Новиот селектор на женската репрезентација на Македонија, Милош Гавриловиќ го објави поширокиот список за претстојната акција, настап во Европската лига.

На списокот се 26 одбојкарки, од кои дури девет дебитираа.

Сестрите Сара и Даниела Горбок, Кариа Трифуновска, Јована Каленикова, Матеа Сотировска, Стефанија Кипријановска и Андреа Митиќ, како и Софија Тенчева и Сара Димитриоска.

Од поискусните репрезентативки отсуствуваат Тамара Стојанова, Антонија Баталаковска, како и Ана Павлоска кои од приватни причини или поради работни обврски не можеа да се стават на располагање на селекторот Гавриловиќ за оваа акција, но на нив ќе се смета и на следните собири.

Првата прозивка е на 13 мај во хотелот „Континентал“ во Скопје, а комплетните подготовки одбојкарките ќе ги одработи во СЦ „Форца“ во Скопје. Во пресрет на првиот турнир ќе одигра пријателски двомеч со селекцијата на Косово, на 29 и 30 мај.

Девојките настапот во Европската лига 2026 го започнуваат во Порто, каде се игра првиот турнир. На 6 јуни за противник ја имаат Унгарија, додека на 7 јуни играат со Португалија.

Од таму продолжуваат за Шпанија, во Аликанте, каде домаќинот ги пречекува на 12 јуни, а ден подоцна се соочуваат со Азербејџан.

Македонија настапот во годинешното издание го завршува на домашен терен кога во СЦ „Борис Трајковски“ во Скопје на 19 јуни ќе ги измери силите со Хрватска, додека на 21 јуни против Словенија ќе го комплетира учеството.

Атлетскиот клуб Олимп од Битола ја продолжува серијата силни настапи, потврдувајќи ја формата со нови победи и подиум-пласмани на натпреварите што викендов се одржаа во Скопје и Штип. На меѓународниот атлетски митинг „Отворање на сезона 2026“ во Скопје, атлетичарите на Олимп остварија забележителни резултати во повеќе дисциплини.

Во женска конкуренција, Ирма Хајдари забележа двојна победа, триумфирајќи на 1500 метри со време од 4:55 и на 800 метри со 2:23. Кај мажите, Бојан Чаприќ исто така освои две први места – на 1500 метри (4:15) и на 800 метри (1:59).

Дарија Крстевска постави два лични рекорди, освојувајќи второ место на 1500 метри (5:07) и трето место на 800 метри (2:28). Макс Пауер го освои четвртото место на 800 метри, додека Матеја Матевска заврши на седмото место во дисциплината скок во далечина.

Континуитетот на резултатите продолжи веќе следниот ден на трката „Superior Runs“ во Штип, каде атлетичарите на АК Олимп повторно се искачија на подиумот. Адријана Поп Арсова Рашиќ беше апсолутна победничка на трката на 5 километри со време од 18:39. Во машка конкуренција на истата дистанца, Димитар Илиев го освои второто место (15:35), додека Димитар Петровски беше трет (16:35). На 10 километри, Григорјан Никовски го освои третото место со време од 33:24.

Дополнително, тимот на АК Олимп, во состав: Илиев, Петровски, Андовски и Епов го освои првото место во тимска конкуренција на 5 километри.

Овие резултати претставуваат продолжение на серијата успешни настапи на клубот во изминатиот период и јасен показател за стабилната форма и квалитетната подготовка на атлетичарите, реализирана под водство на тренерот Димитар Петковски.

Од клубот најавуваат дека со ист интензитет ќе продолжат и во следните натпревари, со фокус на одржување на формата и освојување нови резултати на домашната и меѓународната сцена.

Атлетичарката од Етиопија Тигст Асефа и Кениецот Себастијан Саве, на маратонот во Лондон поставија нови светски рекорди.

Атлетичарот од Кенија, Себастијан Саве, делницата од 42 километри и 195 метри ја мина за еден час, 59 минути и 30 секунди.

Саве стана првиот атлетичар во историјата што истрчал маратон за помалку од два часа.

Тој го собори претходниот светски рекорд – 2:00:35, кој го постави Кениецот Келвин Киптум во октомври 2023 година на маратонот во Чикаго.

Второто место на маратонот во Лондон го освои атлетичарот од Етиопија Јомиф Кеџелча, кој исто така го заврши маратонот за помалку од два часа. Тој постигна резултат од еден час, 59 минути и 41 секунда.

Третата позиција му припадна на Џејкоб Киплим од Уганда, кој беше исто така побрз од претходниот светски рекорд. Тој забележа време од 2:00:28.

Македонскиот атлетичар Дарио Ивановски оствари уште еден огромен успех во својата кариера, откако победи на полумаратонот кој денес се одржа во хрватскиот туристички бисер, Дубровник.

Ивановски истрча најдобро време од еден час, шест минути и триесет секунди, уште еднаш потврдувајќи ја својата извонредна форма.

Прв пат во историјата Полска ќе организира Европско првенство во атлетика, а регионот Шлезија е избран за домаќин на првенството во 2028 година, објави синоќа Европската атлетика. Одлуката е донесена на првиот ден од состанокот на Европскиот атлетски совет во Бирмингем, градот домаќин на овогодишното првенство кое ќе се одржи во август.

Европското првенство во 2028 година ќе се одржи во Хорзов, еден месец пред почетокот на Летните Олимписките игри во Лос Анџелес.
„Ова ќе биде четврти пат Европското првенство во атлетика да се одржи во истата година како и Олимписките игри. И не е претерување да се каже дека Шлезија 2028 ќе ни даде увид во иднината“, рече претседателот на Европската атлетика, Добромир Карамаринов.

Полска е шестата најуспешна нација во историјата на ЕП во атлетика, кое прв пат се одржа во 1934 година. Полските атлетичари досега имаат освоено 59 златни медали и вкупно 185 одличја.

Селекторот на нашата одбојкарска репрезентација, Јошко Миленкоски го објави за стартот на подготовките на Европската Лига. Македонија во септември ја чека и настап на ЕП 2026.

На списокот и најдоа и дебитантите Јован Милев, Митко Спасов и Филип Јованов на кои ова им е и прв повик за А-репрезентацијата.

Инаку стартот на подготовките е закажан за 6.мај и тоа во Крушево, една недела порано од предвиденото и тоа на барање на селекторот Миленкоски.

Во периодот од 27 до 29 мај, избраниците на Миленкоски ќе одиграат и две контролни средби со Црна Гора во Подгорица.

Првиот турнир од Европската лига Македонија ќе го организира на домашен терен во Струмица, каде што на 5 јуни ќе се соочи со Холандија, а два дена подоцна и со Луксембург.

Вториот турнир ќе се игра во Атина, каде што следуваат дуели со Исланд (13 јуни) и со домаќинот Грција (14 јуни).

Третиот турнир ќе се одржи во Косово и на 19 јуни Македонија ќе игра против домашната селекција, а веќе следниот ден ја очекува пресметка со Израел.

Марк Маркез, на домашен терен во Херез, победи во спринт трката. Самата трка беше вистински спектакл, за што придонесе дождот, а Маркез победи и покрај тоа што го загуби водството од својот брат Алкес, а веднаш потоа и падна. Актуелниот првак, успеа да се врати на својот мотор, успеа да дојде до боксот, седна на мотоциклот со гуми за дожд и на крајот ја забележа втората спринт победа оваа сезона.

Дукати, во Херез, успеа да одговори на предизвикот што го наметна Априлија. Покрај Маркез на подиумот се најдоа и Франческо Бањаја, односно Франко Морбидели од ВР46 Дукати тимот.

Априлија, доживеа дабакл, бидејќи главните возачи, лидерите во генералниот пласман, Марко Бецеки и Хорхе Мартин, не ја завршија трката. Бецеки, имаше лош страт, од четвртата падна на 15-та позиција, а кога започнаа влегувањата во боксот, поради дождот, го смени мотоциклот и падна веднаш по враќањето на патеката.

Мартин, имше добар старт, од седмото дојде на четвртото место, но на влезот во третиот круг, кога го мина Алекс Мартин, откажаа неговите сопирачки, поради што се повлече од трката.

Одбојкарите на Штип УГД и третпат го победија ГОК Борец (3:0) и го обезбедија шампионскиот пехар во Првата одбојкарска лига на Македонија.

Штипјани со ова ги обединија двете круни во мак-одбојката оваа сезона, бидејќи претходно го освоија и трофејот на завршниот турнир во Купот каде исто така беа подобри од велешани.

Денес Штип испиша историја, за првпат една екипа од овој град освои шампионски пехар во едно првенство на Македонија.

Трипати Штип УГД беше подобар против Борец во финалната серија, а истата ја заврши без загубен сет. Вечерва во Штип, домашната екипа беше подобра со 25:18, 25:18 и 25:16 по сетови. Со оваа победа Штип УГД ја потврди доминацијатa оваа сезона во одбојката.

Граѓаните на Северна Рајна-Вестфалија што гласаа на референдум во неделата, со огромно мнозинство ја поддржаа кандидатурата на областа Рур за домаќин на Олимписките и на Параолимписките игри.

Според националното олимписко и спортско здружение ДОСБ, кандидатурата била поддржана од 66 проценти од гласачите што излегле на гласање, а потребното мнозинство било постигнато во 16 од 17. општини.

Доколку биде успешна кандидатурата, Германија би можела да биде домаќин на Игрите помеѓу 2036 и 2044 година.

Хертен, единствената општина без мнозинска поддршка, беше потенцијална локација за натпреварите во планински велосипедизам. Затоа општината беше исклучена од проектот.

За кандидатурата на Келн-Рајна-Рур, како и на три други од Германија, ќе биде одлучено од ДОСБ, во септември. Во трка се и: Минхен, каде што граѓаните ја поддржаа кандидатурата наесен; Хамбург, каде што ќе гласаат граѓаните на крајот од мај и Берлин, кој се откажа од референдумот, но останува во трка.

Летните олимписки игри во 2028 година ќе се одржат во Лос Анџелес, а оние во 2032 година – во Бризбејн.

Доминацијата на тенисот во овогодинешниот избор за наградата „Лауреус“.

Арина Сабаленка и Карлос Алкараз ги добија најпрестижните награди во светот на спортот и со тоа ја продолжија доминацијата што, со кратки паузи, трае од времето на Џенифер Каприати, Серена Вилијамс, Жастин Енан, Наоми Осака, Роџер Федерер, Новак Ѓоковиќ и Рафаел Надал.

Сите тие го добија „Лауреус“, некои пет пати, ако зборуваме за Новак и Роџер, Серена четири пати, а сега е редот на лидерите на новата генерација тенисери.

Во 2025 година, Шпанецот освои два Гренд слем турнири, Ролан Гарос и Отвореното првенство на САД и ја заврши сезоната како „Број 1“, а својата доминација ја продолжи и на отворањето на 2026 година со триумф на Отвореното првенство на Австралија.

Сабаленка беше убедливо најуспешна на ВТА турнејата минатата година со две Гренд слем титули, Вимблдон и Отвореното првенство на САД, со едно финале во Париз.

„Добивањето на ова признание од луѓе кои толку длабоко го разбираат спортот го прави уште позначаен“, рече Алкараз по прифаќањето на наградата.

„Ова е ноќ што никогаш нема да ја заборавам, момент што засекогаш ќе го носам во срцето.“

„Сe тресам од возбуда“, рече Белорусинката.

„Некако е неверојатно да знам дека моето име ќе биде покрај тие легенди, спортисти на кои се восхитував и им се восхитував.“

Церемонијата во „Палата Сибелес“ во главниот град на Шпанија ја водеа спортските легенди и олимписки шампиони Ајлин Гу и Новак Ѓоковиќ.