Европската ракометна федерација (ЕХФ) потврди дека почнувајќи од следната сезона, форматот на ракометната Лига на шампиони и Европската лига ќе биде променет. Бројот на екипи во Лигата на шампиони ќе се зголеми од сегашните 16 на 24, и тие ќе играат според сосема нов систем на натпреварување, сличен на оној што го гледаме на репрезентативните настани.

Почнувајќи од следната сезона, најелитното клупско натпреварување во Европа ќе го играат 24 екипи, поделени во шест групи од по четири екипи. Откако ќе играат во „кружен систем“ (со секој ривал дома и на гости), двете првопласирани екипи од секоја група се префрлаат во две групи од по шест екипи.

Екипите што ќе завршат на позициите три и четири ќе го продолжат своето европско патување во елиминацискиот дел од Европската лига.

Дванаесетте екипи што на тој начин ќе се најдат во главниот дел од ждрепката повторно ќе играат по „кружен систем“, по што четирите најдобри екипи од секоја од тие две групи ќе се квалификуваат за четвртфиналето (првопласираниот ќе игра со четвртопласираниот, второпласираниот со третопласираниот).

Шестопласираните тимови ќе ја завршат својата европска приказна тука, додека петтопласираните тимови ќе се пласираат директно во осминафиналето во Европската лига.

Победниците од четвртфиналните натпревари на Лигата на шампионите ќе се квалификуваат за турнирот „Фајнл Фор“ во Келн, каде што, како и досега, ќе се одлучува за новиот шампион.

Од следната сезона, 32 тима ќе влезат во Европската лига, распоредени во осум групи од по четири тима (веќе нема да има прелиминарни рунди и квалификации). Во групите, тимовите ќе играат по „кружен систем“, по што првите две од секоја група ќе се пласираат во елиминацискиот дел од натпреварувањето.

На 16-те тима во нокаут фазата ќе им се приклучат и 12 екипи од Лигата на шампионите.

Овие 28 тима ќе бидат поделени во 14 парови, по што на победниците ќе им се придружат уште две тима од Лигата на шампионите. Зборуваме за петтопласираните екипи од главниот дел од ждрепката на тоа натпреварување, што ќе ни даде 16 екипи во осминафиналето на Европската лига.

Победниците од тие натпревари ќе се пласираат во четвртфиналето, победниците во оваа фаза ќе изборат место на „Фајнал Фор“ турнирот.

Македонскиот вицешампион Вардар вечерва оствари голема победа откако во 2.коло од ЕХФ Лига Европа го совлада францускиот Тулуз на гости со 28-26 (18-11). Ова за „црвено-црните“ е втора победа во групата Ф. Вардар одлично го почна натпреварот, а водство имаше во текот на целиот натпревар. Единствено резултатот беше нерешен 1-1, а Вардар направи серија од 5-0 за водство до 6-1. На почетокот на вториот дел Вардар поведе и со +9 (20-11 и 21-12), но потоа Тулуз имаше серија од 10-2 и стигна до негатива од еден гол. Сепак избраниците на Иван Чупиќ, најдоа сили и го задржаа водството до крајот на дуелот.

Најефикасен кај Вардар беше Јака Малус со 6 голови, додека на дуелот најпрецизен беше Немања Илиќ од Тулуз со 7 голови.

На вториот дуел од група Сесвете – Кристијанстад 32:32. Вардар е лидер на табелата со 4 бодови, Кристијанстад има 3, Сесвете 1, Тулуз 0.

Во следното коло Вардар на 11 ноември гостува кај Кристијанстад.

Денеска во седиштето на ЕХФ беше извршена ждрепката за третото коло во Европскиот Куп во машка конкуренција.

Екипата на Охрид ќе се соочи со Слога Добој во битката за пласман во осминафиналето. Во претходната рунда тимот од БИХ го елиминира составот на Тенакс Добеле од Летонија. Првиот натпревар ќе се игра на 15/16 ноември во Охрид додека реваншот е на 22/23 ноември во Добој.

Ќе потсетиме дека Тиквеш и Бутел претходно беа елиминирани од Европскиот Куп.

Селекторот на нашата машка ракометна репрезентација, Кире Лазаров, го објави списокот за ЕХФ неделата и двата контролни меча со слекцијата на Јапонија.

Најголема новост на списокот на Лазаров е враќањето на Дејан Манасков кој сезонава игра во одлична форма дресот на Пелистер. На списокот на Лазаров има 20 ракометари плус уште седум како резерва.

Нашите ракометари двата контролни меча со Јапонците ќе ги одиграат во салата во Автокоманда и тоа на 30.10. (четврток) и на 1 ноември (сабота).

Македонскиот претставник во Европскиот ракометен куп, Тиквеш е елиминиран во второто коло. Кавадарчани денес го загуби реваншот со турски Бешикташ на домашен терен со 21-23.

На првиот натпревар Бешикташ победи со убедливи 3-:20.

Вториот македонски претставник во третото по квалитет ракометно континателно натпреварување, екипата на Охрид избори пласман во третата рунда по двете убедливи победи над Баки со 44:11 и 38:21.

Ракометарите на Еурофарм Пелистер извојуваа победа над Еурофарм Пелистер 2 со 27-34 во натпреварот од осмото коло на македонската Суперлига. Братскиот дуел беше рамноправен 45 минути, но потоа првакот додаде „гас“ и стигна до шеста победа сезонава во домашниот шампионат. Актуелниот шампион на Македонија настапи без Никола Митревски, Домен Тајник, Жарко Пешевски и Усама Хосни, но и со комбиниран состав успеа да се избори за триумф. Зарков исто така имаше некомплетен ростер, бидејќи не настапија десниот бек Одифред Баптист и десното крило Ненад Белистојановски.

Еурофарм Пелистер 2 парираше во првото полувреме, иако фаворитот констатно имаше предност која најмногу одеше до три гола разлика (10-13). На пауза сепак се замина со нерешен резултат (18-18).

На срединат на вториот дел, Хекберт донесе плус четири (23-27), а во продолжение актуелниот првак покажа зошто е фаворит. До крајот избраниците на Гарабаја без поголема драма ја запишаа победата.

Најефикасен во тимот на Гарабаја беше Рудолф Хакбарт со седум голови, додека меѓу момците на Зарков ист учинок имаше Бојан Гичев. Одличен настап запишаа младите голмани Јован Мацанковски (10 одбрани) и Иван Младенов (11 одбрани). Во следното коло шампионот ќе го пречека Радовиш на домашен терен, а Еурофарм Пелистер 2 ќе има тешко гостување кај екипата на Алкалоид. Во меѓувреме првакот на Македонија в четврток во Лигата на шампионите гостува кај европскиот првак Магдебург.

Во следното деветто коло Еурофарм Пелистер ќе го пречека Радовиш, а Еурофарм Пелистер 2 гостува кај Алкалоид Ракомет.

Само дваесет часа по дуелот со Барселона во Лигата на шампионите против Барселона, првакот Еурофарм Пелистер одигра дуел од Суперлигата со Тиквеш и го совлада среде Кавадарци со 25-30 (12-15).

Пелистерци отворија подобро, погодуваа Тајник, Атанасијевиќ, Кузмановски и Валид за 1-4. Успеа домаќинот да се консолидира, па пријде до 3-5, ама бргу на семафорот се врати предноста од четири гола откако реализираа Валид и Видомски (3-7). Погоди Мартин Манасков за 5-7, а потоа гостите врзаа серија од 0-5 и се одлепија на седум разлика. Сепак, до полувремето домашните ја преполовија негативата и на одмор се замина со 12-15.

Успеа Тиквеш во второто полувреме да дојде и израмнување (18-18), но шампионот тука одново „додаде гас“ и до крајот повторно беше подобриот тим за петти триумф од стартот на сезоната

Во победничкиот табор со по пет гола се истакнаа браќата Петар и Павле Атанасијевиќ, Домен Тајник и Рудолф Хекбарт.

Во следното осмо коло, в сабота од 13:00 часот Еурофарм Пелистер го игра градското дерби со Еурофарм Пелистер 2.

Женската ракометна репрезентација на Македонија со пораз ги почна квалификациите за Европското првенство. Вечерва во Гумерзбах, нашите девојки беа поразени од Германија со 34-18 (14-8).

Иако одигравме солидно во првиот дел, во второто полувреме Германките, особено во финишот, ја зголемија разликата која на крајот не чинеше повеќе од убедлив пораз. Апсолутниот фаворит во групата уште на стартот на квалификациите потврдува дека е најголем фаворит за директен пласман на ЕП.

Емилијана Ризоска беше најдобра во нашата репрезентација со 8 гола, додека Ива Младеновска постигна четири.

Македонскиот ракометар Томислав Јагуриновски официјално потпиша договор со ГРК Охрид, враќајќи се во домашното првенство по кратка авантура во Германија.

Тој пристигна од клубот Десау, каде што настапуваше минатата сезона, но поради повреда на грбот реши да се врати во Македонија.

„Чест ми е што ќе го носам дресот на ГРК Охрид. Ова е град со голема ракометна традиција и вистински македонски бисер. Се надевам дека заедно ќе постигнеме големи работи,“ изјави Јагуриновски по потпишувањето на договорот.

Со овој трансфер, Охрид добива големо засилување на бековската позиција. Јагуриновски во минатото настапуваше за Металург, Вардар, Еурофарм Пелистер и Работник, а беше и дел од македонската репрезентација.

Тренерот Борис Ројевиќ очекува новото засилување да внесе искуство и стабилност во тимот кој оваа сезона има амбиции да се бори за пласман во горниот дел од табелата.

Ракометарите на Еурофарм Пелистер се претставија добро во дуелот со европскиот великан Барселона во ракометната Лига на шампиони, но не успеаја да обезбедат позитивен резултат на домашен терен (30-34).

Двата шпански тренери го анализираа натпреварот и се осгласија дека подобриот тим победи. Исто така беа одушевени од атмосферата и амбиентот во салата.

Рубен Гарабаја
(тренер на Еурофарм Пелистер)
Игравме против можеби најдобриот тим во светот. Да ја победиш Барселона мора да си перфектен, ние имавме добар меч, но не и перфектен. Правевме некои лесни грешки, не најдовме решение да ги сопреме во одредени ситуации. Вториот дел беше многу подобар, видов борба. Имавме мала шанса на крајот на мечот, но не можевме да победиме. Мислам дека напредуваме секој ден и сме подобри, мора да го ставиме фокусот дури и на најмалиот детал во играта. Мора да го држиме фокусот, да бидеме паметни во најситните моменти. Знам дека некогаш не е лесно да се прави тоа, но мора да работиме на таквите работи за да дојдеме до нови победи.

Карлос Ортега
(тренер на Барселона)
Беше задоволство да се игра на ваков терен пред овие навивачи, ми доаѓа пак да бидам играч во овие услови. Домашната публика навистина притиска и сите екипи сигурен сум дека ќе имаат тука проблеми. Против нас го имавме и мојот поранешен играч Филип Кузмановски, сега Кузмановски е веќе зрел играч, лидер на екипата, игра извонредно со пивот и токму тој е она што му треба на Еурофарм Пелистер. Ми беше драго што повторно го видов.

По пет одиграни гола Еурофарм Пелистер е седми во групата Б со една победа и четири порази.