Со две победи од два натпревари Лино Червар ја започна својата авантура во Битола. Еурофарм Пелистер со убедливи 45-33 (24-15) го победи Ловќен во натпревар од второто коло во Регионалната ракометна лига.

Битолчани тргнаа фуриозно уште од самиот почеток на натпреварот, момците на Червар сериозно си ја сфатија задачата па на полувремето имаа предност од 24-15. И во второто полувреме паднаа многу голови, а вистински предводник на тимот беше Филип Кузмановски кој постигна дури 14 голови. Конечниот резултат гласеше 45-33.

Но, не беше само Кузмановски супер-ефикасен, двоцифрен беше и Ник Хенигман кој даде десет голови. Одушеви потегот на црногорскиот првак, кој излезе со маички со името на Боро Чурлевски, кој дел од кариерата помина токму во овој клуб. Следниот меч на пелистерци во регионалната лига е против Дубочица на 31 август.

Еурофарм Пелистер неочекувано ја прекина соработката со ракометарот, Омер Мехмедовиќ, кој практично без да одигра официјален меч си заминува од Битола.

Тој ги помина летните подготовки со „зелено-белите“ но, не доби шанса да се појави пред домашната публика.

Интернационалецот од БИХ во мај беше најавен како големо засилување но, од засега непознати причини, си замина од клубот.

Македонија освојува уште еден медал на Медитеранските Игри во Таранто. Денеска во финалната програма на натпреварите во борење слободен стил во женска конкуренција, бронзен медал за Македонија обезбеди Вероника Консевиќ.

Таа во малото финале во категоријата до 57 килограми славеше над Милица Петровиќ од Србија со 7:5 и успеа да го освои бронзениот медал.

Интересно е што и покрај тоа што неодамна на свет го донесе своето прво дете, Вероника собра храброст и со голем апожртвуваност успеа да дојде до голем медал.

Ракометарот на Охрид, Дарко Ѓукиќ, може да замине во составот на Партизан кој ќе биде дел од Лигата на шампионите во новата сезона.

Според одредени шпекулации, српското десно крило е пред трансфер во редовите на „црно-белите“.

Низ кулоарите се шпекулира дека челниците на Партизан ќе направат напор да го ангажираат Ѓукиќ кој би бил одлично засилување за наредните предизвици пред се во меѓународната конкуренција.

Новата сезона за битолски Еурофарм Пелистер започна перфектно. Лино Червар ја оствари првата победа на клупата на пелистерци, откако славеше на дебито во Регионалната ракометна лига. Во салатата „Боро Чурлески“ вечерва падна Партизан, откако пелистерци триумфираа со 35-31 (20-13).

Очекувањата за тактичко надмудрување меѓу двајцата трофејни тренери, Червар и Раул Гонзалез, беа оправдани уште од првата минута. Битолчани влегоа мотивирано и го диктираа темпото уште од самиот старт на мечот. Со фуриозна игра, веќе на полувреме имаа позитива од седум голови, откако беше 20-13. Во вториот дел домашните ракомегари целосно го контролираа мечот, и на крајот запишаа триумф од четири голови разлика.

Кузмановски со петнаесет гола беше најефикасен на мечот, додека кaј Партизан Вагнер постигна десет голови. В среда во Битола гостува Ловќен од Цетиње во вториот натпревар од групата во регионалната лига.

Домаќинот Охрид го освои трофејот на Меморијалниот турнир „Крсте Андоновски“. Во финалето, Охрид го победи Вардар со 29-27 (12-10).

Првиот дел од финалето мина во израмнета игра, се играше гол за гол, а ниту еден тим се до финишот на првото полувреме немаше предност поголема од еден гол.

Охриѓани подобро влегоа во вториот дел, во 40-та минута стекнаа предност од четири гола (17:13), која до крајот не ја испуштија.

Охрид до победата го предводеше Унгарецот Доминик мате со шест гола.

Ова беше второ финале, во изминатите десет дена во кое се сретнаа овие ривали. Претходно Охрид го победи Вардар и во финалето на турнирот во Струга.

На почетокот на септември, Вардар и Охрид ќе се сретнат во финалето на Супер купот на Македонија.

Претходно, Загреб го освои третото место, откако по изведување пенали го совлада Тримо Требње. Регуларниот дел заврши 24:24, а Загреб славеше со 5:3 по изведувањето пенали. Петтото место и припадна на Војводина со победата над Нексе од 33:30, додека Египет У20 заврши седми по триумфот над Олимпијакос со 36:33.

Македонскиот ракометен репрезентативец, Милан Лазаревски е подготовен да се врати на терените.

Поради повреда на рамото, вардаровиот пикер беше надвор од терените.

Лазаревски успешно ја заврши рехабилитацијата, на голема среќа не станува збор за нешто посериозно.

Тој поради истиот проблем претходно една година беше надвор од терените.

Алкалоид продолжува со подготовките за новата сезона во која покрај домашните обврски ќе настапи на две меѓународни сцени, ЕХФ Европскиот Куп каде испиша историја како прв македонски тим кој го освоил овој трофеј, и во Регионалната лига.

Тренерот Кирил Лазаров и неговите избраници го одиграа вториот пријателски натпревар, за противник го имаат тимот на Египет, кого го совладаа со 33-31.

Оваа репрезентација во Скопје се подготвува за Медитеранските Игри. Двата тима ќе одиграат уште еден контролен меч, и тој ќе биде од затворен карактер.

Алкалоид претходно славеше против Прилеп.

Својот прв официјален натпревар ќе го одигра на 26. август во салата во Автокоманда, а противник ќе биде составот на Партизан, предводен од поранешниот македонски селектор, Раул Гонзалез.

Ракометарите на Охрид со 31-30 го победија Вардар и го одбранија трофејот на традиционалниот ракометен турнир во Струга.

Натпреварот беше изедначен, во првото полувреме и двете екипи се менуваа во водство. Во вториот дел Охриѓани беа тие кои водеа, а Вардар се трудеше да го сврти резултатот.

Охрид неколкупати водеше и со три гола разлика, но на крајот мечот влезе во драматичен финиш. Вардар имаше три секунди за израмнување, за малку не успеа да ги искористи, Охрид беше тимот кој победи со 31-30.

Најефикасен за Охрид беше Филип Талески со девет голови, кај Вардар најдобар беше Мохаб Абделха со осум погодоци.

Ракометните федерации на Македонија, Србија и Словенија официјално поднесоа заедничка кандидатура за организација на машкото EHF EURO 2034. Трите земји со богата ракометна традиција ги здружија силите со јасна амбиција заеднички да бидат домаќини на еден од најголемите настани во европскиот ракомет.

„За мене претставува посебна чест и задоволство што Ракометната федерација на Македонија прави уште еден значаен чекор напред и што, заедно со ракометните федерации на Србија и Словенија, учествува во заедничката кандидатура за организација на машкото EHF EURO 2034. Верувам дека сите три федерации, со своето богато искуство, капацитети и ракометна традиција, ги имаат сите предуслови да одговорат на барањата и стандардите на Европската ракометна федерација и успешно да организираат Европско првенство на највисоко ниво. Македонија е ракометна земја. Ракометот со децении е длабоко вкоренет во нашата спортска традиција и историја, создавајќи генерации успешни ракометари и ракометарки. Со својата популарност, како и со резултатите остварени на европско и светско ниво, слободно можам да кажам дека ракометот е спорт број еден во Македонија и дека тоа останува така. За нас оваа кандидатура е можност за уште еден голем исчекор и потврда дека Македонија има капацитет да биде дел од организацијата на најголемите европски ракометни настани. Се надеваме дека нашата заедничка кандидатура ќе ја добие довербата и дека во 2034 година, заедно со Србија и Словенија, ќе бидеме успешни домаќини на EHF EURO“, изјави претседателот на Ракометната федерација на Македонија, Александар Стефанов.

Сите три федерации ја истакнуваат својата целосна подготвеност во процесот на кандидатурата и евентуалната организација на првенството во целост да ги почитуваат правилата и насоките на Европската ракометна федерација (EHF), како и да ги исполнат сите неопходни организациски, инфраструктурни и други услови за одржување на натпреварувањето на највисоко ниво.