Фудбалерот, Џошуа Кимих, ќе добие зелено светло да го напушти Баерн Минхен откако пропаднале преговорите за продолжување на соработката.

Иако имаше најави дека Кимих ќе остане во Германија, сега се појавија шпекулации дека тој може да замине во Саудиска Арабија.

Кимих има договор со Баварците до наредното лето а неговата вредност на трансфер-пазарот е околу 40-50 милиони евра.

Португалскиот фудбалски интернационалец, Жоао Феликс, не крие дека сака да остане во Барселона.

„Јас играм како позајмен и не зависи од мене. Ја сакам Барса“ – потенцираше напаѓачот кој имаше одлична сезона кај каталонците.

Тој се наоѓа на платниот список на Атлетико Мадрид и допрва ќе ја чека одлуката на челниците дали ќе се врати кај „јорганџиите“ или ќе добие дозвола да остане на стадионот – „Камп Ноу“.  

35-годишниот фудбалски стратег, Гиљермо Абаскал, може да седне на клупата на италијанскиот состав Удинезе.

Тој има реална шанса да го наследи Фабио Канаваро кој доби отказ иако тимот од Удине успеа да се избори за опстанок во Серија „А“.

Претходно имаше информација дека шпанскиот тренер може да ја води Гранада но, тоа се покажа како шпекулација.

Како што пренесува утринава „Мундо депортиво“, Барселона летово може да продаде неколку фудбалери во Саудиска Арабија.

Дури шестмина фудбалери на оваа екипа се мета на клубовите од Арапскиот Полуостров, а прв кој би можел да замине е Жил Кунде, фудбалер кој пристигна по барање на поранешниот спортски директор на клубот. Рамон Планес. Тој сега е дел од Ал-Итихад и го сака Кунде во својот тим.

Покрај него, интерес има и за Роберт Левандовски, Тер Штеген и Рафиња, но реално е дека сите тројца и следната сезона ќе останат во редовите на Барселона и покрај големиот интерес од клубови од Саудиска Арабија.

За Клемен Ленгле исто така има интерес од Саудиска Арабија, но неговата желба е да остане во Европа. Последниот во низата и официјално е член на Барселона, но само околу 20 дена Жоао Феликс, кој се враќа од позајмица во Атлетико Мадрид и кој има сериозни понуди од Саудиска Арабија, пишува споменатиот весник.

Милан е силно заинтересиран за младиот напаѓач на Челзи, Армандо Броја, пренесуваат италијанските медиуми.

„Росонерите“ имаат одлична соработка со Челзи и минатото лето ги доведоа Лофтус Чик и Пулишиќ, а сега сакаат уште еден фудбалер на „сините“.

Милан е во завршни преговори за ангажман на Зиркзе, но сака да го ангажира и Броја бидејќи е напаѓач со различни карактеристики. 22-годишниот напаѓач минатата сезона запиша неколку настапи за Челзи и самиот сака да ја промени средината.

Двата клуба преговараат за едногодишна позајмица со право на откуп.

Шпанските медиуми пренесуваат дека Реал Мадрид е заинтересиран за ѕвездата на Интер, Николо Барела.

Барела веќе неколку сезони е еден од најдобрите играчи за врска во Серија А и го привлече вниманието на многу европски клубови.

Реал е во потрага по играч за врска кој ќе биде наследик на Тони Крос, а Анчелоти го сака својот сонародник.

Реал спрема понуда од 80 милиони евра, но Интер ќе направи се, за да ја задржи својата ѕвезда.

Единствениот играч кој во последните 15 години успеа да го освои „Трофејот Пичичи“, трофеј наменет за најдобриот стрелец во Ла Лига, без да биде играч на Реал или Барселона, е Артем Довбик кој тоа го направи во изминатата сезона.

Напаѓачот на Жирона ја прекина таа серија со 24 постигнати гола во најсилното шпанско првенство. Во таква ситуација очекувано е за него да има интерес. Од Шпанија интерес за Довбик покажал Атлетико Мадрид, меѓутоа како најсериозни изгледа се италијанските клубови.

Украинецот има договор до 2028 година, па така Жирона не брза и не сака да го продаде за сума под 35 милиони евра. Дека може да го гледаме во Италија потврдува и неговата изјава дадена за шпански „АС“.

„Да, точно е, мојот агент води преговори со италијански клубови“, изјави Довбик.

Секако, Довбик ќе биде дел од репрезентацијата на Украина на Европското првенство и неговата иднина сигурно ќе се решава настапот на собирот на најдобрите континентални репрезентации.

Фудбалерот од средниот ред на Германија, Тони Крос ги верува дека неговата репрезентација ќе триумфира на претстојното Европското првенство.

„Кој ќе стане европски шампион? Германија! Можеме да се спротивставиме на нашите противници. Одбројувањето веќе започна, сакам да ги одиграм овие последни натпревари во мојата кариера на ист начин како што ги одиграв последните натпревари за Реал“, го цитира „Кикер“ Крос.

Германската репрезентација ќе игра во иста група со Шкотска, Унгарија и Швајцарија. Турнирот ќе се одржи во Германија од 14 јуни до 14 јули. Претходно, фудбалерот проговори за плановите по завршувањето на професионалната кариера.

Еден од најискусните фудбалери од репрезентацијата на Чешка, Михал Садилек ќе го пропушти Европското првенство во Германија.

Сандилек се повредил возејќи велосипед од кој паднал и си ја скршил ногата.

„За жал Садилек падна додека возеше со својот велосипед и се здоби со расекотина на ногата. За нас ова е сериозен удар бидејќи станува збор за еден од нашите најискусни играчи. Против Малта затоа и беше наш капитен“, изјави селекторот на Чешка Иван Хашек.

Во тој натпревар против Малта, Садилек ги одигра комплетните 90 минути, а неговата репрезентација славеше победа од 7:1. Изминатата сезона прикажуваше солидни настапи во холандски Твенте.

Ќе потсетиме, Чешка утре 18:00 часот ќе игра против Македонија и тоа за нив ќе биде последна контролка пред Европското првенство кое стартува на 14-ти јуни.

Давиде Анчелоти е асистент на неговиот татко осум години, со него беше во Баерн, Наполи, Евертон и Реал Мадрид, но сега има желба да продолжи да работи на друго место како главен тренер.

Според последните информации од Шпанија тој смета дека е вистинско време да направи нов чекор во кариерата.

Во текот на летото помладиот Анчелоти ќе ги одбие понудите и ќе остане во Мадрид, меѓутоа има најавил дека од наредната веќе може да му доставуваат понуди каде што би работел како тренер.

Засега се наведува дека најголем интерес за неговите услуги има од Италија, меѓутоа се споменуваше и Севиља. Како и да има време во текот на сезоната која следи да размисли и да ја избере понудата која најмногу му одговара.