Светската фудбалска федерација(ФИФА) ги демантира шпекулациите дека натпреварите на Светското првенство во Катар ќе траат подолго од 90 минути.

Претходно, некои од светските медиуми ја пренесоа веста дека од ФИФА размислувале да ги продолжат натпреварите, а претседателот Џани Инфантино ја разгледувал опцијата натпреварите да траат 100 минути, со цел навивачите да уживаат во повеќе акција.

Во извештаите се напоменуваат податоци од истражувања според кои во Лигата на шампионите активно се игра само 60,2 проценти од времето.

Но набрзо стигна и демант од Светската куќа на фудбалот.

„После објавените извештаи и гласини, ФИФА сака да истакне дека нема да има промени во правилата во врска со должината на траење на фудбалските натпревари на СП во Катар, ниту на било кое друго натпреварување“.

Фудбалска федерација на Австрија официјално ги демантираше гласините дека во почетокот на неделава директорот на организацијата, Петер Шетел, одлетал во Манчестер на средба со привремениот менаџер на „црвените ѓаволи“, Ралф Рангник.

Според шпекулациите, газдите на австрискиот фудбал имале план да го поканат Рангник за селектор. Местото е испразнето откако Франко Фода поднесе оставка по поразот од Велс во полуфиналниот плеј-оф за Светското првенство во Катар.

Австриската фудбалска федерација наведува дека немало средба меѓу Шетел и Рангник.

Тренерот на македонскиот прволигаш Академија Пандев, Ѓорѓе Стојчев, не е повеќе тренер на екипата.

Тој одлучи да се повлече од функцијата во клубот од Струмица, после двата натпревари во кои Академија Пандев беше изразит фаворит но не успеа да слави победа. Во минатото првенствено коло претрпе пораз од Скопје а во последниот натпревар играше нерешено со Борец .

„Благодарност до Горан Пандев, Фк Академија Пандев. Со срце и душа работев од создавањето на клубот па се до денес. После двата последни резултати одговорноста ја превземам јас како тренер. Посакувам на клубот, играчите во иднина исполнување на зацртаната цел и се надевам ФК Академија Пандев ќе игра во Европските натпреварувања !!!“, порача Стојчев преку пост на Фејсбук.

Тренерот на Реал Мадрид, Карло Анчелоти не ги штедеше импресиите од играта на напаѓачот Карим Бензема, кој постигна хет-трик во победата од 3:1 над Челзи во првото четвртфинале од Лигата на шампионите кое се одигра на „Стемфорд Бриџ“.

„Го контролиравме натпреварот и опасно напаѓавме преку контра напади. Беше добра фудбалска вечер, сега имаме мала пауза, но не треба да се опуштиме. Покажавме добра организација, а Бензема беше фантастичен пред голот на противникот. Имаме предност пред реваншот, но во вторник ќе имаме сосема поинаков натпревар. Сепак, Челзи е актуелен победник во Лигата на шампионите“, изјави Анчелоти после натпреварот.

Тренерот на Виљареал, Унаи Емери, упати пофалби кон своите играчи за нивниот настап на натпреварот со Баерн Минхен. 

Виљареал славеше победа со 1-0 против шампионот на Германија во првото четвртфинале од Лигата на шампионите.

“Начинот на кој играме покажува дека сме на високо ниво при соочувањето со фаворитите. Нашата цел е да се пласираме во полуфиналето. Бевме практично совршени против Баерн и можевме да оствариме и поубедлива победа”, изјави Емери.

Челниците на Париз Сен Жермен ќе се обидат да го привлечат Погба назад во неговата татковина. Според информациите клубот веќе упатил понуда до Пол Погба бидејќи договорот на Французинот со Манчестер Јунајтед истекува на крајот на сезоната и се чини дека тој нема да остане на Олд Трафорд.

Доколку 30-годишниот фудбалер се согласи со условите на ПСЖ, тој ќе се пресели на Паркот на принцовите како слободен играч.

Парижаните со сигурност ќе му понудат повисока плата од 290 илјади фунти неделно, колку што во моментот Погба заработува во Јунајтед.

Се верува дека Погба повеќе сака да се врати во својот поранешен тим Јувентус, но неговата плата е превисока за гигантот од Италија.

Фудбалскиот сојуз на Русија (РФС) ја повлече жалбата на одлуката на ФИФА за забрана за учество на „Зборнаја“ на меѓународни натпреварувања, со што практично го прифати исклучувањето од Светското првенство во 2022 година, соопшти Судот за спортска арбитража (ЦАС).

Во соопштението ЦАС истакна дека постапката наскоро ќе биде затворена. На крајот на февруари ФИФА ја суспендираше Русија на неодредено време од сите натпреварувања, а сето тоа поради војната со Украина.

Русите тогаш најавија жалба, но сега се повлекоа и ја прифатија конечната одлука.

Сепак, Русија ја продолжува акцијата против Европската фудбалска федерација (УЕФА) и се уште се надева дека ќе и дозволи на женската репрезентација да учествува на Европското првенство летово во Англија, кое ќе се игра од 6 до 31 јуни.

Ѕвездата на Манчестер Јунајтед – Кристијано Роналдо, повторно тренира со екипата. Португалецот поради настинка го пропушти ремито со Лестер, но сега повторно му е на располагање на тренерот Ралф Рангник. Тоа значи дека Роналдо сигурно ќе биде во тимот за тешкото гостување кај Евертон во сабота.

Во меѓувреме, Роналдо беше прогласен за играч на месецот на Јунајтед.

„Ви благодарам многу за гласовите и поддршката. Се чувствувам многу среќен и мотивиран за остатокот од сезоната. Како и секогаш ќе дадам се од себе“, изјави Роналдо за навивачите на „црвените ѓаволи“.

Гонзало Игуаин, кој настапува во американската МЛС лига за екипата на Интер Мајами, ги демантираше информациите дека ќе се пензионира на крајот на оваа сезона.

„Зборовите на татко ми беа погрешно разбрани. Ова е некакво недоразбирање. Никогаш не зборував со него за пензионирање. Оваа информација нема никаква врска со реалноста, целосно сум фокусиран да играм за сегашниот клуб и да го исполнам договорот. Кога ќе дојде време да ја завршам кариерата, и да биде донесена таква одлука, јас ќе бидам единствениот кој ќе го објави тоа. Никој освен мене нема д азборува за тоа“, изјави Игуаин.

Игуаин се пресели во Интер Мајами во 2020 година. Договорот на играчот со клубот е до 2022 година. Претходно, Аргентинецот играше за Јувентус, Челзи, Милан, Наполи и Реал Мадрид.

Фудбалерот на Милан, Алесандро Флоренци, имаше успешна операција на менискусот на левото колено, објави денеска калчо-лигашот.

„Росонерите“ не наведуваат до кога ќе трае процесот на рехабилитација на дефанзивецот иако вообичаениот период е неколку месеци.

Ќе потсетиме дека во изминатиот октомври италијанскиот репрезентативец ја имаше иста операција на истото место.