Македонската традиционална карате федерација (МТКФ) денеска во Скопје го одржа традиционалниот „Избор за најдобри каратисти“ на кој беа прогласени најуспешните каратисти во 2025 година во сите возрасни категории, од деца до сениори.

За најдобра каратистка беше прогласена Антонија Белазелкоска, додека признанието во машка конкуренција му беше врачено на Дејан Недев.

Во јуниорска конкуренција, признанието за најдобар каратист го освои Матеј Магаровски, а во кадетска конкуренција Камелија Недев и Ненад Јекиќ.

Во категорија деца, за најдобри беа прогласени, Филип Недев (11 – 12 години), Максим Поп Трпев (9 – 10 години), како и Тадеј Недев и Мартина Зафировска (7 – 8 години)

Признанието за најуспешен тренер му беше врачено на Аљоша Недев, додека најуспешен судија во изминатата календарска година беше Јадранка Недева.

„Со посебно признание за придонес во развојот на карате спортот беа одликувани министерот за спорт Борко Ристоски, и ректорот на Универзитетот Скопје, Аце Миленковски, кој повеќе од 20 години несебично и континуирано ја поддржува работата на МТКФ и развојот на традиционалното карате во Република Македонија“, соопштија организаторите.

Tимот на Мерцедес ги објави првите фотографии од својот болид за новата сезона во Формула 1, кој ќе има одредени освеежувања, но тука се секако и препознатливите сребрено-црни бои.

„Сребрените стрели“, кои минатата година водеа жестока битка за второто место помеѓу конструкторите и оваа сезона ќе настапат со непроменет возачки состав со Џорџ Расел и Кими Антонели.

Новиот болид „W17“, како и неговите конкуренти, е помал, потесен и полесен во однос на претходникот, бидејќи е дизајниран и изработен според новите аеродинамички правила.

Мерцедес следната недела ќе им се приклучи на останатите екипи во Шпанија на петдневниот „Barcelona Shakedown“.

Осумкратниот светски шампион потоа на 2 февруари, ќе организира и официјален настан за отворање на сезоната, на кој пред новинарите ќе излезат возачите и раководниот кадар, но ќе биде прикажан и самиот болид.

Екипата по тој настан патува за Бахреин, каде што се закажани официјалните предсезонски тестирања.

Планирани се два тридневни теста на кои тимовите ќе имаат можност дополнително да ги усовршат своите болиди пред стартот на сезоната.

Трката на Светскиот куп во спуст во Кран-Монтана во петокот, една недела пред почетокот на Зимските олимписки игри во Кортина и Милано, беше откажана по неколку падови, вклучувајќи го и оној на американската ѕвезда Линдзи Вон, објавија организаторите.

„Жирито и организаторите одлучија да ја прекинат трката“, соопштија организаторите на Светскиот куп во алпско скијање.

Одлуката ја донесоа откако три од шестте натпреварувачки, кои стартуваа, завршија во заштитната ограда.

Вон ја изгуби рамнотежата на почетокот од патеката и заврши во заштитната мрежа. Една од фаворитките за медал на претстојните Олимписки игри успеа да се врати на скиите, но болката во левата нога беше сепак посилна. Покрај Вин, трката не ја завршија Австријката Нина Ортлиб и Норвежанката Марте Монсен.

Ортлиб успеа да се откаже, додека Норвежанката Монсен имаше помалку среќа. Држејќи се за коленото откако беше ослободена од мрежата, Монсен беше врзана за носила и однесена со крваво лице.

Швајцарката Корин Сутер, Американката Жаклин Вајлс и Французинката Роман Мирадоли стигнаа до целта.

Во организација на Министерството за спорт беше одржана традиционалната манифестација изборот на “Спортисти на годината“ за 2025.

71-издание на изборот „Спортисти на годината 2025“ ни ги донесе најдобрите за изминатата година, а за спортист на годината беше прогласен боксерот Ален Рустемовски кој го освои 2.место на ЕП до 23 години.

За најдобра спортистка беше прогласена Катерина Попева, која беше светска првенка во боди билдинг. За најдобар тренер/селектор беше прогласен Могамед Ибрагимов во борење.

Одбојкарската репрезентација на Македонија е најдобриот национален тим во машка конкуренција, додека ракометната го доби ова признание во женска конкуренција.

Добитници по категории:

Спортист на годината: Ален Рустемовски (бокс)
Спортистка на годината: Катерина Попева (боди билдинг и фитнес)
Најуспешен млад спортист: Адријан Рустемовски (бокс)
Најуспешна млада спортистка: Даниела Алексовска (бразилска џиу џица)
Најуспешен женски национален тим: Ракометна репрезентација на Македонија -сениорки
Најуспешен машки национален тим: Одбојкарска репрезентација на Македонија- сениори
Најуспешен тренер/селектор: Могамед Ибрагимов (борење)
Најуспешна национална спортска федерација: Џудо федерација на Македонија
Најуспешен спортист со инвалидитет: Андреј Стојановски (пливање)
Најуспешна спортска екипа од Универзитетите: Машки тим во мал фудбал на Универзитетот „Св.Кирил и Методиј“ – Скопје
Најуспешен училишен спортски клуб од средните училишта: СУГС „Никола Карев“ – Скопје
Најуспешен училишен спортски клуб од основните училишта: ООУ „Никола Карев“ – Кочани
На годинашното издание на изборот „Спортист на годината 2025“ беше доделена и
плакета за постигнати резултати на талентиран млад спортист. Добитник на ова
признание е младиот пливач Петар Цеков.

Претседателот и извршен директор на Формула 1, Стефано Доменикали, ќе учествува на отворањето на Олимпијадата Милано-Кортина 2026 како официјален носител на факелот.

Страста, извонредноста и спортот се обединуваат, стои на профилот на социјалните мрежи на Олимписките и Параолимписките Зимски игри.

Штафетата на Олимпискиот факел во 2026 година започна на 26 ноември 2025 година во Олимпија, Грција. Етапата во Милано е закажана за 5/6 февруари. Последната станица ќе биде стадионот „Сан Сиро“.

Зимските олимписки игри ќе се одржат од 6 до 22 февруари во два италијански града, Милано и Кортина д’Ампецо.

Швајцарските ски-скокови влегуваат во нова фаза без едно од најголемите имиња во својата историја.

Легендарниот Симон Аман нема да биде дел од националниот тим на претстојните Зимски олимписки игри, со што симболично ќе се затвори едно од најзначајните поглавја во спортот.

Аман зад себе има импресивна олимписка кариера, обележана со настапи на 7 последователни Игри и историско двојно злато во Ванкувер 2010.

Сепак, тековната сезона на Светското првенство не ги донесе резултатите на кои е навикнат, а пласманот надвор од врвот и отсуството од подиумот од јануари 2018 година беа одлучувачки во одлуката на тренерот.

Наместо на искусниот ветеран, Швајцарија ќе им даде шанса на помладите сили, а едно од имињата што ќе добијат шанса на најголемата сцена е Феликс Трунц, кој е дел од новата генерација ски-скокачи.

Српскиот тенисер Новак Ѓоковиќ се пласираше во полуфиналето на Австралија опен во 2026 година.

Во четвртфиналето на Грен слем турнирот, Србинот утрово се соочи со Италијанецот Лоренцо Мусети, кој го предаде мечот во третиот сет поради повреда на бутниот мускул.

До повредата Мусети водеше со 2-0 (6-4 и 6-3) во сетови, и имаше негатива 1-3 во третиот сет.

Меѓу вториот и третиот сет медицински тајмаут побара и Ѓоковиќ кој имаше проблеми со плускавци на десното на стапалото

Ѓоковиќ го одигра својот 1.400. натпревар во кариерата и ја забележа 1.168-та победа за 13 полуфинале на АО.

Противник на Србинот во полуфиналето ќе биде победникот од мечот Јаник Синер (Италија) – Бен Шелтон (САД).

Во првото полуфинале ќе се соочат Карлос Алкараз (Шпанија) и Александар Зверев (Германија).

Балканските шампионати за одбојкари и одбојкарки до 20 години од годинешниот календар на Балканската одбојкарска асоцијација (БВА) ќе претставуваат и Зонски квалификации за ЦЕВ Европското првенство У20 кое ќе се одржи во 2027 година. Оваа одлука беше донесена на Генералното собрание на Асоцијацијата кое се одржа денеска во хотелот „Хилс“ во Сараево, БиХ, со присуство на претставници на десет од 11 членки на БВА.

Македонија ќе учествува во Зонските квалификации и во машка и во женска конкуренција, а тоа го потврдија претседателот Петар Јовановски и генералниот секретар Филип Деспотовски, кои како претставници на Одбојкарската федерација на Македонија беа делегати на Собранието.

Во женска конкуренција, домаќин на Балканијадата У20, која ќе се игра во периодот од 19 до 23 август ќе биде Босна и Херцеговина, а покрај организаторот и Македонија ќе учествуваат и Албанија, Бугарија, Црна Гора, Романија, Србија и Турција.

Кај мажите, организатор на Балканијадата до 20 години ќе биде Бугарија, а ќе учествуваат Македонија, Албанија, БиХ, Црна Гора, Романија, Србија и Турција. Ова натпреварување ќе се одржи од 25 до 29 август.

Во однос на другите БВА шампионати на Собранието беа дефинирани организаторите и термините за одигрување на истите, додека листата на учесници треба да биде комплетирана до 1 април.

Претседателот на ОФМ, Петар Јовановски оваа година ја превзема функцијата на потпретседател на БВА, додека Гркот Георгиос Карампецос е нов претседател на Асоцијацијата и ќе ја води оваа година.

Поранешниот тимски шеф на Ред Бул, Кристијан Хорнер, е еден од инвеститорите кои сакаат да купат удел во Алпин, потврди францускиот тим.

Хорнер беше отпуштен од Ред Бул минатото лето, по изненадувачкиот пад на формата на тимот, и речиси две годишните конфликти во тимот. Алпин објави соопштение во кое се наведува дека група инвеститори предводени од Хорнер е меѓу заинтересираните страни со кои се разговара за потенцијални инвестиции.

Исто така, се наведува дека не е тајна дека малцинскиот сопственик „Отро Капитал“, кој купи 24 проценти од акциите во Алпин за 200 милиони евра во 2023 година, веќе водел прелиминарни преговори во врска со продажбата на својот удел.

Во времето кога „Отро Капитал“ купи удел во Алпин, тимот беше проценет на околу 700 милиони фунти.

Оттогаш, светските шампиони Мекларен се проценети на 3,5 милијарди фунти, а Мерцедес на 4,6 милијарди фунти, по некои промени во сопственичките структури.

Хорнер, кој го предводеше Ред Бул до осум титули кај возачите и шест титули кај конструкторите за 20 години на чело, не се огласи откако беше отпуштен. Сепак, тој им стави до знаење на одредени инсајдери во Формула 1 дека ако се врати во шампионатот, сака целосна контрола врз тимот, или како тимски шеф или како еден од сопствениците.

Доколку купи дел од Алпин, тоа нема да ги исполни тие услови, освен ако Рено не се откаже од поголемиот дел.

На отказот што го доби во јули му претходеа две турбулентни години во кои колешка го отпушти поради сексуално вознемирување, а сè се совпадна со пад на формата. Хорнер ги негираше обвинувањата, а по две внатрешни истраги, тие се покажаа како неосновани.

По неговото заминување, Ред Бул успеа да се стабилизира, а Макс Ферстапен се врати во трката за титулата, која на крајот му ја одзеде Ландо Норис за два бода.