Најдобрата македонска ракометна судиска двојка, Ѓорѓи Начевски и Славе Николов добија двегодишна суспензија од страна ЕХФ и плус парична казна поради наводна манипулација со фитнес тестовите пред стартот на ЕП. Покрај ова и двајцата ќе мора да платат и парична казна. Нивната суспензија се однесува на сите натпреварувања што се под капата на ЕХФ.

„Ракометниот суд на ЕХФ донесе одлука во случајот отворен против македонскиот судиски пар Ѓорѓи Начевски и Славе Николов. Пред машкото ЕХФ ЕВРО 2026, ЕХФ ја повлече номинацијата на двајцата судии од Македонија поради наводна манипулација со прикачените видео снимки од таканаречениот „Тест за кондиција во повеќе фази“. Врз основа на анализата на партнерот за интегритет на Европската ракометна федерација, Спортрадар, Ракометниот суд на ЕХФ дојде до заклучок дека спорните видеа биле манипулирани и затоа ги изрече следните санкции. Двајцата судии се суспендирани од извршување на каква било функција во рамките на ЕХФ и учество во какви било активности на ЕХФ во период од две години од датумот на првостепената одлука поради сериозно неспортско однесување. Секој судија мора да плати казна од 5000 евра за фундаментални прекршувања на Кодексот на однесување на ЕХФ. Жалба може да се поднесе до Апелациониот суд на ЕХФ во рок од седум дена“, се вели во известувањето на ЕХФ.

Ракометарите на Еурофарм Пелистер издвојуваа победа над Алкалоид од 33-35 во дерби средбата од петтото коло на плеј-офот, која вечерва се одигра во Автокоманда.

Овој натпревар понуди многу голови, пресврти и на крајот славје на актуелниот шампион. Избраниците на Кирил Лазаров беа подобар ривал во првото полувреме и на пауза заминаа со предност од 22-16. На стартот на вториот дел поведоа и со +8, но од тука тргна неверојатниот кам-бек на „зелено-белите“.

Еурофарм Пелистер играше искусно, постепно го намалуваше минусот за да потоа и дојде до водство кое успеа да го сочува и да дојде до 44 бода на табелата.

Дејан Манасков беше лидер кај гостинот кај стрелците со седум гола, а Дамјан Митев на другата страна имаше седум реализации.

Во следното шесто коло од плеј-офот Еурофарм Пелистер ќе се сретне со Бутел Скопје.

Легендарната поранешна македонска репрезентативка и ракометна икона, Индира Кастратовиќ е назначена за шеф на делегацијата на Македонија за претстојното Светско училишно првенство во ракомет кое ќе се одржи во Скопје од 21 до 29 април. Македонија за првпат е домаќин на едно вакво големо натпреварување, кое е во организација на Федерацијата на училишен спорт на Македонија, а под покровителство на Министерството за спорт.

Кастратовиќ која беше дел од славната генерација на Кометал Ѓорче Петров, а денеска е координатор на женските национални селекции вели дека е голема чест и задоволство што ќе биде шеф на делегацијата на Македонија.

„Ми претставува голема чест и задоволство, но во исто време и пријатна обврска, да бидам шеф на делегацијата на наша земја на ваков голем спортски настан како што е Светско училишно првенство во ракомет, настан на кој учество ќе земаат околу 700 млади ракометарки и ракометарки на средношколска возраст“, вели Индира Кастратовиќ.

Љубовта кон спортот започнува токму во училишните клупи. Иконата на македонскиот ракомет и спорт токму во Основното училиште ја започнала нејзината ракометна приказна.

„Уште на рана школска возраст почнав да се занимавам со спорт во моето основно училиште “Милош Шиљеговиќ” во Приједор каде сум родена. Мојот прв избор беше атлетика, со учество на крос-натпреварувања каде што го претставував моето училиште на локални и регионални натпревари. Потоа следеше „излет“ во тенискиот спорт на препораката на мојот професор по физичка култура. Во седмо одделение почнав да тренирам и играм ракомет во моето основно училиште. Ракометот од тие училишни денови прво стана моја љубов, а подоцна и моја професија“.

Светското училишно првенство во ракомет треба да биде поттик и инспирација за младите ракометари и ракометарки.

Интернационалната ракометна федерација (ИХФ) воведува ново натпреварување, Трофејот на нациите, ново сениорско натпреварување што ќе биде значаен чекор во континуираната посветеност на развојот на спортот на секое ниво и во секој агол од светот, објави ИХФ.
– Ова натпреварување е една од клучните иницијативи вклучени во четиригодишниот план на ИХФ од 2025 до 2029 година, нагласувајќи ја стратешката визија на Федерацијата да обезбеди структурирани меѓународни патеки за натпреварување за сите федерации-членки во секоја возрасна категорија – пишува Интернационалната ракометна федерација.

По многу години успешна имплементација на Трофејот низ целиот свет, прво во јуниорската, а подоцна и во младинската категорија, програмата одигра одлучувачка улога во помагањето на националните федерации да ги изградат темелите на своите национални тимови и да развијат тренери и судии.

Откако внимателно го оцени напредокот и ги проучи најефикасните методи за понатамошно поттикнување на проектот, ИХФ сега го направи природниот следен чекор, проширување во сениорската категорија, пишува ИХФ.

„Ова проширување е водено од три основни цели: затворање на постојниот круг на Трофејот каде што младинските и јуниорските натпревари се веќе добро воспоставени, обезбедување значајно меѓународно натпреварување за сите федерации-членки што не се натпреваруваат редовно на светската сцена и зајакнување на континенталните првенства со зголемување на бројот на екипи учесници.

Трофејот на нациите има цел и да го крене нивото на тренирањето и судењето на глобално ниво, а и да ѝ даде можност на секоја национална федерација да биде домаќин на меѓународен настан на ИХФ и да ги развие своите организациски капацитети. Трофејот на нациите е дел од поширока долгорочна стратегија за обезбедување одржлив развој на ракометот од основно до елитно ниво. Клучен спортски услов е националните федерации што се пласирале на две од претходните три светски првенства повеќе да немаат право да учествуваат на Трофејот на нациите, со што се осигурува дека натпреварувањето останува фокусирано на земјите во развој.

Ако федерацијата што претходно не била подобна не успее да се пласира за две последователни светски првенства, таа ќе стане подобна повторно да влезе во програмата.

Косуке Јасухира е нов ракометар на ГРК Охрид. Јапонецот доаѓа на позајмица до крајот на оваа сезона да и помогне на екипата во остварување на што подобри резултати во историската сезона на клубот.

„Пресреќен сум што се враќам во Македонија, во тимот има добри мои пријатели од Вардар, едвај чекам да заиграм за Охрид утре против Тиквеш, па потоа да можам да им помогнам на моите соиграчи за поуспешна сезона. Среќен сум за ваквиот пречек од нашите навивачи, тоа ми дава уште поголема мотивација“, изјави Косуке за веб-страницата на охриѓани.

Јасухира е јапонски репрезентативец и доаѓа од екипата на Бурган од Кувајт.

Пред две сезони тој имаше извонредни настапи за екипата на РК Вардар 1961. Игра на позицијата среден бек и има 25 години.

Средниот бек на српскиот ракометен клуб Партизан, Миха Котар, од следната натпреварувачка сезона 2026/27 ќе ги брани боите на Е.Пелистер.

Во последните неколку натпревари, Словенецот беше најдобриот играч на белградските „црно-бели“.

Особено блесна во финалето на Купот на Србија во Бањица против Динамо Панчево (34:27). Иако имаше договор до јуни 2027 година, Словенецот доби дозвола од Партизан за промена на средината.

Се очекува да го замени сонародникот Домен Тајник кој по три години во „зелено-белиот“ дрес се враќа во Словенија во Слован Љубљана, сигурен учесник во Лигата на шампионите следната сезона.

Вардар 1961 од следната сезона ќе биде засилен со нов десен бек – Мохамед Абделхак.

23-годишниот Египјанец доаѓа од Кил, а претходно настапуваше и за Ним. Сезонава одигра 26 натпревари и постигна 32 гола.

Абделхак освен за Кил има играно и за Ал Ахли и за француски Ним.

Ракометарите на Охрид обезбедија пласман во полуфиналето на ЕХФ Европскиот куп откако во четвртфиналната фаза со две победи го елиминираа грчкиот Олимпијакос.

Следен предизвик за македонскиот претставник ќе биде словенечкиот тим Целје кој пак беше подобар во двомечот со Бузау од Романија.

ГРК Охрид објави дека првиот натпревар против Целје ќе го игра на 25 април во Словенија, а реваншот е закажан за 2 мај во салата „Билјанини извори“.

Во втората полуфинална пресметка од клупското натпреварување ќе играат Татабања од Унгарија на Филип Талески и Извиѓач од Босна и Херцеговина.

До првиот меч против Целје, играчите на тренерот Борис Ројевиќ ќе одиграат два меча во домашниот шампионат, на 8 април на гости против актуелниот првак Еурофарм Пелистер, а на 14 април ќе го пречекаат Тиквеш.

Ракометарите на Охрид со денешната победа против Олимпијакос со 25:24 го потврдија пласманот меѓу најдобрите четири екипи во Европскиот Куп на ЕХФ.

Во одлична атмосфера во СЦ Билјанини Извори, домаќините ја одбранија предноста од пет голови од првиот меч во Грција и ги израдуваа фановите со историски пласман во полуфиналето на едно европско натпреварување.

Во нашиот тим се издвои Анте Иванковиќ со осум голови пред Томи Јагуриновски со четири. Кај Олимпијакос, Савас постигна пет гола. Во полуфиналето на ЕХФ Купот, нареден противник на Охрид ќе биде словенечкиот состав Целје.

Ракометарите на Охрид сериозно се подготвуваат за реванш четвртфиналето од Европскиот куп. Утре во „Билјанини Изори“ гостува екипата на Олимпијакос, а охриѓани ќе бранат предност од 5 гола остварена на првиот меч. Тренерот Ројевиќ, во очекување на утрешниот дуел вели:

„Сигурно дека ништо не е готово. Гледам дека јавноста е позитивно расположена по првиот меч, но оваа предност во модерниот ракомет не мора да значи ништо. Кога се игра со брзо темпо и влогот е голем, овие пет гола можат лесно да бидат надополнети. Олимпијакос минатата сезона ја победи Турда со пет гола на гости, па загуби со четири гола на домашен терен. Имаме многу повреди, дури четворица ќе мораат да играат под лекови или со инјекција. Не тренираме толку силно како минатата недела, очигледен е заморот, но и проблемот со повредите. Не играме само за Охрид, туку и за цела Македонија, затоа што ја претставуваме државата. Имаме добар резултат, но мораме да работиме напорно за да се пласираме во полуфиналето. Немаме преголем ростер, но ќе се обидеме да пружиме силен отпор, со кој ќе ја оствариме нашата цел“, изјави Ројевиќ.