Германскиот ракометен клуб Интерактив официјално соопшти дека македонскиот тренер Филип Лазаров повеќе нема да ја води екипата, ставајќи крај на повеќегодишната соработка.

Лазаров се пресели во Интерактив во 2018 година како играч од редовите на Бешикташ, а по завршувањето на играчката кариера во 2022 година ја презеде тренерската клупа.

Уште во дебитантската тренерска сезона ја освои шампионската титула и го внесе тимот во Третата Бундеслига, а под негово водство клубот го освои и германскиот аматерски Куп.

Почетокот на новиот квалификации и дуелот со Луксембург беа можност за Ракометната Федерација на Македонија и навивачите да му се заблагодарат на Никола Маркоски за придонесот што долгогодишниот репрезентативец го имаше за националниот тим.

Ракометарот пред натпреварот доби специјален подарок – дрес со своето презиме од претседателот Стефанов, излегувајќи на терен со своите деца при што беше поздравен од сите репрезентативци и доби гласни овации од присутните во СЦ „Борис Трајковски“.

Никола Маркоски летово ја заврши својата богата ракометна кариера и моментно е дел од стручниот штаб во суперлигашот Мулти Есенс.

Избраниците на селекторопт Кире Лазаров апсолутно доминираа на мечот со Луксембург и без никаквби проблеми остварија очекувана убедлива победа.

По мечот селекторот Лазаров истакна дека е задоволен од настапот на своите ракометари:

“Задоволен сум од момците како пристапија кон натпреварот и за она што го работевме во изминатите два дена, немавме доволно време.

Требаше да почекаме да се одморат играчите на Вардар и Пелистер по дербито, имавме играч кој за првпат е овде, требаше да го инкорпирираме во системот кој што го играме и не беше воопшто лесно сето тоа да го направиме во три тренинга.

Го искористивме максимално времето. Задоволен сум од тоа како системски напаѓавме, секогаш може подобро, може и полошо, но задоволен сум. Задоволен сум од настапот, не е битен резултатот, битен е пристапот и на кој начин играме.

Имавме темпо цели 60 минути што не е лесно за наши услови, без разлика што се работи за Луксембург. Им честитам на момците за она договореното што го прикажаа“.

За претстојниот дуел со Грција истакна:

“Мислам дека малку и заштедивме сили за тоа што ни следува со оглед на тоа дека е ек на сезона. Заетедивме сили, имаме сега три дена пред мечот со Грција за да максимално се спремиме. Таму не очекува пеколен меч против една одлична репрезентација која што за баражот за СП ја мина Холандија. Ќе пристапиме максимално сериозно , треба да бидеме спремни на се. Треба да имаме контрола на цела ситуација, можни се многу ситуации, да не кажам сценарија, спортски сценарија пред се. Ќе пробаме психолошки да ја спремиме екипата за она што следува“.

Македонската ракометна репрезентација победнички ги отвори квалификациите за пласман на Европското првенство 2028.

Селекторот, Кирил Лазаров и неговите момци на домашен терен ја оправдаа улогата на фаворит против Луксембург, славеа со 41-23 (20-10).

Мартин Томовски имаше 13 одбрани, во своето деби за националниот дрес, Горига постигна три гола. Костески постигна 6 гола, Петковски и Серафимов имаа по пет гола.

Следен противник на „црвено-жолтите“ е репрезентацијата на Грција, дуел кој го играат на гостински терен во недела.

Машката ракометна репрезентација на Македонија вечерва ги започнува квалификациите за пласман на Европското првенство во 2028 година, кое ќе се одржи во Швајцарија, Шпанија и Португалија. Прв предизвик за избраниците на Кирил Лазаров ќе биде селекцијата на Луксембург, против која Македонија ја има улогата на голем фаворит.

Традицијата е целосно на страната на македонската репрезентација. Двете селекции досега одиграле шест меѓусебни натпревари во квалификациите за европските шампионати, а Македонија има максимален ефект од шест победи. Особено убедливи биле настапите на домашен терен, каде што сите три триумфи биле остварени со двоцифрена разлика.

Последната пресметка во Скопје, одиграна во октомври 2022 година, заврши со убедливи 38:24 за Македонија, додека во последниот меѓусебен дуел, во април 2023 година во Луксембург, нашите ракометари славеа со 28:23.

Гостите во Скопје доаѓаат со нов селектор, искусниот Дидие Динар, но тоа не ја менува фаворитската улога на македонската селекција, која со победа сака да го отвори новиот квалификациски циклус.

Селекторот Кирил Лазаров го избра составот за вечерашниот дуел. Од првично повиканите 18 ракометари, надвор од комбинација останаа Васил Гогов и Филип Николов, додека шанса за деби настап ќе добие Дмитро Хориха.

Состав на Македонија: Томовски, Галевски, Костески, Петковски, Атанасијевиќ, Ристевски, Аларов, Лазаревски, Стојковиќ, Горига, Кузмановски, Митев Д., Митев М., Ѓорѓиев, Серафимов и Велковски.

Натпреварот Македонија – Луксембург ќе се одигра вечерва во спортскиот центар „Борис Трајковски“, со почеток во 19:00 часот. Победнички старт и потврда на традицијата е целта на македонските ракометари пред домашната публика.

Македонската ракометна репрезентација ја чека пресметка против Луксембург во квалификациите за Европското првенство (ЕП) во 2028 година, а капитенот Филип Кузмановски ги кажа своите очекувања од следните предизвици.

Кузмановски кажа дека ракометарите се подготвени за следните натпревари и ќе одат на победа против селекциите на Луксембург, но и на Грција.

„Мислам дека Македонија во изминатиот период покажа континуитет во големите натпреварувања. Сакаме да го продолжиме и мислам дека напредуваме од првенство во првенство. Се создаде нова генерација, сметам дека сме позрели во моментов и посакуваме за уште еден настап на шампионат. Задачите ни се дадени, сè ни е јасно. Не потценуваме никого, ние сме максимално подготвени. Нè очекува интересен натпревар, треба да ја почитуваме нашата тактика и со добра атмосфера да го пречекаме мечот со Грција“, кажа Кузмановски.

Капитенот вели дека добро ја проучиле и Грција, па желбата е да остварат триумф против јужниот сосед.

„Имаме доволно материјал од екипата на Грција, тие покажаа добра игра против Холандија. Ќе биде тежок натпревар, но ние сме подготвени и сакаме да победиме. Ние секогаш одиме на победа и тоа треба да го оствариме на терен“, додаде Кузмановски.

Натпреварот меѓу Македонија и Луксембург се игра утре од 19 часот во СЦ „Јане Сандански“, по што на 8 ноември следи тешкото гостување во Грција.

Голманот на германската репрезентација, Андреас Волф, би можел да ја напушти екипата на Кил и да продолжи во друг германски клуб, а според медиумите, Гумерсбах во моментов е најсериозен кандидат за неговиот потпис.

Иако има договор со Кил до 2028 година, продолжувањето на соработката не оди според очекувањата на клубот.

Раководството сака да го задржи еден од најважните играчи во тимот, но Волф наводно размислува за нов предизвик.

Волф би можел да го промени клубот уште следното лето, но во таков случај Гумерсбах ќе мора да постигне договор со Кил и да плати обесштетување за предвременото заминување на голманот.

Носени од својата публика и „Комитите“ и во одлична атмосфера во СЦ Јане Сандански, ракометарите на Вардар го добија големото дерби против Пелистер со 31-23, и со тоа останаа перфектни на чело на табелата во ракометната Суперлига, нанесувајќи му го првиот пораз на битолскиот состав оваа сезона во домашното првенство. Дополнителен декор додадоа и „Чкембарите“ кои пристигнаа во финишот на првиот дел, па атмосферата беше дополнително „запалена“ во скопската  сала.

Љевар со седум голови беше најефикасен кај победничкиот тим. Педро после него следуваше со шест. Кај Пелистер, најефикасен беше Кузмановски кој уфрли девет погодоци, но ја немаше поддршката од своите соиграчи. После него Пешевски со четири беше најефикасен.

Нов квалификациски циклус за ракометната репрезентација на Македонија, но иста е целта, а тоа е пласман на големо натпреварување. Македонија в среда во Скопје ќе игра против Луксембург во првиот меч од мисијата за пласман на Светско првенство 2028 година. По тој дуел, следува и гостување во Грција, а секако планот е две победи.

Селекторот Кирил Лазаров знае дека Македонија ја има фаворитската улога против Луксембург и целиот фокус сега е насочен на тој дуел.

„Имаме нов предизвик, квалификации за ЕП 2028. Имаме доста искуство со ваков тип на квалификации. Првиот ривал е Луксембург. Нема да бегаме од фаворитската улога, но секако дека ќе барам претпазливост од нашите играчи. Тие го сменија селекторот и немаме видео материјал да видиме како функционираат“, рече Лазаров, кој потенцираше дека со доаѓањето на натурализираниот Димитро Горига, националниот тим добил дополнителен квалитет.

„Дмитро доби македонско државјанство. Се работи за квалитетен играч, кој изминативе години покажа во дресот на Вардар дека имаше главна улога во освојување на шампионската улога. Сега е член на ПИК Сеген тим кој е во Топ 10 во Европа. Се надевам дека брзо ќе се вклопи во екипата, дека момците ќе го прифатат“, реферираше Лазаров.

На првиот собир секако ги немаше репрезентативците кои настапуваат во Еурофарм Пелистер и Вардар, кои вечерва играат дерби од лигашкиот дел. Лазаров потенцираше дека посакува по завршувањето на дербито сите репрезентативци да останат здрави и да може да бидат максимално подготвени за репрезентативните обврски кои ќе следуваат.

Македонската ракометна репрезентација повторно е на собир, а пред избраниците на Кирил Лазаров е нов предизвик на патот кон континенталниот собир во 2028 година. Подготовките за претстојните квалификациски натпревари официјално започнаа денеска во Скопје, каде репрезентативците се собраа во хотелот „Александар Палас“ Посебен момент на првиот собир беше пречекот од маскотата Шарко, која ги поздрави ракометарите и внесе дополнителна атмосфера во репрезентативниот камп.

На располагање на селекторот Кирил Лазаров на првиот ден му се ставија 12 ракометари, додека преостанатите репрезентативци се очекува да пристигнат во текот на вечерта. Дополнително, националниот тим ќе биде засилен и со играчите на Вардар и Еурофарм Пелистер, кои ќе се приклучат по завршувањето на меѓусебното дерби во „Јане Сандански“.

Првиот предизвик за Македонија во квалификацискиот циклус ќе биде селекцијата на Луксембург. Натпреварот е закажан за 4 ноември во спортскиот центар „Борис Трајковски“ во Скопје, со почеток во 19:00 часот.

По премиерата пред домашната публика, македонските ракометари ќе заминат на гостување во Грција, каде ќе го одиграат вториот натпревар од квалификациската група.