Дијагнозата е јасна: Познато колку е сериозна повредата на Килијан Мбапе

Реал Мадрид и официјално ги прекина шпекулациите околу здравствената состојба на својата прва ѕвезда. По деталните прегледи во Париз, потврдено е дека Килијан Мбапе се соочува со истегнување на левото колено. Дијагнозата ја поставија врвни француски специјалисти, под будното око на медицинскиот тим на „Кралскиот клуб“, со цел да се добие прецизна слика за сериозноста на повредата во овој клучен дел од сезоната.

И покрај првичниот страв од подолга пауза, последните вести носат доза оптимизам за навивачите на Бернабеу. Клупското соопштение ја потврди „соодветноста на конзервативниот третман“, што значи дека напаѓачот нема да мора да оди под нож. Наместо операција, рехабилитацијата ќе се фокусира на интензивна физикална терапија. Оваа одлука е клучна не само за Реал, туку и за француската репрезентација, со оглед на претстојното Светско првенство.

Иако операцијата е избегната, отсуството на Мбапе е огромен хендикеп за Реал. Французинот е во неверојатна форма со 39 постигнати голови сезонава, а неговото неиграње веќе се почувствува на последните натпревари во Ла Лига и Лигата на шампионите. Додека медицинскиот тим порачува дека неговото враќање ќе зависи од „еволуцијата на заздравувањето“, под голем знак прашалник останува неговиот настап во двобојот против Манчестер Сити на 11-ти март.