Уругвајскиот фудбалер Единсон Кавани официјално го продолжи договорот со Бока Јуниорс до 2026 година.

Кавани пристигна во Бока пред две една година и досега постигна 20 гола на 43 натпревари, со што бргу ги освои симпатиите на навивачите и стана еден од нивните миленици.

37-годишниот Уругваец претходно во кариерата беше дел од Данубио, Палермо, Наполи, ПСЖ, Манчестер Јунајтед и Валенсија. Новиот договор со Бока е со важност до 31 декември 2026 година.

Дефанзивецот на Реал Мадрид, Дани Карвахал е тешко повреден по победата на неговиот тим над Виљареал со 2-0.

Десниот бек беше принуден да го напушти теренот со солзи во очите. Во текот на ноќта тој самиот на социјалните мрежи објави дека ги скинал вкрстените лигаменти на десното колено и дека треба да се оперира.

Тоа значи дека сезоната за дефанзивецот на Реал Мадрид завршува, пишува „АС“.

Луѓето од Јувентус имаат намера да го раскинат договорот Пол Погба кој одлежува суспензија поради користење на допинг, велат последните најави од фудбалска Италија.

Причина за таа одлука е големата плата на фудбалерот кој има тековна соработка до летото 2026 година.

Судот за спортска арбитража (CAS) вчера ја намали суспензијата на Французинот од четири години на 18 месеци. 31-годишниот беше позитивен на тестостерон.

Барселона ќе го задржи фудбалерот, Роберт Левандовски, до летото во 2026 година, објавија денеска медиумите во Шпанија.

Тоа значи дека полскиот голгетер ќе го одработи до крај тековниот договор со Каталонците. 36-годишниот ветеран во тековнава сезона одигра 10 натпревари на кои забележа 9 голови и направи две асистенции.

Според одредени проценки неговата пазарна вредност е 15 милиони евра.

Голманот на Ајнтрахт Франкфурт, Кевин Трап, ја санирал повредата и ќе му биде на располагање на тренерот, Дино Топмолер, за утрешниот меч против Баерн Минхен во рамките на Бундес-лигата на Германија.

Фудбалерот денеска ќе ги има последните лекарски прегледи по што ќе се знае дали ќе биде пријавен за мечот со Баварците.

Ајнтрахт Франкфурт победи на последните четири натпревари во Бундеслигата и заостанува само еден бод зад Баерн.

Напаѓачот на Престон, Црногорецот, Милутин Осмајиќ е
суспендиран на осум натпревари за гризнувањето на фудбалерот
на Блекбурн Овен Бек за врат за време на натпреварот од
Чемпионшип.
Фудбалскиот сојуз на Англија освен со суспензија го казни
Осмајиќ и со парична казна од 15.000 фунти.
Инцидентот се случи пред крајот на натпреварот кој се играше на
22 септември. Напаѓачот го призна својот неспортски потег, но тоа
не му помогна да избегне сериозна казна.

Судот на правдата на Европската унија (ЕУ) денеска пресуди
дека одредени правила на Меѓународната фудбалска федерација
(ФИФА) кои ги регулираат трансферите на играчи меѓу клубовите
се во спротивност со законите на ЕУ.
Одлуката доаѓа откако поранешниот француски репрезентативец
Ласана Дијара правно ги оспори правилата на ФИФА по спорот со
клубот кој датира од пред 10 години.
Дијара тврди дека ограничувањата на ФИФА значат дека тој не
може да најде нов клуб откако неговиот договор со Локомотив
Москва беше раскинат во 2014 година.
Правилата на ФИФА велат дека ако играчот го раскине договорот
без „праведна причина“, играчот и секој клуб што сака да го
ангажира се заеднички одговорни за плаќање на отштета на
претходниот клуб.
„Тие правила го попречуваат слободното движење на играчите и
конкуренцијата меѓу клубовите. Станува збор за такви што го
попречуваат слободното движење на професионалните
фудбалери“, се вели во соопштението на судот.
Судот додаде дека сегашните правила „наметнуваат значителни
правни, финансиски и спортски ризици за играчите и клубовите
што сакаат да ги вработат и кои ги попречуваат меѓународните
трансфери на играчи“.

Хулијан Алварез го принуди Манчестер Сити да го продаде на
Атлетико Мадрид ова лето, но на Аргентинецот досега не му оди.
Како што пренесуваат сигурни извори од Аргентина, блиски до
репрезентативец, Алварез е депресивен бидејќи во Атлетико
Симеоне не го користи како централен напаѓач.
На осумте досегашни натпревари само двапати Алварез играше
како напаѓач. Одигра дури четири натпревари на позицијата зад
класичниот напаѓач, еднаш како лев играч за врска, па дури и
како лево крило, позиција на која воопшто не играше под водство
на Пеп Гвардиола.
Алварез забележа осум настапи во Примера и два во Лигата на
шампионите и постигна два гола.

Луис Суарез жестоко го критикуваше селекторот на Уругвај,
Марсело Биелса и откри дека тој е главната причина што повеќе
не е дел од репрезентацијата.
Суарез репрезентацијата на Уругвај ја напушти пред помалку од
еден месец, а сега одлучи јавно да зборува што се случувало.
Според зборовите на Суарез, Биелса немал воопшто добар однос
со фудбалерите.
„Многу ситуации со него навистина ме погодуваат, сепак не сакав
јавно да зборувам за да го зачувам мирот. Имаше состаноци на
кои ние фудбалерите баравме барем да не поздравува, но не го
правеше ниту тоа. На прес-конферциите кажува убави зборови,
но кога бевме во Њујорк ни забрани дури и да ги поздравувавме фановите. На таа одлука се спротиставив и му кажав дека ќе
продолжиме да го правиме тоа“, изјави Суарез.

Мохамед Салах ја игра последната сезона на „Енфилд“.и следното лето ќе си замине како слободен агент.

Салах влезе во последната година од договорот, а веќе донел конечна одлука да не ја продолжува соработката со клубот од „Енфилд“.

Пари Сен Жермен планира да му понуди тригодишен договор, што е долг договор за играч на негова возраст.

Салах има понуда од Саудиска Арабија, но претпочита да остане да игра на највисоко ниво во Европа. Според „Сан“, раководството на ПСЖ сака да донесе нова голема светска ѕвезда откако клубот во последните години го напуштија Лионел Меси, Нејмар и Килијан Мбапе и нема да жали пари за Салах.