противниците за настапот во најновото издание од Лигата на нации. Нашата селекција е дебитант во Б конкуренцијата, а предводникот на националниот тим Гоце Седлоски со респект кон репрезентациите со кои ќе се соочиме, но и верба во своите избраници кои можат да докажат дека Македонија сосема заслужено се наоѓа меѓу нив.
“Шкотска и Швајцарија се главните фаворити во групата. Станува збор за две селекции со континуитет на настапи на големи натпреварувања, учесници и на претстојното Светско првенство. Имаат квалитет и искуство на највисоко ниво. Тоа доволно зборува за предизвикот што нè очекува.
Но, ние не влегуваме во овој циклус со улога на аутсајдер. Нашата цел е да бидеме конкурентни на секој натпревар, без разлика дали играме дома или на гости. Ќе се трудиме да го наметнеме нашиот стил на игра, дисциплиниран, организиран и храбар. Да покажеме дека Македонија со право е дел од Лига Б.
Имаме генерација која веќе е зрела, имаме јасна идеја како сакаме да изгледаме на теренот и треба да веруваме во квалитетот.
Со максимален фокус, посветеност и тимски дух, верувам дека можеме да одговориме на предизвикот”
Шкотска, Швајцарија и Словенија ривали на Македонија во Лигата на нации
Фудбалската репрезентација на Македонија ги доби противниците во дебитантскиот настап во Б конкуренцијата од Лигата на нации.
Македонија е дел од групата Б1 во која партиципираат селекциите на Шкотска, Швајцарија и Словенија.
Во Б2 конкуренцијата ќе настапат Унгарија, Украина, Грузија и Северна Ирска додека Израел, Австрија, Република Ирска и Косово ќе се натпреваруваат во групата Б3.
И во последната четврта група ќе учествуваат Полска, Босна и Херцеговина, Романија, Шведска.
Според календарот на УЕФА, натпреварите ќе се играат во септември, октомври и ноември, но за разлика од претходните години првите четири кола ќе се одиграат во десетина дена.
