Дембеле се согласил да премине во ПСЖ

Усман Дембеле има устен договор со челниците на Пари Сен Жермен за засилување на клубот на лето, тврди „Фут Меркато“. Како што е познато, договорот на Французинот со Каталонците истекува на лето и тој во оваа фаза не го продолжил. Затоа интересот за него е огромен, но се чини дека Парижаните се чекор понапред од своите конкуренти.

Веќе подолго време се зборува за очекуваната разделба на Барселона и Дембеле. Каталонците дури се обидоа да го продадат во зима, но не успеаја. На крајот клубот се помири со фактот дека крилниот напаѓач ќе ја заврши сезоната на „Камп Ноу“ и ќе си замине како слободен играч. Неодамна, сепак, играчот почна да добива повеќе можности за настап и направи неколку силни натпревари, по што се шпекулираше дека може да се премисли и сепак да остане. Сепак, се чини дека ова нема да се случи.

Ситуацијата околу Дембеле ја следат многу клубови, меѓу кои Манчестер Јунајтед, Челзи, Тотенхем, Јувентус и Баерн (Минхен). Сепак, се чини дека Пари Сен Жермен е пред конкуренцијата и веќе постигнал устен договор со фудбалерот. На „Паркот на принцовите“ велат дека крилото доаѓа на местото на Килијан Мбапе, кој на лето ќе замине како слободен играч, најверојатно во насока на Реал Мадрид.

Оваа сезона Дембеле има 19 натпревари за Барса, на кои постигна 2 гола и 7 асистенции.