Светската Ракометна Федерација ИХФ објави соопштение во врска со синоќешниот дуел меѓу Македонија и Холандија, изрекувајќи санкции поради инцидентите што се случија на трибините на овој натпревар.

Ракометната Федерација на Македонија е казнета парично со 10.000 швајцарски франци за овој инцидент на навивачите од нашата земја, со напомена дека следни вакви случки ќе значат и забрана за присуство на навивачи во арената во Вараждин.

Парична казна е изречена и до Хрватската Федерација за слабата организација на натпреварот. Покрај паричната санкција за организаторите, ИХФ донесе и одлука за забрана на дел од трибините, и тоа делот што се наоѓа веднаш зад клупите на двете селекции.

Покрај тоа, светската куќа на ракометот сугерира овој дел од трибините да остане затворен за сите натпревари до крајот од ова СП што ќе се играат во салата во Вараждин.

ИХФ преку соопштението се заканува и со целосно затворање на оваа арена доколку биде повторен инцидент сличен на оној на синоќешниот дуел меѓу Македонија и Холандија.

Македонскиот ракометен репрезентативец Иван Џонов говореше за африканскиот противник кој е енигма за нас и против кого играме првпат.

„За натпреварот со Гвинеја мора да бидеме максимално подготвени, затоа што се посебен вид на репрезентација, немаме играно со таква селекција. Играат поинаков ракомет, треба да не ги потцениме и да бидеме максимално борбени како во претходните две средби за да дојдеме до посакуваната победа. Гвинејците може да бидат непредвидливи во некои потези и ситуации на теренот. Мора да внимаваме и да бидеме сконцентрирани. Атмосферата во која играме не мотивира, се надевам дека сите ќе продолжат да не поддржуваат во истиот стил“, изјави Џонов.

Светската ракометна федерација (ИХФ) ја казни Ракометната федерација на Македонија, но и Ракоментниот сојуз на Хрватска за случувањата по завршувањето на натпреварот Македонија-Холандија, во Вараждин.

Натпреварот заврши со победа на Холандија 37-32. Македонските навивачи, незадовлни од судењето на данската двојка Хансен-Мадсен, во финишот на натпреварот фрлаа предмети на теренот, а откако натпреварот заврши продолжија поради што Холанѓаните веднаш се повлекоа во соблекувалната.

ИХФ соопшти дека Ракометната федерација на Македонија е казнета со 10.000 швајцарски франци за инцидентот кој го иницираа македонските навивачи. Со 10 швајцарски франци е казнет и Ракометниот сојуз на Хрватска како организатор на натпреварот.

Во соопштението ИХФ потенцира дека дека секој сличен инцидент ќе значи бркање на македонските навивачи од натпреварите, а Хрватска како домаќин ќе остане без организација на натпревари во Вараждин.

ИХФ му налоѓи на организаторот , да го затвори просторот за гледачи зад тимските клупи.

Селекторот на Македонија, Кирил Лазаров внимателен пред меќот со Гвинеја иако Македонија на оваа средба е голем фаворит. Лазаров вели дека двата исцрпувачки натпревари кои ги одигравме ,не смеат да ни направат проблем за мечот со Гвинеја.

„Натпреварот со Гвинеја ни е од круцијално значење. Мораме да се мобилизираме и да го добиеме натпреварот. Нема да калкулираме воопшто, победата ни е потребна за пласман во втор круг. Можеби сме фаворити на хартија, но со оглед дека имавме два тешки и исцрпувачки дуели, очекувам тежок натпревар”, рече селекторот Лазаров.

Натпреварот меѓу Македонија и Гвинеја се игра в недала од 18 часот во Вараждин.

Генералниот секретар на Ракометната федерација на Македонија, Филип Милошевски, најави дека РФМ ќе поднесе жалба до ИХФ за делењето на правдата на средбата со Холандија.

„За 12 години во ракомет не сум видел натпревар со повеќе пенали, повеќе украдени топки, повеќе искалкулирани фаули. Во превод… дробење. Досега ретко сме се жалеле, може двапати до сега, ама ова беше под секое спортско достоинство. РФМ ќе поднесе жалба, но без оглед на резултатот, Македонија победи, напиша Милошевски на Фејсбук./

Селекторот на македонската ракометна репрезентација, Кирил Лазаров по крајот на натпреварот против Холандија и првиот пораз (37:32) на Светското првенство беше незадоволен од текот на натпреварот и се она што се случуваше на теренот. Тој нагласи дека е тешко да се одигра натпревар во кој речиси 20 минути имаш играч помалку, а од друга страна противникот има дванаесет пенали во своја корист.

„Уште вчера кажав дека нè очекува тешка борба и знае да не понесе еуфорија. Знаев што нè очекува, иако се надевав на позитивен резултат. Требаше да ја искористиме таа позитивна атмосфера и самодовербата што ја имаа играчите. Но, не секогаш, пресметките се исти дома и на пазар што се вели. Секој натпревар е различен. Натпреварот излезе тотално надвор од контрола. Личеше на сè, само не на еден меч од Мундијал, на официјален меч на Светско првенство. Колку и да не сакам да зборувам и да се правдам поради нешто, но ривалот имаше дванаесет пенали.

Колку и да е подобар противникот, тешко е како тренер да се води тимот со дванаесет пенали против вас. Ние имавме скоро дваесет минути со играч помалку. Тешко е да се браниш со оглед на нивната игра, седум на шест, а особено со играч помалку. Ако не дадеш гол, веднаш ти даваат, тоа е скоро па сигурно, а дури и кога си комплетен имаш проблем. Им реков на момците дека мора да се бориме, повеќе пати го кажав тоа. Брзите контри на Холандија и играта со брз центар се неодбранливи, на чело со организаторот Стеинс. Се обидовме и бевме близу. Направивме грешки во првиот дел кој им дозволи да направат разлика. Пробавме со фластер на Стеинс, пробавме и да се вратиме и назад со плитка зона, едноставно се обидовме со сè.

Црвениот картон на Петар беше многу важен момент , тој е неискусен играч, има само 21 година и во таа ситуација мораше да го остави противникот. Џонов добро го замени, одигра доста интелигентно. Сепак, со толку исклучувања и пенали тешко можевме да дојдеме до позитивен резултат. Сега ни останува да се подготвиме за Гвинеја и да го добиеме тој натпревар“, рече селекторот Лазаров.

Средбата со Гвинеја се игра в недела во 20:30 часот, а нашите ракометари се во добра позиција и сопобеда ќе се пласираат во втора фаза и ќе пренесат бод од првата рунда.

Најдобрата македонска машка ракометна репрезентација го претрпе првиот пораз на Светското првенство откако загуби со 37-32 од Холандија. Клучен податок можат да бидат и 14 грешки на нашата селекција во овој меч.

Во завршницата од средбата Холанѓаните речиси рутински го одбранија стекнатото водство, а имаа „помош“ и од данските судии кои ги казнија сите наши грешки. Борбената наша игра доведе до втор црвен картон, овојпат за Лазаревски. Со головите на Серафимов и Кузмановски во два наврати се враќавме на „минус два“, но ривалот ги казнуваше сите наши грешки. Не успеавме да ја анулираме негативата и претрпевме прв пораз на овој светски шампионат.

Кај стрелците Кузмановски имаше девет голови, а Серафимов шест. На спротивната страна Смитс реализираше седум погодоци.

Жарко Пешевски очекува уште еден добар меч на Светското првенство во Данска, Норвешка и Хрватска. Втор противник на Македонија во групната фаза ќе и биде селекцијата на Холандија. Мечот ќе се реализира утре во арената во Вараждин.

„Максимално се фокусираме на Холандија, заборавме што се случуваше против Унгарија, немавме среќа да победиме, но ремито е одличен резултат. Мислам дека максимално сме мотивирани.

Излегуваме максимално мотивирани и се надеваме дека ќе стигнеме до добар резултат. Тие се побрзи од Унгарците, имаат одлични индивидуалци, ќе биде сосема различен меч, но, подготвени сме и мислам дека имаме шанси“, изјави нашиот ракометар.

Селекторот на македонската ракометна репрезентација Кирил Лазаров целосно се фокусира на утрешниот предизвик против Холандија во рамки на второто коло на Светското првенство. Турнирот го почнавме добро со реми против фаворитот Унгарија иако имавме големи шанси и да го освоиме цел плен и да почнеме со победа во рамки на групата Д.

„Мислам дека треба да бидеме навистина задоволни и нема за што да жалиме. Треба да го заборавиме натпреварот со Унгарија и со една позитивна мисла да одиме напред. Треба да бидеме свесни дека и покрај добриот резултат, можеше да биде и подобро, но да не бараме ‘леб преку погача’. Треба да бидеме задоволни и да се фокусираме на она што ни претстои, веќе утрешниот натпревар со Холандија и следните натпревари“, изјави Лазаров.

„Лалињата“ се селекција која можеби го игра најбрзиот ракомет во светот и според тоа Лазаров смета дека се понезгоден противник за Македонија од Унгарија. Но добрата атмосфера и самодовербата кај играчите треба да се надополни со нов добар натпревар во Вараждин.

„Мислам дека Унгарија е поцврста репрезентација, но мислам дека Холандија е репрезентација што помалку ни одговара според стилот на игра. Тоа е репрезентација што игра брз ракомет, има ритам во текот на сите 60 минути, не дека Унгарија го нема, напротив исто така го има, но дека со тоа што правеа повеќе измени ни даваа повеќе опции. Затоа јас сум максимално фокусиран, гледајќи да не ги оптоварувам премногу момците, затоа што се во една добра атмосфера, можам да кажам дека имаат и добра самодоверба, подржани од нашите навивачи, кои се надевам дека утре ќе бидат во уште поголем број. Треба да го искористиме тоа утре“, додаде македонскиот селектор.

Македонија и Холандија утре својот натпревар од 2.коло во групата Д на Светското првенство го играат со почеток од 18:00 часот.

Португалскиот ракометар Мигел Мартинс, член на данскиот клуб Алборг, доцна во вторникот беше суспендиран од Светското првенство во ракомет, откако беше позитивен на допинг тест.

Алборг во средата наутро бил информиран дека Мартинс нема да учествува на завршниот турнир на Светското првенство за Португалија, бидејќи бил позитивен на допинг тест за време на активностите на португалската репрезентација пред последната фаза од натпреварувањето.

-Се разбира, ова е голем шок за нас и веднаш стапивме во контакт со Мигел, кој е исто толку збунет како нас и инсистира дека не направил ништо незаконско, изјави директорот на Алборг, Јан Ларсен во соопштението за медиумите.

Тој веднаш побарал таканаречен „Б“ тест за да се разјасни ситуацијата, но сигурно е дека нема да учествува на завршниот турнир на Светското првенство, додава Ларсен.

-Не можеме и нема да преземеме понатамошни чекори додека не ги добиеме резултатите од „Б“ тестот, а во моментов не знаеме кога ќе биде тоа. Откако ќе ги добиеме резултатите, ќе одлучиме за понатамошна акција, заклучува Ларсен.

Мартинс е португалски репрезентативец од 2016 година и има одиграно повеќе од 100 натпревари за националниот тим. Пред да дојде во Алборг настапуваше за унгарскиот клуб Пик Сегед.